Lucas 22
22
Tuune diidza nakxh lazëëne Jesús
(Mt 26:1-5,14-16; Mr 14:1-2,10-11; Jn 11:45-53)
1Chi zua ga'la lni ga ta'we yët'xhtiil le ti yu'u le rzaaxh ley, nazi' lei' lni ki Pascua. 2Bënni tunabe'i'de pxuuz len bënni useed xhba kie' Dios tazu'tabë'e nakxh luune ludëëd'de Jesús, san taadx'de bunach'a.
3Na' Bënni Xëwi gyaazie le' Judas, tue' kieke Chin'nu'ke bënni useed kie' Jesús, bënni'a te'ke le' Iscariote. 4Le' yajyue bënni tunabe'i'de pxuuz len bënni nakua'ke lau'i ki gdou', naar luune diidza nakxh gdëëde Jesús lu naa'ke. 5Leke guludziij'de len gulazi'lunaa'ke lunëëdzje dumi kie' Judas. 6Len le' gxhi'lu'ne'e len gzulau'e rzu'rbë'e batxh gunn gdëëde Jesús lu naa'ke kati ti nakua'k bunach.
Jesús raagu'leene xhtzë' bënni useed kie'
(Mt 26:17-29; Mr 14:12-25; Jn 13:21-30; 1Co 11:23-26)
7Bdxin dza ki lni ga ta'we yët'xhtiil le ti yu'u le rzaaxh ley, kati tudëëd'de'ba bëku'xhiila ki Pascua. 8Jesús psë'le'e Pedro len Juan, gudxe leke:
—Gultzajpa'a kieeru xhtzë' ki Pascua.
9Leke gulunaab'de le':
—¿Gaxh re'en'du tzajpa'a'tu ley?
10Jesús bubi'e diidza:
—Kati tzaaz'li lu yëdz, udzaag'li'ne tue' bënni nue'e tu rë'ë nis gultziaj'leene naar gdxin'li yu'u ga tzaazie, 11len gie'li'ne bënni xaani yu'u ni: “Bënni Useed rnaabe: ¿Gaxh de latj ga gagu'leen'ka'ne bënni useed kia' xhtzë' ki Pascua?” 12Le' glui'de lbi'ili lu yu'u zua xhtza' tu latj xhën le chi naba'a naar tzu'u xhtzë'. Gulupa'a ni' le nayaadzji.
13Leke yajake len yajxaka'ke ka'teez gudxe leke Jesús len gulupa'a'ke xhtzë' ki Pascua.
14Kati chi rala tzu'u xhtzë', Jesús len bënni gbaaz kie' gulabë'ke ga rala la'we. 15Jesús gudxe leke:
—¡Chi gze'tzka'laadxa'a zua'leena lbi'ili lu xhtzë' ki Pascua ni, chi nak'r ka si'a yëla gut! 16Koma rgixhji'da lbi'ili ki tir guuna lni ni, nakati gak'r lu yëla rnabe' kie' Dios. 17Na'ar gde'le'e lu ne'e xhiiga len gdëëd be'e yëla dexhken Dios, gne':
—Gulgia'aj len Gulunëëdzj ki lza'a'li; 18koma rgixhji'da lbi'ili ki tir gi'i'ja nup uva ni, nakati giid'r yëla rnabe' kie' Dios. 19Gdëëd ni gde'le'e yët'xhtiil, len gdëëd be'e yëla dexhken Dios bxhuuxhje len bnëëdzje kieke, gne':
—Le ni nak xhpeela'a, le rnëëdzja lu yëla gut nia'a kieeli. Gulgun ki naar tzajnei'li neda.
20Lekz'ka' beene len xhiiga'a, gdëëd gla'we xhtzë', gne':
—Xhiiga ni nak diidza kub le rxënalaadxi'li ati len rën kia' rzi'luna'a, le glaalja nia'a kieeli. 21Ati na'a bënni'a rala gdëëde neda lu naa'ke bunach, zue' ni ga rbë'ru raag'ru. 22Koma Le' Xi'ine Bënni chi nak ka rala gak kie', san ¡bayechi nake bënni'a gdëëde le' lu naa'ke bunach!
23Na' gulazulau'ke tunaabi lza'a'ke nuxh'lke ludëëde le' lu naak bunach.
¿Nuxh nak'r blou?
