ᤗᤠᤶᤍᤡᤰ 10
10
ᤏᤡ᤺ᤱᤄᤢᤰᤘᤠᤜᤠ᤹ᤗᤠᤶ ᤔᤡᤱᤍᤣ᤹
1ᤕᤠᤶᤔᤥ ᤕᤜᤘᤣ ᤍᤠᤱᤒᤠᤸᤗᤧ ᤔᤥᤛᤠᤴ ᤔᤧᤳᤋᤢ. “ᤂᤧᤏᤧ᤹ ᤐᤣᤃᤧ᤹ᤀᤠᤱ ᤑᤠᤖᤥᤴ ᤋᤢᤔᤧ᤹॥ ᤀᤠᤱᤃᤠ᤹ ᤑᤠᤖᤥᤴ ᤏᤢ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠᤴ ᤜᤠᤍᤡᤱ ᤁᤧᤎᤰᤐᤠ ᤆᤥᤃᤢᤱ ᤐᤡᤖᤢᤱᤛᤡᤱᤅᤠᤱ ᤘᤠ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠᤴ ᤜᤠᤍᤡᤱ ᤁᤧᤎᤰᤐᤠ ᤆᤥ᤺ᤰᤐᤠᤸᤗᤧ ᤆᤥᤃᤢᤸᤗᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤱᤃᤠ᤹ ᤁᤴ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱ᤹॥ 2ᤜᤧᤰᤁᤣᤗ᤹ᤖᤡᤰ ᤔᤡᤛᤪᤡᤜᤠ᤹ ᤀᤍᤱ ᤆᤥᤃᤢᤱᤛᤡᤱᤅᤠᤱ ᤂᤢᤴᤇᤡ᤹ ᤏᤡᤱᤘᤠᤴ ᤜᤠᤍᤡᤱ ᤁᤧᤎᤰᤐᤠ ᤆᤥᤃᤢᤱ ᤐᤡᤖᤢᤱᤛᤡᤱ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱᤒᤠᤴ ᤂᤡᤏᤡ᤹ ᤛᤠᤔᤧᤴᤇᤠ᤹ᤜᤠ᤹ ᤔᤧᤵᤔᤠ ᤁᤧᤛᤢᤰᤋᤢᤶᤛᤡᤶᤗ॥ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤖᤧᤰᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶ᤹॥”
3ᤁᤸᤗᤧᤆᤥᤃᤢᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤑᤠᤖᤥᤀᤥ ᤐᤣᤛᤧᤳᤇᤡᤀᤠᤱ ᤔᤧᤳᤋᤧᤛᤢ. “ᤜᤡᤒᤪᤢᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ᤹. ‘ᤀᤠᤵᤑᤠᤸᤗᤧ ᤌᤠᤖᤡᤰ ᤂᤧᤏᤧ᤹ ᤀᤠᤱᤃᤠ᤹ ᤀᤠᤍᤃᤡ ᤏ᤺ᤶᤛᤡᤱᤔᤠ ᤁᤧᤴᤍᤧᤴᤏᤧᤶᤒᤠᤒᤣ᥅ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤐᤣ᤺ᤰᤔᤠ ᤑᤠ᤺ᤰᤋᤧᤛᤧ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣ᤺ᤰᤁᤠᤱ ᤀᤠᤱᤃᤠ᤹ ᤔᤠᤱᤛᤧᤘᤠ ᤔᤧᤔᤧᤳᤋᤠᤖ॥ 