Génesis 26
26
Te Isaac bajt' ta Gerar
1Tal wi'nal tey a ta lumq'uinal ta bay nainem te Isaac, jich nix bit'il tal wi'nal c'alal cuxul to a te Abrahame. Jich yu'un te Isaac bajt' ta lum Gerar te banti ay Abimelec te ajwalil yu'un te filisteoetique. 2Te Cajwaltic la yac' sba ta ilel ta stojol Isaac, jich la yalbey:
—Ma me xcoat bael ta Egipto, nainan te banti ya calbate. 3Tey me xnainat a te bay q'uinal ayate, ya me joinat, soc ya me cac'bat bendición. Yu'un ya me cac'bat aq'uinalin spisil soc ats'umbal te q'uinale, soc ya me cac' c'otuc ta pasel te bila la calbey te atat Abrahame. 4Ya me cac' esmajuc ats'umbal, jich yipal ya xc'otic te bit'il eq'uetic ta ch'ulchan. Soc ya me cac'bey sq'uinalin spisil in q'uinal to te ats'umbale. Ta swenta ats'umbal ya me x'ac'bot bendición ta spisil ta jchajp mach'atic ayic ta balumilal.#Gn 22.16-18. 5Te melel la xch'uunbon jc'op te Abraham, soc la xch'uunbon jmandal, soc la xch'uun spasel spisil te bila la calbey —xi' sc'oplal yu'un te Cajwaltique.
6Ja' yu'un te Isaac nain ta lum Gerar. 7Te winiquetic ayic tey a la sjojc'obeyic bi yutoj te ants sjoineje, ja' te yiname. La sjac' te Isaac:
—Quijts'in-ach'ix#Gn 12.13; 20.2. —xi'. Yu'un la xi' te ya yalbey yaiy te bit'il yinam, melel la yal ta yo'tan teme ya xmilot yu'un te winiquetic ta scaj te Rebeca te melel buen t'ujbil ants.
8Jalajemix bayal c'aal tey a te Isaaque. Jun buelta te Abimelec te ajwalil yu'un te filisteoetic, la yil ta ventana, yac ta smeyel Rebeca te Isaaque. 9Jich yu'un te Abimelec la sticun ta iq'uel te Isaac, jich la yalbey:
—¿Bistuc, “Quijts'in-ach'ix”, xaat yu'un te ants ajoineje? Awinam ya quil —la yut.
La sjac' te Isaac:
—Yu'un la cal ta co'tan: “Repente ya smilonic yu'un”, xoon —xi'.
10La yal te Abimelec:
—¿Bi yu'un te jich la apasbotique? Ja' wocol te ayuc mach'a way soc te awiname, jich la jta jmultic awu'un te jichuque —xi'.
11Jich yu'un te Abimelec la yalbey tulan mandal spisil te lume:
—Ma me ayuc mach'a ya yuts'in te winic soc te yiname. Teme ay mach'a jich ya spase, ya me x'ac'ot ta lajel ta ora —xi'.
12Te Isaac la sts'un yawal-sts'unub tey a. Lec a sitin c'ax ja'wil, yu'un bayal ac'bot bendición yu'un te Cajwaltique. 13Jich esmaj sc'ulejal te Isaac, yanyan ta tsobajel sc'ulejal, buen c'ulej c'ot. 14Bayal me xchij, bayal swacax, bayal swinictac, asta bic'tal-o'tantayot yu'un te filisteoetique. 15Te c'alal cuxul to a te Abraham, ja' te stat Isaac, te abatetic yu'un la sjoq'uic pozoetic; ja'uc me to, te filisteoetic patil la sbut'beyic ta lum, jich la smacbeyic. 16Te Abimelec la yalbey te Isaac:
—Loc'an bael li'to, melel c'ax jich ac'ulejal te bit'ilotic —la yut.