24Bënni useed guladil'e diidza ki nuxh'lke rala gak're bënni blou. 25Jesús gudxe leke: «Ladj'ke bënni yëdz yubl, bënni tunabe'ke tusaka'zi'ke bënni laadz'ke ka tanaaz kieke, len zala tusaka'ke ka' leke, rzi' lake bënni rak'len bunach. 26San lbi'ili ti rala gak'li bënni ka', bënni nake blou ladj'li rala guune kuine ka bënni ti nake blou len bënni rnabe'e rala guune kuine ka bënni ruune dxin ki lze'e. 27¿Nuxh nak'r blou, bënni rbë'e ga raag'ru u bënni rge'e la'wa'gu ni? ¿Naru keg bënni'a rbë'e ra'we nak're blou? San neda zua'leena lbi'ili ka bënni'a rge'e la'wa'gu.
28»Lbi'ili chi gzua'tekz'li len neda lu bagi'i kia' le gdëëda. 29Lena'a lbi'ili wap'li tu latj ga gnabe'li lu yëla rnabe' kia', ka Xuuza beene len neda, 30len lbi'ili gia'aj'gagu'leen'li neda lu yëla rnabe' kia' len kë'li xhlatj'li blou ki kchuug'be'li ki chin'nu kë'ke xi'in'xhzue' Israel.»
Jesús rgixhjë'e ki Pedro ti si'lu'ne'e ki numbe'e Le'
(Mt 26:31-35; Mr 14:27-31; Jn 13:36-38)
31Gne' lekz'ka' Xan'ru:
—Simón, Simón, Bënni Xëwi chi bnaabe lbi'ili ki kuiibe lbi'ili ka tabiibe xhua'xhtiil; 32san neda chi gutayua' kiu', naar ti gnitiu' yëla rajle' kiu'. Len kati chi bubi'ilaadxu'u, guk'leen'ke bunach tayajle'ke lakua'ke tzutzu.
33Simón gudxe le':
—Xan, neda zua si'na sa'leena li' liidx'gia, len lekz'ka' gat'leena li'.
34Jesús bubi'e diidza:
—Pedro, rea' li' ki na'dza kati zia'a këëdx'ba xi'in'druuz, tson lzu ti si'luno'u ki numbe'u neda.
Za' ga'la gdxin dza ba'zi'
35Jesús bnaab'de leke:
—Kati psë'la'a lbi'ili len ti bia'li dumi, ti bia'li le gia'aj'gaag'li, ti bia'li ye tu kë' lëël'li, ¿Ba byaadzji bi byaadzji kieeli?
Leke gulubi'i'ke diidza:
—Tibi byaadzji.
36Na' gudxe leke:
—Na'a, bënni de kie' dumi rala tzajxhi'e, lekz'ka' le gia'aj'gaag'li; len bënni ti de kie' gia'tuchi, tzajweti'e xhe' len si'e kie' tu. 37Koma rgixhji'da lbi'ili ki rala gak kia' ka'teez nayoj lu Diidza La'ay: “Gulusake'e le' ka tusaka'ke bënni dula” Koma yugute' le nayoj kia' de ki lakgak.
38Leke gulanake:
—Xan, ni de chop gia'tuchi.
Len le' bubi'e diidza:
—Guluzuadxi tir gui'li diidza.
Jesús rui'leene diidza Dios
(Mt 26:36-46; Mr 14:32-42)
39Gdëëd ni Jesús gze'e ka chi naleeb'de ziije Gia'a ki Olivos; len bënni useed kie' zjak'leene le'. 40Kati guladxiine ni', gudxe leke:
—Gulgui'leene diidza Dios, naar ku gbixh'li lu dula.
41Le' gze'e ye lati ga nakua'ke'a ka tzka rdxin tu giaj kati taru'u'ne len bzechu xhiibe naar gui'leene diidza Dios. 42Gne': «Xuuza, xhki re'en'du buslá neda lu yëla rsaka'zi' ni; san ti gak ka ryaazlaadxa'a neda gak ka ryaazlaadxu'u li'.»
43Na' blui' lau'e tue' gbaaz la'ay ki yewayuba, naar ktipe'laadxe'e. 44Lu yëla rsaka'zi' kie', Jesús rui'leene diidza Dios gdu ikj'laadxi'dau'e, len nis yës kie' le glëxhj lyu gulana' ka rna' rën.
45Kati buudx be'leene diidza Dios, gyiije ga nakua'ke bënni useed kie' len budzëël'de leke tas'ke, tzka yëla ruwi'i'ni kieke. 46Gudxe leke:
—¿Bixhkia' ras'li? Gultzas len gulgui'leene diidza Dios naar ku gbixh'li lu dula.
