ᤗᤠᤶᤍᤡᤰ 27

ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ

1“ᤂᤧᤏᤧ᤹ ᤒᤒᤢᤗ ᤛᤡᤱᤅᤡᤸᤗᤧᤴ ᤜᤢᤰᤛᤡᤰ ᤅᤠᤛᤡ ᤁᤢᤗᤠᤶᤋᤡ ᤏᤢ ᤜᤢᤰᤛᤡᤰ ᤅᤠᤛᤡ ᤁᤢᤓᤧᤖᤧ ᤁᤧᤒᤵᤐᤠ ᤁᤢᤍᤱᤒᤠ ᤁᤢᤕᤠ ᤗᤡᤛᤡ ᤁᤧᤒᤵᤐᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤡᤰ ᤆᤥᤃᤧ᤹॥ ᤂᤧᤸᤗᤧ ᤁᤢᤗᤡᤱᤃᤧᤴᤏᤡᤴ ᤜᤢᤰᤛᤡᤰ ᤛᤢᤶᤛᤡ ᤁᤣ᤺ᤶᤒᤠ ᤐᤥᤱᤗ॥ 2ᤂᤧᤸᤗᤧ ᤁᤧᤖᤧᤰ ᤗᤡᤛᤡ ᤁᤢᤛᤢᤰᤐᤥ ᤗᤳᤇᤠ ᤗᤳᤇᤠ ᤁᤢᤍᤠᤱ ᤑᤳᤇᤧ᤹॥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴᤏᤢ ᤂᤧᤸᤗᤧ ᤁᤢᤍᤠᤱᤜᤠ᤹ ᤜᤠᤒᤠ ᤂᤧᤴ ᤗᤳᤇᤠ ᤛᤡᤱᤓᤧᤸᤗᤧᤰᤗᤠᤶ ᤆᤥ᤺ᤰᤔᤏᤠᤒᤠ ᤐᤥᤱᤗ॥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤁᤠᤛᤠ᤺ᤸᤗᤧ ᤛᤢ᤺ᤵᤋᤧ᤹॥ 3ᤂᤧᤵᤔᤥᤒᤠ ᤂᤠᤵᤐᤢᤴ ᤗ᤺ᤵᤔᤠᤖᤧ ᤗᤠᤃᤡ ᤂᤵᤐᤩᤠᤜᤠ᤹. ᤜᤧᤰᤁᤩᤠᤱ ᤋᤠᤒᤡᤸᤗᤥᤜᤠ᤹. ᤛᤠᤱᤔᤠ ᤇ᤻ᤕᤧ᤺ᤱᤃᤩᤠᤜᤠ᤹. ᤛᤠ ᤗᤰᤔᤠᤗ᤺ᤵᤔᤠ ᤂᤧ᤺ᤰᤆᤢᤖᤡ ᤁᤧᤒᤵᤐᤠ ᤀᤢ᤺ᤰᤂᤡᤜᤠ᤹ ᤏᤢ ᤔᤡ ᤏᤧᤔᤠ ᤛᤠᤱᤋᤧᤖᤧ᤺ᤱᤜᤠ᤹ ᤆᤥᤃᤧ᤹. ᤁᤧᤖᤧᤰ ᤛᤠᤔᤠᤜᤠ᤹ ᤁᤠᤛᤠ᤺ᤸᤗᤧᤴ ᤐᤥᤱᤔᤠ ᤐᤥᤱ᤹॥ 4ᤂᤧᤸᤗᤧ ᤗᤠᤃᤡ ᤁᤠᤛᤠᤒᤠ ᤆᤡ᤹ᤗᤡᤱᤃᤣ᤹ ᤆᤥᤃᤧ᤹. ᤜᤧᤰᤁᤩᤠᤱ ᤆᤡ᤹ᤗᤡᤱᤃᤣᤸᤗᤧ ᤁᤢᤛᤶᤎᤠᤱ ᤗᤡᤛᤡ ᤁᤢᤛᤢᤰᤐᤥ ᤗᤡᤛᤡ ᤁᤠᤛᤠ ᤁᤢᤴᤍᤢᤸᤗᤥᤜᤠ᤹ ᤑᤳᤇᤧ᤹॥ 5ᤂᤧᤏᤧ᤹ ᤁᤴᤃ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤛᤡᤃᤠᤱ ᤁᤧᤖᤧᤰ ᤐᤡᤛᤠᤱᤒᤠ ᤁᤢᤃ᤺ᤱᤃᤩᤠ᤺ᤸᤗᤧ ᤁᤢᤛᤡᤃᤠᤱ ᤕᤢᤰᤂᤧ᤹. ᤜᤧᤰᤁᤣᤗ᤹ᤖᤡᤰ ᤆᤡ᤹ᤗᤡᤱᤃᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤗᤢᤶᤔᤥ ᤌᤠᤖᤡᤰ ᤁᤧᤳᤗ॥ 6ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤗᤠᤃᤡ ᤒᤒᤢᤗ ᤛᤡᤱᤅᤡᤸᤗᤧᤴ ᤋᤰᤗᤠᤱᤜᤠ᤹ ᤆᤥᤃᤧ᤹॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤠᤛᤠ᤺ᤸᤗᤧ ᤛᤢ᤺ᤵᤋᤧ᤹॥ 7ᤂᤧᤵᤔᤥᤒᤠ ᤋᤰᤗᤠᤱᤜᤠ᤹ ᤁᤢᤴᤍᤢᤸᤗᤥᤜᤠ᤹ᤀᤥ ᤗᤡ᤺ᤰᤂᤧ᤹. ᤜᤧᤰᤁᤩᤠᤱ ᤂᤧᤴ ᤐᤱᤔᤧᤸᤗᤧ ᤂᤧᤴ ᤋᤰᤗᤠᤱᤜᤠ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤏᤠᤜᤠᤱ ᤁᤳᤏᤠᤜᤠᤱ ᤐᤳᤗ॥ 8ᤂᤧᤏᤧ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤛᤡᤱᤓᤧᤸᤗᤧᤰᤁᤡᤸᤗᤧᤴ ᤁᤢᤜᤥ᤺ᤴᤍᤪᤠ ᤁᤧᤒᤵᤐᤠ ᤆᤥᤃᤧ᤹॥ ᤀᤠᤱᤃᤠ᤹ ᤁᤥ᤺ᤰᤔᤠᤀᤥ ᤀᤥ᤺ᤴᤎᤠᤰᤏᤧᤒᤠ ᤁᤢᤀᤡᤛᤡᤰ ᤂᤧᤴ ᤆᤥᤃᤧ᤹ᤀᤥ॥

ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤰᤂᤢᤶ

(ᤗᤠ ᥉᥎:᥏-᥈᥆)

9“ᤂᤧᤏᤧ᤹ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤗᤠᤃᤡ ᤗᤰᤂᤢᤶ ᤌᤡᤰ ᤆᤥᤃᤧ᤹॥ ᤂᤧᤸᤗᤧ ᤗᤠᤱᤃᤧᤳ ᤗᤧᤵᤔᤠᤱᤒᤠ ᤗᤰᤁᤡᤸᤗᤧ ᤁᤢᤗᤠᤶᤋᤡ᤺ᤴ ᤁᤡᤵ ᤌᤡᤰ ᤜᤢᤰᤛᤡᤰ ᤏᤧᤖ ᤐᤥᤱ᤹. ᤜᤧᤰᤁᤩᤠᤱ ᤂᤧᤸᤗᤧ ᤗᤠᤃᤡ ᤆᤢᤴᤈᤢᤶᤒᤠ ᤂᤡ᤺ᤸᤗᤧ ᤑᤔᤏᤠᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤑᤥ᤺ᤴᤍᤠᤜᤠ᤹ ᤆᤥᤃᤧ᤹॥ 10ᤂᤧᤵᤔᤥᤒᤠ ᤏᤡᤒᤥᤱ ᤁᤠᤛᤠ ᤛᤡᤳᤗᤠᤱᤜᤠ᤹ ᤏᤢ ᤂᤧᤸᤗᤧ ᤁᤢᤕᤢᤰᤏᤠᤜᤠ᤹ᤀᤠᤱ ᤏᤡᤒᤥᤱᤅᤣ ᤁᤠᤛᤠ᤺ᤸᤗᤧᤴ ᤐᤥᤱᤔᤠ ᤐᤥᤱ᤹॥ ᤛᤡᤳᤗᤠᤱᤅᤥᤒᤠ ᤂᤧ᤺ᤰᤆᤢᤖᤡᤜᤠ᤹ ᤏᤢ ᤂᤧᤸᤗᤧ ᤁᤢᤏᤠᤶᤜᤠ᤹ᤃ ᤕᤢᤵᤐᤠ᤺ᤸᤗᤧᤴ ᤐᤥᤱᤗ॥ 11ᤜᤧᤰᤁᤣᤗ᤹ᤖᤡᤰᤁᤣ ᤌᤠᤱᤃᤧᤳ ᤐᤡᤛᤠᤱᤒᤠ ᤁᤢᤗᤰᤁᤡᤸᤗᤧ ᤗᤠᤃᤡᤀᤠᤱ ᤁᤡᤵ ᤌᤡᤰ ᤜᤢᤰᤛᤡᤰ ᤕᤠᤖᤡᤰ ᤁᤣ᤺ᤶᤒᤠ ᤑᤥ᤺ᤴᤍᤠᤜᤠ᤹ ᤐᤳᤗ. