ᤗᤠᤶᤍᤡᤰ 20

ᤌᤡᤒᤥᤱ ᤀᤡᤱᤈᤠᤱᤜᤠ᤹

1ᤜᤧᤰᤁᤩᤠᤱ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ.

2“ᤀᤠᤱᤃᤠ᤹ ᤂᤡᤏᤡ᤹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤀᤠ. ᤀᤠᤱᤃᤠ᤹ ᤂᤡᤏᤡ᤹ ᤕᤥᤃ᤻ᤒᤠ ᤕᤥ᤺ᤃ᤻ᤔᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤕᤢᤅᤡᤒᤠ ᤔᤡᤛᤪ ᤗᤠᤈᤣ᤹ᤗᤠᤶ ᤂᤡᤏᤡ᤹ ᤗ᤺ᤳᤏᤡᤱ ᤑᤧᤳᤏᤡᤱ॥

3“ᤀᤠᤱᤃᤠ᤹ᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤴ ᤔᤠᤱ ᤛᤠᤶᤔᤠᤱᤜᤠ᤹ᤀᤠᤱ ᤛᤧᤘᤠ ᤔᤧᤔᤧᤳᤋᤧᤶᤛᤡᤶᤔᤡᤴᤏᤧ᤹॥

4“ᤂᤡᤏᤡ᤹ ᤀᤠᤒᤠᤅᤣ ᤗᤠᤃᤡ ᤛᤡᤱᤜᤠ᤹ ᤔᤧᤄᤥ᤺ᤴᤍᤧᤶᤔᤡᤴᤏᤧ᤹ᤀᤠᤱ ᤀᤠᤳᤋᤡᤴ ᤐᤖᤡᤰᤗᤧᤴᤏᤠᤱ ᤏᤠᤘᤠᤀᤡᤳᤗᤠ ᤔᤧᤈᤥᤃᤧᤶᤔᤡᤴᤏᤧ᤹. ᤌᤠ᤺ᤱ ᤋᤠᤱᤛᤠᤱᤒᤥᤒᤠ ᤀᤡᤃᤪ ᤀᤡᤰᤛᤠᤍᤡᤱ ᤂᤠᤶᤒᤣᤰ ᤏᤢ ᤔᤢ ᤆᤫᤠ᤺ᤋᤥ ᤁᤧᤕᤠᤰᤐᤠ ᤀᤠᤳᤋᤡᤴ ᤐᤖᤡᤰᤗᤧᤴᤏᤠᤱ ᤏᤠᤘᤠᤀᤡᤳᤗᤠ ᤔᤧᤈᤥᤃᤧᤶᤔᤡᤴᤏᤧ᤹॥ 5ᤀᤠᤳᤋᤡᤴ ᤏᤠᤘᤠᤀᤡᤳᤗᤠ᤺ᤴᤏᤠᤱ ᤂᤡᤏᤡ᤹ ᤛᤧᤘᤠ ᤔᤧᤔᤧᤳᤋᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤂᤡᤏᤡ᤹ ᤂᤧᤴ ᤔᤠᤱᤛᤧᤘᤠᤀᤠᤱ ᤔᤧᤔᤧᤳᤋᤧᤶᤔᤡᤴᤏᤧ᤹ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥ ᤂᤡᤏᤡ᤹ ᤘᤣ᤹ ᤔᤠᤱᤅᤡᤴ ᤔᤠᤱᤛᤧᤘᤠ ᤁᤧᤔᤧᤳᤋᤢᤶᤔᤡᤸᤗᤧ ᤀᤠᤱᤃᤠ᤹ ᤏᤠᤛᤡ ᤔᤧᤎ᤺ᤳᤋᤠᤴ॥ ᤀᤠᤱᤃᤠ᤹ ᤕᤠᤵᤔᤡ ᤁᤧᤈᤡ᤺ᤵᤐᤠᤜᤠ᤹ ᤂᤢᤴᤇᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤛᤢᤶᤛᤡᤃᤣᤰᤐᤠ ᤏᤢ ᤗᤡᤛᤡᤃᤣᤰᤐᤠ ᤌᤠ᤺ᤰ ᤌᤠᤖᤡᤰ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹॥ 6ᤁᤖ ᤀᤠᤳᤋᤡᤴᤜᤠ᤹ᤖᤧ ᤀᤠᤱᤃᤠ᤹ ᤔᤡ᤺ᤶᤈᤡ ᤔᤧᤔᤧᤳᤋᤠᤀᤠ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤧᤴᤇᤡᤱ ᤜᤧᤴᤇᤡᤱ ᤌᤠ᤺ᤰᤜᤠ᤹ ᤀᤠᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤢᤱᤛᤡᤱ᤹॥

7“ᤀᤠᤳᤋᤡᤴ ᤋᤠᤵᤑᤧ᤺ᤶᤒᤠ ᤏᤡᤱᤛᤣ᤺ᤰᤗᤧ ᤗᤠᤃᤡᤀᤠᤱ ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤜᤏᤧ ᤔᤧᤒᤠᤋᤠᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤡᤱ ᤑᤧᤰᤁᤧᤗᤠ᤺ᤶᤒᤠᤜᤠ᤹ ᤀᤠᤱᤃᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹॥

8“ᤏᤠ᤺ᤶᤛᤡᤱᤔᤠ ᤕᤧᤴᤏᤡᤴ ᤏᤧᤳᤋᤧᤶᤔᤧ᤹ ᤜᤧᤰᤁᤩᤠᤱ ᤂᤧᤴ ᤕᤧᤴᤏᤡᤴ ᤛᤣᤛᤣ ᤁᤳᤋᤧᤶᤔᤧ᤹॥ 9ᤂᤡᤏᤡ᤹ ᤕᤠ᤺ᤶᤒᤰᤁᤡᤴ ᤋᤢᤰᤛᤡ ᤕᤧᤴ ᤌᤠᤖᤡᤰ ᤆᤥᤃᤧᤶᤔᤧ᤹. 10ᤁᤖ ᤏᤢᤛᤡᤃᤣᤰᤐᤠ ᤕᤧᤴᤏᤡᤴ ᤆᤠᤜᤡ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤏᤠ᤺ᤶᤛᤡᤱᤔᤠ ᤕᤧᤴᤗᤥ॥ ᤂᤧᤸᤗᤧ ᤕᤠ᤺ᤴᤍᤡᤰ ᤂᤡᤏᤡ᤹ ᤌᤣᤀᤠᤱ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹. ᤂᤡᤏᤡ᤹ ᤛᤠ ᤕᤧᤶᤒᤡᤳᤇᤠ᤺ᤸᤗᤧ. ᤛᤠ ᤔᤧᤴᤇᤢᤔᤠ᤺ᤸᤗᤧ. ᤂᤡᤏᤡ᤹ ᤕᤥᤃ᤻ᤒᤠ ᤕᤥ᤺ᤃ᤻ᤔᤧᤸᤗᤧ. ᤂᤡᤏᤡ᤹ ᤐᤡᤳ ᤌᤰᤛᤠ᤺ᤸᤗᤧ. ᤂᤡᤏᤡ᤹ ᤗᤠᤈᤣ᤹ᤀᤥ ᤁᤧᤘᤠ᤹ᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠ᤺ᤸᤗᤧ ᤌᤣᤀᤠᤱ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ॥ 11ᤌᤣᤀᤠᤱᤓᤧᤸᤗᤧ ᤋᤢᤰᤛᤡ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤋᤠᤱᤛᤠᤱᤒᤠ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠ. ᤘᤖ᤺ᤱ ᤏᤢ ᤂᤧᤵᤔᤥ ᤁᤧᤕᤠᤰᤐᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤆᤥᤃᤢ. ᤁᤖ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤂᤢᤏᤧ᤹ ᤏᤠ᤺ᤶᤛᤡᤱ॥ ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤏᤠ᤺ᤶᤛᤡᤱᤔᤠ ᤕᤧᤴᤏᤡᤴ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢ. ᤜᤧᤰᤁᤩᤠᤱ ᤂᤧᤴ ᤛᤣᤛᤣ ᤆᤥᤃᤢ॥

