ᤋᤥᤗᤡᤱᤛᤥᤔᤢ 40
40
ᤑᤠᤖᤥᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤧᤵᤔᤠᤱ
1ᤔᤡᤛᤠᤰ ᤕᤧᤶ ᤀᤣᤃᤠᤱ. ᤔᤡᤛᤪᤒᤠ ᤜᤠᤱᤅᤡᤴ ᤌᤡ ᤁᤧᤍᤥᤶᤒᤠ ᤁᤧᤒᤡᤒᤠ ᤋᤢᤶ ᤁᤢᤔᤏᤠᤴ ᤏᤢ ᤋ᤺ᤰ ᤁᤧᤎᤥ᤺ᤰᤐᤠ ᤋᤢᤶ ᤁᤢᤔᤏᤠ᤺ᤸᤗᤧ ᤔᤡᤛᤪᤒᤠ ᤜᤠᤱ ᤂᤢᤴᤇᤡ᤹ ᤀᤠᤒᤠᤅᤣ ᤍᤠᤱᤒᤠᤴ ᤁᤢᤏᤠᤔᤧᤴᤇᤠ᤹ ᤔᤧᤳᤋᤧᤇᤢ॥ 2ᤜᤧᤰᤁᤩᤠᤱ ᤑᤠᤖᤥᤴ ᤁᤴ ᤏᤧᤵᤑᤢ ᤁᤢᤛᤢᤜᤠᤱᤃᤧᤶᤒᤠᤜᤠ᤹. ᤀᤡᤃᤪ ᤌᤡ ᤁᤧᤍᤥᤶᤒᤠ ᤁᤧᤒᤡᤒᤠ ᤋᤢᤶ ᤁᤢᤔᤏᤠ ᤜᤧᤰᤁᤩᤠᤱ ᤋ᤺ᤰ ᤁᤧᤎᤥ᤺ᤰᤐᤠ ᤋᤢᤶ ᤁᤢᤔᤏᤠ᤺ᤴᤏᤢ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧ॥ 3ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤌᤰᤁᤶᤒᤪᤠᤱ ᤁᤧᤔᤧᤵᤐᤠ ᤌᤰᤐᤧᤒᤠᤸᤗᤧ ᤁᤢᤜᤡᤶ ᤐᤢᤱᤗᤠᤜᤡᤶᤔᤥ ᤛᤠᤰᤋᤢᤛᤡ॥ ᤕᤢᤛᤢᤑᤧᤴᤏᤠᤱ ᤜᤠᤒᤠ ᤂᤧ᤹ᤕᤥ ᤛᤠᤰᤋᤧᤀᤠᤱ ᤕᤠᤃᤧ॥ 4ᤌᤰᤁᤶᤒᤪᤠᤱ ᤁᤧᤔᤧᤵᤐᤠ ᤌᤰᤐᤧᤒᤠᤸᤗᤧ ᤂᤧᤱ ᤏᤧᤵᤑᤢᤜᤠ᤹ ᤕᤢᤛᤢᤑᤧᤴ ᤜᤢᤰᤛᤢᤵᤋᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤀᤥᤔᤧᤳᤋᤢᤛᤡ॥
ᤁᤢᤓᤠ ᤕᤧᤶ ᤌᤠᤖᤡᤰ ᤂᤧᤱᤜᤠ᤹ ᤛᤠᤰᤐᤠ ᤁᤧᤎᤠᤒᤠ ᤁᤶᤒᤪᤠᤱᤅᤥ ᤘᤕᤧᤛᤡ॥
