Luka 14
14
Yeso Fa Maɗufal ima Lo' Ames Hwa' Cala
1Mwen ti Lafos nin ndai, Yeso yis ta wur i mbai i Mafarisi nin, ɓa u cu cwa ta, ɗufal sin shwaiti shishat ɗingsus fo. 2Maɗufal nin yis ta ima lo' ames hwa'a'. 3Unai Yeso lul ta Farisiyawa hu som kofiti si anggut hai ni, “A kiga' si anggut hai, ka ha' maɗufal mwatan ya Mwen ti Lafos, ahun awet ya?” 4Si tehus gbak. Unai Yeso ngge'us, ha'us mwatani ya, nyus ɓa u wis.
5Unai Yeso lulus ni, “Awe amu na njaki asus, ahun al ames, ahun randong asus ti ndak ta hum i ham Mwen ti Lafos, u ha' ya fo abet kwa ya?” 6Si matussi kwa. 7Myan ima Yeso ɗing shini ɗufali ta saa ti som ima si ta kyel i gotti sin ben ti kikyal i mute ima si ɓin ɗat, unai kaanus findel nin nyai, 8“Na si laiya wa kyel i got i kunggo, ka ha tong mute amun ta kyel i mbayai kwa, ɓurti ashang si yes si lai ɗeng ima ɓina mbaitat si nggaha ta kyeli. 9Yis dee makunggo ma wa laisu shak apili ɗak laka ha uni, luka fit ha fa maɗufal mai kyel. Ha wa muluk fit ti shusho ha humta kyel matoi. 10Na si laiya wa got, ha wa ha tong far ti kyel i mute matoi ha te ta, na dee magoti yes, ma wa nyai, ‘A mwen, luka fit ha hum ta kyel muɗesi andi.’ A ti andi shak ɗufal ima si yes gotti si wa fasa ngye. 11Maɗufal ima ha' haisus fit, si wa muɗortus kyel, maɗufal ima ɗor ti haisus ya, si wa ha'sus fit.”
12Unai Yeso lak maɗufal mawur ima laiyusi ni, “Na ha ɗi got, ahun ha lai lai yes ucwan ta wur ama, kan ha lai a myaya kek, hu shuna, hu gung ama, hu som ima hu ɗiyai nggas som i ramwayat je kwa, ɓurti sin hwak wasan si laiya, kof ndai si wera aɗeng ima ha masusi ya. 13Na ha ɗi got, laiya ɗufal mutoi fota som i jyel, hu gundungang, hu som ima si gyak hu manzyauwau, 14andi ha wa wis ti maɗesi ta kyel i DeeƁwe. Sin mii musut i ɗufali si ndok si tala aɗeng ima ha masusi kwa, ayis DeeƁwe je ma wa talsa mwen ti muluk fit ti som munderei ta fiyai.”
Kaani si Got Mbai
(Mat 22:1-10)
15Ti hal ti mai findeli, andek ta saa ti som ima si cwai ti cwa akul lak Yeso ni, “Disyo' si maɗufal ima ma wa cwai ti cwa ta got i kyel ta wur i kaitat i DeeƁwe!”
16Yeso humuskyel ti findel ni, “Ai maɗufal nin mas kyel ta fwet u lai mbai got, u lai ɗufal hyang ɓa si yes gotti. 17Myan ima mwen ti gotti ti ru, unai ro yere ames ɓa u wa u lai som ima myana lakus gotti, u nyus, ‘Yehukan kong, gotti moti ti nung.’
18“Unai shak asussi si furus tang ti findelal. Maɗufal i bya' ni, i tal yang ni, teen hai a kpang i wa i ɗing ngga' ima yang i mata, i fwal sa ka'a agung i wa wis ti yes kwa.
19“Ma andeki ni, ‘I juwil randwang hure i han ti ahan, i wa wis ti kyel i yes kwa.’ 20Nin hwak ni, ‘A mukonan moti i mas kunggo, ɓurti andi i wa wis ti kyel i yes kwa.’
21“Unai yerei humkyel, lak dee mawuri shak aɗeng ima si lakus. Ti futut dee mawuri lak yere ames ni, ‘Langa kang, ɓwa ta fiselal hu ɓwayai i mashwa, hu ndyi ti ashwa, ha lai som i jyel, hu gundungang, hu manzyauwau, hu som mushokani ha yes tus nati.’
22“Yerei ni, ‘A dee, ti i mas aɗeng ima ha lakun, shak ta andi kyel kat na.’
23“Unai dee mawuri lak yerei ni, ‘Langa ta fiselal mbayai hu muyayi, ha tukus na wur amen ɓa u hya. 24I laksu, sin som ima ai i tong laisus ani, ɗeng ames ma wa hal ti mimyat i got amen kwa.’ ”
Shum i Koltifai ti Yeso
(Mat 10:37-38)
25Ɗufal hyang sin koltifai ti Yeso, unai hatat lakus nyus, 26“Na ɗeng yis wa koltifai asuni, ɗak ɓwetun ɓin dees, hu nasus, hu mborsus, hu fe ames, hu shunus muryai hu murwafi, ta mupwet amessi shak kwa, ndok mute ii makoltifai asuni kwa. 27Shak maɗufal ima makoltifai asuni ɗak nggwes i zan ti Shanggam ames, ndok mute ii makoltifai asuni kwa.
28“Na ɗeng na saa asu yis wa ta' ti wur i fit, ka nyai ma wa mute amun u mbe' na yis ti cef ima ndok u pun ta' ti wuri ɗak furi hoo? 29Na masi andi kwa, ma wa vwat ti mahuhuri hweng o, ɗak mbiti ta'i pwan, unai shak som ima si ɗing roi si musasus. 30Si wa nyai, ‘Maɗufal amai fur ta' ti ta' u mai pwanus.’
31“Ahun na makai nin ma wa mulang ti som i ɓwol nggal hure wa ɓwol hu nin ma som i ɓwol nggal hure apil, wa' te amun u mbe' an mati njeng ima ndok u kin ukan i ɓwol hu makai ani nan o? 32Na yis wa mundok kwa, unai u ro som i taɓak hwer sin ɗiri ta maleng. 33Andi hwak, na ɗeng na saa asu wak ɗamam ima mati ya shak kwa, ndok mute ii makoltifai asuni kwa.
34“Amma mati ɗat, na ɗati mbitus, si wa masi atini ɗati u humta ya? 35Ɗat mute ii sal ta yang kwa, si wak ya kek buu.
“Mamwal i hali, u hali!”
Currently Selected:
Luka 14: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
