Génesis 43
43
Benjamín ic'ot bael ta Egipto
1Toy xan te wi'nal ta banti ayique. 2Ja' yu'un te c'alal lajix yu'unic te trigo te la yich'ic tel ta Egipto, albotic yu'un te statique:
—Baanic xan ta Egipto, baan manaic xan tel jtebuc te jwe'eltique —la yut te snich'nabe.
3La sjac' te Judá:
—Ja'xan te bit'il tulan sc'oplal la yalbotic te ajwalile: “Teme ma la awiq'uic tel te awijts'inique, ma me xtal awilonic”, la yutotic te c'alal xc'otucotique. 4Jich yu'un ja' to teme ya awac'botic jointic bael te quijts'intique, ya me xbootic, ya xba jmantic tel te jwe'eltique. 5Yan teme ma xawac'botic jointic baele, ma me xju' ya xbootic. Te melel jich la yalbotic te ajwalile: “Ma me xtal awilonic, teme ma la awiq'uic tel te awijts'inique”, la yutotic —xi'.
6La sjac' te mamal Israel:
—Mero ma lecuquex ya caiy. ¿Bistuc la awalbeyic yaiy te ajwalil te bit'il ay to yan awijts'inique? —xi'.
7La sjaq'uic:
—Te ajwalile, bayal la yich'otic ta c'op ta jyalel, te bit'il ayotic, te jaytulotique, soc spisil mach'a ay cu'untic. La sjojc'obotic yaiy teme cuxul to te jtatique, soc teme ay to yan quijts'intique. Te jo'otique ma'yuc yan bi la jpastic, ja' nax la jsujt'esbeytic te bila la sjojc'obotique. ¿Banti c'an jna'tic teme ya yal: “Ic'a tel te awijts'inique”, te xie? —xiic.
8Jich yu'un te Judá la yalbey te state, te mamal Israel:
—Teme ya awac'botic bael te quereme, jo'on me ya join bael, puersa me ya xbootic, swenta yu'un ma me xlajotic yu'un wi'nal ta jpisiltic soc te alaletic cu'untique. 9Jich yu'un te quereme ya jwentain bael. Teme ay ya sta faltae, jo'on me ya awac'bon jmulin sbajt'el q'uinal. Puersa me ya quic' sujt'el tel. 10Melel te manchuc lajuc acomotique, xchebal meix buelta cu'untic a te jichuque —xi'.
11La sjac' te statique:
—Lec ay jiche, ic'aic bael. Soc ich'beyaic bael jtebuc smajt'anin te bila ay ta jq'uinaltique, ya me xc'o awac'beyic te ajwalile, ja' te bálsamo, chab, soc te bila bujts'an yic', mirra, soc sit te', nuez soc almendra. 12Soc ich'aic bael swenta cheb buelta te stojol trigo, yu'un ya me asujt'esbeyic te taq'uin la sujt'esbeyex tele, te la ataic ta yutil acoxtalique. Repente yu'un ch'ay yo'tan te bit'il jich la spase. 13Soc ic'aic bael te awijts'inique, joinaic bael, baan c'oponaic xan te ajwalile. 14Te Dios te Spisil ya xju' yu'une, ac'a scoltayex, ac'a stijbey yo'tan te ajwalil te yacuc xc'uxtayexe, yacuc scoltaybotic tel te abanquilic chucul jilele, soc te manchuc ya yuts'inbotic te Benjamín. Teme spisil ya xpojboton te jnich'nabe, jich nanix, bi c'an cal —xi' te mamal Israele.
15Jich te snich'nab te mamal Israel la xchajban sbaic, la yich'ic bael te majt'aniletique, soc te stojol trigo swenta cheb buelta te stojole, soc la yiq'uic bael te Benjamín. Bajt'ic ta Egipto, c'o stejc'an sbaic ta stojol te José. 16C'alal la yil te José te bit'il la sjoiniquix tel te yijts'inique, jich yu'un la yalbey te yabate:
—Ic'a bael ta jnatic te winiquetique. Ac'a ta milel wacax, ac'a ta chajbanel, yu'un ya xba join ta we'el ta olil c'aal yo'tic —la yut.
