Ro i Som Muro 16
16
Timoti Kolfai ti Pool hu Sila
1Pool yes Derbe ɗak wa Listra, wis makoltifai nin ta, ma asum Timoti. Nasus a moti Judya a mu koltifai hwak, dees a maɗufal i Girik. 2Shunukan ta Listra hu Ikonyum si lak muro maɗesi si Timoti hai fwet. 3Pool yis ɓweti ɓa si at akul hu Timoti, unai zanus wa masus mukwen. Ɓurti shak Ju ima si mati mute ta mbayai i ashwai, si shangi dees a maɗufal i Girik.
4Myan ima Pool hu Sila sin nggaari ti ashwahai, sin lak ti som koltifai ti ɗamam ima Som Muro hu mbayai si ɓetti ta Yerushalima, ɓa som koltifai si masti ro. 5Angga' ima som koltifai si hum wis ti njeng si fati mulut ta nai, ngang si cu wei ti wis ti ɗufal i hai.
Pool Ɗing Maɗufal i Makidonya nin ta Fiɗyat wi
6Pool hu myayus sin ati ta ashwaha i ngga' i Firija hu Galatya, ɓurti Rin Masapai shahus mba ti findel i Deembai ta Asya. 7Myan ima si ru ta anggwe' i ta' ti Misya, si masi ɓa si lang ta ashwa ti Bitinya, shak ta andi Rin i Yeso honus ɓa si wa kwa. 8Unai si sas ta ɓwai i Misya, si ɗorus ta Trowas. 9Ta saa ti fo'i, Pool mas fiɗyat, ɗing maɗufal nin ta Makidonya, te mangra yis fwal nyai, “Ya Makidonya, ha bum nin.” 10Takfai tima Pool mas fiɗyat mai, fo abet ni kin hai ni ka' fisel wa Makidonya, ɓurti ni zan nyai, DeeƁwe lai nin, ɓa ni wa ni kolus muro maɗesi ndai.
Hatat i Ulidya ta Filipi
11Ta Trowas ni lang kwang i ham ni ka' fisel mangra ni wa Samotires, mwen ti ɓu ni wa Nyapolis. 12Ta te i ni wa Filipi tima ti ta ɓwai i kaitat ti Rom, ayit ti mii ndyi ti ashwa ti ta' ti Makidonya. Ni mas mukonan ndyong ta kyeli. 13Mwen ti Lafos, ni lang ya ta kwap i ashwai, ni wa foi ɗara, ashang ɓa ni wis kyel ima si fwalan ti DeeƁwe ta. Ni te amunan, ni findel arof ima si suɓut ta kyeli. 14Andek ta saa ti som ima si hal ti findeli, mu asum Ulidya a ndii muwoor. Mu juwil ti arom macef fwet ya. Yit amu cwai ti DeeƁwe afut, ta ta' ti Tyatira. Deembai ɓuut mulut ya, ti mat aɗeng ima Pool lak. 15Myan ima si masut batisma hu som i wur amet, unai ti fwal nin ti ni, “Na hu ɓwet nyai yin a mu fati mwawei si Deembai hai, yehun hu tena wur amen.” Ti lweshesh nin hai, unai ni ɓwet.
Pool hu Sila ta Wur i Shitam
16Nin mweni ndai, ni ka' fisel wa kyel i fwal ti DeeƁwe, unai ni shwai hu yamwan yere nin mu rin i mburuhat. Som i yamwan moti si wis ti cef fwet si ro i mburuhat ima ti masti ɗufali. 17Yamwan moti ti ka' koltifai asinini hu Pool hwak, yit taanja ta raafoi nyai, “Mii ɗufali a yarai i DeeƁwe Mambaitat, sima laksu fisel ti wis ti abum!”
18Ti cu wei ha ti i mukonan hyang, unai Pool rafat mulut ya, hatat lak rin mafwashii ni, “Ti asum i Yeso Kristi, langa ya na wii yuti, hona yut!” Fo abet si myani rini honut.
