San Lucas 18

Seña-c'op te me'ba ants soc te juez

1Te Jesús la yalbey yaiyic yan seña-c'op, swenta yu'un jich me ya snopic te ma ba ya yijq'uitayic sc'oponel Dios spisil ora soc te ma xchebaj yo'tanic ta stojole. 2Jich albotic yu'un:

—Ay jtul juez ta bay jpam lum te xujt' ma xi' te Diose, soc jtul ma'yuc mach'a ya yich' ta muc'. 3Ta bay te lume ay jtul me'ba ants tey a. Tal sc'opon bayal buelta te juez, yu'un ya sc'anbey te yacuc chajbanotuc soc te scontroe. 4Te juez bayal c'aal te ma la sc'an yo'tan te ya xchajbane. Patil la snop: “Manchuc teme ma ba ya jxi' te Diose soc te ma'yuc mach'a ya quich' ta muq'ue, 5scaj te ya swulilayon te me'ba antse, jich yu'un ya me jchajban, swenta yu'un ma me x'ilin co'tan yu'un te bit'il ya swulilayon spisil ora”, xi' ta yo'tan —xi' ta yalel te Jesuse.

6Soc la yal xan te Cajwaltique:

—Awaiy bit'il la yal te juez te ma ba lec yo'tane. 7Ja' xan te Diose ¿ma bal yacuc scoltay te mach'a tsabil yu'un te ya x'albot wocol yu'un c'aal ajc'ubale? ¿Ya bal smaliy bayal c'aal te ya xcoltaywane? 8Ya calbeyex te ya xcoltaywan ta orae. Yan te c'alal ya xtal te Nich'anile ¿ay bal mach'a jun yo'tan xch'uunej Dios te ya xjul sta ta balumilale? —xi' te Cajwaltique.

Seña-c'op te jtul fariseo soc te jtul jc'an-patane

9Te Jesús la yalbey yaiyic yan seña-c'op ta stojol te mach'atic scuyoj sbaic te toj yo'tanic ta stojol te Diose, soc te ya yalic te amen yat'elic ta sc'opic te yantique. Jich la yal:

10—Ay cheb winiquetic ba sc'oponic Dios ta templo. Te jtule fariseo, in te yane jc'an-patan. 11Te fariseo teq'uel la sc'opon te Diose. Jich la yal: “Dios cu'un, wocol awal te ma pajaluc co'tan soc te j'eleq'uetique, soc te ma tojuc yo'tanique, soc te jmulwejetic, soc ma jichuc co'tan te bit'il yo'tan in jc'an-patan to. 12Te jo'one ya jcom jwe'el cheb buelta jujun semana soc ya cac'bat jun ta slajunebal te bila ya jtae”, xi'.

13“Yan te jc'an-patane, q'uejel to la stejc'an sba jilel stuquel. La stinan sba ta stojol Dios. Ma la sc'an stoy moel te site. La smajulay yo'tan. Jich la yal: “Dios cu'un, pasbon perdón te bit'il jmulawilon ta atojol”, xi'. 14Ya calbeyex: Te jc'an-patane libre c'otix ta stojol Dios te c'alal sujt' bael ta snae. Yan te fariseo ma'yuc bila la sta stuquel, melel te mach'a cajal ya yac' sbae, peq'uel me ya xc'ot. Yan te mach'a peq'uel ya yac' sbae, ja' me cajal ya xc'ot stuquel#Pr 29.23; Mt 23.12; Lc 14.11. —xi' te Jesuse.

Jesús la yac'bey bendición te alaletique

(Mt 19.13-15; Mr 10.13-16)

15Ay la yiq'uic tel ch'in alaletic ta stojol te Jesuse, swenta yu'un ya scajanbey sc'ab ta sjolic. Te c'alal la yil te jnopojeletique, la scomic te mach'atic yic'ojic tele. 16Ja'uc me to, te Jesús la yic' tel te ch'in alaletique, soc la yalbey te jnopojeletique:

—Ac'a taluc ta jtojol te alaletique. Ma me x'acomic. Melel te mach'a jich yo'tanic te bit'il in alaletic to, ja' me ya xju' ya yajwalinic te Diose. 17Jamal ya calbeyex, te mach'a ma xch'uun yajwalinel te Diose, jich bit'il te alale, ma xju' ya yajwalin te Diose —xi' te Jesuse.

Tal sc'opon Jesús jtul winic te jc'uleje

(Mt 19.16-30; Mr 10.17-31)

18Ay jtul mach'a ich'bil ta muc' yu'un te judioetique, tal sc'opon te Jesuse:

—Maestro, te lecat ta winiquile, ¿bit'il ya jta jcuxlejal sbajt'el q'uinal? —xi'.