5ᤌᤡᤰᤗᤧᤱ ᤌᤡᤰᤛᤧᤴᤗᤧ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤁᤧᤎᤠᤒᤠ ᤔᤡᤛᤪᤒᤠ ᤜᤠᤱᤅᤡᤸᤗᤧ ᤋᤢᤶ ᤁᤢᤎᤡ ᤁᤧᤍᤥ᤺ᤶᤒᤧᤴ ᤏᤢ ᤋᤢᤶ ᤁᤢᤍ᤺ᤰ ᤁᤧᤎᤥ᤺ᤰᤐᤧᤸᤗᤧ ᤀᤠᤒᤠᤅᤣ ᤁᤢᤒᤣ ᤁᤧᤕᤠᤰᤐᤠ ᤛᤧᤵᤔᤠᤱ ᤔᤠᤰᤋᤧᤳᤇᤢ॥
6ᤕᤢᤛᤢᤑᤧᤴ ᤋᤠᤏᤠᤶ ᤂᤢᤴᤇᤡᤀᤥ ᤋᤩᤧ᤺ᤸᤗᤧ ᤂᤧᤱᤜᤠ᤹ ᤂᤢᤴᤇᤡ᤹ ᤏᤠᤔᤠᤰᤋᤧᤒᤠ ᤏᤡᤛᤢᤛᤡ॥ 7ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤛᤣ᤺ᤴᤗᤠᤵᤋᤢᤛᤡ. “ᤀᤠᤀᤡᤴ ᤌᤣᤀᤠᤱ ᤂᤡᤴᤇᤡ᤹ ᤏᤠᤔᤠᤰᤐᤠᤒᤣ᥅”
8ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤳᤋᤧᤇᤢ. “ᤀᤠᤴᤇᤡᤃᤣ ᤏᤧᤵᤔᤠᤱᤗᤧ ᤛᤧᤵᤔᤠᤱ ᤔᤠᤰᤋᤧᤳᤇᤢᤃᤧ. ᤁᤖ ᤂᤧᤸᤗᤧ ᤁᤢᤒᤣ ᤁᤧᤜᤶᤒᤠ ᤔᤏᤠ ᤜᤠ᤺ᤳᤋᤠᤱ ᤜᤥᤵ॥”
ᤕᤢᤛᤢᤑᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤛᤧᤵᤔᤠᤱᤅᤡᤸᤗᤧ ᤁᤢᤒᤣ᤺ᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤢᤰᤁᤥ ᤔᤧᤘᤠ᤹ᤏᤧᤶᤒᤡ᥅ ᤂᤧᤴᤇᤡ᤹ ᤛᤧᤵᤔᤠᤱᤜᤠ᤹ ᤀᤠᤔᤧᤳᤋᤧᤇᤧ᤹॥” #ᤋᤥᤗᤡᤱ ᥉᥍:᥋.᥏
