Ro i Som Muro 7
7
Findel i Tifanus
1Unai mbai makocok lul ta Tifanus ni, “Findelal ima si lak mii a awei haa?”
2Unai Tifanus ni, “Hun shunun, ta hu deehi, hal huna. DeeƁwe Deembai macinjangat kof ɗyus, ta kyel i wash amukan Ibirai, myan ima yis ɗiri ta ashwa i Mesofotamya, kaciwa' tuu wa ti mute ta Haran. 3DeeƁwe nyus, ‘Hona ta' asa moti, hu gung ama, wa ta' tima i wa kofsa ti.’
4“Unai wash Ibirai lang ta ta' ti Kaldiyawa, wa te ta Haran. Takfai ti mot i dees, DeeƁwe yes tus na ta' tima hu mutena kwai moti. 5DeeƁwe fa Ibirai kop i ta'i kwa, kyel ima sai ames mata hwak fas kwa. DeeƁwe fas kintiɓwi, ma wa fa sus ta'i fweng, yis hu washash ames, takfai tima yis niwet, si cu kop ti ta'i. Tasi myani Ibirai yis yus kaciwa' al. 6DeeƁwe lak Ibirai ni, ‘Washash ama si wa mute ii mwalmwat ta ta' nin tima a sus kwa, somi si hat tus ii yarai, si kofus ya i wilyal ndik ɓaras.’ 7DeeƁwe ni, ‘I wa tot ti ramam ima si hat tus ii yarai ɓur. Takfai ti andi, washash ama si wa murangya ta ta'i, si yes si cun afut na kyel mai.’ 8Unai fa Ibirai dakwa i mukwen. Fas al ma asum Aizik, ɗak masus mukwen si mukon mumyarfu' takfai ti al sus. Aizik al Jakop, Jakop al kaya amukan hure mulang apil.
9“Ɓurti nadon ima ai kaya amukan fe i Jakop sin ti ta si Josep hai, si juwilus ya wa ta ta' ti Masar ii yere. Shak ta andiyi, DeeƁwe ma akul hu yis. 10Re'us ya ta shum ames shak. Fas piris, kin mati ɓos ta wei i Fero, makai i Masar. Fero ɓwetus, kinus te ii makunggul i Masar, kin shak wur ames ta rai Isifu.
11“Unai hwem ndak ta shak ta' ti Masar hu Kainan, ima yes ti shum mafwashi fwet, kol ta kyel ima hu washash amukan si dun cwa. 12Myan ima Jakop hali nyai, cwa mata Masar, ro femes hu washash amukan wa Masar, a at i bya' mai. 13Ti a at ames mapil, Isifu kof haisus ta kyel i shunus nyai, ayis a nusus. A nasi myan mai Fero si shwai hu gung i Josep.
14“Takfai ti andi, Josep ro muro ɓa si yes ti dees Jakop, ta shunusi shak. Shak asussi a ɗufal hure pyoron tau harai. 15Unai Jakop ɗor wa ta Masar. A ta te'i mot ta, ta hu washash amukani hure mulang apili. 16Si hum kyel ti funatat ames ta Shekem, si lai ta fiyai ima ai Ibirai juwil ti kyel i fei Hamo, ta Shekem ti cef.
17“Myan si kat ndyong, ɓurti ɓa DeeƁwe u hya kintiɓwi ima mas Ibirai yi, ɗufal amukan si cu wei ti ɗaɓak ta ta' ti Masar. 18Unai makai nin ima wa' shang Josep, mat kaitat ti Masar. 19Makai mai mbwa' som mukan, kof washash amukan ya. Kinus kpang ɓa si hwai ti kalajwau ya, ɓa si mwat.
20“A ta si myani si al Mosis, ali ɗat fwet ta kyel i DeeƁwe. Si mas ture ataat sin kol sus ta wur i dees. 21Myan ima si kinus ta saikyel, al ti Fero ti ha'us, ti kol ya fota al amet. 22Si kof Mosis ti shak musut i piris i som i Masar, te ti mbaitat i findel hu masi.
