Hechos 9
9
Saulo rubi'i'laadxe'e
(Hch 22:6-16; 26:12-18)
1Tzal'za, Saulo ti rzuadxie' rzeide banaadx bënni'a tayajle'ke Xan'ru. Lena'a yajyue pxuuz blou, 2len bnaabe gich ga rzi'e lsenz tziije lu yu'u useed ki Damasco, yajdiilje bënni'a zjak'leene Nëëz Kub'a, bënni len nguul, len uche'e leke Jerusalén layu'u'ke liidx'gia. 3San kati chi zua gdxiine Damasco, ka zua ka' tu gi' le za lu xhba bze'ni ga ziije'a. 4Saulo gbixe len byëën'de chi'i le guudx le': «Saulo, Saulo, ¿Bixhkia' rlaag'yuudxu neda?»
5Saulo bnaabe: «¿Nuxh li', Xan?» Chi'i ni bubi'i diidza: «Neda naka Jesús, larakz bënni'a li' rlaag'yuudxu'ne. 6Gyas len gyaaz la yëdz ni; len ni' le'ke li' le rala guunu.»
7Bënni'a zjak'leene le' Saulo glaadxi'tzki'de, koma gulayëën'de chi'i ni, san nutunu gulale'i'de. 8Chi nak ka', Saulo gyase lyu'a; ati kati psaalje lau'e ti rle'i'de. Lena'a gulazëën'de ne'e len guluche'ke le' Damasco. 9Ni' gzue' tson dza ti ble'i'de len tibi gwi'i'gda'we.
10Yëdz Damasco ni zue' Ananías tue' bënni rajle'e Xan'ru, ati Xan'ru blui'lau'e ga zue' len gudxe le': «¡Ananías!» Le' bubi'e diidza: «Ni zua', Xan.»
11Le' Xan'ru gudxe le': «Gyas len gyaj nëëz'a nazi' lei' nëëz Li, len liidxe Judas gnaabu'ne tue' bënni yëdz Tarso bënni le' Saulo. Le' rui'leene diidza Dios. 12Len Dios chi blui'de le', ki tue' bënni le' Ananías rdxiine len rxua'ne'e le', naar gunn ule'i'de.»
13Kati byëën'de le ni Ananías gne': «Xan, ziaane chi glui'leene neda diidza kie' bënni'a len tzka'ti'ga le chi psake'e bënni'a tayajle'ke Li' yëdz Jerusalén. 14Ati na'a ze'e ni, koma bënni tunabe'i'de pxuuz nunëëdzj'ke lsenz, naar kche'e len ku'e liidx'gia yugute'ke bënni tayiijilaadxi'ke li'.»
15San Xan'ru gudxe le': «Gyaj, koma neda grëa'ne bënni ni ki guune neda lban lau'ke bënni yëdz yubl, len bënni tunabe'ke, len lekz'ka' len bënni yëdz Israel. 16Neda glui'da'ne gakati rala ktzaage nia'a kia'.»
17Ananías gyaazie nu'yu'u ga zue' Saulo len pxua'ne'e le', len gudxe le':
—Saulo bë'cha'a, Xan'ru Jesús, bënni'a blui'lau'e li' la nëëz ga zo'u, psë'le'e neda naar yule'i'du len gdze'iz'de li' Bë' La'ay kie' Dios.
18Ati na'teez bi'nakz xhlëëza'ba bël guluroj lau'e Saulo, len bule'i'de. Na' gyase len bdiile nis. 19Chi nak ka' gda'we len bude'li'de, len ka chop tson dza bga'ane len bënni'a tayajle'ke Xan'ru lu yëdz Damasco.
Saulo rgixhjë'e xhtiidze'e Xan'ru lu yëdz Damasco
20Len Saulo gzulau'e rgixhjë'e lu yu'u useed, ki Jesús nake Xi'ine Dios. 21Yugute'ke bënni tayëën'de le' tubaan'de len tanáke:
—¿Naru keg le' bënni'a rde' rlaage bënni'a tayajle'ke Jesús lu yëdz Jerusalén? ¿Naru keg larakz le'a bënni'a ze'e lekz'ka' ni naar sëëne leke len udëëde leke lu naa'ke bënni'a tunabe'i'de pxuuz?
22Ati Saulo ni ptipr'laadxe'e rue'e diidza len rlui'de leke ki Jesús nake le' Cristo, ati ka' run'chixi'de ikj'lau'ke bënni Judea nakua'ke yëdz Damasco.
