Juan 14
14
Jesús nake nëëz rdxin len Xuuz'ru
1«Ti sua'yechi'li. Gultzajle'e Dios, len lekz'ka' gultzajle' neda. 2De'tzka latj ga suáru liidxe Xuuza; nar'la ti nak ka, neda ti gie'a lbi'ili ki tzajpa'a kieeli tu latj. 3Len kati chi zuwëëja ati chi nupa'a kieeli tu latj, wëëda yubl dujxi'a lbi'ili, naar suáli ga neda sua'. 4Lbi'ili nëëzi'li bixh nëëz'a rche' ga neda ziija.»
5Tomás gudxe Jesús:
—Xan, ti nëëzi'tu gaxh ziiju, ¿Nakxh umbe'tu nëëz'a?
6Jesús bubi'e kie' diidza:
—Neda naka nëëz, yëla li len yëla naban. Nutunu rdxin len Xuuz'ru xhki ti nak nia'a kia'. 7Xhki lbi'ili numbe'li neda, lekz'ka' umbe'li'ne Xuuza; ati na'a chik'z numbe'li'ne, koma chi ble'i'tikz'li'ne.
8Na' Felipe gudxe Le':
—Xan, uxën'da'laadxi'tu ka nak glui'du'ne netu Xuuz'ru.
9Jesús bubi'e kie' diidza:
—Felipe, xhtzei guk zua' len lbi'ili, ¿Ati ti numbe'i'du neda? Nu chi ble'i neda, chi ble'i Le' Xuuza; ¿Bixhkia' rnaabu glui'da'ne lbi'ili Xuuz'ru? 10¿Naru ti rajle'u ki Xuuz'ru zue' len neda, ati neda zua' len Le'? Diidza rui'leena lbi'ili ti nak le rnaaz kia'. Xuuz'ru zue' len neda, len Le' ruune xhchiine. 11Gultzajle' ki neda zua' len Xuuz'ru len Le' zue' len neda; xhki na'a, gultzajle' nia'a ki dxin le ruuna. 12Le nak'te rea' lbi'ili ki bënni tzajle'e neda lekz'ka' guune dxin le ruuna neda; len uxhën'r le guune Le', koma neda wëëja ga zue' Xuuz'ru. 13Len yugute' le gnaab'li lu La', guuna ley, naar lu ne'e Xi'ine glui' lau'i yëla xhën kie' Xuuz'ru. 14Biti'teez le gnaab'li lu La', neda guuna ley.
Jesús rxënelaadxi'ke ksë'le'e Bë' La'ay kie'
15»Xhki nadxi'i'li neda, uzenaagi'li xhba kia'. 16-17Ati neda gnaab'da'ne Xuuz'ru ksë'le'e nu Ruwi'xhën, Le' Bë' ki Yëla Li naar sua'leen'tekze lbi'ili. Bënni nakik'de ki yëdz'lyu ti runn lazi'ke Le', koma ti tale'i'de len ti numbe'ke Le'; san lbi'ili numbe'li'ne, koma Le' zue' len lbi'ili len sua'leen'tekze lbi'ili.
18»Ti jka'an uzeeba lbi'ili; wëëda naar sua' len lbi'ili. 19Bënni nakik'de ki yëdz'lyu ni ye tuchi'iz na' tir lale'i'de neda; san lbi'ili ule'i'li neda, len uyu'u yëla naban kieeli koma neda yu'u yëla naban kia'. 20Na' gdxin dza'a lbi'ili wak'be'i'li ki neda zua' len Xuuz'ru, len lbi'ili zuaali len neda, len neda zua' len lbi'ili. 21Bënni rzi'e xhba kia' len rzenaage ley, rlui'e ki leel nadxi'i'de neda. Len Xuuza gdxi'i'de bënni nadxi'i'de neda len lekz'ka' neda udxi'i'da'ne len glui'lau'a len Le'.»
22Judas (keg Iscariote) bnaab'de Le':
—Xan, ¿Bixhkia' glui'lau'u len netu ati ti glui'lau'u len bunach yëdz'lyu ni?
23Jesús bubi'e diidza:
—Bënni nadxi'i'de neda, rzenaage xhtiidza'a; ati Xuuza udxi'i'de le', neda dzaaga'ne xuuza udusuátu len le'. 24Bënni ti nadxi'i'de neda, ti rzenaage xhtiidza'a. Diidza ryëëni'li ni ti nak xhtiidza'a, nak xhtiidze'e Xuuz'ru nusë'le'e neda.
25»Yugute' le ni rgixhji'da lbi'ili tzal ni zua' len lbi'ili; 26san nu Ruwi'xhën, Le' Bë' La'ay kie' Dios Xuuz'ru ksë'le'e Le' lu La', yugute' kseed'de lbi'ili len use'e'laadxi'li yugute' le chi gdixhji'da lbi'ili.
27»Yëla rë'dxi rka'ana kieeli, yëla rë'dxi kia' runna kieeli, keg ka tunne ley bënni yëdz'lyu ni. Ti sua'yechi'li len ti gaadxi'li. 28Chi byëëni'li gnia' ki wëëja len wëëda duzua' len lbi'ili yubl. Xhki leel nadxi'i'li neda, udziiji'li kati gnëëzi'li ki wëëja len Xuuz'ru, koma Le' nak're xhën ka neda. 29Rgixhji'ti'da lbi'ili na'a naar kati gak le ni, lbi'ili tzajle'li.
30»Tir gui'leena lbi'ili zian diidza, koma ze'e bënni rnabe'e yëdz'lyu ni. San tibi yëla wak nape lu yëla naban kia', 31ka' rala gak, naar yëdz'lyu gnëëzi ki neda nadxi'i'da'ne Xuuz'ru ati ruuna le gnabe'i'de neda Le'.
»Gulsui. Waj'ru.
Currently Selected:
Juan 14: PZD
Highlight
Share
Copy
Want to have your highlights saved across all your devices? Sign up or sign in
© Sociedad Biblica de México AC
