Hechos 6
6
Tuzua'ke gaadx'ke bënni lak'leene bënni'a tayajle'ke
1Dza ni, le zjak'tekze tayaane bënni'a tayajle'ke, bënni tui'ke diidza griego gulazulau'ke tanéke kieke bënni'a tui'ke diidza hebreo, koma ti tui'laadxi'ke dxia'a ga lazi'nu le laag'nu nguul uzeeb'a tui'nu diidza griego. 2Bënni chin'nu'ke gbaaz kie' Xan'ru gulutzaage bënni'a tayajle'ke, len gle'ke leke:
—Ti nak dxia'a netu ksan'tu kixhjë'tu xhtiidze'e Dios naar gui'laadxi'tu ka'a'tu la'wa'gu. 3Lena'a, bë'cha'a gulkiilj ladj'li ni gaadx'ke bënni gunn gxhënilaadxi'li'ne, bënni nayajni'i len nadze'iz'kde Bë' La'ay kie' Dios, naar gzua'ru lu naa'ke dxin ni. 4Netu na'a uyaj'leen'tu gui'leen'tu'ne diidza Dios len kixhjë'tu xhtiidze'e.
5Yugute'ke gulayazlaadxi'ke diidza ni, len gulabëe' Esteban bënni rajle'e gdu laadxe'e len nadze'iz'de Bë' La'ay kie' Dios, len Felipe, Prócoro, Nicanor, Timón, Parmenas len Nicolás bënni Antioquía, le' zia'a yajte'e bënni Judea. 6Chi nak ka guluche'ke leke ga nakua'ke bënni gbaaz kie' Xan'ru, len leke guluxua'naa'ke leke len glui'leene diidza Dios.
7Xhtiidze'e Dios ziaj'tekz rxhua, len tayan'tekze bënni tayajle'ke Xan'ru lu yëdz Jerusalén. Lekz'ka' ziaane pxuuz Judea gulayajle'ke.
Tazëëne Esteban
8Le zian le tunn'be' yëla wak xhën ruune Esteban lu yëdz koma nadze'iz'de yëla wak kie' Dios len yëla rak'len kie' Le'. 9La'ke bënni nu'tza'ke lu yu'u useed kieke bënni Judea le nazi' lei' Bënni Nadzan'ke, len dzaag'ke bënni yëdz Cirene, Alejandría, Cilicia len bënni Asia gulazulau'ke tadil'e diidza len Esteban; 10san ti guladxin'ga'le'e le' koma le' rue'e diidza len yëla nayajni'i kie' le' Bë' La'ay kie' Dios. 11Na' gulagiixhj'ke bënni lanáke ki gulayëën'de le' rne' diidza le rudabaaga le' Moisés len Dios. 12Ki gluune na' gulayas'ke bënni yëdz, len bënni guul tuzeajni'i'de len bënni useed xhba kie' Dios len gulabialaadxi'ke Esteban, len gulazëëne le' ati guluche'ke le' lau'i dxin'lau'i blou. 13Lekz'ka' gulagiilje bënni gxhi'ye' tzajxaka'lau'ke, len lanáke:
—Bënni ni ti rsan'kze rudabaage'e gdou' la'ay ni len xhba kie' Dios. 14Chi byëëni'tu rne' ki Jesús bënni Nazaret ukin'je gdou' ni len utze'e le chi naleebi'ru run'ru le pka'ane kieeru Moisés.
15Bënni'a tunabe'ke len yugute'ke bënni'a rë'ke ni' kati guluyue' Esteban gulale'i'de lau'rue'e ka bënni gbaaz la'ay kie' Dios.
Currently Selected:
Hechos 6: PZD
Highlight
Share
Copy
Want to have your highlights saved across all your devices? Sign up or sign in
© Sociedad Biblica de México AC
