Ro i Som Muro 27
27
Pool Lang ta Kwang i Ham wa Rom
1Si ɓetti ɓa ni lang ta kwang i ham ni wa ta' ti Italya, unai si kin Pool hu shini fe shitami ta ra i mbai i som ɓwol i Rom nin, ma asum Julyos, andek ta saa ti som ɓwol i Agostus. 2Ta Adramityum, ni lang ta kwang ima ma fisel i wa ashwaha i ta' ti Asya. Ni ka' fisel akul hu maɗufal nin ma asum Aristakus, maɗufal i Makidonya ta Tasalonika.
3Mwen ti te ɓwai nin muru ta Saidon, Julyos mas Pool maɗesi, honus wa kyel i myayus ɓa si fas ɗama i tal ti myatat. 4Ta te'i, ni lang kwangi hwak, sei yis wei ti nin, ɓurti andi ni sanin ta takfai i Saiprus, kyel ima wa' sei njeng ta. 5Takfai tima ni pis yiir mbai ima ma nggas ti ta' ti Silishya hu Pamfilya, ni ru ta Mira i ta' ti Lisya. 6Ta te'i mbai i som ɓwol i Rom wis kwang i ham i Alekzandira ima ma wa ta' ti Italya, unai shunin ta wi. 7Ni mas mukonan hyang nin ati loo, ni masut a kabuta ɗak ni ru Kinidus. Myan ima sei honin ɓa ni ka' fisel aminin kwa, ni sa ta takfai i ashwai i Kirit, ima si ɗing ɗiyai hu ta' ti Salmoni. 8Ni sa ta fwai i yiiri a kabuta, ni ru ta kyel nin ima si lai i Kyel i Lafos Maɗesi, ta nggas ti ashwa i Lasya.
9Ɓurti ni foor myan ya hyang, a ati tyos ti tirim, ɓurti myani a dala i wil, kol ima Mwen ti Kuna i Mafwashi#27:9 Mwen ti Kuna i Mafwashi Mai a got ima yias ta dala i wil, myan ima se yis ii manjengi fwet. ti langut ta. Unai Pool taɓakus ni, 10“A ɗufal, i ɗingi a at amukan a mai ma wa mute ti tirim, hu rafat hu dun ti ɗamam hyang na kwang i ham, ta mupwet amukan ni hwak.” 11Unai Julyos, mbai i som ɓwoli nggwes i hal ti findel ima Pool lak, hal a findel i matuk ti kwangi hu i makwang i hami je. 12Ɓurti si mata kyel ima ɗat ɓa si cu humbil ta kwa, unai ɓwai mbai ames si ɓwet ɓa ni cu wei ti a ati. Si kin hai nan si ru ta Foniks ɓa si cu humbil ta. Foniks a kyel i shwai i kwangang i ham ta ta' ti Kirit tima ti ta ɓwai i muɗor i ɓwe ti ndak, hu ɓwai mafiti i ɓwe ti ndak.
Mbai Rumung i Sei ta Yiir Wi
13Myan ima sei fur fu'i ta ɓwai wuri ti ndyong ti ndyong, unai ɗufal si ɗingi fota je ndai, unai si dul shitam ima ma ka'ti kwangi ya si ka' fisel. Unai si sa ta ɓwai i ta' ti Kirit nggas ti fo i yiiri. 14Kaciwa' ni yash, unai se manjengi nin nyan rumung fu' ta ɓwai mafiti, jik ta ta' tima ham nggarut ya.
15Myan ima sei pa kwangi, kol ima sei ɓin njeng i kwangi, unai ni ɗingi wet ni hon sei cu wei ti tuk sinin. 16Unai sa tinin ta takfai ti foti ta' nin tima ham nggar ya, mu asum Kauda, ta kyeli sei ni ri'-ri'. A ti kabuta ni dul kwang i ham ali yes nggas ti kwang i ham mbaiyi. 17Takfai tima si dul kwang i ham ali si lang ti ta kwang i ham mbaiyi, unai si nwa' munggya' si ranggal ti kwang mbaiyi ya, ɓurti kandok u ɓakus. Si ɗor ti kyel ti mashir i kwangi ya, si hon sei yis tuk ti kwangi. Si masi andi ɓurti si myanat kandok sei hwitus ya tasi njor i Siritis. 18Ɓurti hami cus wei ti wanggan, yis gicik sinin ti ambas, mwen ti ɓu si fur haar ti ɗamam ima mata kwangi wi sin hwyayan ti ya ta wii ham.
19Tasi mwen mutaat, ti ra ames si hwyai ti ɗamam i ro i kwangi ya shak ta ham wi. 20Myan ima ni mas mukonan hyang kaciwa' ɗing ti ɓwe hu ɓyar, se manjengi cu wei ti ndash sinin, unai ni zan ɓwi ya nyai ni wa mupwet kwa.