4ᤂᤧᤏᤧ᤹ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤐᤣ᤺ᤰᤔᤠ ᤁᤧᤶᤓᤠ᤺ᤰᤋᤢᤛᤡᤴᤏᤧᤓᤃᤪ. ᤀᤥᤔᤧᤳᤋᤧ᤹. ᤋᤠ᤺ᤴᤍᤡᤰ ᤂᤧᤏᤧ᤹ ᤁᤧᤗᤠᤈᤣ᤹ᤀᤥ ᤏᤡ᤺ᤱᤄᤢᤰᤘᤠᤜᤠ᤹ ᤋᤠᤖᤢᤱᤛᤡᤱ᤹॥ 5ᤂᤧᤱᤜᤠ᤹ᤖᤧ ᤂᤠᤶᤒᤣ᤺ᤴᤔᤠᤴ ᤏᤡᤔᤧᤴᤎᤠ᤺ᤵᤐᤣ ᤌᤠᤖᤡᤰ ᤛᤡᤍᤧᤵ ᤔᤧᤍᤧᤵᤋᤢ᤹॥ ᤑ᤺ᤴ ᤌᤩᤧᤀᤠᤱ ᤋᤠᤅᤧ ᤕᤠ᤺ᤰᤋᤧᤒᤠ ᤁᤧᤖᤧᤰ ᤁᤢᤈᤠᤜᤠ᤹ ᤂᤧᤱᤜᤠ᤹ᤖᤧ ᤔᤧᤈᤔᤧᤍᤣᤛᤢ᤹॥ ᤂᤡᤏᤡ᤹ ᤀᤡᤰᤋᤠᤵᤐᤥ ᤁᤧᤗᤡᤱᤒᤠ ᤁᤧᤖᤧᤰ ᤛᤡᤱᤒᤢᤱᤜᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤈᤔᤧᤍᤣᤛᤢ᤹॥ 6ᤂᤧᤏᤧ᤹ ᤁᤧᤜᤡᤶᤔᤥ ᤏᤢ ᤂᤧᤏᤧ᤹ ᤁᤧᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤔᤥ ᤜᤧᤰᤁᤩᤠᤱ ᤔᤡᤛᤪ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤜᤡᤶᤜᤠ᤹ ᤂᤧᤱᤜᤠ᤹ᤖᤧ ᤔᤧᤎᤡᤶᤛᤢ᤹॥ ᤂᤧᤶᤓᤩᤠᤖᤡᤰ ᤕᤖᤡᤰ ᤏᤡ᤺ᤱᤄᤢᤰᤘᤠ ᤂᤧᤏᤧ᤹ ᤁᤧᤶᤒᤠ ᤁᤧᤎᤠ᤺ᤰᤌᤧᤒᤠᤜᤠ᤹ᤖᤧ ᤁᤴ ᤗᤠᤈᤣ᤹ᤀᤥ ᤔᤧᤍᤩᤧᤀᤠᤱᤎᤥ ᤀᤠᤀᤡᤴ ᤌᤠᤖᤡᤰ ᤀᤠᤓᤧᤸᤗᤧᤀᤠᤱ ᤔᤧᤴᤏᤡᤀᤣ ᤔᤧᤘᤕᤧ॥’” ᤂᤧᤒᤩᤠᤱ ᤔᤥᤛᤠᤴ ᤜᤡᤛᤡᤱᤅᤠᤱ ᤑᤠᤖᤥᤀᤥᤗᤠᤶ ᤗ᤺ᤴᤍᤧ ᤐᤣ॥
7ᤑᤠᤖᤥᤸᤗᤧ ᤁᤢᤛᤢᤜᤠᤱᤃᤧᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤁᤴ ᤔᤏᤠ᤺ᤸᤗᤧ ᤀᤠᤵᤑᤠᤸᤗᤧ ᤌᤠᤖᤡᤰ ᤀᤠᤏᤡ᤹ ᤋᤢᤰᤂᤣ ᤀᤠᤈᤠ᤺ᤳᤋᤠᤱ ᤐᤵᤐᤠᤒᤣ᥅ ᤀᤡᤛᤪᤠᤀᤡᤗᤡᤜᤠ᤹ ᤗᤧᤖᤧᤍᤣᤛᤧᤛᤧ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣ᤺ᤰᤁᤠᤱ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤛᤧᤘᤠ ᤔᤧᤔᤧᤳᤋᤢᤖ॥ ᤔᤡᤛᤪ ᤗᤠᤈᤣ᤺ᤴᤏᤣ ᤂᤠᤵᤐᤢᤌᤩ᤺ᤱ ᤐᤥᤱᤔᤠ ᤆᤥᤰ. ᤌᤣ ᤀᤠᤍᤠᤱᤒᤠᤖᤧ ᤁᤧᤴᤏᤡᤛᤢᤶᤒᤡ᥅”
