ᤋᤥᤗᤡᤱᤛᤥᤔᤢ 35
35
ᤕᤠᤁᤢᤒᤧᤴ ᤒᤣᤌᤣᤗᤀᤥ ᤏᤢᤱ᤹
1ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤁᤢᤒᤧᤴ ᤔᤧᤳᤋᤢ᤹. “ᤐᤥᤃᤧ᤹ᤀᤠᤱ ᤌᤥ ᤒᤣᤌᤣᤗᤀᤥ ᤐᤣᤃᤧ᤹ ᤜᤧᤰᤁᤩᤠᤱ ᤂᤧᤵᤔᤥᤀᤣ ᤕᤢᤅᤧ᤹ᤀᤥ. ᤁᤧᤶᤓᤢ᤹ ᤀᤣᤛᤠᤒᤖᤥᤗᤠᤶ ᤂᤧᤏᤧ᤹ ᤁᤧᤄᤧᤳᤇᤡᤱᤅᤧᤸᤗᤧ ᤂᤧᤏᤧ᤹ᤀᤥ ᤁᤧᤎᤠ᤺ᤶᤛᤡᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤂᤧᤵᤔᤥ ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤡᤰ ᤆᤥᤃᤧ᤹ᤀᤥ॥” #ᤋᤥᤗᤡᤱ ᥈᥎:᥇᥇-᥇᥍
2ᤂᤧᤸᤗᤧᤆᤥᤃᤢᤸᤗᤧ ᤕᤠᤁᤢᤒᤖᤧ ᤁᤢᤜᤡᤶᤛᤕᤱ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠᤜᤠ᤹ ᤁᤧᤖᤧᤰ ᤔᤧᤳᤋᤢᤛᤡ. “ᤂᤡᤏᤡ᤹ ᤁᤧᤃᤳᤋᤢᤶᤛᤡᤶᤒᤠ ᤔᤢᤖᤧᤴᤗᤠᤈᤣ᤹ᤒᤠ ᤔᤠᤱᤜᤠ᤹ ᤗᤠᤵᤑᤣᤛᤠᤶᤛᤡᤶᤔᤧ᤹ ᤜᤧᤰᤁᤩᤠᤱ ᤀᤠᤒᤠᤅᤣ ᤛᤣᤛᤣᤛᤠᤱᤛᤠᤱ ᤆᤥ᤺ᤰᤛᤡᤱᤅᤠᤶᤔᤧ᤹ᤀᤠᤱ ᤆᤠᤱ ᤗᤧᤰᤛᤡᤅᤠᤶᤔᤧ᤹॥ 3ᤂᤧᤒᤩᤠᤱ ᤀᤠᤏᤡ᤹ ᤒᤣᤌᤣᤗᤀᤥ ᤐᤣᤃᤡ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤢᤰᤂᤧᤖᤧᤴ ᤕᤧᤴᤏᤥ ᤀᤠᤒᤣᤗᤡ ᤁᤧᤄᤧᤶᤒᤠ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤳᤋᤠᤴ ᤐᤣ᤺ᤰᤁᤠᤛᤠᤱ ᤀᤠᤱᤃᤠ᤹ᤏᤢ ᤛᤥᤛᤥᤖᤡᤰ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤂᤧᤵᤔᤥ ᤀᤠᤱᤃᤠ᤹ ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤡᤰ ᤆᤥᤃᤢᤱ᤹॥” 4ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤔᤧᤃᤳᤋᤢᤒᤠ ᤔᤢᤖᤧᤴᤗᤠᤈᤣᤒᤠ ᤔᤠᤱᤜᤠ᤹ ᤜᤧᤰᤁᤩᤠᤱ ᤀᤠᤒᤠᤅᤣ ᤂᤢᤏᤡ᤹ ᤏᤧᤰᤂᤥᤀᤥ ᤔᤧᤘᤠᤖᤢᤒᤠ ᤏᤡᤖᤡᤰᤘᤠᤜᤠ᤹ ᤔᤧᤓᤧᤴᤍᤢᤀᤠᤱ ᤕᤠᤁᤢᤒᤧᤴ ᤔᤧᤒᤡᤖᤢ ᤜᤧᤰᤁᤩᤠᤱ ᤕᤠᤁᤢᤒᤖᤧ ᤛᤁᤣᤔᤖᤧ ᤁᤢᤒᤣᤛᤠᤱᤒᤠ ᤕᤜᤡᤒᤠ ᤛᤡᤱᤒᤢᤱᤅᤡᤸᤗᤧ ᤁᤢᤒᤢᤱᤅᤥ ᤗᤢᤵᤋᤢ॥
5ᤂᤧᤱᤜᤠ᤹ ᤗᤠᤶᤍᤡ᤺ᤰᤁᤥ ᤔᤧᤎᤠᤛᤡᤱᤅᤧᤸᤗᤧ ᤂᤡᤷᤗᤡᤒᤠ ᤕᤧᤰᤕᤰᤜᤠ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤡᤔᤠ ᤕᤱᤔᤠ ᤋᤩᤧ. ᤜᤧᤰᤁᤩᤠᤱ ᤀᤠᤳᤋᤡᤸᤗᤧᤀᤠᤱ ᤂᤧᤱᤜᤠ᤹ ᤔᤧᤶᤓᤳᤋᤢᤴᤛᤡᤴᤗᤥ॥
6ᤕᤠᤁᤢᤒ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤁᤏᤠᤏ ᤗᤠᤈᤣ᤹ᤒᤠ ᤗᤢᤈ ᤐᤠᤱᤈᤢᤶᤔᤥ (ᤒᤣᤌᤣᤗᤀᤠᤱ ᤔᤧᤔᤧᤳᤋᤢ᤹) ᤔᤧᤃᤧᤖᤧ॥ 7ᤂᤧᤵᤔᤥ ᤂᤢᤏᤧ᤹ ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤡᤰ ᤆᤥᤃᤢ॥ ᤂᤧᤴ ᤋᤧᤴᤏᤡᤴ ᤂᤢᤏᤧ᤹ ᤀᤧᤸᤒᤣᤌᤧᤗ ᤔᤡᤱ ᤘᤠ᤺ᤳᤋᤢ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤶᤓᤢ᤹ᤖᤥᤗᤠᤶᤒᤠ ᤂᤧᤳᤇᤡᤱᤅᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤒᤠᤅᤣ ᤂᤧᤵᤔᤥ ᤂᤢᤏᤧ᤹ᤏᤢ ᤌᤠ᤺ᤶᤛᤡᤱᤅᤠᤱ ᤘᤕᤧ॥