19Te Jesús la yalbey:

—¿Bi yu'un ya awal te lecon ta winiquile? Ma'yuc mach'a lec. Ja' nax lec stuquel te Diose. 20Ana'oj stojol te bila ya yal te mandaliletique: “Ma me x'awaiy mulwej,#Ex 20.14; Dt 5.18. ma me x'awaiy milaw,#Ex 20.13; Dt 5.17. ma me x'awaiy elec',#Ex 20.15; Dt 5.19. ma me xlewanat ta c'op,#Ex 20.16; Dt 5.20. soc ich'a ta muc' te ame'-atate”,#Ex 20.12; Dt 5.16. te xie —xi' te Jesuse.

21La yal te winique:

—Spisil cat'elinej spasel ta jqueremil to tel —xi'.

22Te c'alal la yaiy stojol te Jesuse, la yalbey te winique:

—Ay to jchajp xan te bila ya sc'an ya apase. Chona spisil bila ay awu'un, soc q'uebanbeya te me'baetique. Jich me ay ac'ulejal ta ch'ulchan ya xc'oat. La' me, joinawon ts'iin —xi'.

23Te c'alal la yaiy stojol te winique, bayal la smel yo'tan yu'un, scaj te bayal sc'ulejale. 24Te Jesús la yil te bit'il ay ta mel-o'tan te winique. Jich yu'un la yal:

—Te jc'ulejetique wocol ya yajwalinic te Diose.#Pr 11.28. 25Jich bit'il ma xju' ya xc'ax ta aguja te camelloe, c'axem to xan wocol ya x'ochic te jc'ulejetic ta banti ay ta ajwalinel te Diose —xi'.

26Te mach'atic la yaiyic stojole jich la yalic:

—¿Mach'a me c'an coluc jiche? —xiic yu'un.

27Te Jesús la yalbey xan yaiyic:

—Te bila ma xju' ta pasel yu'un te ants-winiquetique, ja' ya xju' yu'un spasel stuquel te Diose —xi'.

28Te Pedro la yal:

—Cajwal, te jo'otique jilemix cu'untic te bitic ay cu'untique, melel jts'aclinejticatix —xi'.

29Te Jesús jich la yal:

—Jamal ya calbeyex, spisil mach'a ya yijq'uitay jilel sna, sme'-stat, sbanquiltac, yinam, yal-snich'an ta swenta te bit'il ay ta ajwalinel te Diose, 30bayal buelta ya x'esmaj sjelol ya yich' li'to ta balumilal, ta patil ya me staic xcuxlejalic sbajt'el q'uinal —xi' te Jesuse.

Yoxebalix buelta te la yal Jesús te bit'il ya xlaje

(Mt 20.17-19; Mr 10.32-34)

31Te Jesús la yic' ta stojol stuquel nax te lajchaytul jnopojeletic yu'une soc la yalbey yaiyic:

—Aiya awaiyic stojol: Yacotiquix ta moel bael ta Jerusalén. Tey me ya xc'ot ta pasel a te bit'il la sts'ibuyic jilel j'alwanejetic yu'un Dios te sc'oplal te Nich'anile. 32Melel ya x'ac'ot ta sc'ab te jyanlumetique. Ya me yich' labanel soc bolc'optayel soc tubtayel yu'unic. 33Te c'alal la yac'beyiquix castigo ta majel ta nujc'ule, ya me smilic. Ja'uc me to, ta yoxebal c'aal ya me xcha'cux tel —xi'.

34Ja'uc me to, xujt' ma la sna'ic stojol te bila la yale, yu'un ma chicanuc la yaiyic te bit'il c'oem swentaile. Jich ma ba c'ot ta yo'tanic.

Jesús la sjambey sit ma'sit ta lum Jericó

(Mt 20.29-34; Mr 10.46-52)

35C'alal nopol xc'ot Jesús ta lum Jericó, ay jtul ma'sit nacal ta c'anbajel ta ti'be. 36C'alal la yaiy stojol te yac ta c'axel tsobol ants-winiquetic ta be, la sjojc'o yaiy te bila yac ta pasele. 37La yalbeyic te ja' te Jesús te Nazarete te yac ta c'axele. 38Jich jajch' yawtay:

—¡Jesús te sts'umbalat Davide, c'uxtayawon! —xi' ta aw.

39Te mach'atic neel yacalic ta c'axele, la scomic te manchuc ya x'awune. Ja'uc me to, tulan awun xan:

—¡Sts'umbal David, c'uxtayawon! —xi' ta aw.

40Te Jesús la stejc'an sba. La yal mandal te ya x'ic'ot tel ta stojole. Te c'alal ayix ta stojole, te Jesús la sjojc'obey yaiy:

41—¿Yu'un bal ay bila ya ac'an te ya jpasbate? —xi'.

La yal te ma'site:

—Cajwal, ya jc'an te ya ajambon te jsite —xi'.

42Te Jesús la yalbey:

—Ya xjamix te asite. Ta swenta xch'uunjel awo'tan colematix —xi'.

43Te winique ora la yil te q'uinale. La sts'aclin bael te Jesuse, yac ta yalel yutsilal te Diose. Soc uuc te ants-winiquetique, la yalbeyic yutsilal Dios yu'un.

Currently Selected:

San Lucas 18: TZOXCH

Highlight

Copy