19Myan ima som i yamwan yerei, si ɗingi fisel ti wis ti cefi ti ndusut, unai si ka' Pool hu Sila, si kpukpongus si watus ta kyel i woor, ɓa si totus ɓur ta mabel i mbayai. 20Myan ima si watus ta mabel i som totti ɓur, si ni, “Mii ɗufali a Ju, si kin ashwa amukan ta wii puɓwar wii. 21Si kofti lakan nin tima fisel asut ti yut akat hu ngga' ima kan som Rom ka wa mati kwa fweng.” 22Unai ɗufal si suɓutus hai shak, som ɓur si gwyakus arom ya, ɗak si kin si masus andash. 23Takfai tima si masus andash fwet, si kinus ta wur i shitam, ɗak si lak maɗing ti wur i shitami ɓa u fwangus ndere. 24Myan ima mai muroi ru ta kyel ames, wa kinus ta wii-wii i wur i shitam, ɗak shu sisai ames ta wii i kunggwal ima si ɓwahi ɗak si ti' ya ti shitam.
25Saa ti fo' Pool hu Sila sin fwal ti DeeƁwe hu sin lak ti adorai i ha' ti asum i DeeƁwe fit, anggum i ɗufal ima sin ta wur i shitami sin halsus. 26Fo abet, si mas mbai muroi i fisha nin, ima mahuhur i wur i shitami ros shak hwak. Unai fwai i mahwam i wur i shitami si matɓus, shitam i ɗufal ima si ta wii wuri si hwetus. 27Myan ima maɗing ti wur i shitami ɓusho, ɗing fwai i mahwam i wur i shitami a wuri shak. Unai re' awal ya ta fatal wi, yis ɓweti foor ti haisus ya, ɓurti maɗingi fota som ima si mata shitam wii shak si titalus. 28Unai Pool cu i fo ta raafoi ti ambas ni, “Ka ha mas haisa afol kwa, ni mana shak asinini!”
29Unai maɗing ti wur i shitami ni ɓa si yes ti man u ɗing ti kyel. Lang ti tital wa fur ta mabel i Pool hu Sila lo' ames yis yus muro. 30Unai langtus ya ta saikyel ɗak lul ni, “A washash, i wa masi atini i wis abum ya?” 31Unai si ni, “Fa mwawei si Deembai Yeso hai ha wa wis ti abum, ha hu wur ama shak.” 32Unai si mba findel i Deembai wa kyel ames, yis hu shak ɗufal ima si mata ta wur ames. 33Ta saa ti fo'i, maɗing ti wur i shitami kon zansus wa sas afolali ya. Fo abet si masus batisma, yis hu som i wur ames shak. 34Unai maɗing ti kyeli langtus ta wur ames, fas cwa. Yis hu som wur ames shak si hya ti jakak, ɓurti fa mwawei wa kyel i DeeƁwe shak.
35Mwen ti ɓu, som i tot ti ɓuri si ro mbayai i som ɓwol wa kyel i maɗing ti wur i shitami ta, ti muro nyai, “Cat ta ɗufal ani ii ra.” 36Maɗing ti kyeli lak Pool ni, “Som i tot ti ɓur si ro muro nyai ɓa i cat tu ii ra. Ɓurti andi, mwashi rang hun hu ka' fisel. Hu wu cala.”
37Unai Pool lak mbayai i som ɓwoli ni, “Si ndash nin ta shishat i ɗufal kaciwa' tot sinin ɓur ndere, ɗak si hwiti nin na wur i shitam wi. Nin a fe i wufen i Rom kwani? Mwashi si ɓwet ti ɓa si cat nin ii ra cakat i mufot haa? Wayou! Andi kwa! Ɗat si yes ti haisus si cat nin ii ra si ti' nin ya.”
38Unai som i ɓwoli si wa si lak som i tot ti ɓur findeli. Myan ima si hali nyai Pool hu Sila a fe ta' ti Rom, myanat ka'us. 39Si yes si fwalus ɓa si ka' agung. Unai si catus ii ra, si ti'us ta wur i shitam, sin fwal sus ɓa si hon ashwai. 40Takfai tima Pool hu Sila si rangya ta wur i shitami, si wa ta wur i Ulidya. Ta kyeli si shwai hu shunukan, si taɓakus, sin fasus njeng i fwaran, ɗak si wis.
Currently Selected:
Ro i Som Muro 16: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