8ᤂᤧᤵᤔᤥ ᤖᤧᤒᤡᤁᤠᤖᤧ ᤁᤢᤛᤧᤘᤠᤖᤥᤔᤠ ᤍᤧᤒᤥᤖᤠᤴ ᤛᤩᤧ ᤜᤧᤰᤁᤩᤠᤱ ᤂᤧᤴ ᤒᤣᤌᤣᤗᤖᤧ ᤁᤢᤒᤣᤛᤠᤱᤒᤠ ᤕᤧᤜᤡᤒᤠ ᤛᤡᤱᤒᤢᤱᤅᤡᤸᤗᤧ ᤁᤢᤒᤢᤱᤅᤥ ᤔᤧᤗᤢᤵᤋᤢ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤀᤸᤗᤥᤏ ᤁᤢᤒᤋ ᤔᤡᤱ ᤔᤧᤘᤠᤋᤢ॥
9ᤕᤠᤁᤢᤒᤧᤴ ᤐᤍᤏ ᤀᤠᤖᤠᤔᤗᤠᤶ ᤏᤢ᤺ᤰᤛᤧᤀᤠᤱ ᤕᤠᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤌᤠ᤺ᤶᤛᤡᤱ ᤜᤧᤰᤁᤩᤠᤱ ᤂᤢᤏᤧ᤹ ᤜᤠᤱᤘᤠ ᤔᤢ᤹ᤀᤡᤛᤠᤶ ᤐᤡᤖᤢ॥ 10ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤁᤧᤔᤡᤱᤅᤡᤴᤃ ᤕᤠᤁᤢᤒᤖᤥ. ᤁᤖ ᤀᤠᤸᤗᤀᤠᤱᤎᤥ ᤂᤧᤏᤧ᤹ ᤕᤠᤁᤢᤒ ᤁᤧᤔᤧᤶᤔᤧᤳᤏᤧᤸᤗᤥ. ᤂᤧᤏᤧ᤹ ᤁᤧᤔᤡᤱ ᤀᤡᤛᤪᤠᤀᤡᤗ ᤐᤥᤱᤗᤥ॥” ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱ ᤀᤡᤛᤪᤠᤀᤡᤗ ᤔᤧᤳᤋᤢ॥ #ᤋᤥᤗᤡᤱ ᥉᥈:᥈᥎ 11ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ॥ ᤑᤢᤱᤘᤠᤑᤧᤰᤋᤧ᤹ᤖ ᤐᤣᤃᤧ᤹. ᤜᤧᤰᤁᤩᤠᤱ ᤕᤖᤡᤰ ᤐᤥ᤺ᤴᤍᤧ᤹ᤖ ᤐᤣᤃᤧ᤹॥ ᤗᤳᤇᤠ ᤛᤢᤒᤠᤱ ᤜᤧᤰᤁᤩᤠᤱ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ ᤗᤢᤵᤜᤠ᤹ ᤂᤢᤏᤧ᤹ᤗᤠᤶᤔᤣ ᤔᤧᤒᤥ᤺ᤴᤗᤥ. ᤜᤧᤰᤁᤩᤠᤱ ᤜᤠᤱᤜᤠ᤹ᤀᤠᤱ ᤂᤧᤏᤧ᤹ᤗᤠᤶ ᤔᤧᤗ᤺ᤴᤗᤥ॥ #ᤋᤥᤗᤡᤱ ᥇᥍:᥊-᥎ 12ᤀᤒᤪᤠᤜᤠᤔ ᤏᤢ ᤀᤡᤛᤜᤠᤰᤁᤧᤴ ᤐᤡᤖᤢᤱᤛᤡᤱᤒᤠ ᤗᤠᤈᤣᤴ ᤀᤠᤱᤃᤠ᤹ ᤂᤧᤏᤧ᤹ ᤐᤡᤏᤧ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤴ ᤗᤠᤈᤣᤴ ᤂᤧᤏᤧ᤹ ᤁᤧᤀᤣᤃᤠᤱ ᤁᤧᤛ᤻ᤛᤠ ᤁᤧᤶᤔᤧᤴᤇᤠ᤹ᤜᤠ᤹ ᤐᤡᤖᤢᤱᤛᤡᤱ᤹॥” 13ᤂᤧᤒᤩᤠᤱ ᤂᤢᤏᤧ᤹ᤏᤢ ᤋᤠ᤹ᤈᤧᤰᤂᤧᤒᤠ ᤋᤧᤴᤏᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤌᤥ ᤐᤣᤃᤧᤖᤥ॥
14ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤢᤏᤧ᤹ᤏᤢ ᤋᤠ᤹ᤈᤧᤰᤂᤧᤒᤠ ᤋᤧᤴᤏᤥ ᤕᤠᤁᤢᤒᤖᤧ ᤏᤡᤱᤘᤠ᤹ᤛᤥᤰᤗᤧ ᤗᤳᤇᤠ ᤗᤢᤱ ᤛᤡᤳᤗᤠᤱ ᤌᤡᤰ ᤑᤥ᤺ᤰᤛᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧ᤹ᤕᤥ ᤏᤡᤱᤘᤠ᤹ᤑᤢᤔᤠᤱᤅᤥ ᤆᤧᤸᤗᤧᤰᤛᤣ᤹ ᤌᤡ ᤛᤡᤍᤢᤱᤈᤓᤠ ᤋᤥ᤺ᤴᤍᤢ ᤜᤧᤰᤁᤩᤠᤱ ᤏᤡ᤺ᤱᤃᤣ᤹ᤀᤡᤸᤗᤧ ᤗᤧ᤺ᤰᤋᤢ॥ #ᤋᤥᤗᤡᤱ ᥈᥎:᥇᥎-᥇᥏ 15ᤜᤧᤰᤁᤩᤠᤱ ᤕᤠᤁᤢᤒᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤢᤏᤧ᤹ᤏᤢ ᤋᤠ᤹ᤈᤧᤰᤂᤧᤒᤠ ᤋᤧᤴᤏᤡᤸᤗᤧ ᤁᤢᤔᤡᤱ ᤒᤣᤌᤣᤗ ᤕᤢᤰᤂᤢ॥
ᤖᤠᤜᤣᤸᤗᤧᤴ ᤔᤠᤛᤡᤱ᤹
16ᤂᤧᤱᤜᤠ᤹ ᤕᤠᤶᤔᤥ ᤒᤣᤌᤣᤗᤗᤠᤶ ᤔᤧᤎᤠᤛᤡᤱᤅᤠᤱ ᤀᤣᤐᤪᤠᤋ ᤁᤧᤵᤔᤠ ᤔᤡᤛᤠᤰᤗᤰ ᤘᤕᤧᤸᤗᤧ ᤖᤠᤜᤣᤸᤗᤧᤴ ᤁᤢᤛᤠᤍᤢᤱᤅᤡᤸᤗᤧ ᤋᤖᤢ ᤜᤧᤰᤁᤩᤠᤱ ᤂᤧᤴ ᤛᤠ᤹ᤖᤡᤰ ᤋᤢᤃᤧ॥ 17ᤂᤧᤴ ᤁᤢᤛᤠᤍᤢᤱᤅᤧᤸᤗᤧ ᤋᤶᤔᤠ ᤗᤧᤖᤢᤀᤠᤱ ᤜᤢᤰᤁᤧᤗᤠᤔᤧᤸᤗᤧ ᤂᤧᤴ ᤔᤧᤳᤋᤢ. “ᤔᤧᤱᤃᤡᤀᤣᤀᤥ ᤘᤣ᤹ ᤁᤧᤛ᤻ᤛᤠ ᤕᤧᤶᤒᤡᤳᤇᤠᤎᤡᤰ ᤐᤥ᤺ᤰᤂᤧ॥” 18ᤂᤧᤸᤗᤧ ᤁᤢᤛᤰᤔᤠ ᤐᤣ᤺ᤰᤔᤠ ᤆᤥᤃᤧᤸᤗᤧ ᤂᤧᤸᤗᤧ ᤂᤧᤴ ᤀᤅᤧ᤺ᤰᤘᤠᤴ ᤒᤧᤏ-ᤀᤥᤏᤡ (ᤀᤠᤱᤃᤠ᤹ ᤀᤠᤍᤢᤰᤂᤣ᤺ᤸᤗᤧ ᤁᤳᤋᤢᤱᤒᤠ ᤛᤠ) ᤔᤡᤱ ᤘᤠ᤺ᤳᤋᤢ॥ ᤁᤖ ᤁᤢᤶᤒᤠᤖᤧ ᤂᤧᤴ ᤀᤅᤧ᤺ᤰᤘᤠᤴ ᤒᤣᤏᤩᤠᤔᤡᤏ (ᤀᤠᤈᤢᤰᤘᤠ ᤜᤢᤰ ᤛᤠ) ᤔᤡᤱ ᤘᤠ᤺ᤳᤋᤢ॥
