Ro i Som Muro 24
24
Ju Si Kol Pool ta Kyel i Ɓur
1Takfai ti mukon hara, mbai i makocok ma asum Hananya, ɗor ta Kaisarya akul hu shini mbayaiyi, hu nin mandereti ma asum Tetulus, si lang ti findel i ɓur si Pool hai ta mabel i makunggul. 2Myan ima si lang ti Pool ta, Tetulus fur lak ti findel si Pool hai ta mabel i makunggul Feliks nyai,
“A dee maɓan, a ɓursa ni wis mute cala i myan hyang, ɗing ti wei ama yes ti mushen maɗesi nasi ɗufal hai. 3A dee Feliks, ɗufal shak ti kikyali sima palangsa kaciwa' anggwe'. 4Ɓurti kandok i cwa myan ya, ima ɓweti fwal sa ɓurti musut i mute maɗesi ama, kina mwal ha hal aɗeng ima i wa lak sa cwak-cwak. 5Ni wis maɗufal mai mati puɓwar hyang, a yis kin rikit na saa ti shak Ju na naya. Ayis mii mbai i som koltifai i fyarat, ima si lai i Manazaret. 6Aɗeng ima ɓin mai rafat shak ayis nai, kin ɗama i zuruk si Wur i DeeƁwe hai, a yis kin ni ka'us.#24:6 Shini kaadahai si ti 7 Ɗak mambai ames ma asum Lisyas, yes ti ro i njeng fwet vyamus ya na ra kanti, 8 kin som ima si se' susi yes na wei yuti. 8Na ha bene hus ti haisa, ha wa shang ti mwawei si shak ɗamam ima ni ma nyai masi.” 9Som i Ju si vohus fai si findeli, ti nyai, angga'i nai.
Pool Ɓweng Haisus ta Mabel i Makunggul Feliks
10Myan ima makunggul fa Pool myan ɓa u findel unai ni, “I wa ɓweng ti haisun ti pipelat ma mulut, ɓurti i shangi ha mas wilyal hyang ha toti puɓwarai i mii ɗufali. 11Na ha bene ha wa wisi nyai, ɓin mukonan hure mulang apil kwa, ima i wa Yerushalima ɓa i cu DeeƁwe afut. 12Ɗufal ima si yes ti findel amen mii si wisun yin uɓet hu ɗeng kwa, ahun si wisun yin kinti ɗufal tirim ta Wur i DeeƁwe, hu mareha, hu wii i ashwa kwa fweng. 13Mwashi ɗamam ima si laki na hai yunti na ha lulus fo, si wa far ti foi findeli wet.
14“A ɗama andek i ɓwet i mat, ayis nai i koltifai ti DeeƁwe i hu washash aminin, ta makoltifai ti Fisel moti, tima ɗufal mii sima nyai, ‘A fisel ti fyarat.’ I fa mwawei si shak aɗeng ima mata worong i anggut, hu worong i som shit i DeeƁwe. 15I kintiɓwi si DeeƁwe hai, fota ngga' ima sin si kin ta, ti nyai som munderei hu mufwashi myan si yes, shak si wa muluktus fit ta fiyai. 16Ayis kinun ngang i ti ambe' maɗesi ta mabel i DeeƁwe hu ɗufal.
17“Takfai ti shini wilyali, i humkyel na Yerushalima ɓa i kol ɗufal amen ima si ti jyel mal, ɓa i mas kuna ta kyel i DeeƁwe. 18I ma saa ti masti ɗamami si wisun ta Wur i DeeƁwe. Myani i mbit sapa ti haisun ya ndai, yin i ma ahweni kaciwa' suɓut i ɗufal, i kin ɗufal ta tirim wi kwa. 19Shak ta andi, shini Ju ta ta' ti Asya, ima sin ta kyeli, ɗat si yes tus na mabel ama. Na si wisun ti ɗama nin ima kol ii tot ti ɓur, si lak. 20Na andi kwa, ɗufal ima sima nati ɓa si lak, na si wisun i nggyel anggut ya, myan ima i te mangra ta wei i kaya. 21A hun a ɓurti findel andek tima i lak, myan ima yin mangra ta wei yusti waak? I lak ti njeng i ni, ‘A ɓurti findel i muluk fit ta fiyai kin si totsun ɓur na wei amu kwai.’ ”
Si Fwang Pool ta Kaisarya
22Unai Feliks ima shang ɗamam hyang si Fiseli hai, ha' ɓuri fit wa wei nyai, “Myan ima Lisyas mbai i som ɓwol yes, ɗak i lefu ɓuri ya.” 23Feliks kin mbai i som ɓwol i Rom ɓa u fwang Pool, kan ɓal kinsus shit hai fwet kwa, ɓa u hon myayus si kolus bum i tal ti myatat.
24Takfai ti mukonan, Feliks yes akul hu mborsus Durusila, yit a muti Ju. Unai ro muro si lai Pool yes, ɗak kin mwal hal sus yis findel si fati mulut si Kristi Yeso hai. 25Myan ima Pool mba findel si mute manderei hai, hu mute i kami loo hu mwen i totti ɓur ti ti yes, myanat ti ka' Feliks unai lak Pool ni, “Findeli ndok andi mwashi! Ha wa tawe. Na i wis myan i wa laisa.” 26Shak ta andi, ma kintiɓwi Pool ma wa fa sus cef i voti fo, ayis kin Feliks wo laisus anggas-anggas yis mataa hu yis.
27Takfai tima wilyal apil si lang ta, Porkyus Festus wis mute ii makunggul i fo i Feliks. Ɓurti Feliks ma far ti asum maɗesi ta wei i Ju, hon Pool ta shitam wi.
Currently Selected:
Ro i Som Muro 24: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
