Ro i Som Muro 17
17
Puɓwar Luk Fit ta Tasalonika
1Myan ima Pool hu Sila si sa ta Amfipolis hu Apolonya, si ru ta Tasalonika, kyel ima mare i Ju mata. 2Unai Pool lang ta kyeli, fota ngga' ima mana masani ta, Mwen ti Lafos sa taat, yis kofsus ti ta Kaada i DeeƁwe. 3Yis kofsus ti, yis nyai, a awei Kristi a kpang u wo shum, u luk fit ta fiyai. Pool ni, “Yeso ima i laksu ti mai, ayis mii Kristi.” 4Unai shini ɗufal i Ju hu i Girik, ima si masti DeeƁwe ro hu mbayai i arof shini hyang, shak asussi si mat findel ima Pool hu Sila si lak, si fut hai hu sin.
5Unai som Ju si zan nadon, si suɓut fei se shini ta kyel i woor. Myan ima si suɓut shak, si lang twakan ti kikyal sin raafo ta wii ashwai. Si wa fo i wur i Jason, sin far ti Pool hu Sila, ɓurti ɓa si watus ta wei i ɗufal. 6Myan ima si rang ta si wisus kwa, unai si kpukpong hu Jason hu shini shunukani, si watus ta kyel i mbayai i ashwai. Sin raafo nyai, “Ɗufal mii si tuk ti puɓwar na naya shak, sin mii si yes nanati hwak. 7Mwashi Jason matus ta wur ames. Shak asussi si nggyalan ti anggutat i Makai Siza ya, sin nyai, makai nin mana ima asum ames a Yeso.” 8Myan ima ɗufal hu mbayai i ashwai si hal mai findeli, mulwat ames luk fit. 9Si kin Jason hu anggumi si tal cef i matsus, ɗak si honus si wis.
Pool hu Sila ta Bereya
10Myan ima fo' ti mas, som koltifai si ti' Pool hu Sila si wa Bereya. Myan ima si ru, si lang ta mare i Ju. 11A som i Bereya si ɓin i Tasalonika mute maɗesi, ɓurti si mat muro i DeeƁwe ra apil, sin bene ti kaadaha ngang, ɓa si ɗingi ahun aɗeng ima Pool ma laki awei. 12Ɓurti andi, Ju hyang si fa mwawei, hu shini ndiyai ti arof i Girik ta aryai hyang hwak. 13Myan ima Ju i kyel ta Tasalonika si hali nyai, Pool ma mba ti findel i DeeƁwe ta Bereya, si wa ta kyeli hwak, sin cwai i fo sin shuk ti ɗufal ya. 14Fo abet som koltifai si ti' Pool ya wis ta foi yiir, unai Sila hu Timoti si kat ta Bereya. 15Arya ima si ti' Pool ya, si kolus ta Atens. Si te muhumkyel, Pool fas muro wa kyel i Sila hu Timoti, ɓa si masi kaang si wisus, unai si ka' fisel.
Pool ta Atens
16Myan ima Pool yis shwai sus ta Atens, wis tirim hu kikyauwat na mulut fwet, ɓurti ɗing ashwai hyas ti mare i harkyel. 17Ɓurti andi, cu wei ti kofsus ti ta mare i Ju, hu shini som i Giriki, ima si ti myanat ti DeeƁwe fo. Si kwafansus ti ngang ta kyel i woor, hu shak ɗufal ima si mata. 18Shini Epikuri hu Sitoyik som ima si ti shangi manggyongi, si fur masti uɓet hu yis. Shini si lul, “Ma toti tazo mai, ami ma ti' ti hai laki ya?” Shini si ni, “Fota Pool ma findel tasi shini ɓwehai.” Si lak mai ɓurti Pool ma mba ti muro maɗesi si Yeso hai hu muluk fit ta fiyai wi.
19Unai si zanus si wa ti ta kyel i shwai i kaya, ima si lai ii Aryopagus, si nyus, “Ni ɓweti ɓa ni shang kofiti mamwai ima ha ma mbai amai! 20Ɓurti ha yes ti findel nin ima manin hai ii mamwai fweng. Ni ma ɓweti ɓa ni shang aɗeng ima hama laki.” 21Shak ɗufal i Atens hu mwalmwat ima siti mute ta kyeli, si zan myan si mataa ɓurti si ɓin ɓweti findel si ɗama mamwai hai.
22Unai Pool lukfit ta saa ti suɓut i Aryopagus ni, “A ɗufal i Atens! I ɗingi ta fiselal shak hun a som ima hu ɓwet koltifai fwet. 23Myan ima yin ɗa'at nggaari na wii ashwai, i kin shit loo i ɗing ɗamam ima hu cwaisus afut. I wis kyel i tor ti kuna ima mati worong mai, ‘Wa Kyel I DeeƁwe Ima wa' ni Shangus.’ Mwashi, aɗeng ima hu ma cwaisus afut ani, shak ta ngga' ima hu shangus kwa, ayisyi i wa laksu ti.
24“DeeƁwe ima mas naya hu shak ɗamam ima si na wii amet, ayis mii Deembai i fit hu fisha. Yis tyai ta wur ima si ta' ti ra i ɗufal kwa. 25Angga'i nai hwak yis far bum i ɗama ta kyel i maɗufal kwa, yis mati tirim kwa. Ɓurti ayis ti haisus fa shak ɗufal mupwet, hu lafos, hu anggum i ɗamami shak. 26Ta lo' i maɗufal andek mas shak ɗufal i ramam ima si hya na nayai shak. Lef myan ɓur sus, hu kikyal ima si wa kiga' ɓa ramami si te ta. 27DeeƁwe masi andi, ɓurti ɓa si farus, ashang si tamba kikyal si wisus. Shak ta andi, DeeƁwe mati maleng na kyel amukan kwa. 28Fota ngga' ima ɗeng lak ta ni, ‘A ta wii yusti ka mati mupwet, ka ɗa'at ta, ka mati mute amukan ta.’ Fota ngga' ima maworong amu lak ta nyai, ‘Kan a fe ames.’
29“Ɓurti andi, na ka mii fe i DeeƁwe, ɗat ka zan lu' asus ka kaan ti ɗama nin kwa, ɗama nin ima si masi ti afyai manzyuwani, ima a maɗufal masi ti shingat ames. 30Ai hwer, DeeƁwe kin shit si mute i maɓin mai kwa. Mwashi, malai ti ɗufal shak ti kikyali ɓa si fwal shwaiti mafwashani ya, si humkyel ta kyel i DeeƁwe. 31Lef mwen tima ma wa toti naya ɓur i mwawei, ben maɗufal ima u tot naya ɓuri. DeeƁwe kof mwawei wa kyel i ɗufal shak, ta fisel ti zan ti maɗufali fit ta fiyai wi.”
32Myan ima si hal Pool findel si muluk fit ta fiyai, shini asussi si totus gbaf hai, shini hwak si ni, “Ni ɓweti ha hum lak sinin findel mai.” 33Unai Pool lang ya ta kyel i suɓuti, wis. 34Shini ta saa yusti si kolfai ti Pool, si fa mwawei. Ta saa yusti a hu Diyonisyus, andek ta saa ti mbayai i Aryopagus, hu mbor nin hwak mu asum Dimaris hu shini hwak.
Currently Selected:
Ro i Som Muro 17: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
