Ro i Som Muro 21
21
A At i Pool wa Yerushalima
1Takfai tima ni honus, ni rang ta kwang i ham ni ka' fisel mangra wa Kos. Mwen ti ɓu ni cu wei ni wa Rodes, ta Rodes ni cu wei ni wa Patara. 2Myan ima ni wis kwang i ham ima wa ta' ti Fonishya, unai ni rang ta ni ka' fisel. 3Myan ima ni ɗing Saiprus, ni honut na ra i ukutyal aminin, ni cu wei ti wa ni ru ta' ti Sirya. Unai ni jak kyel ta Taya, ɓurti A nanati si wa jak ti ɗamam i kwang i ham ya. 4Ni wis som koltifai ta kyeli, ni te ta mukonan pyoron. Ta kyeli Rin ima mata wii yusti, si fwal Pool kan wa Yerushalima kwa. 5Myan aminin si ndok ɓa ni hon kyeli, unai ni cu wei ti ɗa'at aminin. Shak som koltifai hu arof ames ta fei si ti' nin ya ta ashwai, ni ni mwa' ta fo i ham ni fwal DeeƁwe. 6Takfai tima ni lak ɗiyai matkaar, ni lang ta kwang i ham, sin si humkyel ta wur.
7Myan ima ni hon Taya, ni ru ta' ti Tolemayis, ni to' som koltifai, ni mas mukon andek ta kyel ames. 8Mwen ti ɓu ni lang ni wa Kaisarya, ni ɗorkyel ta wur i Filip. Ama but ti findel i DeeƁwe, ima mii andek ta saa ti ɗufal pyoron ima si ben ti bya'. 9Yis mati femes afwar ɓaras ima wa' si kunggo, si lakan ti findel i som shit. 10Takfai tima ni mas mukonan awen ta kyeli, unai mashit nin ma asum Agabus yes ta Judya. 11Myan ima Agabus yes ta kyel aminin, unai zan fata' ti Pool, no' ti ra ta sisai amesi ya, ɗak ni, “Aɗeng ima Rin Masapai lak mai, ‘Angga' ima Ju i Yerushalima si wa no' ti ma fata' moti ta mai. Ɗak si ha'us si fa ɗufal ima a Ju kwa.’ ” 12Myan ima ni hal mai, nin hu ɗufal ima ni ta kyeli, ni fwal Pool ɓa u hon wa Yerushalima. 13Unai Pool humuskyel ti findel ni, “Ami kin hu kawayai ya? Ami kin hu kinsun futut ya? I fa hai a mano' je kwa, i fa hai ɓa i mot ta Yerushalima ɓurti asum i Deembai Yeso.”
14Myan ima ni mba woti hai ames wet, unai ni kat cakat, ni ni, “Ka hon Deembai u mas aɗeng ima ɗatus.”
15Takfai ti mukonan mii ni sinzam haisinin ni ka' fisel wa Yerushalima. 16Shini som koltifai ta Kaisarya si ti' nin, si kol nin ta wur i Minason kyel ima ni nin wa muɗorkyel ta. Yis a maɗufal i Saiprus, andek ta saa ti som koltifai i bya'.
Pool ru Yerushalima
17Myan ima ni ru Yerushalima ɗufal som koltifai si mat nin ra apil-apil. 18Mwen ti ɓu Pool hu nin anggumi ni wa ɓa ni ɗing Jemis, shak mbayai i som koltifai si shwai ta kyeli. 19Takfai tima Pool to'us, lakus nggya-nggya shak ɗamam ima DeeƁwe masi ta wii i ɗufal ima a Ju kwa, ta saa ti ro ames.
20Myan ima si hal mai, si fa DeeƁwe mbaitat. Unai si lak Pool si ni, “A nusus aminin, ɗingai, ɗufal hyang ti nggal ndikak buu ima a Ju si fa mwawei. Shak asussi si mati kinti hai si hya ti anggut. 21Si lakus nyai, ha kofti shak Ju ima si ta saa ti Ramam nyai, ɓa si hon anggut i Mosis. Si ni ha lakus kan si mas fe ames mukwen, hu ɗamam i lakan amukan kwa. 22Ami ka wa masi ya? Te a kpang si wa hali nyai ha yes, 23ɓurti andi masa aɗeng ima ni wa laksa. Ni ti ɗufal ɓaras nati ima si zan shiɗat. 24Hara ɗufal mii hu wa tikul, hu sapa haisu ya, tala cef ɓur sus shak si soos hihai i sapa ya. A ti andi shak ɗufal si wa shangi nyai, shak findelal ima si lak si ha hai a fyarat. Si wa ɗingi nyai hati hai sa ha hya ti anggut.