8ᤂᤧᤒᤩᤠᤱ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤑᤠᤖᤥᤀᤥ ᤔᤧᤍᤠᤖᤢᤛᤡ ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤂᤢᤴᤇᤡ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤐᤣᤃᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤛᤧᤘᤠ ᤔᤧᤳᤋᤧᤶᤔᤧ᤹॥ ᤁᤖ ᤂᤡᤏᤡ᤹ᤀᤥ ᤀᤠᤳᤋᤡᤴ ᤀᤠᤳᤋᤡᤴᤜᤠ᤹ ᤁᤧᤒᤣᤃᤡᤒᤠ᥅”
9ᤔᤥᤛᤠ᤺ᤸᤗᤧ ᤔᤧᤳᤋᤢ. “ᤀᤠᤏᤡᤃᤣ ᤁᤧᤖᤧᤰ. ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ ᤏᤢ ᤁᤠᤵᤐᤥ ᤁᤠᤵᤔᤢ ᤂᤰᤐᤧᤳᤋᤣ ᤐᤣᤃᤡᤃᤧ॥ ᤀᤠᤏᤡᤃᤣ ᤛᤠᤀᤣᤜᤠ᤹. ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ ᤏᤢ ᤌᤰᤛᤠᤜᤠ᤹ ᤁᤧᤖᤧᤰ ᤋᤣ᤹ᤖᤢᤶᤛᤡᤶᤒᤧ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤀᤠᤏᤡᤃᤣ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢᤶᤒᤧᤀᤠᤱ ᤗᤳᤇᤠ ᤋᤱᤏᤠᤶ ᤋᤥᤛᤢᤶᤒᤧ॥”
10ᤑᤠᤖᤥᤸᤗᤧ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤌᤣ ᤂᤡᤏᤡ᤹ ᤁᤧᤛᤧ᤺ᤵᤋᤡᤒᤡ᤹᥅ ᤀᤠᤱᤃᤠ᤹ ᤔᤧᤴᤇᤢᤔᤠᤜᤠ᤹. ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ ᤂᤡᤏᤡ᤹ ᤋᤣ᤹ᤔᤠᤛᤡᤀᤠᤱ ᤐᤣ᤺ᤰᤔᤠ ᤔᤧᤓᤠ᤺ᤰᤏᤡᤱᤅᤡᤴ॥ ᤂᤡᤏᤡ᤹ ᤋᤠᤵᤑᤧ᤺ᤶᤒᤠ ᤆᤥ᤺ᤰᤔᤠ ᤁᤧᤀᤡ᤺ᤳᤋᤢᤶᤒᤠ ᤐᤠ᤺ᤴᤏᤡᤴ ᤏᤢᤖᤡᤰᤁᤠᤱ ᤏᤡᤍᤧᤳ॥ 11ᤔᤣ᤺ᤴᤍᤢᤰ. ᤂᤡᤏᤡ᤹ ᤕᤧᤶᤒᤡᤳᤇᤠᤜᤠ᤹ᤖᤰ ᤕᤜᤘᤣ ᤍᤠᤱᤒᤧᤴ ᤔᤠᤱᤛᤧᤘᤠ ᤔᤧᤳᤇᤧ ᤐᤣᤃᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤜᤠᤒᤠᤜᤧᤰᤁᤣ ᤆᤥ᤺ᤰᤔᤠ ᤁᤧᤏᤠ᤺ᤰᤋᤢᤶᤔᤠᤱ ᤘᤠ᤹॥” ᤜᤧᤰᤁᤣ ᤔᤧᤳᤋᤢᤛᤡᤀᤠᤱ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤑᤠᤖᤥᤸᤗᤧ ᤁᤢᤍᤃᤡᤗᤠᤶᤒᤠ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡ॥
12ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤁᤢᤒᤴᤈᤩᤠᤱ ᤁᤢᤒᤴᤈᤩᤠᤱ ᤏᤡ᤺ᤱᤄᤢᤰᤘᤠᤜᤠ᤹ ᤔᤡᤛᤪᤀᤥ ᤔᤧᤃᤧᤳᤗ ᤑᤠ᤹ᤀᤠᤱ ᤂᤧᤏᤧ᤹ ᤁᤧᤜᤢᤰᤁᤡᤴ ᤛᤴᤇᤧ᤹॥ ᤐᤩᤠᤱᤛᤡ ᤀᤡᤰᤋᤠᤵᤐᤥ ᤁᤧᤒᤥ᤺ᤰᤐᤠ ᤁᤧᤖᤧᤰ ᤏᤢᤎᤡᤛᤠᤰᤆᤡ᤹ ᤏᤢ ᤑ᤺ᤴᤗᤠᤶᤒᤠ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤁᤧᤖᤧᤰ ᤁᤢᤈᤠᤜᤠ᤹ ᤂᤧᤱᤜᤠ᤹ ᤔᤧᤍᤠᤀᤠᤱ ᤔᤧᤈᤔᤧᤍᤣᤛᤢ᤹॥”
13ᤔᤥᤛᤠ᤺ᤸᤗᤧ ᤁᤢᤍᤰᤁᤠ᤺ᤳᤋᤡᤴ ᤔᤡᤛᤪᤀᤥ ᤑᤥ᤺ᤰᤂᤢ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤸᤗᤧ ᤕᤠ᤺ᤴᤍᤡᤰ ᤏᤠᤶᤎᤠᤎᤠ ᤏᤢ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤔᤡᤛᤪ ᤗᤠᤈᤣ᤹ᤀᤥ ᤏᤠᤱᤃᤧᤴ ᤗᤧᤵᤔᤠᤱᤗᤠᤶ ᤛᤢᤖᤡᤳ ᤁᤣᤈᤱ ᤜᤢᤖᤧᤖ ᤕᤠ᤺ᤴᤍᤢ॥ ᤁᤢᤍᤠ᤺ᤰᤍᤡᤰᤔᤠ ᤋᤠᤏᤠᤶ ᤂᤧᤴ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤏᤡ᤺ᤱᤄᤢᤰᤘᤠᤜᤠ᤹ ᤋᤠᤖᤢᤛᤡ॥ 14ᤜᤧᤰᤁᤩᤠᤱ ᤂᤧᤴ ᤏᤡ᤺ᤱᤄᤢᤰᤘᤠᤜᤠ᤹ ᤁᤢᤒᤴᤈᤩᤠᤱ ᤁᤢᤒᤴᤈᤩᤠᤱᤔᤠ ᤔᤧᤍᤩᤧ ᤂᤧᤒᤩᤠᤱ ᤔᤡᤛᤪ ᤗᤠᤈᤣᤴ ᤁᤧᤖᤧᤰ ᤛᤡᤍᤧᤵ ᤔᤧᤍᤧᤵᤋᤢ॥ ᤂᤧᤶᤓᤩᤠᤖᤡᤰ ᤕᤖᤡᤰ ᤏᤡ᤺ᤱᤄᤢᤰᤘᤠ ᤋᤃᤡ ᤀᤠᤓᤧᤸᤗᤧᤀᤠᤱ ᤔᤧᤱᤃᤧᤳᤋᤣ ᤔᤧᤘᤕᤧ ᤜᤧᤰᤁᤩᤠᤱ ᤋᤠ᤺ᤴᤍᤡ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤔᤧᤱᤃᤧᤳᤏᤧᤴ᤹॥ 15ᤂᤧᤱᤜᤠ᤹ᤖᤧ ᤂᤠᤶᤒᤣ᤺ᤰᤔᤠᤴ ᤔᤠᤰᤋᤠᤱᤒᤠ ᤐᤥ᤺ᤰᤂᤧᤖ ᤕᤠᤖᤡᤰ ᤛᤡᤍᤧᤵ ᤔᤧᤍᤧᤵᤋᤢ॥ ᤑ᤺ᤴᤗᤠᤶᤒᤠ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤁᤧᤖᤧᤰ ᤁᤢᤈᤠᤜᤠ᤹ ᤏᤢ ᤛᤡᤱᤛᤣ᤹ᤜᤠ᤹ ᤂᤧᤱᤜᤠ᤹ᤖᤧ ᤔᤧᤈᤔᤧᤍᤣᤛᤢ॥ ᤔᤡᤛᤪ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤗᤣ᤺ᤳᤋᤠᤱᤒᤠ ᤜᤡ᤺ᤰᤋᤠᤱᤒᤠ ᤏᤢ ᤏᤢᤎᤡᤛᤠᤰᤆᤡ ᤌᤣᤀᤠᤱ ᤔᤧᤏᤖᤧᤴ॥