Saulo rxhunj'de bënni Judea
23Kati chi gdëëd zian dza, bënni Judea gluune diidza ludëëd'de Saulo, 24san le' guk'be'i'de. Dza len reel tabë'nisie' le' ga ta'a'ke lu yëdz kieke'a, naar ludëëd'de le', 25san bënni useed kie' Jesús gulagu'u'ke le' lu bdë'ë len guluzëtje le' zga lu zë'ë le rli'i'ji yëdz'a.
Saulo riije yëdz Jerusalén
26Kati Saulo bdxiine Jerusalén, gu'un'de gdzaage bënni'a tayajle'ke Xan'ru; san yugute'ke taadx'de le', koma ti tayajle'ke ki le' lekz'ka' chi rajle'e Xan'ru. 27Ati Bernabé pche'e le' len yajue'e le' lau'ke bënni gbaaz kie' Xan'ru. Len gdixhji'de leke ka guk kie' Saulo ble'i'de Xan'ru la nëëz, len be'leene le' diidza, len lu yëdz Damasco Saulo ni, si'na chi gzua'tzke beene lban kie' Jesús. 28Ati Saulo bga'ane Jerusalén, len bdzaage leke, si'na zua'tzke rue'e xhtiidze'e Xan'ru, 29ati rui'leene diidza len rdil'e diidza len bënni Judea tui'ke diidza griego; san leke te'en'de ludëëd'de le'. 30Kati bënni bë'chi'ru tayajle'ke Xan'ru gulak'be'i'de le ni, guluche'ke Saulo yëdz Cesarea, len na' gulusë'le'e le' yëdz Tarso.
31Len gdu yu ki Judea, Galilea len Samaria gzua yëla rë'dxi lu gdou' len rxhën yëla rajle' kieke. Nakua'ke len yëla raadxi Dios len yëla rak'len kie' Bë' La'ay kie' Dios tayan'tekze.
Pedro ru'uune Eneas
32Pedro bënni rde' rajyue bënni bë'chi'ru, gyiije lekz'ka' yajyue bënni tayajle'ke Xan'ru lu yëdz Lida. 33Ni' yajxa'ke'e tue' bënni le' Eneas, len chi guk xuunu iz de' baya', nat'zie'. 34Pedro gudxe le':
—Eneas, Jesucristo ru'uune li', gyas len butuub xhto'u.
Eneas na'teez gyase. 35Len yugute'ke bënni nakua'ke yëdz Lida len yëdz Sarón gulale'i'de le' gyase len gulubi'i'laadxi'ke len Xan'ru.
Dorcas rubaan'nu lu yëla gut
36Dza ni' gzuaanu lu yëdz Jope tuunu nguul nayajle'nu leenu Tabitá, len lu diidza griego re'e'ni gna Dorcas. Nguul ni gdu yëla naban kieenu ben'nu le nak dxia'a len guk'leen'nu'ne bënni nayaadzji'kde. 37Len tu dza bdxin xhwe'nu Dorcas len gut'nu. Len buudx gulugaazje'nu guluxua'ke'nu lu yu'u zua xhtza'. 38Yëdz Jope ni de ga'la'z yëdz Lida ga Pedro rde'; len gulanëëz'de bënni'a tayajle'ke Xan'ru ki ni' rde', ati gulusë'le'e chope' bënni tzajëëdx'ke le': «Dia' yëdz Jope, ti tzei'du zi'.»
39Ati Pedro gyaj'leene leke. Kati bdxiine, guluche'ke le' nu'yu'u ga deenu; len guladxin'nu kuiti le'e nguul uzeeb tabëëdx'nu len tului'nu le' yugu laari le lenu ben'nu kati ni zuaanu yëdz'lyu. 40Pedro bubiije yu'u yugute'ke, ati bzechu xhiibe len be'leene diidza Dios, len chi nak ka', byue'nu nguul nat'a, len gne':
—¡Tabitá, gyas!
Lenu psaalj'nu lau'nu len kati ble'i'nu'ne Pedro, grë'nu. 41Le' gde'le'e na'nu len pchise'nu, chi nak ka' bliidze bënni'a tayajle'ke Xan'ru len nguul uzeeb'a len blui'de leke ki naban'nu. 42Len gdu yëdz Jope gnëëzi le guk ni, len zian'ke gulayajle'ke le' Xan'ru. 43Pedro bga'ane zian dza lu yëdz'a, liidxe tue' bënni rpe'e gid kieeba beedx, bënni ni le' Simón.
Currently Selected:
Hechos 9: PZD
Highlight
Share
Copy
Want to have your highlights saved across all your devices? Sign up or sign in
© Sociedad Biblica de México AC
