Ro i Som Muro 22
22
1“A shunun ta hu Deehi, hal hun aɗeng ima i wa laksu.” 2Myan ima si hali findelus ti alis i Ju, unai si te cakat.
Ɗak ni, 3“Yin a maɗufal i Ju, si alun ta Tarsus ta' ti Silishya, i ngye na ashwa moti. I mas ambe' amen ta ra i Gamalyel, i wis ɓwai ti shishat ya si shak anggut i washash amukan. I mati nadon i masti DeeƁwe ro, fota ngga' ima shak asui hu masi ta kwai. 4I kof som koltifai ti Fisel moti ya, ta fwaransus yai. Yin ka'an ti arya ta arofi yin hwyayan ti ta wur i shitam wi. 5Mbai i kocokak hu mbayai i som ka'ti man si shang aɗeng ima i laki. I wa i mat kaada ta kyeli ames wa kyel i shunus ta Damashkus. I wa ta kyeli ɓa i yes ti ɗufal ta shitam wi yes Yerushalima, ɓa si lefus ɓur.
Pool Lak Ngga' ima Hatat Koltifai ti Yeso Ta
6“Yin saa ti wa ndai, i kat ndyong ti Damashkus, sang ren, unai mbai i kweneng nin ta fit matun kinun ta saa. 7I fur ta fisha i hal la nin yit nyaisun, ‘Sool! Sool! Ami kin ha kofsun ya ya?’ 8I shen lai, i ni, ‘A ha aweya a Deembai?’ Unai nyun, ‘Ayin Yeso maɗufal i Nazaret ima ha kofi ya.’ 9Som ima ni tikul, si ɗing kwenengi kaciwa' hal ti la ti mati findel sun. 10Unai i lul, ‘Ami i wa masi ya a Deembai?’ Deembai lakun ni, ‘Lukka fit ha lang ta Damashkus, a ta te'i si wa lak sa shak aɗeng ima DeeƁwe kin ɓa ha masi.’ 11Kwenengi kinun i nzyauwun, ɓurti andi myayun i ma'at si ka'un ra si lang tun ta Damashkus.
12“Maɗufal nin ma asum Hananya mata. A ma myanat ti DeeƁwe fo fwet, ma ka'ti anggut mweret, shak Ju ima si mati mute ta ashwai si fa sus ngye fwet. 13Yes tyon mangra hai, nyun, ‘A nusun Sool ɗinga kyel!’ Fo abet shishat amen si matɓuya i ɗingus. 14Unai nyun, ‘DeeƁwe i washash amukan bena ɓa ha shang aɗeng ima ma ɓweti, ɓa ha ɗingus yis ima ii Manderei, ha hal findel ta fo ames hwak. 15Ɓurti ha wa mute ii ma mba ti findel ames wa kyel i shak ɗufal, si aɗeng ima ha ɗingi hu ima ha hali. 16Mwashi, ami ha kat ɗingi ya? Lukka fit, si masa batisma, laiya asum i Deembai, ayis ma wa shwai sa mafwashani ama ya.’
17“Unai i humkyel ta Yerushalima. Myan ima yin fwal ta Wur i DeeƁwe, unai shishat amen si maɓu i ɗing ɗama fota fiɗyat. 18I ɗing Yeso yis nyaisun, ‘Rwa kang, ha tital na Yerushalima, ɓurti ɗufal si wa mat ti aɗeng ima ha wa laki si yin hai kwa.’ 19Unai yin i nyus, ‘A Deembai, sin ti haisus si shangi i wa ta shak mareha, i ka' ɗufal ima si fa mwawei si ha hai, i nwa'us, i ndashus hwak. 20Myan ima si for Tifanus ma mba ti findel ama, yin ti haisun yin mangra ta kyeli, yin vosus mas si aɗeng ima si masi, yin i te ii ma ɗing ti arom i som ima si forsus.’ 21Unai Deembai nyun, ‘Lukka fit ha wa, i wa rosa ta maleng, wa kyel i ɗufal ima a Ju kwa.’ ”
Pool Maɗufal i Wufen ti Rom
22Ɗufal si shu mwal sin hal ti findel ames, yes myan ima lak findel mai, unai si mat raafo si ni, “For hun ɗama i gbya'i! Ɗat u pwet kwa!” 23Unai si cu wei ti taanja sin raafo, sin hwyayan ti arom ames ta fit, sin haar ti ɓura ta fit. 24Unai mbai i som ɓwoli, kin ɓa si lang ti Pool ta foti ashwa i som ɓwol. Ni ɓa si ndashus, ɗak si lulus fo, ami kin suɓut i ɗufal mi si yus raafo hai ati ya? 25Myan ima si no'us ɓa si ndashus ndai, unai Pool lak mbai i som ɓwol ima ma mangra ta kyeli ni, “A kiga' si ndash maɗufal i wufen ti Rom, kaciwa' si totus ɓur haa?”
26Myan ima mbai i som ɓwoli hali andi, unai wa kyeli mbai ames nyus, “Ami ha ɓweti masi ya? A maɗufal i wufen ti Rom wa.”
27Unai mbai i som ɓwoli wa kyel i Pool lulus ni, “Lakana mwawei, ha a maɗufal i wufen ti Rom haa?”
Unai Pool ni, “Hei,”
28Unai mbaiyi nyus, “Yin i tal ti cef hyash, ɗak i wis mute ii maɗufal i wufen.”
Pool ni, “Yin si al lun nasi wufeni.”
29Ɓurti andi, som ima si fut hai ɓa si lulus fo, si herus takfai kang. Yis mbaiyi, myan ima shangi nyai Pool ama Rom, myanat ka'us, ɓurti tuu no'us.
Pool ta Mabel i Kaya
30Mwen ti ɓu, mbai i som ɓwoli ma ɓweti shang ti kyas i findel ima Ju si ti ta hai i Pool, kin si lai mbayai i kocokak hu shak kaya ɓa si shwai. Ɗak hwet Pool ya, kinus te mangra ta wei yusti.
Currently Selected:
Ro i Som Muro 22: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