16ᤂᤧᤒᤩᤠᤱ ᤜᤠᤱᤅᤡᤸᤗᤧ ᤜᤠᤖᤠᤜᤠᤖᤠ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤂᤡᤏᤡ᤹ ᤕᤜᤘᤣ ᤍᤠᤱᤒᤠᤴ ᤏᤢ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢᤱ॥ 17ᤁᤸᤗᤧᤆᤥᤃᤢᤸᤗᤧ ᤁᤴᤇᤗᤠᤶᤒᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤠᤗᤠᤕᤥᤴ ᤗᤧᤵᤔᤡ ᤆᤥᤃᤧ ᤀᤠᤒᤡᤖᤧ᤹ ᤜᤧᤰᤁᤩᤠᤱ ᤂᤧᤴ ᤛᤡᤔᤠᤗᤡᤱᤎᤥ ᤕᤠᤖᤡᤰᤐᤠ ᤂᤢᤶᤍᤡᤱᤅᤡᤴ ᤂᤧᤵᤔᤠᤖᤧ ᤗᤠᤃᤡ ᤂᤡᤏᤡ᤹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡ ᤑᤠᤰᤋᤠᤶ ᤀᤠᤒᤡᤖᤧᤶᤔᤧ᤹॥”
18ᤂᤧᤒᤩᤠᤱ ᤔᤥᤛᤠᤴ ᤑᤠᤖᤥᤀᤥᤏᤢ ᤗ᤺ᤴᤍᤧᤀᤠᤱ ᤐᤣ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢ॥ 19ᤕᤜᤘᤣ ᤍᤠᤱᤒᤧᤸᤗᤧ ᤏᤠᤱᤃᤧᤴ ᤐᤡᤛᤠᤱᤗᤠᤶ ᤁᤧᤓᤧᤶᤒᤠ ᤛᤢᤖᤡᤳ ᤁᤣᤈᤱᤅᤡᤴ ᤂᤀᤡᤰ ᤂᤀᤡᤰ ᤁᤧᤀᤡᤰᤛᤡᤱᤒᤠ ᤏᤠᤶᤎᤠ ᤐᤡᤛᤠᤱᤗᤠᤶ ᤁᤧᤜᤢᤒᤠ ᤛᤢᤖᤡᤳ ᤆᤥᤃᤢ ᤜᤧᤰᤁᤩᤠᤱ ᤂᤧᤴ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤏᤡ᤺ᤱᤄᤢᤰᤘᤠᤜᤠ᤹ ᤑᤧᤛᤢᤛᤡᤀᤠᤱ ᤜᤧ᤺ᤳᤋᤠᤱᤒᤠ ᤘᤖ᤺ᤱᤅᤥ ᤁᤣ᤺ᤳᤋᤢᤛᤡ॥ ᤔᤡᤛᤪ ᤗᤠᤈᤣ᤹ᤀᤥ ᤗᤳᤇᤠᤀᤠᤱ ᤏᤡ᤺ᤱᤄᤢᤰᤘᤠ ᤔᤧᤴᤕᤠ᤺ᤰᤋᤧᤴ॥ 20ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤑᤠᤖᤥᤸᤗᤧ ᤁᤢᤏᤡᤱᤘᤠᤴ ᤜᤠᤍᤡᤱ ᤁᤧᤎᤰᤐᤠ ᤆᤥᤃᤢ ᤐᤡᤖᤢ ᤜᤧᤰᤁᤩᤠᤱ ᤂᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤐᤣ᤺ᤰᤔᤠ ᤔᤧᤓᤠ᤺ᤰᤋᤢᤛᤡᤴ॥
ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤂᤠᤔᤠᤰᤆᤢᤶᤒᤠ
21ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤜᤢᤰᤁᤡᤴ ᤋᤠᤱᤛᤠᤱᤒᤥ ᤗᤧᤵᤔᤠᤱ ᤑᤥ᤺ᤰᤂᤧ᤹ ᤜᤧᤰᤁᤩᤠᤱ ᤔᤡᤛᤪ ᤗᤠᤈᤣ᤹ᤀᤥ ᤂᤠᤔᤠᤰᤆᤢᤶᤒᤠ ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤐᤥᤱ᤹॥ ᤛᤶᤔᤧᤸᤗᤧ ᤕᤠᤱᤁᤧᤍᤧᤵᤐᤠ ᤜᤧᤰᤁᤣ ᤂᤠᤔᤠᤰᤆᤢᤶᤒᤠ ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤐᤥᤱᤗ॥” 22ᤜᤧᤰᤁᤩᤠᤱ ᤔᤥᤛᤠ᤺ᤸᤗᤧ ᤁᤢᤜᤢᤰᤁᤡᤴ ᤋᤠᤱᤛᤠᤱᤒᤥ ᤗᤧᤵᤔᤠᤱ ᤛᤴᤇᤢ ᤜᤧᤰᤁᤩᤠᤱ ᤔᤡᤛᤪ ᤗᤠᤈᤣ᤹ ᤁᤧᤖᤧᤰ ᤛᤢᤶᤕᤠᤴ ᤌᤠᤖᤡᤰ ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤂᤠᤔᤠᤰᤆᤢᤶᤒᤠ ᤐᤥ᤺ᤰᤂᤧ॥ 23ᤔᤡᤛᤪᤡᤜᤠ᤹ ᤂᤢᤴᤇᤡ᤹ ᤏᤡᤔᤠ ᤔᤧᤴᤇᤢᤰᤛᤡᤱᤅᤡᤴ ᤜᤧᤰᤁᤩᤠᤱ ᤛᤢᤶᤕᤠᤴ ᤌᤠᤖᤡᤰ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤢᤴᤇᤡ᤹ ᤜᤡᤶᤜᤠ᤹ ᤗᤧᤵᤔᤠ ᤔᤧᤸᤗᤧᤖᤢᤴ॥ ᤁᤖ ᤀᤡᤛᤪᤠᤀᤡᤗᤡᤜᤠ᤹ ᤔᤧᤕᤢᤅᤧᤒᤠᤍᤧᤴᤏᤥᤃ ᤂᤠᤀᤥ᤺ᤳᤋᤣᤀᤠᤱᤅᤣ ᤐᤳᤇᤧ॥
24ᤂᤧᤒᤩᤠᤱ ᤑᤠᤖᤥ ᤜᤠᤱᤅᤡᤸᤗᤧ ᤔᤥᤛᤠᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤂᤡᤏᤡ᤹ ᤐᤣᤃᤧᤶᤔᤧ᤹ᤀᤠᤱ ᤂᤡᤏᤡ᤹ ᤕᤜᤘᤣ ᤍᤠᤱᤒᤧᤴ ᤔᤠᤱᤛᤧᤘᤠ ᤔᤧᤳᤋᤠᤶᤔᤧ᤹. ᤂᤡᤏᤡ᤹ ᤔᤧᤴᤇᤢᤔᤠᤜᤠ᤹. ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ᤀᤠᤱ ᤔᤧᤒᤣ᤺ᤰᤗ॥ ᤁᤖ ᤂᤡᤏᤡ᤹ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ ᤐᤡᤳ ᤏᤢ ᤁᤢᤶᤒᤠᤒᤠ ᤐᤡᤳᤜᤠ᤹ ᤀᤠᤶᤓᤠ ᤁᤵᤔᤥ ᤔᤧᤕᤠ᤺ᤰᤗ॥”
25ᤔᤥᤛᤠ᤺ᤸᤗᤧ ᤏᤥᤃᤵ ᤐᤡᤖᤢ. “ᤜᤧᤰᤁᤣᤏᤧᤓᤃᤪ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤠᤀᤥ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤖᤧ ᤗᤠᤃᤡ. ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤖᤧ ᤗᤠᤃᤡ ᤌᤰᤛᤠᤜᤠ᤹ ᤋᤣ᤹ᤔᤠ ᤂᤧᤏᤧ᤹ ᤕᤠᤵᤔᤡ ᤁᤧᤓᤠ᤺ᤰᤗᤀᤣ ᤐᤥᤱ᤹॥ 