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤛᤡᤳᤗᤠᤱᤜᤠ᤹ ᤏᤡᤒᤥᤱ ᤏᤢ ᤂᤧᤸᤗᤧ ᤁᤢᤕᤢᤰᤏᤠᤜᤠ᤹ᤀᤠᤱ ᤏᤡᤒᤥᤱᤅᤣ ᤐᤳᤗ. ᤁᤧᤖᤧᤰ ᤁᤠᤛᤠ᤺ᤸᤗᤧᤴ ᤐᤥᤱᤗ॥ ᤁᤖ ᤛᤡᤳᤗᤠᤱᤅᤥᤒᤠ ᤂᤧ᤺ᤰᤆᤢᤖᤡᤜᤠ᤹ ᤏᤢ ᤁᤢᤏᤠᤶᤜᤠ᤹ ᤕᤢᤵᤐᤠ᤺ᤸᤗᤧᤴ ᤐᤥᤱᤗ॥

12“ᤗᤰᤂᤢᤶᤔᤥᤒᤠ ᤏᤠᤶᤎᤠ ᤐᤡᤛᤠᤱᤒᤠ ᤁᤢᤓᤧᤖᤧ᤺ᤸᤗᤧ ᤗᤠᤃᤡ ᤅᤠᤒᤥᤱ ᤜᤢᤰᤛᤡᤰ ᤁᤧᤒᤵᤐᤠ ᤑᤥ᤺ᤴᤍᤠᤴ ᤐᤳᤗ॥ ᤂᤧᤵᤔᤥᤒᤠ ᤛᤡᤳᤗᤠᤱᤜᤠ᤹ ᤌᤡᤒᤥᤱ ᤏᤢ ᤁᤢᤕᤢᤰᤏᤠᤜᤠ᤹ᤀᤠᤱ ᤌᤡᤒᤥᤱᤅᤣ ᤐᤥᤱᤗ॥ 13ᤗᤰᤂᤢᤶᤔᤥᤒᤠ ᤏᤠᤱᤃᤧᤴ ᤀᤡᤃᤪ ᤏᤠᤶᤎᤠ ᤐᤡᤛᤠᤱᤒᤠ ᤁᤢᤏᤢᤵᤔᤥᤒᤠ ᤁᤢᤓᤧᤖᤧᤴ ᤅᤠᤒᤥᤱ ᤜᤢᤰᤛᤡᤰ ᤏᤧᤖ ᤐᤥᤱ᤹॥ 14ᤔᤠ ᤗᤠᤶᤎᤣ᤺ᤳᤋᤥᤒᤠ ᤌᤡᤰ ᤗᤧᤵᤔᤠᤱᤗᤧ ᤗᤠᤃᤡ ᤌᤡᤒᤥᤱᤅᤠᤱ ᤅᤠᤛᤡ ᤜᤢᤰᤛᤡᤰ ᤁᤧᤒᤵᤐᤠ ᤑᤥ᤺ᤴᤍᤠᤜᤠ᤹ ᤐᤳᤗ ᤐᤥᤱ᤹॥ ᤂᤧᤵᤔᤥᤒᤠ ᤛᤡᤳᤗᤠᤱᤜᤠ᤹ ᤛᤢᤶᤛᤡ ᤏᤢ ᤁᤢᤕᤢᤰᤏᤠᤜᤠ᤹ᤀᤠᤱ ᤛᤢᤶᤛᤡᤀᤣ ᤐᤥᤱᤗ ᤐᤥᤱ᤹॥ 15ᤘᤣ᤹ ᤐᤡᤛᤠᤱᤗᤧ ᤗᤠᤃᤡ ᤌᤡᤒᤥᤱᤅᤠᤱ ᤅᤠᤛᤡ ᤜᤢᤰᤛᤡᤰ ᤁᤧᤒᤵᤐᤠ ᤑᤥ᤺ᤴᤍᤠᤜᤠ᤹ ᤐᤳᤗ॥ ᤂᤧᤵᤔᤥᤒᤠ ᤛᤡᤳᤗᤠᤱᤜᤠ᤹ ᤛᤢᤶᤛᤡ ᤏᤢ ᤁᤢᤕᤢᤰᤏᤠᤜᤠ᤹ᤀᤠᤱ ᤛᤢᤶᤛᤡᤀᤣ ᤐᤥᤱᤗ ᤐᤥᤱ᤹॥

