Ro i Som Muro 15
15
Shwai i Ka'ti Man ta Yerushalima
1Shini ɗufali ta Judya si yes Antyok, sin kofti shunukan nyai, “A kpang si kwen tu fota ngga' ima anggut i Mosis lak ta. Angga' ima hu wa wis ti bum ta nai je.” 2Mai kol ii ma Pool hu Barnabas si mas uɓet mafwashi, si dul findel hu somi. Unai si kin Pool hu Barnabas hu shini som koltifai yi, ɓa si wa Yerushalima kyel i som muro hu mbayai, ɓa si at si lulal mai hai.
3Som i koltifaiyi si ti'us ya, si ka' fisel si sa ta ta' ti Fonishya hu Samarya. Ta findeli sin lak ti ngga' ima som ima a Ju kwa, si hatat ta. Findel mai kin shak shunukan si pipel na mulut fwet. 4Myan ima si ru ta Yerushalima, som koltifai hu Som Muro hu mbayai, si shwaiyus ti yes. Unai Pool hu Barnabas si lakus ngga' ima DeeƁwe mas ro ti sin ta shak. 5Unai shini som koltifai ima si ta ɓwaiyi i Farisiyawa, si luk fit si ni, “A kpang ima a Ju kwa, si masus mukwen, si kinus kpang u mas aɗeng ima anggut i Mosis lak.”
6Som i muro hu mbayai, si shwai ɓa si at si lul mai hai. 7Takfai ti uɓet hyang, Pita luk fit nyus, “A shunun, hu shangi ta si hwer hai DeeƁwe benun na saa yuti ti nyai, ii na fo amen ɗufal ima a Ju kwa, si wa hal ti muro maɗesi si fa mwawei. 8DeeƁwe ima shang mulwat i ɗufal shak, kof nyai matus ta ngga' ima fas Rin Masapai, fota ngga' ima fa kan ta. 9Yis kaarti mute asikan hu sin kwa. Sapa mulwat ames ya, ɓurti si fa mwawei. 10Ɓurti andi, ami kin hu mba ti DeeƁwe ti kinti kol si som koltifai mii hai, ima kan hu demukan ka mba ha'i wet ya? 11Wayou! Kan ka fa mwawei, a mal i Deembai Yeso bum kan, fota ngga' ima bumus ta.”
12Unai shak ɗufal si te cakat sin hal ti aɗeng ima Barnabas hu Pool si laksus, si ɗamam i shok na fo hu i lum ti fo ya, ima DeeƁwe masi ta ra yusti, wa kyel i ɗufal ima a Ju kwa.
13Myan ima si mbit findeli, unai Jemis ni, “A shunun, hal hun na. 14Siman lakan ngga' ima DeeƁwe ti bya' kof matɓwet ames ta, haar shini ta saa ti Ramam, matus ii ɗufal ames. 15Mai wa kiga' hu findel ima som shit si lak, fota ngga' ima si worong ta,
16“ ‘Takfai ti mai i wa muhumkyel,
i hum ta' ti wur i Devid ima nggulus ta,
I wa muhum zan ti korom ames fit,
17Ɓa anggum i ɗufali si far Deembai,
hu Ramam shak ima i ben.
Deembai lak, yis ima mas ɗamam mii.’#15:17 Ɗing huni hwak: Emo 9:11-12.
18Si shang ɗamam mii tasi hwer hai.
19“Ɗingi amen, kan ka kin shum nasi Ramam kwa, ima si ɓweti hatat yes kyel i DeeƁwe. 20Ka worongus kaada ka lakus nyai, kan si cu alwyat ima si ɗi harkyeli kwa, si mas maleng ta arak i zuruk wi, hu lo i ɗam ima si hwirish, kan si cu wash kwa. 21Ɓurti ai hwer, som kofiti si anggut i Mosis hai, sin mbya'ani ta shak mareha, hu shak ashwaha, hu shak Mwen ti Lafos.”
Findel in Mbayai wa Kyel Som i Koltifai
22Unai Som Muroi hu mbayai i som koltifai, akul hu shak som koltifai si ɗingi ɗatus ɓa si ben shini ta saa yusti, ɓa i roos wa Antyok akul hu Pool hu Barnabas. Unai si ben Judas ima si lai i Barsaba, hu Sila, ima a mbayai ta saa ti shunukan. 23Si tukus ti kaada tima ti ni,
Na kyel i shunun,
Som Muro hu mbayai i som koltifai,
Wa kyel som koltifai ima a Ju kwa,
ta Antyok hu ta' ti Sirya hu ti Silishya.
Ni ma too'.
24Ni wis muro nyai, shini na saa nin ti si yes sima ringsu ya ti findelal ames, si kinu tirim hai. Nin ni ro ɗeng ti musut i findelal mii kwa. 25Ɓurti andi, shak asinini ni ka' man si ɗamami hai, ni ɗingi ɗat ɓa ni ben shini ni roos yes kyel amu, hu akul hu myayus aminin Barnabas hu Pool, 26ima si fa hai asus ɓurti asum i Demukan Yeso Kristi. 27Ɓurti andi, ni ro Judas hu Sila yes kyel amu. Sin si wa laksu ti ɗamami fo si fo.
28Ɗat Rin Masapai ta si ɓwi, angga' ima nin hwak ni ɗingi ta nai, kan si kinsu kinggat nin hai ima si ɓin ɗamam mii kwa, 29ka hu cu alwyat ima si ɗi harkyeli kwa, hu wash, hu cwai ti lo ima si hwirish lai. Ka hu mas arak i zuruk kwa. Na hu fwang haisu ya na ɗamam mii wi, hu mas aɗeng mandere ndai. Lafos hun cala.
30Unai si roos ti kaadai si wa ti Antyok. Myan ima si suɓut som koltifai yi, si fas kaadai. 31Myan ima ɗufali si mbe' kaadai, si jakak fwet ɓurti njeng na mulut ima si yes ti. 32Judas hu Sila sin hwak a som shit, si taɓak ɗufal, si lak findelal hyang i fati njeng i fwaran wa kyel i shunus, som koltifai. 33Takfai tima si te ta kyeli i myan ndyong, unai shunukan si ti'us cala, si humkyel ta kyel i ɗufal ima si rohus.#15:33 Shini kaadahai si ti 34 Sila ɓwet ɓa u te ta Antyok. 35Unai Pool hu Barnabas si tak mute ta Antyok i mukonan ndyong. Sin hu shini ɗufali hyang sin kofti shangi hu but ti findel i Deembai.
Pool hu Barnabas si Matkaar
36Takfai ti mukonan shini, Pool lak Barnabas ni, “Yakun ku humta ashwaha ima ku but findel i Deembai ta, mukonan mufai, ku wa ku to' shunukan.” 37Barnabas yis ɓweti ɓa si zan Jwon ima si lai ii Mak, ɓa si wa tikul. 38Unai Pool ɗingi ɗat ɓa si wa akul hu Mak kwa, ɓurti ai honus ta Pamfilya, nggwes i cwai ti wei ti masti ro hu sin. 39Uɓeti kolus shaal manjengi si matkar. Ɓurti andi, Barnabas zan Mak si lang kwang i ham, si wis Saiprus. 40Unai Pool ben Sila, ɗak shunukan si ti'us ya, sin fwal ti Deembai ɓa u fwangus saa ti mal ames. 41Si sa ta ashwaha i Sirya hu Silishya, sin fati som koltifai njeng i fwaran.
Currently Selected:
Ro i Som Muro 15: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