23“Myan ima yis wilyal hure ɓaras, mbe' nyai ɓa u wa u ɗing shunus Isar'ila. 24Unai ɗing ma Masar nin, yis kofti ɗeng ya ta saa yusti, wa ha'us man hai werusi, ndash ma Masari for ya. 25Mosis mbe' nyai, som ames si wa ɗingi si ni, DeeƁwe ma wa bumsus ta fisel ti ro ti yis. Shak ta andi, si yus ta maɓing wi.
26“Unai wasan abet, Mosis wis ɗufal apil i Isar'ila sin ɓin. Wa garaisus ya yis masus taɓak nyai, ‘Hal huni, ka nyai hun a shunus i ɗiyai hoo? A ɓurti mi hu ɓweti nggo ti ɗiyai ya?’
27“Unai ima ma muk ti nususi, tuk Mosis ya tasi ɓwai nyus, ‘Awe kina ii makaitat hu ma tot ti ɓur na saa nin ti ya? 28Ha ɓweti forsun fota ngga' i makon ha foor ma Masar ani ta ani?’#7:28 Ɗing huni hwak: Mul 2:14. 29Ti halti mai findeli, Mosis titalus, wis ashwa ti Midyan. Te ta kyeli fota mwalmwat. Ata te'i al fe muryai apil ta.
30“Takfai ti wilyal hure ɓaras, malu' i DeeƁwe pwak Mosis hai ti bilim i man, ta la', ta nggas ti Anggash i Sinai. 31Ti ɗingi andi, Mosis shok na fo, her ta anggasi ɓa u ɗingi ndere. Unai hal la ti Deembai ti ni, 32‘Ayin a DeeƁwe i washash ama i ɓele, DeeƁwe i Ibirai, i Aizik, hu Jakop.#7:32 Ɗing huni hwak: Mul 3:6. Unai lo' i Mosis roos jiir ti myanat, hum ɓweti ɗingi kwa.’
33“Unai Deembai nyus, ‘Mbweta kpakasak ama ya, ɓurti kyel ima ha mangra ta, a kyel Masapai. 34I ɗing shum ima ɗufal amen si woi ta Masar, i hal kawa ames unai i ɗor ɓa i bumus. Yaa mwashi, ɓa i rwa ha hum kyel ta Masar.’#7:34 Ɗing huni hwak: Mul 3:5,7,8,10.
35“Ayis Mosis mandeki ima si nggwesti nyai, ‘Awe kina ii makaitat hu ma tot sinin ɓur ya?’ Ayis DeeƁwe roos ɓa u te ii makaitat hu ma abum, ta foi malu' i DeeƁwe ima pwakus hai ta ya.
36“Ayis langtus ya, takfai tima mas ɗama i lum ti fo hui shok na fo ya ta Masar, hu Yiir Majuwi, hu ta ya hwak i wilyal hure ɓaras.
37“Ayis Mosis maiyi lak Isar'ila ni, ‘DeeƁwe ma wa ro su ti mashit nin, na saa ti ɗufal amu, fota ngga' ima roon ta.’#7:37 Ɗing huni hwak: Muh 18:15. 38Ai yis ta saa ti Isar'ila ima suɓut ta ya, akul hu malu' ima findelus ta Anggash i Sinai hu washash amukan hwak. Ayis mat findel i fati mupwet ta kyel i DeeƁwe ɓa u fa kan. 39Shak ta andi, hu washash amukan si nggwes i halsus, ɓurti andi, si nggwetus, unai ambe' i mulwat ames humuskyel ta Masar.
40“Si lak Eron nyai, ‘Masa kan ɓweha ima si wa kin sikan ta fisel, ɓurti Mosis ima lang ti kan ya ta Masar mai, ka shang aɗeng ima wisus kwa.’#7:40 Ɗing huni hwak: Mul 32:1. 41Si myani hai, si mas harkyel nin fota al i randong. Si masus malal, sin jakak ta wei i harkyel ima si masi ti ra ames. 42Unai DeeƁwe hatatus ti mas, honus ɓi si fa ɓyar hu shak ɗamam ima si na fit ngye, si cus afut. Mai lang kyak hu aɗeng ima mata worong i kaada i som i shit.
