Juan 21
21
Jesús rlui'lau'e len gaadx'ke bënni useed kie'
1Gdëëd le ni, Jesús yubl yajlui'lau'e len bënni useed kie', rui'i nis ki Tiberias. Ki guk: 2Tuuz nakua'ke Simón Pedro, Tomás, bënni te'ke le' Bënni Kuach, Natanael, bënni Caná ki Galilea, bënni xi'ine Zebedeo len ye la'ke bënni useed kie' Jesús. 3Simón Pedro gudxe leke:
—Bël tzajxëëna'ba.
Leke gulubi'ke diidza:
Lekz'ka' netu uza'leen'tu li'.
Yajake len gulabeene tu barku; san chi'dzë'ël'a nutunu bua' gulazëëne'ba. 4Kati za reni, Jesús blui'lau'e ra nis'a, san bënni useed kie' ti nëëzi'kde ki le'a. 5Jesús bnaab'de leke:
—Bënni, ¿Ku de kieeli le gaag'ru?
Leke gulubi'ke diidza:
—Ti de.
6Jesús gudxe leke:
Guluzal yëxhj'a tzala'a yubeel ki barku'a len ka' sën'li'ba bël.
Ka' gluune, ati chi nak ka tir taxikj'ke lubiije yëxhj'a koma bël zian gxhën lek'ba. 7Na' bënni useed kie' Jesús bënni'a nadxi'i'tzki'de, gudxe Pedro.
—¡Xan'ru'a!
Kati byëën'de Simón Pedro ki Xan'ru'a, buakue xhe' len bzale kuine lu nis. 8Ye la'ke bënni useed kie' Jesús guladxiine ra nis'a len barku, zuna'ij'ke yëxhj'a dzë'ë'tzka'ba bël, koma ga'la'z ra nis'a nakua'ke. 9Kati glëtje, gulale'i'de rë' gi' len tuuba bël xhuaaba lau'i, len yët'xhtiil. 10Jesús gudxe leke:
—Guldujua'ba lati'ba bël'a gxhën'li'ba'a.
11Simón Pedro bubeene lu barku len bueije ra nis'a yëxhj'a dzë'ë'tzka'ba bël, tu'gayua' chi'i'nu'uma; zala bua' zian nak'kba yëxhj'a ti grëëza. 12Jesús gudxe leke:
—Guldá gaag'li xhsiil.
Keg tue' bënni useed kie' ruwaaxhj'de gnaab'de Le' nuxh bënni'a, koma nëëzi'kde ki Xan'ru'a. 13Chi nak ka Jesús gbiige'e, gde'le'e yët'xhtiil'a len bnëëdzje kieke len lekz'ka' bnëëdzje'ba kieke bël'a.
14Ni guk tson lzu Jesús rlui'lau'e len bënni useed kie' buudx bubaane lu yëla gut.
Diidza be'leene Jesús, Simón Pedro
15Gdëëd xhsiil, Jesús bnaab'de Simón Pedro:
—Simón, bënni xi'ine Juan, ¿Ba nadxi'ir'du neda ka bënni ni?
Pedro bubi'e kie' diidza:
—Xan, Li' nëëz'du ki nadxi'i'da Li'.
Jesús gudxe le'
—Ben'chi'kba bëku'xhiila kia'.
16Yubl bnaab'de le':
Simón, bënni xi'ine Juan, ¿Ba nadxi'i'du neda?
Pedro bubi'e kie' diidza:
—Ja', Xan, Li' nëëz'du ki nadxi'i'da Li'.
Jesús gudxe le'
—Ben'chi'kba bëku'xhiila kia'.
17Bunn lzu bnaab'de Le':
Simón, bënni xi'ine Juan, ¿Ba nadxi'i'du neda?
Pedro, gzua'yeche'e koma chi guk tson lzu rnaab'de le' xhki nadxi'i'de Le', bubi'e kie' diidza:
—Xan, Li' nëëz'du yugute': Li' nëëz'du ki nadxi'i'da Li'.
Jesús gudxe le'
—Ben'chi'kba bëku'xhiila kia'. 18Le nak'te rea' li' ki kati guku kuidi raku xhou' naar gyiiju ga gna kiu'; san nakati chi guku bënni guul, gliu' no'u len bënni yubl jgakue' li' xhou' len kche'e li' ga ti re'en'du tziiju.
19Len le ni gne' ni, Jesús gdixhjë'e nakxh gatie' Pedro len guune xhën Dios len yëla gut kie'. Buudx'a gudxe le':
—¡Dia'leen neda!
Bënni useed kie' Jesús bënni'a nadxi'tzki'de
20Kati bueikje Pedro ble'i'de ki kuudzu'lke ze'e bënni useed kie' Jesús, bënni'a nadxi'tzki'de, larakz bënni'a grë'e kuiti le'e kati gla'we xhtzë' len bnaab'de Le'; «Xan ¿Nuxh bënni'a rala gdëëde Li' lu naa'ke bunach?» 21Kati Pedro ble'i'de Le', bnaab'de Jesús:
—Xan, ati bënni ni ¿nakxh gak kie'?
22Jesús bubi'e kie' diidza:
—Xhki neda gna kia' za zuaaze ka' nakati gdxin'r dza wëëda, ¿Bixh rki'i Li'? Dia'leen neda Li'.
23Lena'a gze diidza ki bënni useed ni ti gat'kze. Len Jesús ti gne' ki ti gat'kze. Le gne' guk le ni: «Xhki neda gna kia' za zuaaze ka' nakati gdxin'r dza wëëda, ¿Bixh rki'i Li'?»
24Larakz bënni useed ni rdujxaka'lau'e le ni len le' bzooje ley. Len nëëzi'ru ki bliide.
25Le zian'r le beene Jesús; le zian'te nak ki ka nak'tza gzoj'tza'ru ley tu ueaj, rsaka'a ki ti la'ki gich ki gdu yëdz'lyu layoj'k.
Currently Selected:
Juan 21: PZD
Highlight
Share
Copy
Want to have your highlights saved across all your devices? Sign up or sign in
© Sociedad Biblica de México AC