17Jich loc' tey a te Isaac. La sq'uej sba, q'uejel ba stejc'an snailpac' ta bay te stenlej xatal q'uinal yu'un beja' Gerar, tey nain a. 18La sjam te pozoetic te la spas Abraham, ja' te state, te c'alal cuxul to ae, te la smaquic te filisteoetic c'alal lajemix a te Abrahame. Jich nix sbiilic c'ot te pozoetic yu'un te Isaac te bit'il nix sbiilic yu'un te state. 19Te abatetic yu'un Isaac la spasic yan pozo ta spamlej. Ay sloq'uibja' la staic tey a, spisil ora ma xtup'. 20Jich yu'un te jcanan-chijetic ta spamlej Gerar la yut sbaic soc te jcanan-chijetic yu'un Isaac, jich la yalic:
—Cu'untic te pozo —xiic. Jich yu'un, “Guerra” sbiil c'ot te pozo, yu'un ay guerra. 21Patil la spasic yan pozo. Ja' nix jich ay guerra c'ot yu'un. “Controinel” sbiil c'ot.
22Jich la yijq'uitay jilel te Isaac, c'ubul ba spas yan pozo. Ma'yuquix guerra c'ot yu'un stuquel. Jich yu'un, “Libre ayotic” xi' sbiil c'ot, yu'un la yal te Isaac:
—Dios la scoltayotic te bay te q'uinale, li' me ya x'esmaj te jbiluctique —xi' yu'un.
23Ta patil bajt' ta Beerseba te Isaac. 24C'alal c'ot ta Beerseba, Dios la yac' sba ta ilel ta ajc'ubal ta stojol, jich la yalbey:
—Jo'on Dioson yu'un te atat Abraham.
Ma me xiwat, joinejat spisil ora.
Ta swenta bit'il c'ux ta co'tan te cabat Abraham,
ya me cac'bat bendición,
ya me cac' esmajuc ats'umbal —xi'.
25Jich yu'un te Isaac la spasbey scajtijib ta chiq'uel smajt'an Dios, la xchic'bey jcojt' chij tey a, soc la squejan sba ta stojol Dios. Tey la stejc'an snailpac' a, soc te abatetic yu'un la sjoq'uic jun pozo.
Isaac soc Abimelec la spasic trato
26Te Abimelec#Gn 21.22. loc' tel ta lum Gerar, tal yutsil-c'opon te Isaac. Tal soc te mach'a jun yo'tan sba soc, te Ahuzat sbiile, soc te Ficol te capitán yu'un te soldadoetic. 27Ja'uc me to, te Isaac la yalbey:
—¿Bi yu'un tal ac'opononic? te melel ma c'uxuc la awaiyonic, la atenonic loq'uel ta aq'uinalic —la yut.
28Jich la sjaq'uic:
—Yu'un quilojtic te bit'il ajoinej te Diose. Jich yu'un la caltic: “Conic, jpastic trato soc”, xootic tel, 29yu'un ya jc'an ya jchajbantic trato te bit'il ma ba ya awuts'inotic, yu'un ma'yuc bila amen la jpastic ta atojol. Lec co'tantic awu'un, sbelal la jticunticat loq'uel tel, melel te ja'ate ay bendición ta atojol yu'un Dios —xiic ta stojol.
30Jich yu'un te Isaac la spas muc'ul q'uin, we'-uch'ajic ta lec. 31Sab jajch'ic, la yalic ta stojol Dios te bit'il jc'axel c'ux ya yaiy sbaique. Jich la sc'oponic xan jilel te Isaac, jun yo'tan bajt'ic.
32Nax to nax bajt'ic a te tal te abatetic yu'un te Isaac, jul yalbeyic bit'il c'ot te pozo yacalic ta sjoq'uel:
—La jtatiquix ja' —xiic julel. 33Jich yu'un te Isaac la slebey sbiil te pozo, Seba sbiil c'ot yu'un. Ja' swentail te bit'il Beerseba sbiil c'oem te lum c'alal ora to.
34Cha'winic (40) ya'wilal a te Esaú te la yic' cheb yinam, Judit sbiil te jtule, yantsil-nich'an Beeri, te heteo-winic, soc Basemat sbiil te yane, yantsil-nich'an Elón te heteo-winic nixe. 35Te Isaac soc Rebeca bayal ac'botic mel-o'tan yu'un.
Currently Selected:
Génesis 26: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.