12“ᤂᤡᤏᤡ᤹ ᤐᤠᤏᤢᤍᤡᤱ ᤐᤠ ᤏᤢ ᤔᤠᤏᤢᤍᤡᤱ ᤔᤠᤜᤠ᤹ ᤔᤡᤱᤛᤥᤀᤡᤱᤎᤠ᤺ᤱ ᤐᤡᤖᤧᤶᤛᤡᤶᤔᤧ᤹. ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤡᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤀᤡᤖᤡᤰ ᤁᤧᤜᤡᤅᤡᤖ॥

13“ᤔᤏᤠ ᤔᤧᤛᤧᤖᤧᤶᤔᤧᤴᤏᤧ᤹॥

14“ᤂᤡᤏᤡ᤹ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹॥

15“ᤂᤡᤏᤡ᤹ ᤔᤧᤄᤢ᤺ᤳᤋᤧᤶᤔᤡᤴᤏᤧ᤹॥

16“ᤂᤡᤏᤡ᤹ ᤜᤡᤶᤒᤣᤛᤠᤱᤒᤧᤴ ᤔᤧᤴᤘᤠ᤹ᤔᤏᤠᤒᤠ ᤀᤠᤵᤋᤡᤰ ᤔᤧᤃᤢᤋᤧᤶᤔᤡᤴᤏᤧ᤹॥

17“ᤂᤡᤏᤡ᤹ ᤜᤡᤶᤒᤣᤛᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤂᤡᤔᤩᤰ ᤔᤧᤈᤥᤃᤧᤶᤔᤡᤴᤏᤧ᤹॥ ᤂᤡᤏᤡ᤹ ᤜᤡᤶᤒᤣᤛᤠᤱᤒᤧᤸᤗᤧ ᤁᤢᤔᤣ᤺ᤳᤋᤡᤴ ᤔᤡᤰ ᤔᤧᤃᤣ᤺ᤳᤋᤧᤶᤔᤡᤴᤏᤧ᤹. ᤂᤡᤏᤡ᤹ ᤜᤡᤶᤒᤣᤛᤠᤱᤒᤧᤸᤗᤧ ᤁᤢᤕᤥ᤺ᤃ᤻ᤒᤠ. ᤁᤢᤕᤥ᤺ᤃ᤻ᤔᤠ. ᤁᤢᤒᤡᤳ. ᤁᤢᤀᤍᤱ ᤀᤡᤃᤪ ᤂᤧᤸᤗᤧ ᤁᤢᤎᤧᤔᤠ ᤐᤠ᤺ᤴᤏᤡᤴᤏᤠᤱ ᤔᤡᤰ ᤔᤧᤃᤣ᤺ᤳᤋᤧᤶᤔᤡᤴᤏᤧ᤹॥”

ᤔᤏᤠᤜᤠ᤹ ᤕᤱᤔᤠ ᤔᤧᤛᤡ᤹᤺

(ᤛᤠᤶᤕᤥ ᤀᤡᤱ ᥋:᥈᥈-᥉᥉)

