Lucas 8

Nguul glaklen'nu'ne Jesús

1Gdëëd le ni, Jesús gde' yëdz yëdz, gdixhjë'e diidza kub dxia'a ki yëla rnabe' kie' Dios, zjak'leene le' Chin'nu'ke bënni gbaaz kie'. 2Lekz'ka' zjak'leen'nu le' la'knu nguul le' buune'nu ki bë' xëwi len ki baya'. Ladj'knu nguul ni ziaj'nu María, nguul leenu Magdalena, nguul'a buroj lenu gaadx bë' xëwi; 3Lekz'ka' Juana nguul kie' Chuza, bënni'a gu'ta lu ne'e yugute' le de kie' Herodes, len Susana, len ziank'nu nguul tak'leen'nu'ne len le de kiek'nu.

Diidza run lsaki'i kie' bënni raaze

(Mt 13:1-9; Mr 4:1-9)

4Zian bunach ki yugu yëdz gularooje naar lale'i'de Jesús, len guludzaage bunach zian. Na' blaabe kieke diidza run lsaki'i: 5«Tue' bënni brooje guuz len nue'e xhsei le rala gaaze. Len kati raaze, lati xhsei ni glëxhj la nëëz len gululiibe ley bunach len bua' tazuuba glaag'ba ley. 6Lati glëxhj ladj giaj len kati xhsei ni glë'u, gbiidx le ti de gupa. 7Ye lati xhsei ni glëxhj ladj yëtzi len kati glë'u tuuz, yëtzi ni blu'li'i ley len tir gxhën. 8Ati ye lati glëxhj lu yu dxia'a len gxhën, len gbia ka tu'gayua' xhsei tu dxigu.»

Le ni gne' Jesús, len be'e diidza zidzj: «¡Tzka'li zua naag'li guluzenaag!»

Bixhkia' ruune lsaki'i diidza

(Mt 13:10-17; Mr 4:10-12)

9Bënni useed kie' gulunaab'de Jesús bixh re'e'ni gna' diidza run lsaki'i ni. 10Gudxe leke: «Dios runne kieeli lsenz umbe'li le naga'chi' lu yëla rnabe' kie'; san ye la'ke rui'leen'ka'ne diidza len diidza run lsaki'i naar gakati luyue' ti lale'i'de, len gakati layëën'de ti layajni'i'de.

Jesús ruseedx'la'a'ne diidza run lsaki'i kie' bënni raaze

(Mt 13:18-23; Mr 4:13-20)

11»Le ni re'e'ni gna' diidza run lsaki'i ni: Xhsei'a nak ka xhtiidze'e Dios; 12len le bëxhj la nëëz rlui' ka nak kieke bënni'a tayëën'de diidza ni, san riide bënni xëwi rgue' diidza ni lu laadxi'dau'ke, naar ti layajle'ke len ti luláke. 13Xhsei le bëxhj ladj giaj nak ka bënni'a tayëën'de diidza ni len tazi'e gdu laadxi'ke, san ti run zxhëni lui; tayajle'ke tuchi'iz, na' kati rdxin le rzi'be' leke tanitie'. 14Xhsei le bëxhj ladj yëtzi rlui' ka nak kieke bënni tuzenaage, len tzaulaadxi tui'ke latj bagi'i, dumi, len yëla ruzi'xhbei ki yëdz'lyu ni ktzutzj leke, len run ga ti lului'ke nu nak'ke. 15Na' xhsei le bëxhj lu yu dxia'a, nakgak bunach len laadxi'dau'ke dxia'a len li, nakua'ke tuzenaage len tuune ka rna diidza ni, len takua'ke tzutzu, len tak'ke ka dxigu lea gbia tu'gayua' xhsei.

Diidza run lsaki'i ki gi'

(Mr 4:1-25)

16»Nutunu bënni rkie'le'e tu gi', na' kseiije lau'i len ku'e xhani ga rasie', rzue' ley ga nak xhtza', naar ga'ta yeni kieke bënni tayaazie. 17Lekz'ka' nak, gat'ga de le naga'chi' ti tzaalj lau'i, len le rak baga'chi'z ku gnëëz len tzaalj lau'i.

