Yezhanq 5

Yezsuz Yuq Haenz Vaengz Naemx Bihseqdaq Ya Goanz Pujchaej Ux Ndae

1Gvaq ndauj ux yaq, zoq taeng jeng puj Yaeuhtaiq jeng ux, Yezsuz zoq mwz Yezluqsaxlaengx. 2Yuq ndaw Yezluqsaxlaengx, miz baegdu ux rongx hoak "Baegdu Dij Mbej," haenz dih naeh miz vaengz naemx ux, hax kauq Cizboahlaiz rongx hoak "Bihseqdaq," haenz vaengz naemx naeh miz haj aen yauj. 3Dih naeh miz puj chaej gunz goanz lai taeuq, miz puj ta'mbud, puj ka'ndiak, puj qenka mboq rux chaeg. 4#5:4 Mbangj bwnz miz gaemz kauq naeh: Bin Zaeuj taeng zwz maz zoq vae vaengz naemx naeh, naemx chaeg yaq, gawz loangz bae daekgoanq, daengz miz gaeng chaej goj ndae nauq. Baenzzaqnaeh paenqdix yuq dih naeh taj naemx chaeg. 5Dih naeh miz goanz ux, chaej ndaej samsip-biad bi. 6Yezsuz leztaen dix gunz dih naeh, ruxndeq dix chaej ndaej ndowj, zoq cham dix: "Mawz zawx ndae vah?" 7Goanz puj chaej naeh yaeng: "Cuh aj, gau naemx chaeg naeh, mboq miz gawz aeu gux nyaengx bae vaengz naemx, sowh gau gux zaekgaj bae naeh, zoah daenh longx bae daekgoanq." 8Yezsuz daj dix hax: "Dwnq maz, gaem faz mawz daeq ndeh." 9Goanz gaengnaeh cenq ndae, zoq gaem faz dix daeq. Vaenz gaengnaeh zawh Vaenz Cednoiq. 10Baenzzaqnaeh, puj saeq puj Yaeuhtaiq daj goanz aen chaej zoah ya ndae naeh hax: "Vaenznaeh zawh Vaenz Cednoiq, mawz gaem faz mboq hoj."#5:10 Sw fahlih Moahciz laiz naeh hax Vaenz Cednoiq mboq jinx hoak gaengx. Puj saeq puj Yaeuhtaiq hax tw gaenq naek daeqloh goj suanq zawh hoak gaengx. 11Gaj dix yaeng: "Goanz hawj gux ndae naeh daj gux hax: ‘Gaem faz mawz bae ndeh.’" 12Paenqdix zoq cham dix: "Goanz daj mawz hax: ‘Gaem faz mawz bae ndeh’ naeh zawh gawz ah?" 13Dihnaeh miz goanz lai taeuq, Yezsuz haeuz ueg ni yaq, baenzzaqnaeh, goanz gaengnaeh mboq ruxndeq goanz ya dix ndae naeh zawh gawz.

14Gvaq ndauj ux yaq, Yezsuz yuq rownz dij Sen cha mex goanz gaengnaeh, dix daj goanz gaengnaeh hax: "Aen chaej mawz dauq ndae yaq, gaj laek daeuq hoak loang, yaj mawz rux daeuq miz yowngh ndai naengz dohbaeuh nyeuz miz aen chaej." 15Goanz gaengnaeh bae haxdoq puj saeq puj Yaeuhtaiq, hax goanz hawj dix ndae naeh zawh Yezsuz. 16Yezsuz yuq Vaenz Cednoiq hoak sowh saeh naeh, puj saeq puj Yaeuhtaiq zoq vazkuz dix. 17Yezsuz daj paenqdix hax: "Dez gux hoak najgaengx taengdeg gannaeh, gux goj hoak najgaengx." 18Cholaeng Yezsuz mboq gaem Vaenz Cednoiq, yaq naengz rongx dij Sen hoak Dez dix, aeu hoakri hoak daj dij Sen baenzndeu, baenzzaqnaeh puj saeq puj Yaeuhtaiq zoq gajfa nwh kaj dix.

19-20 Yezsuz zoq daj paenqdix hax: "Gux haxdoq su swhlit, daengz gux zawh Lug zaiz dij Sen, gux goj mboq rux haeggaj hoak gaeng, mizgaj leztaen sowh gaenq Dez ndaw fax hoak naeh, gux zux hoak. Dez ndaw fax ngaiq Lug, hoakri dix hoak gaeng raeuh, dix goj jix hawj Lug lez. Baenzzaqnaeh gux leztaen Dez ndaw fax hoak gaeng, gux zux hoak gaeng. Dez ndaw fax naengz rux aeu sowh saeh dwx nyeuz sowh saeh naeh jix hawj Lug lez, baenzzaqnaeh hawj gaenqsu sawz taeuq. 21Dez hoakrawz hawj puj tai daeuq zaeu, hawj paenqdix ndaej aen mingh, Lug goj dungzlumj, ngaiq aeu aen mingh hawj gawz zoq hawj gawz. 22Dez mboq saenxpanq dij goanz, sowh saeh saenxpanq naeh dix haeuz aeu hawj Lug gvanx, 23hoanx naeh dij goanz zaenzzungq Lug daj zaenzzungq Dez dungzlumj. Gawz mboq zaenzzungq Lug, zoq zawh mboq zaenzzungq Dez nemz dix daeuj naeh. 24Gux haxdoq su swhlit, gawz biak kauq gux, goj sinq laux nemz gux daeuj naeh, gawz zoq ndaej aen mingh daengznauq. Dix mboq ndaej tw sowh gaenq hoakri hoak loang naeh, dix haeuz ni ka loh rux zoah tai naeh, daeq ka loh ndaej aen mingh naeh. 25Gux haxdoq su swhlit, zaekgaj taeng zwz yah, gannaeh zoq zawh, puj tai ruxnyinz hiang lug zaiz dij Sen, gawz ruxnyinz gawz zoq zaeu yah. 26Zoq baenzzaq Dez ndaw fax zawh goaklaeg aen mingh, dix goj hawj Lug zaiz dix baenz goaklaeg aen mingh. 27Goj cholaeng gux zawh goanz rongx hoak Lug Dij Goanz naeh, dix zoq aeu sowh qenhliq saenxpanq naeh hawj gux. 28Gaenqsu laek sawz zawh Lug dij Goanz saenxpanq dij goanz. Gaenq naeh naengz gajfa, zoq zawh taeng zwz maz, Lug dij Goanz rongx puj tai, paenqdix ruxnyinz hiang dix, 29daengzle zoq og maz. Gawz hoak ndae, daeuq zaeu, ndaej aen mingh. Gawz hoak mbowq, daeuq zaeu, zoq haeggaj ndaej tw sowh gaenq hoakri hoak loang naeh.