18ᤀᤠᤸᤗ ᤁᤧᤖᤧᤰ ᤔᤏᤠᤜᤠ᤹ᤖᤧ ᤋᤠᤱᤛᤠᤱᤒᤥ ᤂᤧᤖᤧᤱᤄᤢᤖᤢᤱ ᤁᤧᤗ᤹ᤒᤠ ᤏᤢ ᤌᤢᤳᤌᤢᤖᤡ᤺ᤵᤐᤠ ᤗᤠᤀᤡᤰᤋᤧᤒᤠ ᤀᤡᤰᤗᤠᤴ ᤔᤧᤄᤧᤵᤛᤢ ᤜᤧᤰᤁᤩᤠᤱ ᤛᤠ᤺ᤶᤓᤣ ᤗᤧᤰᤋᤧᤒᤠ ᤏᤢ ᤌᤧᤃᤢᤀᤥᤗᤠᤶ ᤁᤧᤗ᤺ᤶᤒᤠ ᤔᤡ᤺ᤰᤂᤢᤴ ᤔᤧᤏᤡᤛᤢ. ᤂᤧᤒᤩᤠᤱ ᤂᤧᤱᤜᤠ᤹ ᤁᤡᤔᤧᤸᤗᤧ ᤔᤧᤕᤰᤂᤧ ᤜᤧᤰᤁᤩᤠᤱ ᤗᤠ᤺ᤳᤗᤠ᤺ᤳ ᤔᤧᤕᤧᤶᤛᤡᤱ॥ 19ᤂᤧᤱᤜᤠ᤹ᤖᤧ ᤔᤥᤛᤠᤴ ᤔᤧᤔᤧᤳᤋᤢ. “ᤂᤧᤏᤧ᤹ ᤀᤠᤏᤡᤃᤧᤏᤢ ᤁᤧᤒᤠ᤺ᤳᤏᤧᤓᤃᤪ ᤀᤠᤏᤡᤃᤣ ᤂᤧᤏᤧ᤹ ᤁᤧᤒᤠ᤺ᤴᤏᤡᤴ ᤂᤧᤵᤛᤢᤶᤒᤧ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡᤃᤧᤏᤢ ᤐᤠ᤺ᤳᤏᤧᤓᤃᤪ ᤀᤠᤏᤡᤃᤣ ᤛᤩᤧ᤹ᤀᤡᤃᤧ ᤑᤠ᤹ᤀᤠᤱ ᤁᤡᤛᤡᤃᤧ॥”

20ᤔᤥᤛᤠ᤺ᤸᤗᤧ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤔᤧᤃᤡᤛᤧᤶᤔᤡᤴᤏᤧ᤹. ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤏᤡᤱᤘᤠ᤹ ᤛᤠ᤹ᤛᤧ ᤕᤧᤀᤠᤱ ᤘᤠ᤹ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤗᤠᤕᤥ ᤔᤧᤈᤥᤃᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤂᤢᤏᤧ᤹ ᤁᤡᤵᤔᤠᤖᤧ ᤗᤠᤃᤡ ᤂᤡᤏᤡ᤹ ᤜᤢ᤹ᤛᤧ ᤕᤧᤀᤠᤱ ᤘᤠ᤹॥”

21ᤁᤖ ᤔᤏᤠᤜᤠ᤹ ᤔᤠ᤺ᤱᤄᤠᤀᤣ ᤔᤧᤕᤧᤶᤛᤡᤱᤅᤠᤱ ᤔᤧᤕᤧᤒᤧ ᤜᤧᤰᤁᤩᤠᤱ ᤔᤥᤛᤠ᤺ᤸᤗᤰ ᤔᤠᤰᤛᤡᤍᤡ᤺ᤱᤃᤩᤠ᤺ᤵᤐᤠ ᤂᤠ᤹ᤔᤡ᤺ᤳᤋᤡᤸᤗᤧ ᤁᤢᤒᤣᤛᤠᤱ ᤐᤣ. ᤂᤧᤵᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤘᤕᤧᤖᤥ॥

ᤗᤧᤳᤋᤡ ᤋᤥ᤺ᤶᤔᤠ ᤌᤡᤶᤜᤠ᤹

22ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤧᤛᤧ᤹. ‘ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤀᤠᤰᤂᤣᤗ᤹ᤖᤡᤰ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤡᤏᤡ᤹ᤏᤢ ᤐᤠᤖᤠᤱ ᤂᤧᤴ ᤂᤡᤏᤡ᤹ ᤁᤧᤏᤡᤛᤢᤶᤔᤠᤱ ᤁᤧᤘᤕᤡ᤹॥ 23ᤀᤠᤱᤃᤠ᤹ᤏᤢ ᤛᤥᤛᤥᤖᤡᤰ ᤂᤡᤏᤡ᤹ ᤘᤣ᤹ ᤔᤠᤱᤜᤠ᤹ ᤔᤧᤈᤥᤃᤧᤶᤛᤡᤶᤔᤡᤴᤏᤧ᤹॥ ᤕᤢᤵᤐᤠ ᤔᤠᤱᤜᤠ᤹. ᤛᤠᤶᤔᤩᤠᤱ ᤔᤠᤱᤜᤠ᤹ ᤀᤠᤒᤠᤅᤣ ᤗᤠᤃᤡ ᤔᤧᤈᤥᤃᤧᤶᤛᤡᤶᤔᤡᤴᤏᤧ᤹॥

