Luka 13
13
A Kpang hu Hatat
1Abet si myani hai, shini ɗufali ima sin ta kyeli si lak Yeso ti ngga' ima Pailet kin si fwar ɗufal shini ta Galili, myan ima sin tor ti kuna wa kyel DeeƁwe ti ɗamam i ngyeshi ya. 2Unai Yeso lulus nyai, “Hu ɗingi fota sin si ɓin anggum i som i Galili masti mafwashi ani, ɓurti si wo shum andi waak? 3Wayou i laksu! Na hu hatat kwa, hu wa kpa fota sinyi. 4Ahun sin ɗufal hure mulang myarfu' ima wur i fit i Silowam nggulus hai si mwat ani, hu ɗingi si ɓin shak anggum i ɗufal i Yerushalima mafwashi waak? 5Wayou, i laksu! Na hu hatat kwa, hu wa kpa fota sinyi.”
Kaani hu Gung ti Twyas Tima Wa' ti Al
6Unai Yeso lakus findel ti kaani moti ni, “Ai maɗufal nin sok gung ti makambong ta yang ti manggɓu' asus, nin mweni wa ɓa u tang ma'ali, far wis ɗama ta kwa. 7Unai lak ma ɗing ti yang amesi fo ni, ‘A wil mataat mai yin yaasan far ti ma'al nasi gung ti makambong moti kaciwa' wis ti ɗama. Tela ya ɓa ti fa kan kyel na yangi, ti rafat ti kyel ya ami gbya' ya?’
8“Unai ma ɗing ti yangi nyus, ‘A Dee, hona i ɓo' ii ta', i shui sal i wil mai. 9Na ti al wil i yes, a maɗesi, na ti al kwa, unai ha tel ya.’ ”
Yeso Fa Mbor Nin Cala
10Myan nin, yis kofiti ta mare Mwen ti Lafos, 11unai mbor nin, tima rin mafwashi no'ut ya ti mwatan i wilyal hure mulang myarfu' yit ta kyeli. Shak mute amet yit yut a kunggur, ti ndok ti luk fit mangra kwa. 12Myan ima Yeso ɗingut, laiyut nyut, “A mbor, shi wis njeng, mwatan amesh mbit.” 13Unai kinut ra hai, fo abet ti luk fit mangra, ti fur ha' ti asum i DeeƁwe fit.
14Unai mbai i marei mas futut ɓurti Yeso fat njeng Mwen ti Lafos, mbaiyi cu wei ti lak ti ɗufal nyai, “Ka mati mukonan taan i masti roha. Yehun tasi mukonan mi ɓa hu wis njeng, ka hu yes Mwen ti Lafos kwa.”
15Unai Deembai nyus, “Hun som rere! Awe amu hwyat randong ahun a njaki asus ya u wa u fat ham Mwen ti Lafos kwa ya? 16Mbor moti tima ti mata gung i Ibirai, ima Shatan no'ut ya, ti kol wilyal hure mulang myarfu' ti mwatan mai, te a kpak fasut njeng Mwen ti Lafos kwa haa?”
17Myan ima lak findel mai, fa som ima si nggwetus shusho. Anggum i ɗufali shak si jakak ɓurti ɗamam i shok na fo ima si ɗingi yis masi.
Kaani ti Ma'al i Gadina
(Mat 13:31-32; Mak 4:30-32)
18Unai Yeso lul ni, “Kaitat i DeeƁwe ma atini ya? I wa kaani ti amiya?
19“Kaitat i DeeƁwe ma fota ma'al i gadina, ima ɗeng zan lai ta yang ames, ngye ta, te i mbai i gung i yit, avyash si lat wurai tasi rai hai.”
Kaani i Hong
(Mat 13:33)
20Unai hum luli nyai, “I wa kaan ti kaitat i DeeƁwe ti amiya? 21Ma fota hong ima mbor nin ti zan ti yir ti han hyang, kin hani shak likin hya rangya.”
Kwap Munzweti
(Mat 7:13-14; 21:23)
22Myan ima Yeso ka' fisel i wa Yerushalima, sa ta ashwaha muyayi hu mbayai yis kofti ɗufal findel i DeeƁwe. 23Ɗeng lulus ni, “A Deembai, a ɗufal ndyong je si wa wis ti abum haa?”
Unai Yeso nyus, 24“Kin hun hai hu lang ta fo i mahom manzweti. I ma laksu, ɗufal hyang si kinti hai ɓa si lang ta, si mba wet. 25Na mawuri luk fit ɓa u vo kwap ames ya hu wa kat ya ta saikyel hu lang kunggwak ti fo i mahomi hun nyai, ‘A Dee mawur, kabuk ɓwa nin fo mahomi ya.’
“Yis ma wa laksu u ni, ‘I shangu kwa, i shang kyel ima hu yes ta kwa.’
26“Hu wa mulang kawa nyai, ‘Ni nyai ka cu ka wo tikul wa, ha kof nin shangi ta ɓwayai i fiselal aminin hwak wa.’
27“Ma wa muhum laksu nyai, ‘I shangu kwa, i shang kyel ima hu yes ta kwa. Hyer hun na ya nanati, hun som i masti mafwashi!’
28“Hu wa kawa hu nggwar ra, myan ima hu ɗing Ibirai, hu Aizik, hu Jakop hu shak som i shit i kaitat i DeeƁwe, hun ti haisu, si nggahu ya. 29Ɗufal si wa yes ta ɓwayai ɓaras i naya, ta ɓwe ti muɗu, hu ɓwe ti ndak, ɓwai fit hu ɓwai muɗor, si wis kikyal i mute ta got i kaitat i DeeƁwe. 30I ma laksu, shini ima si mii dala si wa mute i bya', ima si mii bya', si wa mute i dala.”
Yeso Tirim Tasi Hai Yerushalima
(Mat 23:37-39)
31Tasi myani, shini Farisiyawa si yes si lak Yeso si ni, “Hona kyel mai, ɓurti Herod ma ɓweti forsa.”
32Unai Yeso nyus, “Ɓu hu lak kyara i fyarai ani, kwai i wa nggati rinan mafwashi, i fa ɗufal njeng i lo'a' ames, wasan hwak andi, ton i mbit ro amen. 33Shak ta andi, a kpak i cu wei ti ɗa'at kwai, hu wasan hu ton. Si wa for ti mashit aleya, a ta Yerushalima kwa haa?
34“A Yerushalima! Yerushalima! Hun ima hu fwaran ti som i shit i DeeƁwe, hun hwyayan ti fe muro mes yes kyel amu. A myan awen i far suɓut su, fota ngga' ima shukor ti suɓwat femet ta wii kurya amet, shak ta andi hunggyu fweng! 35Mwashi ɗing huni, i honu wur amu ii korom. I laksu, hu wa muhum ɗingsun kwa, yes mwen ima hu wa nyai, ‘Disyo' si maɗufal ima yes ti asum i Deembai.’#13:35 Ɗing huni hwak: Nak 118:26. ”
Currently Selected:
Luka 13: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
