Ro i Som Muro 26
26
1Agripa lak Pool ni, “Si fa myan ɓa ha ɓweng haisa.” Unai Pool ha' ra ta fit, fur findel ni,
2“I ti aweng fwet, a Makai Agripa Herod, ɓurti ɓa i te mangra na wei yuti kwai, ɓa i ɓweng haisun si shak findelal ima som Ju si lak na hai yunti, 3fota ngga' ima ha shang shak lakan i Ju hu findelal ames. Ɓurti andi ima fwalsa ha ka' agung ha halun.
4“Som i Ju shak si shang musut i mute ima i masi yin ɗiri ii zalang, ta si bya' i mupwet amen ta si ta' asun, hu Yerushalima yes kwai. 5Si shangun i myan hyang, si wa lak ti findel na hai yunti na si ɓwet, fota ngga' ima i mas mute i Mafarisi ta, ti zan ti ɗamam vwelelel fwet si mangga' i koltifai amukan ta. 6Mwashi i ma mangra na mabel amu, ɓa si mban, ɓurti ti hya ti kintiɓwi ima DeeƁwe lak hu washash aminin. 7A mai kintiɓwi ima gung hure mulang apil i Isar'ila si kintiɓwi i hai, ɓa si ɗing hya ames, mai aɗengi kin si mas DeeƁwe ro fo' ta reni. A makai, a ɓurti kintiɓwi mai som Ju sima tyorsun. 8Ami kin mayu hai ti shum ɓa hu ɓwet nyai, DeeƁwe ma wa muluk fit ti som ima si mot ta fiyai ya?
9“Ti mwawei yin ti haisun, ai i zan na mulut yunti a kiga' i mas ɗamam hyang i ha' ti wei ti asum i Yeso maɗufal i Nazaret. 10A aɗeng ima i masi ta Yerushalima mai. Tasi kaitat i mbayai i kocokak i kin som sapai hyang ta shitam wi. Myan ima sin fwaransus ya, yin i fas voti mas takfai ti mai. 11I zan myan yin wayan ta mareha yin lef sus ɓur, i masut fwet ɓa i kinus kpang si mas gbya' ti asum i Yeso. Ɓurti i mas futut ti sin hwak fwet, kinun i kolfai asussi wa ta ashwaha hu ta'a' ɓa i kofus ya.
12“Mwen nin ndai, yin wa musut i ɗamami ta Damashkus ti andok hu kaada ima mbaiyai i kocokak si ron ti. 13A dee makai, sai ren yin ta fisel, i ɗing kweneng nin ta fit, ima ɓin ɓwe muka' matun hai, kinun ta saa hu myayun ma'at. 14Ni fwaar ta fisha shak asinini, unai i hal la nin ti alis i Ju ti nyun, ‘A Sool! A Sool! Ami kin ha kofsun ya ya? Ha fati haisa shum ta fisel ti zan ti wei si aɗeng ima i ɓweti masi.’
15“Unai i ni, ‘A ha aweya, Deembai?’
“Unai Deembai nyun, ‘Ayin Yeso ima ha kofsus ya. 16Lukka fit mwashi. I pwaka hai ɓa i kina ha masun ro, ha wa lak ti ɗamam ima ha ɗingi si yin hai, hu ɗama ima i wa kofsa ti yes wei. 17I wa bumsa ya ta ra i som ama hu ta ra i som ima a Ju kwa. I ma rosa ta kyel ames. 18Ha wa ɓwaisus shishat ya, ha hatus ta maɓing wi yes kweneng, ta kaitat i Shatan yes kyel i DeeƁwe. A ti andi si wa wis ti shwaiti mafwashani ya, hu kop akul hu shak som sapa ɓurti si fa mwawei si yin hai.’
Pool Lak Roha ima Masi
19“Ɓurti andi a Makai Agripa Herod, i nggwen i masti aɗeng ima i ɗingi ta fiɗyat wi ta fit kwa. 20Ti bya' i fur lak ti findel i DeeƁwe wa kyel i ɗufal ta Damashkus, ɗak ɗufal ima si mata Yerushalima, hu shak ima si mata Judya, hu Ramam hwak. I mba findel nyai ɓa si fwal shwaiya si hatat wa kyel i DeeƁwe, si mas ɗamam ima kof si shen. 21Ayis kin som Ju si ka'un ta wii i Wur i DeeƁwe ɓa si forun ya. 22Shak ta andi, DeeƁwe bumun yes kwai moti, ayis kin i ma mangra nati ɓa i mba wa kyel i mbayai hu muyayi shak. I ma lak ti a aɗeng ima som i mashit i DeeƁwe hu Mosis si lak ta, 23nyai, a kpang Kristi u wo shum, u te ii bya' ima lukfit ta fiyai. A ti andi ma wa yes ti kweneng ta kyel i shak ɗufal, Ju hu Ramam.”
24Pool yis saa ti ɓweng ti haisus ndai, unai Festus taanja ti ambas lak ni, “A Pool, hai asa ti hatatut ani? Ambe' i kaadaha ɓal kina ha wangana haa?”
25Unai Pool ni, “I wangan kwa a dee Festus, aɗeng ima i laki a mwawei ti shangi amen. 26Makai shangi ti shak ɗamam mii, i ma laksus mulut asun andek. I fa mwawei nyai, shang ɗamam mii shak, ɓurti ɗamam mii si masus ii mufot kwa. 27A Makai Agripa Herod, ha fa mwawei si som i shit i DeeƁwe hai haa? I shangi ha fa mwawei.”
28Unai Makai Agripa Herod lak Pool ni, “Ha ma ɗingi nyai, na saa ti myan ndyong mii, ha wa dul ti ambe' amen ɓa i hatat ii Krista ani?”
29Unai Pool ni, “A saa ti myan ndyong hu mahyangi je kwa. I fwal ti DeeƁwe ɓa a ha kyek je kwa, naɗin shak ɗufal ima si halsun kwai, si te fota yin, a shitam mai kyek kan ɗeng amu te ti kwa.”
30Unai makai, hu makungguli hu Ubanis, hu shak som ima sima amunan tikul ta kyeli, si lukus fit, si wis. 31Myan ima si rangya ta kyel i ɓuri, si lak ɗiyai si ni, “Maɗufal mai mas ɗama nin ima kol ɓa u wa mano', ahun ɓa si forus ya kwa.”
32Unai Makai Agripa Herod lak Festus ni, “Naɗin maɗufal mai ha' ɓur ames fit wa kyel i Makai Mbai kwa, naɗin si catus ii ra.”
Currently Selected:
Ro i Som Muro 26: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