25“Mwashi, si mangga' i ɗufal ima a Ju kwa ima si fa mwawei, ni worongus kaada, ni lef findel ya nyai, kan si cu lo ima si lef harkyeli kwa, kan si cu wash kwa, kan si cu funat i lo kwa, kan si mas ɗamam i arak i zuruk kwa.”
26Mwen ti ɓu Pool haar ɗufali si wa si sapa hihai asus ya tikul. Unai lang ta Wur i DeeƁwe ɓa u lang ti mwen tima myan i sapa ti wa hya ta, a mwen ti fai i ɓweti i mulut ɓur sus shak.
Si Ka' Pool ta Wur i DeeƁwe ta Yerushalima
27Myan ima mukonan pyoroni si kat ndyong i hya, shini Ju ta Asya si ɗing Pool ta Wur i DeeƁwe. Unai si yaf suɓut i ɗufali, si ka' Pool. 28Sin raafo sin nyai, “A som i Isar'ila, mas hun nin abum! Maɗufal mai a ma ɗa'at ti shak kikyali yis sya'an ti som mukan, hu anggut amukan, hu mai kyeli. Mas ima ɓin mai, yes ti Girik na Wur i DeeƁwe, zuruk ti kyel masapai ya.” 29Si lakan andi ɓurti ai si ɗing Pool akul hu Trofimus, maɗufal i Afisa ta wii i ashwai. Ayis nai kin si ɗingi fota Pool lang ta Wur i DeeƁwe akul hu yisyi.
30Shak ashwai ti rikitut, ɗufal si rangya ta shak kikyal ti tital. Si wa si ka' Pool si kpukpongus mulang ti ya ta Wur i DeeƁwe, fo abet si vo fwai i mahwam ya. 31Sin ti' ti hai ɓa si forsus ya ndai, unai findel ru ta kyel i mbai i som ɓwol i Rom nyai, Yerushalima ti rikitut ti ambas. 32Fo abet ni ma tuu haar som ɓwol hu mbayai, si rang ta ɗufal wi ti titalal. Myan ima ɗufali si ɗing som ɓwoli hu mbaiyi, si hon ndash ti Pool.
33Unai mbai i som ɓwoli wa ka' Pool, kin si no'us ti shitam apil. Ɗak lul ta ɗufali yis a aweya, ami masi ya? 34Shini ta saa ti suɓut i ɗufali sin findelal met-met. Unai mbai i som ɓwoli wis hai i findeli kwa, ɓurti ti rikit ima ma wa, unai kin ɓa si kol Pool ta kyel i ro i som ɓwol. 35Myan ima Pool ru si kyel i muɗu, ɗufal sinin gɓwuk ɓa si ndashus. Ima kol som ɓwoli si ha'us ya ta kyeli. 36Suɓut i ɗufal ima si kolfai sin cwai wei ti jolok sin nyai, “For hun ya! For hun ya!”
Pool Findel Suɓut i Ɗufali
37Si kat ndyong i mulang ti Pool ta kyel i ro i som ɓwoli ndai, unai lak mbaiyi ni, “Na ha ɓwet, ɓa i findela haa?”
Unai mbaiyi ni, “Kai! Ha shang alis i Girik ani? 38I ha' sa ha a ma Masar ani, ima wilyal mufai dul puɓwarai. Ayis ima ai kol ɗufal nggal ɓaras ta ya, ima si fwaran ti ɗufal kwaa?”
39Unai Pool humuskyel ti findel ni, “Yin a maɗufal i Ju ta ta' ti Tarsus i ta' ti Silishya. Yin a al i ndii ti ashwa mu taafi. I fwal sa, hona na i findel ɗufal mii.”
40Unai fas myan, Pool te mangra ta si kyel i muɗu hai, zan ɗufal ra fit ɓa si te cakat. Myan ima si te cakat, unai findelus ti alis i Ju.#21:40 Ahun maɗesi Hibru; Andi hwak ta: Mat 22:2.
Currently Selected:
Ro i Som Muro 21: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
