Génesis 37
37
1Te Jacob nain ta sq'uinal Canaán, te bay nix nain te state. 2Jich ay sc'oplal te snich'nab Jacob.
José soc sbanquiltac
C'alal ay juclajuneb ya'wilal a te José, la sjoin ta jcanan-chij te sbanquiltaque. Te querem José ja' la sjoin te yalatac Bilhá soc te yalatac Zilpa, te ac'bot yinamin te state. Jich te José jul yalbey yaiy te stat te bit'il ma lecuc yat'elic te sbanquiltaque.
3Te Israel c'ax jich c'ux ta yo'tan José te bit'il c'ux ta yo'tan te yantic snich'nabe, yu'un mamalix a te ayin stuquele. Jich yu'un la spasbey buen t'ujbil snajt'il c'u', bayal ta jpol sbonil. 4Ilot yu'un te sbanquiltac te bit'il c'ax c'uxtaybil yu'un stat te bit'il c'uxtaybil stuquelique. Jich yu'un la yil-o'tantayic, ma lecuc yo'tanic ta stojol.
5Jun buelta waichej te José. La xcholbey yaiyic te sbanquiltac te bit'il ay te swaiche. Bayal to xan la yil-o'tantayic yu'un. 6Jich la yalbey yaiyic:
—Aiya awaiyic stojol, ya calbeyex awaiyic bit'il ay te jwaiche: 7Yacotic ta stomel ta chuquel trigo ta jq'uinaltic. Te jtom te la jchuque, jajch', toj la stejc'an sba. Te jayeb ta jtom la achuquic te ja'exe, la sjoytay te cu'un soc la stinan sbaic ta stojol —xi'.
8La yalic te sbanquiltaque:
—¿Yu'un bal sc'oplal ya cajwalinticat ya awal? ¿Yu'un bal sc'oplal ya xmandalajat ta jtojoltic? —la yutic.
Bayal to xan la yil-o'tantayic yu'un ta swenta swaich soc ta swenta te sc'ope.
9Ta yan buelta waichej xan te José. La xcholbey yaiyic te sbanquiltaque:
—Ay yan jwaich, aiya awaiyic stojol, ya calbeyex awaiyic. La quil la stinan sbaic ta jtojol te c'aal, te u, soc te bulucheb eq'uetique —xi'.
10C'alal la xcholbey yaiyic te stat soc te sbanquiltaque, te stat utawan yu'un, jich la yalbey:
—¿Bit'il ay a te awaich ya awalbone? ¿Yu'un bal jo'on ya xtal jtinan jba ta atojol ta ac'op soc ame' soc awijts'in abanquiltac? —la yut.
11Te José lab-o'tantayot yu'un sbanquiltac#Hch 7.9. ta scaj te swaiche. Yan te state bayal bi la snop yu'un.
José chonot yu'un sbanquiltac
12Ta patil te sbanquiltac ba slebey swe'el xchij te static ta Siquem. 13Te Israel la yalbey te José:
—Baemic ta jcanan-chij ta Siquem te abanquiltaque. Ya jticunat bael, baan ilawil —la yut.
—Lec ay —xi' te José.
14Jich yu'un albot bael yu'un te state:
—Baan, ilawil teme lec ay te abanquiltaque, soc teme lec ay te jchijtique. Ya me xtal awalbon caiy te bi yilelique —xi'.
Jich la sticun loq'uel ta Hebrón, bajt' ta Siquem. 15Ay jtul winic la sta sba soc te José te bit'il jowejem ta be. Jojc'obot yu'un te winique:
—¿Bi ya ale? —xi' sc'oplal yu'un.
16La sjac' te José:
—Ja' yacon ta sleel te jbanquiltaque. Yacuc awac'bon quil banti yacalic ta scanantayel xchijic —la yut.
17La sjac' te winique:
—Baemiquix, yu'un la caiy stojol: “Conic ta Dotán”, xiic la caiy —xi'.