24“‘ᤀᤠᤱᤃᤠ᤹ ᤀᤠᤗᤠᤃᤡ ᤗᤳᤇᤠ ᤂᤠᤶᤗᤧᤴ ᤗᤧᤳᤋᤡ ᤋᤥ᤺ᤶᤔᤠᤎᤡᤰ ᤆᤥᤃᤧᤶᤔᤧ᤹ ᤜᤧᤰᤁᤩᤠᤱ ᤂᤧᤵᤔᤥ ᤂᤡᤏᤡ᤹ ᤔᤧᤸᤗᤢᤰ ᤏᤢ ᤛᤧᤃᤶᤒᤠᤜᤠ᤹ ᤛᤡᤍᤢᤱᤈᤓᤠ ᤆᤥᤃᤧᤶᤛᤡᤶᤔᤧ᤹ᤀᤠᤱ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤏᤢ ᤏᤠᤍᤱ ᤆᤥ᤺ᤰᤔᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤴᤍᤧᤶᤔᤧ᤹ ᤂᤧᤒᤩᤠᤱ ᤂᤧᤴ ᤌᤰᤛᤠᤜᤠ᤹ ᤔᤡ᤺ᤸᤗᤧ ᤂᤠᤵᤐᤢᤌᤩ᤺ᤱ ᤔᤡᤎᤡᤰᤂᤧᤶ ᤋᤣᤛᤧᤶᤛᤡᤶᤔᤧ᤹॥ ᤀᤠᤱᤃᤠ᤹ ᤀᤣ᤺ᤰ ᤛᤧᤴᤍᤢᤱᤒᤠ ᤀᤠᤛᤧᤘᤠ ᤔᤧᤵᤔᤠ ᤁᤧᤖᤧᤰ ᤋᤧᤴᤜᤠ᤹ᤀᤥ ᤀᤠᤱᤃᤠ᤹ ᤂᤡᤏᤡ᤹ᤀᤥ ᤋᤠᤀᤠ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤏᤡᤱ᤹॥ 25ᤂᤡᤏᤡ᤹ ᤀᤠᤱᤃᤠ᤹ ᤀᤠᤗᤠᤃᤡ ᤗᤢᤱᤅᤡᤸᤗᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤁᤧᤈᤥᤃᤢᤶᤏᤧᤓᤃᤪ ᤂᤧᤴ ᤗᤰᤔᤏᤠᤒᤠ ᤂᤰᤔᤏᤠᤒᤠ ᤗᤢᤱᤜᤠ᤹ ᤔᤧᤈᤥᤃᤧᤶᤔᤡᤴᤏᤧ᤹॥ ᤌᤣᤀᤠᤱᤓᤧᤸᤗᤧ ᤂᤧᤵᤔᤥ ᤂᤡᤏᤡ᤹ ᤛᤠᤔᤠᤜᤠ᤹ ᤀᤥᤃᤵ ᤁᤧᤈᤥᤃᤢᤶᤔᤡᤸᤗᤧ ᤂᤧᤴ ᤀᤠᤛᤢᤳᤌᤥ ᤁᤧᤈᤥᤃᤢᤶ᤹॥ 26ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ᤀᤥ ᤗᤧᤳᤋᤡ ᤔᤧᤍᤥᤴᤍᤢᤒᤠᤍᤧᤴᤏᤥ ᤏᤠᤜᤠᤱᤛᤣᤰ ᤔᤧᤓᤳᤇᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤔᤧᤗᤡᤅᤧᤶᤔᤡᤴᤏᤧ᤹॥ ᤜᤧᤰᤁᤣ ᤁᤧᤈᤥᤃᤢᤶᤔᤡᤸᤗᤧ ᤂᤡᤏᤡ᤹ ᤗᤧᤰᤆᤠ᤹ᤒᤧᤎᤡᤰᤁᤡᤴ ᤏᤡᤎᤠ᤺ᤵᤗᤥ॥’”

Currently Selected:

ᤗᤠᤶᤍᤡᤰ 20: LIFOTNT

Highlight

Copy

Compare