18»Ka nak, guluzenaag dxia'a, bënni de kie' uzi're zxhëni; len bënni ku de kie', le rak'de de kie' udua.»

Xhne'e len bënni bë'che'e Jesús

(Mt 12:46-50; Mr 3:31-35)

19Xhne'e len bënni bë'che'e Jesús guladxiine ga zue' le', len ti benn ladxiine ga'la ga ze', koma rë'tzka bunach. 20Tu bunach gdixhji'i le' Jesús:

—Xhno'u len bënni bë'chu'u nakua'ke rayu'u, te'en'de lale'i'de li'.

21Le' bubi'e diidza:

Bënni'a tayëën'de xhtiidze'e Dios len tuune ka rna, bënni'a nak'ke xhna'a len bënni bë'cha'a.

Jesús rbeki'dxie' bë' bduunu

(Mt 8:23-27; Mr 4:35-41)

22Tu dza, Jesús gyaazie lu barku len bënni useed kie', len gudxe leke:

—Tziaj'ru tzala'a nis.

Gulagie'le'e nëëz zjake, 23len tzal tadëëde lu nis ni, Jesús guxe. Na' gyas tu bë' bduunu xhën lu nis ni, len gzulau ryaaz nis lu barku len yëla naban kieke gzua banaadx. 24Na' guluspaane Jesús, gle'ke le':

—¡Bënni useed! ¡Bënni useed! ¡Wat'ru!

Jesús gyase len gnabe'i'de bë' len nis rbixh'rtul len ley gulakua' dxiiz len grë'dxi. 25Gdëëd guk le ni gudxe bënni useed kie':

—¿Gaxh gne' yëla rajle' kieeli?

Ati leke, len yëla raadxi len yëla rubaani tunaabi lza'a'ke:

—¿Nuxh nake bënni ni, rnabe'i'de bë' len nis len tuzenaagi le'?

Bënni'a yu'u le' bë' xëwi lu yëdz Gerasa

(Mt 8:28-34; Mr 5:1-20)

26Guladxiine tzala'a nis lu xhyu'ke bënni Gerasa, le de tzala'a ki yu ki Galilea. 27Kati bëtje lu barku Jesús, brooje lu yëdz ni tue' bënni yu'u le' bë' xëwi len dutzaage Jesús. Chi gdzei rde' xhgiid'ze len ti zue' tu yu'u, zue' ladj ba. 28Kati ble'i'de Jesús, bzechu xhiibe lau'e, len bisku'e:

—¡Bixh rala'a kiu' xi'ine Dios xhën'te! ¡Ratayui'da li' ti ksaka'zi'u neda!

29Gna' ki, koma Jesús chi gnabe'i'de bë' xëwi'a uroj le' bënni ni; zian lzu bë' xëwi'a rzën'tzka le'; len zala bunach tuuga'ke ni'a'ne'e len du gia naar kë'e dxiiz le' rchuuge, len bë' xëwi'a rche' le' latj yu biidx. 30Jesús bnaab'de bë' xëwi'a:

—¿Bixh leu'?

Bë' xëwi'a gna:

—Zian'te lea'.

Gna ki koma le zian bë' xëwi'a gulayaaz le' bënni ni, 31Bë' xëwi ni glatayui le' Jesús ti ksë'le'e ley ga chul. 32Nakua'ba lu gia'a ni ziank'ba kuch tadaaba taag'ba, bë' xëwi'a glatayui le' gnëëdzje lsenz layaaz le'ek'ba kuch ni, len Jesús bnëëdzje lsenz. 33Bë' xëwi'a guluroj le' bënni'a len gulayaaz le'ek'ba kuch ni, ati kuch ni gulaxhunj'ba le'gia'a dxi'it ga de nis xhën, len ni' gulaye'pi'ba nis.