30"Mboq zawh hax gux zawx hoakrawz zoq hoakrawz, zawh biak kauq laux nemz gux daeuj naeh hoak. Baenzzaqnaeh, gux goj mboq rux haeggaj hoak gaeng, gux hoakzaqrawz ruxnyinz, gux zoq hoakzaqrawz saenxpanq. Baenzzaqnaeh gaenq saenxpanq gux naeh zawh tw'piang. 31Jixzawh zux miz gaj gux hax gux zawh gawz, daengz gux hax gux zawh gawz goj mboq miz gaeng luq.#5:31 Sowh goizdingq naeh yuq Sw Fahlih Daih Ngih 19:15: "Jixzawh goanz rawz hax dix ndaej taen goanz rawz hoak loang, mboq baenz pinh gaj kauq dix zoq paeg goanz gaengnaeh hoak loang, hoakrawz goj song goanz rux sam goanz hax ndaej taen goanz rawz hoak loang, zoq paeg goanz gaeng naeh hoak loang baenz." Saeh ndae goj zawh hoakzaqnaeh paeg. 32Gaj naengz miz goanz ux hax gux zawh gawz, gux ruxndeq gaenq gaenqdix hax naeh zawh zaeh. 33Gaenqsu ndaej nemz dij goanz mwz dih Yezhanq naeh, dix haeuz haxdoq su gux zawh gawz, gaenq gaenqdix hax naeh zawh zaeh. 34Doiq gux maz hax, dij goanz hax gux zawh lug zaiz dij Sen, mboq miz gaeng jihzaq. Gaj gux laemh le gaemz Yezhanq hax naeh, zawh cholaeng hawj su ndaej jeuq. 35Yezhanq daj aen daeng oq ux dungzlumj, gaenqsu venq zaemz gaenqrungh dix goanq. 36Yezhanq goj hax gux zawh gawz, gaj naengz miz diauq ux hawj daenh ruxndeq gux zawh gawz singjringh. Diauq naeh zoq zawh sowh najgaengx Dez ndaw fax hawj gux daeuj hoak naeh, zoq zawh sowh gaenq gux hoak naeh, hawj daengzle ruxndeq gux zawh Dez ndaw fax nemz daeuj. 37Dez nemz gux daeuj inxnaeh, dix goj haeggaj hax gux zawh gawz. Hiang dix, gaenqsu mboq sanz ndaej ruxnyinz. Rangh dix, gaenqsu goj mboq sanz ndaej taen. 38Kauq dix, gaenqsu goj mboq aeu nyaengxzaw. Baenzzaqrawz gux ruxndeq mah? Zawh gaenqsu mboq sinq goanz dij Sen nemz daeuj naeh. 39Gaenqsu caqsiq doag Sw Dij Sen, zawh su faeklaih rux daeq ndawSw Dij Sen ndaej aen mingh daengznauq. Gaj bwnz Sw Dij Sen naeh lej zawh haxdoq daenh gux zawh gawz mbezneh. 40Gaj gaenqsu mboq venq maz zawj gux ndaej aen mingh. 41Gux mboq ceu najta dij goanz. 42Gaj gaenqsu lej, gux ruxndeq zaw su mboq ngaiq dij Sen saek'i. 43Gux daeuj inxnaeh zawh Dez gux yaix daeuj, zawh cho Dez daeuj mbezneh, gaj gaenqsu mboq zaemz gux. Jixzawh puj ndai mboq miz gawz yaix daeuj, zawh cho gaj hoakri daeuj, gaenqsu ej zaemz dix. 44Gaenqsu gawz goj zaemz sowh najta daenh aeu hawj naeh, gaj gaenqsu mboq ceu sowh najta laux Sen doag doag aeu hawj naeh. Hoanx naeh su hoakzaqrawz sinq gux mux? 45Vaenz saenxpanq naeh, mboq zawh hoakri gux yuq doqnaj Dez ndaw fax gauq su, goanz gauq su naeh zawh Moahciz, zawh goanz su maengx naeh. 46Sowh sw Moahciz laiz naeh, laiz zoah gaenq gux, baenzzaqnaeh, jixzawh gaenqsu sinq sowh sw Moahciz laiz naeh, jixzawh gaenqsu sinq zaeh, gaenqsu goj toj sinq gux mboqyaq. 47Jixzawh gaenqsu mboq sinq sowh gaenq dix laiz naeh, gaenqsu hoakrawz sinq sowh kauq gux hax naeh mux?"

Currently Selected:

Yezhanq 5: ZHN

Highlight

Copy