26ᤀᤠᤏᤡᤃᤣ ᤌᤰᤛᤠᤜᤠ᤹ᤀᤠᤱ ᤀᤠᤏᤡᤃᤧᤏᤢ ᤛᤥᤖᤡᤰ ᤔᤧᤒᤣ᤺ᤰ. ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤳᤇᤠ ᤗᤠᤱ ᤋᤥ᤹ᤓᤣᤳ ᤌᤡᤰᤁᤠᤱ ᤕᤠ᤺ᤰᤔᤠ ᤔᤧᤏᤢ᤹ᤏᤧᤴ॥ ᤀᤠᤏᤡᤃᤣ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤛᤧᤘᤠ ᤔᤧᤵᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤗᤠᤶᤒᤠᤀᤣ ᤁᤢᤓᤠ ᤋᤥ᤺ᤶᤔᤠᤛᤡ ᤁᤧᤒᤥᤱᤒᤠ ᤘᤠ᤹॥ ᤀᤠᤏᤡᤃᤣ ᤂᤧᤵᤔᤥ ᤔᤧᤱᤃᤧᤳᤋᤣ ᤌᤠᤖᤡᤰ ᤌᤣᤎᤣᤜᤠ᤹ ᤋᤥ᤺ᤶᤔᤠᤛᤡᤀᤠᤱ ᤕᤜᤘᤣ ᤍᤠᤱᤒᤧᤴ ᤔᤠᤱᤛᤧᤘᤠ ᤔᤧᤵᤔᤠ ᤐᤥᤱ᤹ ᤂᤧᤴ ᤀᤠᤏᤡᤃᤣ ᤔᤧᤏᤡᤛᤢᤶᤒᤧᤴ॥”
27ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤜᤠᤱᤅᤡᤸᤗᤧ ᤁᤢᤏᤡᤱᤘᤠᤴ ᤜᤠᤍᤡᤱ ᤁᤧᤎᤰᤐᤠ ᤆᤥᤃᤢ ᤐᤡᤖᤢ. ᤜᤧᤰᤁᤩᤠᤱ ᤂᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤐᤣ᤺ᤰᤔᤠ ᤔᤧᤓᤠ᤺ᤰᤋᤢᤛᤡᤴ॥ 28ᤂᤢᤏᤧ᤹ ᤔᤥᤛᤠᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤍᤃᤠᤱᤗᤠᤶᤒᤠ ᤗ᤺ᤴᤍᤧ ᤐᤣᤃᤧ᤹᥄ ᤂᤧᤏᤧ᤹ ᤁᤧᤏᤠᤖᤠᤴ ᤀᤠᤱᤃᤠ᤹ ᤕᤠᤶᤔᤥ ᤀᤥ᤺ᤴᤔᤧᤎᤠᤰᤋᤠᤱᤅᤡᤴᤏᤧ᤹᥄ ᤀᤠᤳᤋᤡᤴ ᤕᤧᤴᤏᤥ ᤂᤧᤏᤧ᤹ ᤀᤠᤱᤃᤠ᤹ ᤀᤠᤍᤃᤡ ᤀᤥ᤺ᤴᤃᤣᤎᤠᤰᤛᤡᤱ᤹ ᤜᤠᤒᤠ ᤂᤧᤸᤗᤧ ᤕᤠ᤺ᤴᤍᤡᤰ ᤂᤧᤏᤧ᤹ ᤁᤧᤛᤡ᤹᤺᥄”
29ᤔᤥᤛᤠ᤺ᤸᤗᤧ ᤔᤧᤳᤋᤢ. “ᤂᤧᤏᤧ᤹ ᤁᤢᤍᤥ᤺ᤵᤔᤠᤀᤣ ᤁᤧᤒᤠ᤺ᤳᤋᤢ. ᤂᤧᤏᤧ᤹ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤀᤠᤱᤃᤠ᤹ ᤁᤧᤴᤏᤡᤀᤠᤴ॥”
Currently Selected:
ᤗᤠᤶᤍᤡᤰ 10: LIFOTNT
Highlight
Copy
Compare
Share
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