34Bënni tun'chi'ke'ba kuch ni, kati gulale'i'de le guk ni, guluxhunj'ke len yajdixhjë'ke lu yëdz len nup nakua' tunn dxin gixi. 35Bunach gularooje zajyu'ke bixh guk. Len kati guladxiine ga zue' Jesús, guludzëël'de bënni'a guluroj le' bë' xëwi rë'e xhni'e Jesús, nakue' xhe' len zue' dxia'a; len leke glaadxi'de. 36Len bënni gulale'i'de le guk ni, gulagixhjë'ke ka guk bueake bënni'a gyue'e bë' xëwi. 37Yugute' bunach ki yëdz Gerasa gulazulau'ke glatayui'de le' Jesús tziije ga yubl, koma leke glaadxi'tzki'de. Na' Jesús gyaazie lu barku len buze'e. 38Bënni'a guluroj le' bë' xëwi'a gutayue' gnëëdzje lsenz tziaj'leene le', ati Jesús gnabe'i'de le' jga'ane, len gudxe le':

39—Buaj liidxu len gdixhjë yugute' le Dios chi beene kiu'.

Bënni'a gyiije gdu yëdz len gdixhjë'e le Jesús beene kie'.

Nguul we' len bi nguul'du kie' Jairo

(Mt 9:18-26; Mr 5:21-43)

40Kati Jesús budxiine zuze'e tzala'a nis, bunach guluzi'e le' len yëla rudziiji, koma yugute'ke tabëëz'ke le. 41Na' bdxiine bënni le Jairo, bënni rnabe'e ki yu'u useed. Bënni ni gyechue' xhni'e Jesús len gutayue' ki tziije liidxe, 42koma lazdui'bi tuubi bi nguul'du kie' zuaabi, ka chin'nu iizi'bi, chi raki'kz gat'bi.

Tzal yu'e nëëz Jesús, rnëëz'de tu'ki'ke le' bunach'a zjak'leen le'. 43Ladj bunach ni ziaj'nu tuunu nguul chi guk chin'nu iz re'i'nu, ti ruwi'i'nu rën, len chi ben'ditji'nu gdu le de kieenu len bënni tu'un'ke bënni we', nutunu guk un lenu. 44Nguul ni bdxin'nu kuudzu'le Jesús gdan'nu rui'i laari xhua kuudze'e, len na'teez bui'i rën'a na' bueak'nu. 45Na' Jesús bnaabe:

—¿Nuxh gdan neda?

Le nutunu gxhi'lu'ne'i gdan le', Pedro gne':

—Bënni useed, bunach tu'ki len tudxiiga'az ka li'.

46Ati Jesús yubl gne':

—Zua nu gdan neda, koma guk'be'i'da ki broj neda yëla wak.

47Nguul ni, kati guk'be'i'nu ki ti gunn jkachi'lau'nu, rxhiz'nu gyaj'nu len bzechu xhiib'nu xhni'e Jesús, pxua'lep'nu lau'ke yugute'ke bixhkia' gdan'nu'ne, len nakxh guk bueak'te'nu. 48Jesús gudxe'nu:

—Xi'ina yëla rajle' ben ga bueaku. Buaj len yëla rë'dxi.

49Ni zue' rue'e diidza Jesús, kati bdxiine tue' gbaaz len gudxe bënni'a rnabe'e ki yu'u useed:

—Bi nguul kiu' chi gut'bi; tir gzu'ne bagi'i bënni useed.

50Ati Jesús byëën'de len gudxe le':

—Ti gaadx'du, gyajle'z, len bi nguul kiu' ueak'bi.

51Kati bdxiine yu'u ni, ti bnëëdzje latj nuul tzaaz len le', tuuze Pedro, Santiago, len Juan len lekz'ka' xuuz'xna'bi bi nguul'du ni. 52Yugute'ke tabëëdxe len tulëënde nia'a kieebi, ati Jesús gudxe leke:

—Ti këëdx'li, bi nguul'du ni ti nat'bi, ras'zbi.

53Yugute'ke gulaxhiidx'de le', koma leke nëëzi'kde ki nat'bi. 54Ati Jesús gde'le'e naa'bi len gne' zidzj:

—¡Bi nguul'du gyas!

55Len leebi bubaami lu yëla gut, na'teez gyas'bi ati Jesús gudxe leke: Gulgui'bi le gaag'bi. 56Xuuz'xna'bi tubaani'tzki'de; Ati Jesús gnabe'i'de leke nutunu lagixhji'de le guk ni.

Currently Selected:

Lucas 8: PZD

Highlight

Copy