“ ‘Hun ɗufal i Isar'ila, ayin hu lyafun sufat,
hu fan malal yes wilyal hure ɓaras ta ya haa?
43Hu ha' puk i Molek
hu ɓyar i ɓwe amu Refan,
ima hu masi ti ra amu ɓa hu cus afut.
Ɓurti andi, i wa nggasu#7:43 Ɗing huni hwak: Emo 5:25. hu wa ta wei ti Babila.’
44“Ai washash amukan sin ati ti buk ta ya. A buk tima DeeƁwe kofti Mosis, kinus si masi ta ngga' ima Mosis ɗingi ta. 45Washash amukan si cu kop i buki, yes tasi myan i Joshuwa. Si lang ti ta ashwa tima si mat ta ra i ramam ima DeeƁwe nggas ya ta wei yusti. Buki te ta ashwai yes myan i Devid. 46Devid wis aweng ta wei i DeeƁwe, unai fwal DeeƁwe, ɓa u ta'us wur i mute, ɓurti DeeƁwe i Demukan Jakop. 47Shak ta andi, a Solomon ta' DeeƁwe wuri.
48“Shak ta andi hwak, Mambaiyi ima Ɓin Shak#7:48 Mambaiyi ima Ɓin Shak Mai a asum i DeeƁwe ima ti fo i wuliya si lai ii Mafi Ɗaukaka., tyai ta wurai ima ɗufal si ta' kwa. Ta ngga' ima mashit lak ta.
49“ ‘Fit a kyel i mute i kaitat amen,
naya a lapan i shwaiti sisai amen.
Anggi wuri hu wa ta' suni ya?
Deembai lak.
Ahun anggi kyeli mii kyel i lafos amen ya?
50A ra amen mas mii ɗamam shak kwani?’#7:50 Ɗing huni hwak: Ish 66:2.
51“Hun som i njeng na hihai, som i mulwat mufwashani, ima si hal findel kwa. Huma fota washash amu. Hu wa munggwya ti Rin Masapai fweng, fota sin haa? 52Anggi mashiti washash amu si kofus ya kwa ya? Si fwar som i shit ima si lak ti yes i maɗufal Manderei. Hun hu te ii som i mengsus, hu forus ya. 53A hun hu mat anggut ima a malu' i DeeƁwe fu, shak ta andi, hu nggyu i masti aɗeng ima mata.”
Si Hwyai Tifanus ti Afyai
54Ti halti mai findeli, si mas futut fwet, ɗak si nggwar ra ya ɓurti Tifanus. 55Ɓurti Tifanus hya ti Rin Masapai, shu shishat yis ɗing ti kyel ta fit, unai ɗing cinjangat i DeeƁwe, hu Yeso yis mangra ta rai ucwa i DeeƁwe. 56Unai Tifanus ni, “Ɗinghuni kwai, i ɗing fit ti maɓu, Al i Maɗufal nai mangra ta rai ucwa i DeeƁwe.”
57Unai si ndus mwal ames ya, ɗak si fur raafo tyambas, si rang shak, si tanggulus hai. 58Unai si kpukpongus si lang ti ya ta ashwai, si fur hwyayan sus ti afyai. Si mbwet arom ames ya, si shu ta kyel i zalang nin, ma asum Sool. 59Sin hai hwyayan ti Tifanus ti afyai, unai fwal DeeƁwe ni, “Deembai Yeso, mata rin amen ya ta rama.” 60Unai fur ta si fwaran ames hai, ɗak kawa ti la mbai ni, “A Deembai, kan ha ka'us ta mulut ti mafwashi mai kwa.” Takfai tima lak andi, motus.
Currently Selected:
Ro i Som Muro 7: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