21Takfai tima ɗufal si mas mukonan hyang kaciwa' cwai ti cwa, unai Pool lukfit te mangra ta saa yusti, nyus, “A ɗufal, naɗin hu hal findel amen ima i nyu, ka hu lang ya ta Kirit kwa, naɗin hu fwang haisu na tirim mai wi, hu dun ti ɗamam mii shak. 22Mwashi ka'ti mulut, ɓurti ɗeng amu ma wa dun ti mupwet ames kwa, a kwang i hami kyek je kawa duni. 23Ti fo' i makon malu' i DeeƁwe ima yin ames, ima i masus ro, te mangra na nggas yunti, 24nyun, ‘Pool, ka ha mwen kwa. A kpang ha wa mute mangra ta mabel i Makai Mbai. DeeƁwe masu maɗesi ames, ma wa bum ti ɗufal ima hu ati tikul shak.’ 25A ɗufal, ka' hun mulut, ɓurti i fa mulut ta kyel i DeeƁwe nyai, ma wa mute ta ngga' ima lakun ta. 26Shak ta andi, a kpang kwangi u nggok si njor nin hai, ima mati ham fwet kwa.”
Ɓaakan i Kwang i Ham
27Ti fo' i mukon mu hure mulang ɓaras, sei yis hai tuk sinin ta Yiir i Adryatik. Nggas ti sang fo' som i tuk ti kwang i hami si ni ashang si ru anggasi ti foi ham. 28Unai si mba kinggyongat i hami si wisi kol sai ndik andek ta hure apili (120). Myan ima ni cu wei ni hyer ndyong, si hum mbai si wisi kol sai hure karfu' (90). 29Ɓurti myanat nyai kandok ni nggok si afyai hai, unai si ak kaɓal ii ra ɓaras ta takfai i kwangi ɓa u hon ɗa'at. Si shu shishat sin fwal ti DeeƁwe nyai maɗin mwen ti ɓu kang. 30Som i tuk ti kwangi si kin hai ɓa si titalus. Unai si jak kwang i ham ali nin ya ti shingat fota si wa jak ti a kaɓal ya ta wei i mbai kwangi. 31Unai Pool lak som ɓwol i Rom hu mbai ames ni, “Na ɗufal mii si tena wii i kwangi kwa, hu wa mupwet kwa.” 32Ti hal ti findel mai, unai som ɓwoli si lyaf munggya' i kwang ali ya, si cat ira ta ham wi wis.
33Mwen ti kat ndyong i ɓwai, Pool fwalus shak asussi ɓa si cu cwa, ni, “Kwai, mukon hure mulang ɓaras ndai hun ta tirim wi, hu cu ɗama kwa. 34Ɓurti andi i fwalsu cuhun cwa ɓa hu wis njeng i mupwet amu. Hai ti wa han ti ɗeng kwa.” 35Takfai tima lak findel mai, unai zan foloki palang DeeƁwe ta wei i ɗufal shak, nggyal fur cwai. 36Shak si wis njeng i mulut, si cu cwa. 37Nin shak ɗufal ima ni ta wii i kwang i hami ni ma ndik apil ta hure pyoron tau taani (276). 38Takfai tima si cu si kaf, si dya' kwangi kinggat ya, si hwiti kukwal i cwai ya ta wii ham.
39Mwen ti ɓu som i tuk ti kwangi si shang ta' ima si ta kwa, shak ta andi si ɗing kyel muɗesi nin mu njor. Unai si kin hai ɓa si wa ti kwangi ta kyeli, ɓa si jwak ti njori, na ma wa maas. 40Unai si lyaf munggya' i shak kaɓali ya si hon ta ham wi. Si myani hwak si hwet mano' i ɗam i hatat ti kwangi ya. Unai si zan mashir ima sita wei i kwangi ta ngga' ima sei u tukus wa wei. Unai si kin hai wa ta foi ham. 41Kaciwa' ti si ru unai Kwangi nju njor nin, hai i kwangi mbwishus ta wii njori, tyos ta gbwenjeng. Unai kwangi langus ɓaakan ta takfai ɓurti njeng i gicik i hami ɓin njeng ames.
42Som ɓwoli si lak ɗiyai ames ɓa si fwaar som ima si mata shitam wi ya, kandok ɗeng ames byam u titalus. 43Ɓurti mbai i som ɓwol i Rom ma ɓweti bum ti Pool, shahus. Unai lak ɗufal ni, maɗufal ima shang abyam, u tong pis u jik ta ham wi u byam. 44Anggumi si ɗu ta si yitat hu ɓalangai i kwangi. A ti andi shak asussi si ru fo i ham cala ɗyokokok.
Currently Selected:
Ro i Som Muro 27: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