Jich te José la yantay bael te sbanquiltaque, c'o sta ta Dotán. 18C'ubul to ay tel a te José, ma to xc'ot a, ilot yu'un te sbanquiltaque. Jajch' xchajbanbeyic sc'oplal ta milel. 19Jich la yalbey sbaic:
—Ilawil, talix te jowil jwaichejele. 20La' me, ya jmiltic, ya jch'ojtic coel ta pozo. Laj ta ti'el ta jti'awal ja'mal chambalam, xootic me ta yalel. Tey me ya xlaj sc'oplal a te swaiche —xiic.
21Ja'uc me to, te Rubén c'opoj yu'un te José te bit'il la yaiy stojol te chajbanbot sc'oplale.
—Ma lecuc teme ya jmiltique. 22Ma me jmulinbeytic smalel xch'ich'el. Ch'ojaic coel ta pozo te ay ta jochol taquin q'uinale, ma me jc'axeluc ya amilic —xi' ta c'op stuquel. Yu'un snopoj ta yo'tan te ya scoltay loq'uel ta sc'abic, te patil ya sticun sujt'el ta stojol te state.
23C'alal c'ot ta bay sbanquiltac te José, la sloq'uesbeyic te sc'u' slapoje, ja' te bayal ta jpol sbonile. 24La stsaquic bael, la xch'ojic coel ta pozo. Ja'uc me to, taquin te pozoe, ma'yuc ya'lel. 25La snajc'an sbaic, ochic ta we'el.
Yacalic ta we'el a, la stoy sitic, la yilic yacalic ta talel ismaeletic jajch'emic tel ta Galaad. Smacojic ta beel scamelloic te xcuchojic te bila bujts'an yic' soc bálsamo soc mirra, te ya xba xchonic ta Egipto. 26Te Judá c'opoj:
—¿Bi ya xloc' cu'untic a teme ya jmiltic te quijts'intic, soc teme ta patil ya jmuc ta co'tantic te bit'il laje? 27Ja' lec ya jchonbeytic bael te ismaeletique. Ma me jmiltic te jo'otique, te melel quijts'intic, jun jme'-jtatic soc —xi'.
Jich c'ot ta yo'tanic spisilic. 28Ay jchonbajeletic madianetic yaquic ta c'axel tey a. Jich yu'un la sliquic loq'uel ta pozo te José, la xchonbeyic bael te ismaeletique, jtab ta jsejp plata stojol c'ot. Jich ic'ot bael ta Egipto te José.#Hch 7.9.
29C'alal tal yil te pozo te Rubén, ma ba la sta tey a te José. Bayal la smel yo'tan, la xch'i' sc'u' yu'un. 30Sujt' bael ta bay te yantique:
—Ma me chicanuc ya quil te quereme. ¿Bi ya cal yu'un te jo'one? —xi'.
31Jich yu'un la stsacbeyic te snajt'il c'u'e, la sts'ajbeyic ta xch'ich'el alal tentsun te la smilique. 32La sticunbeyic bael te snajt'il c'u' te bayal ta jpol sbonil. Jich c'ot ta ac'beyel yil te statique, soc la sticunic bael c'op te jich la yalic julele:
—Ay bi la jtatic tel. Ilawil teme ja' sc'u' anich'ane —xi' julel sc'opic.
33Te Jacob la sna'bey sba te ja' nix sc'u' a te snich'ane.
—Ja' nix sc'u' a te jnich'ane. Yu'un nix laj ta ti'el ta jti'awal ja'mal chambalam a te José —xi'. 34Jich yu'un te Jacob la xch'i' sc'u' yu'un, la slap xch'ixal pac' yu'un mel-o'tan. Bayal c'aal la yoq'uetay te snich'ane. 35Tal ta muc'tesel q'uinal yaiy yu'un te snich'nabe; ja'uc me to, ma ba muc'ub q'uinal la yaiy yu'un. La yal:
—Mero ma xcom te jmel-o'tan ya caiy yu'un te jnich'ane, ja' to teme ba join ta bay mach'atic lajemique —xi'. Jich yu'un jujun c'aal ay ta oq'uel te state.
36Te madianetic c'o xchonic te José ta sc'ab Potifar ta Egipto. Ay yat'el ta comandante yu'un jcanantaywanejetic ta stojol faraón te muc' ajwalil yu'un Egipto.
Currently Selected:
Génesis 37: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.