17Jich te yabat José la xch'uun te bila albot yu'un te yajwale, la yic'bey bael ta sna te winiquetique. 18C'alal la yilic te ic'otic ochel ta sna te José, och xiwel ta yo'tanic yu'un, jich la yalbey sbaic:
—Ja' swentail te la yic'otic ochel tel ta sna te bit'il ay ta jcoxtaltic te jtaq'uintic la jtatic te xtalucotic ta neelale. Jich yu'un ya sc'an ya xchucotic, ya sc'an ya yuts'inotic, ya sc'an ya spojbotic jburrotic, soc ya smozoinotic —xiic yu'un.
19Jich la sc'oponic te mayordomo José ta sti' sna, 20la yalbeyic:
—Cajwal, ta neelal ja' xtalucotic yu'un te tal jman te jwe'eltique. 21Ja'uc me to c'alal c'ootic ta wayel, c'o jam jcoxtaltic. Juju-jtul ts'acal la jtatic ta jcoxtaltic te jtaq'uintique, jich yu'un la jcha'quich'tic tel. 22Soc la quich'tic tel yan taq'uin swenta yu'un ya jmantic xan bael jwe'eltic a. Ma jna'tic mach'a la yac'botic ochel ta jcoxtaltic te jtaq'uintique —xiic.
23La sjac' te yabat José:
—Ma xiwex, ma xamel awo'tanic. Te Dios awu'unic soc yu'un te atatique, ja' la yac'beyex ochel ta acoxtalic te ataq'uinique, te melel la jtsacbeyex te ataq'uinique —xi' sc'oplalic yu'un.
Jich te Simeón ic'ot loq'uel ta chucjibal yu'un, ac'bot sjoinic. 24Patil ic'otic ochel ta yutil sna te José. Ac'bot ja' spoc yacanic a, soc ac'bot swe'el te sburroique. 25Jich te winiquetique la xchajbanic te majt'anile, swenta yu'un te c'alal ya xtal ta olil c'aal te José, ya me yac'beyic smajt'an, melel la yaiyiquix te ya x'ic'otic ta we'el yu'une.
26Ta patil och tel ta sna te José. Jich yu'un la yac'beyic te majt'anil te xchajbanejique, la stinan sbaic coel ta stojol c'alal ta lum. 27Te José la sjojc'obey yaiy ta ora teme lec ayic ta spisilique. Soc jich la yal:
—¿Ja'xan te atatique, te mamal la awalbonique, lec bal ay? ¿Cuxul to bal? —xi'.
28La yalbeyic:
—Lec ay te jtatic cu'untic, te awabaton soque. Cuxul to —xiic.
La stinan xan sbaic coel c'alal ta lum. 29Te José la stoy sit, la yil tey ay a te Benjamín, te mero yijts'in te jun sme' soque. La yalbey:
—¿Ja' bal axutil-ijts'inic te la awalbonic caiye? Querem, ac'a yac'bat bendición te Diose —la yut.
30C'alal laj yo'tan ta yalel, bayal la smel yo'tan te José te bit'il la yilbeyix sit te yijts'ine. Ma cujch' yu'un te mel-o'tane, jich yu'un loc' bael ta yolilic ta ora. Och bael ta yan tsal sna, ba yoq'uetay sba. 31Patil c'alal laj yo'tan ta oq'uel, la spoc sit, cha'loc' xan tel. Spasoj tulan te manchuc ya x'oc' xan. La yal mandal te bit'il ya x'ich'bot tel swe'elic, swenta yu'un ya x'ochic ta we'el.
32Ja'uc me to, parte parte we'ic. Parte ac'bot swe'el ta yan mesa te José. Ta yan mesa ac'bot swe'elic te sbanquiltaque, soc ta yan mesa ac'bot swe'elic te egipcioetic te ic'bilic tel yu'un te José. Melel te egipcioetic ma sc'an ya sjoinic ta we'el te hebreoetique, yu'un ma lecuc ya yaiyic te ya slac' sbaic soc ta we'ele. 33La snajc'an sbaic ta banti la yal mandal te José. Ja' neel te banquilale, xmelmon najc'ajic bael te ijts'inaletique, ja' to c'alal ta xut. C'alal jich pasot la yilic, bayal c'opoj yo'tanic, la yilbey sba sitic yu'un. 34Te José jajch' yac'bey swe'el te sbanquiltaque. Yan te Benjamín c'ax jich swe'el ac'bot a te bit'il te yantique, swenta jo'eb buelta yajwal te swe'el ac'bot stuquele. Jich we'-uch'ajic, bin nax yo'tanic ta spisilic.
Currently Selected:
Génesis 43: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.