16“ᤗᤰᤂᤢᤶᤔᤥᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤗᤠᤃᤡ ᤜᤡ᤺ᤰᤕᤱᤕᤱᤒᤠ. ᤐᤠᤖᤠᤴᤗᤠ ᤜᤧ᤺ᤳᤋᤠᤱᤒᤠ ᤂᤡ ᤏᤢ ᤆᤢᤴᤈᤢᤴ ᤗ᤹ᤖᤡᤰ ᤌᤠᤰᤔᤏᤠᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤏᤡᤒᤥᤱ ᤜᤢᤰᤛᤡᤰ ᤁᤧᤒᤵᤐᤠ ᤑᤥ᤺ᤴᤍᤠ ᤐᤳᤗ ᤐᤥᤱ᤹॥ ᤂᤧᤵᤔᤥ ᤁᤢᤓᤢᤱ ᤗᤰᤔᤏᤠ ᤁᤣ᤺ᤵᤔᤏᤠᤒᤠ ᤕᤠ᤺ᤶᤒᤰ ᤐᤥᤱᤗ॥ ᤂᤧᤵᤔᤥᤒᤠ ᤛᤡᤳᤗᤠᤱᤜᤠ᤹ ᤗᤡᤛᤡ ᤏᤢ ᤁᤢᤕᤢᤰᤏᤠᤜᤠ᤹ᤀᤠᤱ ᤗᤡᤛᤡᤀᤣ ᤐᤥᤱᤗ॥ 17ᤗᤰᤂᤢᤶᤔᤥᤒᤠ ᤁᤧᤖᤧᤰ ᤐᤡᤛᤠᤱᤒᤠ ᤁᤧᤖᤧᤰ ᤛᤡᤳᤗᤠᤱᤜᤠ᤹ᤀᤥᤒᤠ ᤁᤢᤏᤠᤶᤜᤠ᤹ ᤏᤢ ᤁᤢᤘᤣ᤹ᤔᤠ ᤂᤧ᤺ᤰᤆᤢᤖᤡᤜᤠ᤹ ᤕᤢᤵᤐᤠ᤺ᤸᤗᤧᤴ ᤐᤥᤱᤔᤠ ᤐᤥᤱ᤹॥ ᤂᤧᤸᤗᤧ ᤁᤢᤕᤢᤰᤏᤠᤜᤠ᤹ ᤁᤠᤛᤠ᤺ᤸᤗᤧᤴ ᤐᤥᤱᤗ॥ 18ᤗᤰᤂᤢᤶᤔᤡᤸᤗᤧ ᤁᤢᤗᤠᤶᤋᤡ᤺ᤴ ᤁᤡᤵ ᤌᤡᤰ ᤜᤢᤰᤛᤡᤰ ᤏᤢ ᤂᤧᤸᤗᤧ ᤁᤢᤓᤧᤖᤧᤴ ᤅᤠᤒᤥᤱ ᤜᤢᤰᤛᤡᤰ ᤐᤥᤱᤗ ᤐᤥᤱ᤹॥ ᤂᤧᤵᤔᤥᤒᤠ ᤑᤥ᤺ᤴᤍᤠᤜᤠ᤹ᤖᤧ ᤁᤢᤗᤡᤱᤃᤧᤴᤏᤡᤴ ᤜᤢᤰᤛᤡᤰ ᤅᤠᤛᤡ ᤁᤧᤒᤵᤐᤠ ᤐᤥᤱᤗ॥ ᤂᤧᤱᤜᤠ᤹ ᤆᤢᤴᤈᤢᤴ ᤗ᤹ᤖᤡᤰ ᤌᤠᤰᤔᤏᤠᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤐᤥᤱᤔᤠ ᤐᤥᤱ᤹. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤁᤢᤕᤢᤰᤏᤠᤜᤠ᤹ ᤁᤠᤛᤠ᤺ᤸᤗᤧᤴ ᤐᤥᤱᤔᤠ ᤐᤥᤱ᤹॥ 19ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤒᤠ ᤔᤠᤱᤛᤧᤘᤠ ᤆᤥ᤺ᤰᤔᤠ ᤁᤧᤖᤧᤰ ᤛᤠᤔᤠᤜᤠ᤹ ᤏᤢ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤀᤢ᤺ᤱᤔᤠ ᤁᤧᤖᤧᤰ ᤗᤰᤆᤢᤜᤠ᤹ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤗᤰᤂᤢᤶᤔᤥᤒᤠ ᤁᤧᤖᤧᤰ ᤁᤢᤜᤠᤰᤔᤠ ᤗᤰᤆᤢᤜᤠ᤹ ᤁᤠᤛᤠ᤺ᤸᤗᤧᤴ ᤐᤥᤱᤔᤠ ᤐᤥᤱᤗᤥ॥