Tazëëne Jesús
(Mt 26:47-56; Mr 14:43-50; Jn 18:2-11)
47Ni zue' rue'e diidza Jesús, kati guladxiine bunach zian, ati Judas, tue' kieke chin'nu'ke bënni useed kie' Jesús, ziije na'nëëre lau'ke, le' gbiige'e ga zue' Jesús len gda'we bxhidu xage'e, 48ati Jesús gudxe le':
—Judas, ¿Naru len tu bxhidu rdëëdu'ne Xi'ine Bënni lu naa'ke bunach?
49Bënni nakua'ke len Jesús kati gulale'i'de le rak gulunaab'de le':
—Xan, ¿Udia'tu len gia'tuchi?
50Len tue' bënni useed beende zi' bënni wendxin kie' pxuuz blou, pchuuge gid'naage 51Jesús gne':
—Gulusan'ke; chi guk.
Len gdaane gid'naage bënni wendxin'a len buune le'. 52Gdëëd ni gudxe bënni tunabe'i'de pxuuz len bënni nakua'ke lau'i gdou' len bënni guul tuzeajni'i'de, bënni'a za'ke zduxi'ke le':
—¿Bixhkia' za'li nua'li gia'tuchi len yaag, ka'kz ka naka bënni gban run'li kia'? 53Yugu dza chi gzua' len lbi'ili lu gdou' len ti gxhën'li neda. San na'a nak dza kieeli, dza kati rnabe' le nak kie' bënni xëwi.
Pedro ti rzi'lu'ne'e ki numbe'e Jesús
(Mt 26:57-58,69-75; Mr 14:53-54,66-72; Jn 18:12-18,25-27)
54Gulazëëne Jesús len guluche'e le' liidxe pxuuz blou. Pedro ziaj'leene le' zitu zitu. 55Ni', gatzj'lau'i lachi'a gulabekie gi' len gulabë'ke ra gi'; len Pedro grë'e lekz'ka' ladj'ke'a. 56Na' tuubi bi nguul wendxin, kati ble'i'bi'ne rë'e ra gi'a, byu'tzkabi'ne len gna'bi:
—Bënni ni lekz'ka' bdzaage Jesús.
57Ati Pedro ti gxhi'lu'ne'e len gne':
Nguul, neda ti numbe'a'ne bënni'a.
58Guk tuchi'i bënni yubl ble'i'de le' len gne':
—Li' lekz'ka' naku bënni lza'a'ke.
Pedro bubi'e diidza:
—Bënni ti nak ka.
59Ye tuchi'i ka gdëëd len ye tue' gne':
—Le nak'te bënni ni lekz'ka' bdzaage Jesús. Koma nake bënni yëdz Galilea.
60Pedro gne':
—Bënni, ti nëëz'da bixh diidza ru'u.
Na'teez, tzal ni rue'e diidza Pedro grëëdx'ba xi'in'druuz. 61Na' Xan'ru bueikje len byue' Pedro, len Pedro gyajnei'de le gudxe le' Xan'ru: «Na'dza kati zia'a këëdx'ba xi'in'druuz, tson lzu ti si' lu no'u ki numbe'u neda.» 62Len Pedro burooje ni' len rënkz grëëdxe.
Tutitj'de Jesús
(Mt 26:67-68; Mr 14:65)
63Bënni nakua'ke tun'chi'ke Jesús tutitj'de le' len tagiine le'. 64Gulusiaj'ke lau'e len tunaab'de le':
—¡Gneya'atzka nuxha' bet li'!
65Len guluza'guludxie diidza gle' le'.
Jesús rdxiine lau'ke bënni blou
(Mt 26:59-66; Mr 14:55-64; Jn 18:19-24)
66Kati chi gyeni, guludzaage bënni guul tuzeajni'i'de, bënni tunabe'i'de pxuuz len bënni useed xhba kie' Dios len guluche'e Jesús lau'ke bënni tabeki'xhbei'de lu gdou'. Ni' gulunaab'de le'.
67—Xhki li' naku le' Cristo gdixhji'i netu.
—Le' bubi'e diidza:
—Xhki si' lu na'a ti tzajle'li neda. 68Len xhki bi gnaab'da lbi'ili ti ubi'i'li diidza. 69Ati na'a sulau'e le' Xi'ine Bënni kë'e kuiti le'e yubeel kie' Dios nape gdu yëla wak.
70Chi nak ka gulunaab'de le':
—¿Ati li'a naku le' Xi'ine Dios?
Jesús bubi'e diidza:
Kuin'kz'li chi gnaali ki leel naka.
71Na' leke gulanake:
—Tir nayaadzji'ru nu bi gna, kuin'kz'ru chi byëëni'ru diidza broj rue'e.
Currently Selected:
Lucas 22: PZD
Highlight
Share
Copy
Want to have your highlights saved across all your devices? Sign up or sign in
© Sociedad Biblica de México AC