19ᤀᤰᤂᤣᤗ᤹ᤖᤡᤰ ᤖᤠᤜᤣᤸᤗᤧᤴ ᤛᤩᤧ. ᤜᤧᤰᤁᤩᤠᤱ ᤀᤣᤐᤪᤠᤋ (ᤒᤣᤌᤗᤧᤜᤧᤔ) ᤐᤣ᤺ᤰᤔᤠ ᤗᤠᤶᤔᤥ ᤂᤧᤱᤜᤠ᤹ᤖᤧ ᤂᤧᤴ ᤔᤧᤗᤢᤵᤋᤢ॥ 20ᤕᤠᤁᤢᤒᤖᤧ ᤂᤧᤸᤗᤧ ᤁᤢᤀᤡ᤺ᤵᤐᤢᤱ ᤛᤶᤍᤠᤱ ᤗᤳᤇᤠ ᤛᤡᤳᤗᤠᤱᤎᤡᤰ ᤗᤣ᤺ᤳᤋᤢ॥ ᤁᤴ ᤖᤠᤜᤣᤗᤖᤧ ᤁᤢᤀᤡ᤺ᤳᤋᤥᤒᤠ ᤛᤡᤳᤗᤠᤱᤅᤡᤴ ᤀᤠᤸᤗᤥ ᤌᤠᤖᤡᤰᤀᤠᤱ ᤏᤧᤖᤥ॥
21ᤀᤡᤛᤪᤠᤀᤡᤗᤗᤧᤴ ᤗᤠᤶᤍᤡ᤺ᤰᤁᤥ ᤋᤃᤡ ᤌᤠᤛᤡᤱ ᤂᤢᤏᤧ᤹ ᤔᤡᤃ᤻ᤍᤗ ᤀᤣᤍᤣᤖᤗᤠᤶ ᤏᤠᤎᤠ᤺ᤶᤒᤡ ᤛᤠ᤺ᤱᤃᤠᤜᤡᤶ ᤗᤣ᤺ᤳᤋᤢ॥
ᤕᤠᤁᤢᤒᤖᤧ ᤁᤢᤛ᤻ᤛᤠ ᤁᤢᤀᤣᤜᤠ᤹
(᥇ ᤛᤠᤵᤔᤢ ᥈:᥇-᥈)
22ᤀᤡᤛᤪᤠᤀᤡᤗᤗᤧᤴ ᤂᤧᤴ ᤗᤠᤈᤣ᤹ᤀᤥ ᤘᤕᤧᤸᤗᤧ ᤖᤢᤒᤧᤴᤏᤧᤴ ᤁᤢᤶᤒᤠᤖᤧ ᤁᤢᤈᤰᤔᤣ᤺ᤳ ᤒᤡᤸᤜᤠ᤺ᤴᤏᤢ ᤀᤡᤵᤛᤧ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤖᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢ॥ #ᤋᤥᤗᤡᤱ ᥊᥏:᥊
ᤕᤠᤁᤢᤒᤖᤧ ᤌᤡᤰᤏᤧᤳ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ ᤔᤧᤘᤕᤧ—
23ᤗᤡᤀᤠ ᤗᤧᤵᤔᤠᤱᤒᤠ ᤁᤢᤛ᤻ᤛᤠᤜᤠ᤹
ᤋᤢᤶᤒᤧᤴ ᤖᤢᤒᤣᤏ
ᤂᤧᤒᤩᤠᤱ ᤛᤡᤔᤡᤕᤥᤏ. ᤗᤧᤒᤡ. ᤕᤜᤢᤍᤠ. ᤀᤡᤛ᤻ᤛᤠᤂᤠᤖ ᤜᤧᤰᤁᤩᤠᤱ ᤈᤒᤗᤢᤏ॥
24ᤖᤠᤜᤣᤗ ᤗᤧᤵᤔᤠᤱᤒᤠ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹
ᤕᤢᤛᤢᤑ ᤏᤢ ᤒᤣᤏᤩᤠᤔᤡᤏ॥
25ᤖᤠᤜᤣᤗᤖᤧ ᤁᤢᤛᤧᤘᤠᤖᤥᤔᤠ ᤒᤡᤸᤜᤠᤗᤠᤶᤒᤠ ᤁᤧᤒᤥᤱᤒᤠ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹.