ᤛᤣᤔᤡ ᤜᤠ᤺ᤶᤔᤠ ᤏᤡ᤺ᤱᤃᤣ᤹

(ᤗᤧᤒᤡ ᥈᥊:᥇-᥊)

20“ᤀᤥ᤺ᤳᤋᤡ᤺ᤸᤗᤧ ᤗᤠᤃᤡ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤕᤢᤛᤢᤒᤠ ᤆᤤᤋᤢᤏ ᤀᤡᤛᤣ᤺ᤱᤒᤠ ᤏᤡ᤺ᤱᤃᤣ᤺ᤴ ᤔᤧᤍᤠᤖᤢᤖ. ᤜᤧᤰᤁᤩᤠᤱ ᤛᤣᤔᤡᤜᤠ᤹ ᤆᤰᤔᤧᤸᤗ᤹ᤀᤣ ᤜᤠ᤹ᤖᤢᤀᤠᤱ ᤕᤢᤱᤗ ᤑᤠ᤹ᤀᤠᤱ ᤂᤧᤏᤧ᤹ ᤂᤧᤱᤜᤠ᤹ ᤀᤡᤱᤈᤠᤱ ᤐᤡᤖᤧᤛᤧ᤹॥ 21ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤁᤢᤍᤃᤡ ᤁᤧᤒᤵᤐᤠ ᤑᤥ᤺ᤴᤍᤠ ᤗᤠ᤺ᤰᤁᤠᤳ ᤜᤠᤖᤢᤏᤧᤴ ᤏᤢ ᤁᤢᤛ᤻ᤛᤠᤜᤠ᤹ᤖᤧ ᤂᤧᤴ ᤛᤣᤔᤡᤜᤠ᤹ ᤕᤢ᤺ᤴᤇᤡᤰᤁᤠᤱᤎᤥ ᤋᤠᤏᤠᤶ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤧᤜᤠ᤺ᤴᤍᤢᤀᤠᤱ ᤔᤧᤕᤠᤰᤗ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤌᤠ᤺ᤰᤌᤠ᤺ᤰᤁᤥ ᤌᤠᤖᤡᤰ ᤁᤴ ᤛᤍᤠᤍᤡᤱᤒᤠ ᤌᤡᤶ ᤐᤥᤱᤗᤖᤥ॥”

Currently Selected:

ᤗᤠᤶᤍᤡᤰ 27: LIFOTNT

Highlight

Copy

Compare