Ro i Som Muro 8
8
1Sool ɓweng sai ti ɓweti ames ɓa si for Tifanus ya.
Sool Ɓaas ti Suɓut i Som i koltifai
Mweni shum mufwashi ti ɗor si som koltifai hai ta Yerushalima. Unai shak som koltifai si ɓaas wa Judya hu Samarya. A som muro i Yeso hure mulang apili je si kat ta kyeli. 2Arya shini ima si mwen DeeƁwe fo, si lai Tifanus, si kawa ti ambas, si shat shaat ames. 3Sool cu wei ti kofti som koltifai ya ti ambas fwet. Yis mulang ta wurai, yis ka'an ti arya ta arofi, yis vosus ta mano' wi.
Filip Lak Muro Maɗesi ta Samarya
4Som i koltifai ima si ɓaas tus, si lak muro maɗesi i Yeso ta shak kikyal ima si wa ta. 5Filip wa ta mbai i mashwa i Samarya, yis mbasus findel i Kristi. 6Myan ima ɗufal hyang si hal findel ima Filip lak, si ɗing ɗamam i shok na fo ima masus, si tes fo mweret, si shu mwal ɓa si hal aɗeng ima ma laki. 7Rin mufwashani hyang, sin murangya ta lo'a' i ɗufal sin raafo, ɗufal hyang hwak ima lo' ames shokus, hu gundungang si wis cala.
8Ɓurti andi, shak ashwai ti jakak fwet.
Siman Mburu
9Ai sin ti maɗufal nin ma sum Siman, a mburu ta ashwai, kyan ɗufal i Samarya shok na fo, yis nyai yis a mbai maɗufal fwet. 10Unai ɗufal shak mbayai ta muyayii, si tes fo mweret sin nyai, “A mbaitat i DeeƁwe ima si nyai tus a Mbai.” 11Si tes fo mweret, ɓurti yash yis masus ɗamam i shok na fo, ti mburuhat ames. 12Ɗak mwashi, myan ima si fa mwawei si findel i Filip hai, ima lak muro maɗesi ta si kaitat i DeeƁwe, hu asum i Yeso Kristi, si mas arya ta arofi batisma. 13Siman ti haisus hwak fa mwawei, si masus batisma, unai cu wei ti koltifai ti Filip wa kikyal. Aɗengi tyos hai ti shok na fo, ɓurti ɗing ti mbaiyai i ɗamam i lum na fo ima Filip masus.
14Myan ima som muro i Yeso ta Yerushalima si hali nyai, Samarya si mat findel i DeeƁwe, unai si tukus Pita hu Jwon. 15Myan ima si ru, si fwal DeeƁwe ɓur sus, ɓa si mat Rin Masapai. 16Ɓurti Rin Masapai tuu ɗor ɗeng ames hai kwa tawe, si masus batisma ti asum i Deembai Yeso je. 17Unai Pita hu Jwon si kinus ra hai, unai si mat ti Rin Masapai.
18Myan ima Siman ɗingi, a ti kinti ra i som muro i Yeso si wyasan ti Rin Masapai, unai ti'us cef. 19Ni, “Fa huna yin hwak mbaitat mai, ɓurti shak maɗufal ima i kinus ra hai, u mat Rin Masapai.”
20Unai Pita nyus, “Ha hu cef ama hu wa cwai ti man! Ha ɗingi nyai a ti cef ha wa pwak ti mal i DeeƁwe ani? 21Ɗama ama ta ti mai kwa fweng, ɓurti mulut asa tima ndere ta kyel i DeeƁwe kwa. 22Kabuka nasi mafwashi mai ha fwal Deembai. Nan u shwahi ya, ɓurti kolti musut i ambe' mafwashi ima hati ta mulut asa. 23Ɓurti i ɗingi ha hya ti ɗar mukyawi, mafwashi no'a ya.”
24Unai Siman matussi nyus, “Fwal hun Deembai ɓur sun, kandok ɗama nin na saa ti ɗamam ima hu lak mai u wisun.”
25Takfai tima Pita hu Jwon si lak muro maɗesi i Deembai, si ka'us fisel muhumkyel ta Yerushalima. Sin lak ti muro maɗesi i Deembai, ta ashwaha mayayani hyang i Samarya.
Filip hu Maɗufal i Itopya
26Unai malu' i Deembai lak Filip ni, “Lukka fit ha hat wa ta ɓwai wuri, ta fisel ti ya, tima ti yes ta Yerushalima wa Gaza.” 27Unai lang ka' fisel, wa shwai hu maɗufal i Itopya nin ima a nggwiri, a makunggul mbai ta kaitat i Ukandis, mukai ndii ti Itopya tima hotat amet shak mata ra yusti. Maɗufal mai wa Yerushalima ɓa u cu DeeƁwe afut. 28Yis ta fisel yus muhumkyel ta wur, yis amun tasi kwang i huhwi i mbiri ames hai, ɓu kaada i Ishaya mashit, yis mbe'i. 29Unai Rin Masapai lak Filip ni, “Ɓwa ta nggas ti huhwi i mbiri ani, hu at akul.”
30Unai Filip tital wa kyel i maɗufali, te ta nggas ti huhwi i mbiri, halus yis mbe'i ta kaada i Ishaya mashit. Unai Filip lulus ni, “Ha shang aɗeng ima ha mbe'i haa?”
31Unai nyus, “I wa masi atini i shangi kaciwa' ɗeng lakunti ya?” Unai lak Filip nyus, ɓa u ɗu ta huhwi i mbiri#8:31 huhwi i mbiri Si laiyani ti Hausa ii karusa na andi kwa keken doki. si te ta tikul.
32Kyel ima ai yis mbe'i ta Worongi mai,
“Si dulus fota tutwi wati kyel i lefi.
Fota ngga' ima al tutwi tyai cakat
ta ra i masosus sya ya ta lo',
angga'i nai ɓu fo kwa.
33Si kinus wo shusho,
kol ii ma si shaas mwawei.
Awe ma wa lak ti findel i washash ames ya?#8:33 Mai ma kofi nyai ma wa wis ti fe kwa.
Ɓurti mupwet ames si zan ya na naya.”#8:33 Ɗing huni hwak: Ish 53:7-8.
34Unai, nggwirii lul ta Filip ni, “Lakana, i ma fwal sa, Mashit mai ma findel tasi awe hai ya? A tasi haisus ahun a tasi ɗeng akat ya?” 35Unai Filip fur findel tasi yis kyel ima ɓui yi, lakus muro maɗesi tasi Yeso hai. 36Myan ima sin wa ta fisel, si ru ta kyel i ham, unai nggwirii lak ni, “Ɗingai ham mai! Ami ma wa shai, ɓa ha masun batisma ya?”#8:36 Shini kaadahai si ti yang mu 37 Unai Filip nyus, “Na ha fa mwawei ti mulut andek i wa masai.” Unai ngguri ni, “I fa mwawei Yeso Kristi a al i DeeƁwe.”
38Unai kin si katya ti huhwi i mbiri. Ɗak Filip hu nggwirii si jak ya, si rang ta ham wi, unai Filip mas nggwirii batisma. 39Myan ima si rangya ta ham wi, Rin i Deembai vur Filip ya wis ti. Unai nggwirii hum ɗing sus kwa, ka'us fisel yis jakak. 40Unai Filip ɗing haisus pwak ya ta Azotus. Yis ati ti kikyali, yis lak ti muro maɗesi i Yeso ta shak ashwaha, yes myan ima ru ta Kaisarya.
Currently Selected:
Ro i Som Muro 8: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