ᤍᤠᤏ ᤏᤢ ᤏᤵᤋᤠᤗᤡ॥
26ᤗᤡᤀᤠᤖᤧ ᤁᤢᤛᤧᤘᤠᤖᤥᤔᤠ ᤈᤡᤸᤐᤠ ᤗᤧᤵᤔᤠᤱᤗᤠᤶ ᤁᤧᤒᤥᤱᤒᤠ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹
ᤃᤠᤍ ᤏᤢ ᤀᤠᤛᤣᤖ॥
ᤐᤍᤏ ᤀᤠᤖᤠᤔᤀᤥ ᤛᤠᤃᤧᤘᤠ᤺ᤴᤇᤡᤱᤒᤠ ᤕᤠᤁᤢᤒᤖᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ ᤜᤠᤒᤠ ᤁᤴᤜᤠ᤹ᤛᤡᤖᤥ॥
ᤀᤡᤛᤜᤠᤰᤁᤧᤴ ᤔᤠᤛᤡᤱ᤹
27ᤕᤠᤁᤢᤒᤧᤴ ᤂᤢᤏᤧ᤹ ᤁᤢᤶᤒᤠ ᤀᤡᤛᤜᤠᤁᤖᤥ ᤔᤔᤪᤣ ᤀᤡᤃᤪ ᤁᤡᤷᤕᤋᤀᤷᤒᤠᤀᤥ ᤋᤩᤧ (ᤂᤧᤱᤃ ᤜᤧᤒᤪᤥᤏᤖᤥ). ᤂᤧᤵᤔᤥ ᤀᤒᤪᤠᤜᤠᤔ ᤏᤢ ᤀᤡᤛᤜᤠᤁ ᤕᤢᤅᤧᤳᤇᤡᤀᤠᤱ ᤘᤕᤧᤛᤡ॥ #ᤋᤥᤗᤡᤱ ᥇᥉:᥇᥎ 28ᤀᤡᤛᤜᤠᤰᤁᤧᤴ ᤁᤡᤵᤌᤡᤰᤁᤠᤱ ᤕᤧᤳᤐᤥᤱ ᤋᤱᤒᤣ ᤁᤧᤖᤧᤀᤠᤱ ᤘᤕᤧ॥ 29ᤂᤧᤒᤩᤠᤱ ᤀᤡᤛᤜᤠᤁᤧᤴ ᤔᤠᤛᤡᤱ॥ ᤂᤢᤏᤧ᤹ ᤂᤍᤠᤰᤔᤡ ᤋᤢᤶᤛᤧᤖ ᤌᤠᤖᤡᤰ ᤜᤡᤅᤧ ᤜᤧᤰᤁᤩᤠᤱ ᤁᤢᤛᤢᤎᤧᤒᤠ ᤁᤢᤎᤠᤰᤌᤧᤒᤠᤜᤠ᤹ᤏᤢ ᤋᤱᤛᤧ ᤐᤣ॥ ᤜᤧᤰᤁᤩᤠᤱ ᤁᤢᤛ᤻ᤛᤠ ᤀᤣᤛᤠᤒ ᤏᤢ ᤕᤠᤁᤢᤒᤖᤧ ᤂᤧᤴ ᤗᤢᤵᤋᤧᤳᤇᤢ॥
Currently Selected:
ᤋᤥᤗᤡᤱᤛᤥᤔᤢ 35: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
