Ro i Som Muro 23
23
1Pool shu kaya shishat hai ɗak nyus, “A shunun, i hya ro amen wa kyel i DeeƁwe ti ambe' maɗesi i shak mulut amen yes kwai moti.” 2Ti hal ti mai, Hananya mbai i makocok kin som ima sin mangrai nggas ti Pool ɓa si pa foi. 3Unai Pool nyus, “Mwe asai, DeeƁwe ma wa pa sa, madish i bang ima si fyal ti ta' mapeli nin! Hama amun ta te'i totsun ɓur si ngga' ima anggut lak ta. Hati hai sa ha nggyel anggut ya, mwe asai, ima ha kin si pan.”
4Ɗufal ima sin mangrai ta nggas ti Pool si ni, “Awinoo! Ha se' makocok mbai i DeeƁwe haa?”
5Unai Pool ni, “A shunun, i shangi nyai, ayis mii mbai i makocok kwa. Ɓur ti si worong ta kaada i DeeƁwe nyai, ‘Kan ha se' makai i ɗufal kwa.’#23:5 Ɗing huni hwak: Mul 22:28. ”
6Pool shangi nyai, shini a Sadukiyawa, anggumi a Farisiyawa, zan la fit lai kaya ni, “A shunun, yin hwak a Mafarisi, al i Mafarisi. I mana fo i ɓur, ɓurti kintiɓwi si mulukfit ta mot wi.”
7Myan ima lak mai, unai uɓet ti lang saa ti Sadukiyawa hu Farisiyawa, suɓut i ɗufal si matkaar apil. 8Sadukiyawa si kof si nyai, na ha mot hawa mulukfit kwa, si fa mwawei si som lu' hu rinan kwa. Farisiyawa si fa mwawei si shak ataati. 9Unai shaal hwet ta fisha, shini som kofiti si anggut ima a Farisiyawa si lukfit si ɓweng sai, si mas uɓet ti njeng, nyai “Ni wis ɗama mafwashi si mai maɗufali hai kwa,” Sin si ni, “Nan a nin rini, ahun a malu' nin findelus hee?”
10Myan ima shaali lukfit ti njeng, mbai i som ɓwoli mwenus nyai, kandok si gwyak Pool ya. Unai lak fe i ro ames ɓa si ɗor si zan Pool ya ti njeng si watus ta foti ashwa i som ɓwol.
11Tafo' Deembai te Pool mangra hai nyus, “Njenga fwet! Ngga' ima ha mba asum amen na Yerushalima, angga'i nai ha wa mbai ta Rom hwak.”
Si Ɓeti Ɓa si For Pool
12Mwen ti ɓu som Ju si suɓut hihai asus, si ka' man si shiɗat nyai, si wa cwai ti cwa hu woti ham kwa, na si mbit for ti Pool tawe. 13Som ima si zan shiɗat mai si kol ɗufal hure ɓaras. 14Si wa kyel i mbayai i kocokak hu mbayai i ashwai si ni, “Ni shiɗat ni wa cwa ti cwa kwa, ni wa woti ham kwa, na ni mbit for ti Pool tawe. 15Ɓurti andi, mwashi hun kaya i ashwa, lak hun mbai i som ɓwol ɓa u yes ti Pool na wei yuti, ti shingat hai ta nyai, hu ɓweti ɓa hu bene findeli, ɓa hu wis kyas i mwawei nasi hai i findel mai. Nin ni no' mulwat ya ni wa forsus ya kaciwa' ru nanati.”
16Myan ima al i tusus ti Pool hal aɗeng ima si ka'ti man i hai, unai wa ta foti ashwa i som ɓwol ɓa u lak Pool findeli ya. 17Unai Pool lai nin mbai i son ɓwoli nyus, “Kola zalang mai ta kyel i mbai amu, mati findel ima ma wa laksus.” 18Unai zanus wa ti ta kyel i mbai mbaiyi nyus, “Pool, mashitam ani laiyun, fwalun ɓa i kol zalang mai na kyel ama, mati findel ima ma wa lak sa.”
19Unai mbaiyi ka' rai ali, dulus ya si ɓwai andek, ɗak lulus fo ni, “Ami ha ɓweti laksun ya?”
20Zalangi ni, “A Ju si ɓetti nyai si wa fwal sa ɓa ha kolus Pool wasan ti shingat hai ta nyai si ɓweti ɓa si hum bene ti findeli, ɓa si wis kyas i mwawei ta si yis hai. 21Ka ha ɓwet kwa, ɓurti ɗufal mii si ɓetti ɓa si fotus ta fo i fisel shwaisus. Si ɓin hure ɓaras, si ni si wa cwai ti cwa kwa, si wa woti ham kwa, na si mbit forsus ya tawe. Mwashi, ti si sinzam hihai asus sima shwai sa ɓa ha ɓwet kyek je.”
22Unai mbai i som ɓwoli dul zalangi mwal nyus, “Ka ha lak ɗeng ha nyus, ha lakun mai findeli kwa.” Ɗak ti'us ya.
Si Tuk Pool Wa Kyel i Makunggul Feliks i Kaisarya
23Unai mbai i som ɓwoli lai som ɓwol apil i Rom nyus, “Sinzam hun haisu ɓa hu wa Kaisarya tafo' shitam karfu'. Hu wa akul hu som ɓwol ndik apil, hu som ɓwol i mbarai hure pyoron, hu som ɓwol ti agasas ndik apil. 24Fahun mbarai ima si wa zan ti Pool si kolus ta kyel i makunggul Feliks. Kan ɗama wisus kwa.”
25Mbai i som ɓwol worong kaada haati,
26Na kyel i Kalaudyus Lisyas, wa kyel i Dee makunggul Feliks. I ma too' ma hyangi.
27Maɗufal mai, Ju si ka'us, si kin hai ɓa si forus kat a ndyong si for ya, unai i lang ti som ro i ɓwol amen i matus ra, ɓurti i hali yis a maɗufal i Rom. 28Ɓurti andi, i masi ɓa i hal tirim ima si ti se'sus, unai i watus ta mabel i kaya ames. 29I wisi sin se'sus si findel i anggut ames i Ju, mafwashi ima si no'u si hai kol ima si no'us hu forus kwa.
30“Myan ima si lakun nyai, si ka' man ɓa si for maɗufal mai ya, a yis nai fo abet i ro tus yes kyel ama. I kin som ima sima se'sus ɓa si yes si lak tirim ames hu mafwashi ima si wisus ti na mabel ama.”
31Unai som ɓwoli si zan Pool tafo' ta ngga' ima si lakus ta, si kolus ta kyel i Antifatiris. 32Mwen ti ɓu si hon som ɓwol i mbarai si cu wei ti watus, sin anggumi si humkyel ta wur. 33Myan ima som ɓwol i mbarai si ru ta Kaisarya, unai si fa makungguli kaadai, si hon Pool ta ra ames.
34Myan ima makungguli mbe' kaadai, lul Pool nyai, yis mii nggi ɓwai i ashwai ɗak. Myan ima hali ni mii ta Silishya, 35unai nyus, “I wa hal ti findel ama, myan ima som i se' sa si yes.” Unai makungguli kin ɓa si fwang Pool ta wur ima Makai Herod ta'.
Currently Selected:
Ro i Som Muro 23: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