9ᤂᤧᤒᤩᤠᤱ ᤌᤡ ᤁᤧᤍᤥᤶᤒᤠ ᤁᤧᤒᤡᤒᤠ ᤋᤢᤶ ᤔᤏᤠ᤺ᤸᤗᤧ ᤁᤢᤛᤧᤵᤔᤠᤱᤅᤡᤴ ᤀᤰᤂᤣᤗ᤹ᤖᤡᤰ ᤕᤢᤛᤢᤑᤧᤴ ᤆᤧᤰᤋᤢ. “ᤀᤠᤱᤃᤠ᤹ ᤔᤠᤰᤋᤢᤱᤒᤠ ᤛᤧᤵᤔᤠᤱᤔᤥ ᤀᤠᤍᤃᤠᤱ ᤗᤳᤇᤠ ᤆᤧᤸᤗᤧᤰᤛᤣᤸᤗᤧ ᤁᤢᤒᤢᤱᤎᤡᤰ ᤕᤢᤅᤧ॥ 10ᤆᤧᤸᤗᤧᤰᤛᤣᤸᤗᤧ ᤁᤢᤒᤢᤱᤅᤥ ᤛᤢᤶᤛᤡ ᤁᤢᤒᤥᤖᤠᤰ ᤐᤳᤇᤧ॥ ᤂᤧ᤹ᤕᤥ ᤁᤢᤈᤱ ᤗᤡᤅᤧ ᤌᤠᤅᤧᤀᤠᤱ ᤁᤢᤓᤢᤱ ᤑᤧᤰᤋᤧ. ᤜᤧᤰᤁᤩᤠᤱ ᤆᤧᤸᤗᤧᤰᤛᤣᤸᤗᤧ ᤁᤢᤈᤠ᤹ ᤌᤥ᤺ᤰᤋᤧᤀᤠᤱ ᤁᤢᤒᤈᤠᤜᤠ᤹ ᤔᤖᤠ᤺ᤰ ᤕᤠᤖᤡᤰ ᤋᤢᤶᤛᤧ॥ 11ᤑᤠᤖᤥᤸᤗᤧ ᤁᤢᤈᤸᤗᤠᤱᤏᤠ ᤂᤥᤷᤕᤠᤴ ᤀᤠᤱᤃᤠ᤹ ᤀᤠᤜᤢᤰᤁᤥᤀᤣ ᤁᤳᤋᤢᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤆᤧᤸᤗᤧᤰᤛᤣᤸᤗᤧ ᤁᤢᤈᤠ᤹ᤀᤡᤴ ᤋᤢᤒᤢᤱᤅᤠᤱ ᤆᤡᤒᤢᤳ ᤆᤡᤒᤢᤳ ᤐᤢᤳᤋᤢᤱ ᤜᤧᤰᤁᤩᤠᤱ ᤑᤠᤖᤥᤸᤗᤧ ᤁᤢᤈᤸᤗᤠᤱᤏᤠ ᤂᤥᤷᤕᤠᤀᤥ ᤁᤣ᤺ᤳᤋᤢᤱ. ᤜᤧᤰᤁᤩᤠᤱ ᤂᤧᤴ ᤁᤢᤜᤢᤰᤁᤥ ᤕᤢᤰᤂᤢᤱ ᤐᤡᤖᤢᤱ॥”
12ᤕᤢᤛᤢᤑᤖᤧ ᤂᤧᤴ ᤔᤧᤳᤋᤢ. “ᤁᤸᤗᤧ ᤁᤢᤒᤣᤴ ᤜᤠᤒᤠ ᤁᤴᤗᤥ—ᤛᤢᤶᤛᤡ ᤁᤢᤒᤥᤖᤠᤰᤜᤠ᤹ ᤑᤠ᤹ᤀᤡᤴ ᤛᤢᤶᤕᤧᤴᤗᤥ॥ 13ᤛᤢᤶᤕᤧᤴ ᤌᤠᤖᤡᤰᤗᤧ ᤑᤠᤖᤥᤸᤗᤧ ᤂᤧᤏᤧ᤹ ᤁᤧᤏᤠ ᤆᤠᤱᤈᤠᤱ ᤆᤥᤃᤢ ᤁᤧᤒᤡ. ᤜᤧᤰᤁᤩᤠᤱ ᤕᤠᤶᤔᤥ ᤂᤧᤏᤧ᤹ ᤁᤧᤕᤠ᤺ᤶᤒᤰᤁᤡᤴ ᤁᤧᤒᤡᤖᤥ. ᤋᤃᤡ ᤂᤢᤏᤧ᤹ ᤋᤢᤶ ᤁᤢᤎᤡ ᤁᤧᤍᤥᤶᤒᤠ ᤁᤧᤒᤡᤒᤠ ᤁᤧᤘᤕᤧᤒᤠᤴ ᤜᤧᤰᤁᤣ ᤕᤠᤶᤔᤥ ᤑᤠᤖᤥᤸᤗᤧ ᤁᤢᤈᤸᤗᤠᤱᤏᤠ ᤂᤥᤷᤕᤠᤴ ᤂᤢᤏᤧ᤹ ᤁᤧᤍᤥ᤺ᤴᤍᤢ ᤁᤧᤒᤡᤖᤢᤖᤥ॥ 14ᤁᤖ ᤂᤧᤏᤧ᤹ ᤁᤧᤏᤢ᤹ ᤁᤧᤍᤠ᤺ᤸᤗᤧ ᤀᤠᤱᤃᤠ᤹ᤀᤠᤱ ᤀᤡ᤺ᤳᤋᤠᤱᤅᤧ᤹ᤀᤥ॥ ᤀᤠᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤑᤠᤖᤥ᤺ᤴᤏᤢ ᤋᤠ᤹ᤈᤧᤰᤂᤧᤀᤠᤱ ᤀᤠᤱᤃᤠ᤹ ᤁᤴ ᤐᤢᤱᤗᤠᤜᤡᤶᤔᤥᤗᤠᤶ ᤗ᤺ᤳᤋᤠᤱᤅᤧ᤹ᤀᤥ॥ 15ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ᤃ ᤛᤧᤰᤂᤠ᤺ᤸᤗᤧ ᤜᤡᤒᤪᤢᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤗᤠᤶ ᤔᤧᤄᤢ᤺ᤳᤋᤠᤱᤅᤠᤱ ᤔᤧᤍᤠᤖᤠᤱᤒᤠᤖᤥ. ᤜᤧᤰᤁᤩᤠᤱ ᤁ᤹ᤕᤥᤀᤠᤱ ᤐᤢᤱᤗᤠᤜᤡᤶᤔᤥ ᤌᤠᤔᤤ ᤁᤧᤒᤥᤱᤒᤠ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤘᤕᤠᤱ॥”
16ᤛᤧᤵᤔᤠᤱᤅᤡᤸᤗᤧ ᤁᤢᤒᤣᤴ ᤏᤢᤒᤠ ᤏᤡᤛᤢᤀᤠᤱ ᤋᤢᤶ ᤋ᤺ᤰ ᤁᤧᤎᤥ᤺ᤰᤐᤧᤸᤗᤧᤀᤠᤱ ᤕᤢᤛᤢᤑᤧᤴ ᤆᤧᤰᤋᤢ. “ᤀᤠᤱᤃᤠ᤹ᤀᤠᤱ ᤀᤰᤋᤱᤒᤠ ᤛᤧᤵᤔᤠᤱᤎᤡᤰ ᤔᤠᤰᤋᤢᤱ॥ ᤀᤠᤎ᤻ᤃᤣᤰᤁᤥ ᤂᤖᤧ᤺ᤱ ᤕᤠᤱᤔᤠ ᤛᤢᤶᤛᤡ ᤐᤰᤘᤠᤜᤠ᤹ ᤕᤢᤅᤧ॥ 17ᤌᤥᤛᤔᤠ ᤐᤰᤘᤠᤀᤥ ᤑᤠᤖᤥᤸᤗᤧ ᤁᤢᤗᤠᤃᤡ ᤐᤖᤡᤰ ᤐᤖᤡᤰᤐᤠ ᤁᤢᤈᤠᤜᤠ᤹ ᤕᤠᤃᤧ. ᤁᤖ ᤀᤠᤎ᤻ᤃᤣᤰ ᤛᤶᤎᤠᤱᤒᤠ ᤐᤰᤘᤠᤀᤥᤒᤠ ᤂᤖᤧ᤺ᤱᤅᤡᤴ ᤐᤢᤜᤠ᤹ᤖᤧ ᤔᤧᤀᤃᤢᤀᤣ ᤔᤧᤈᤖ ᤔᤧᤕᤠᤃᤧ॥”
18ᤕᤢᤛᤢᤑᤖᤧ ᤔᤧᤳᤋᤢ. “ᤁᤸᤗᤧ ᤁᤢᤒᤣᤴ ᤜᤠᤒᤠ ᤁᤴᤗᤥ—ᤛᤢᤶᤛᤡ ᤐᤰᤘᤠᤜᤠ᤹ ᤛᤢᤶᤕᤧᤴᤗᤥ॥ 19ᤛᤢᤶᤕᤧᤴ ᤌᤠᤖᤡᤰᤗᤧ ᤑᤠᤖᤥᤸᤗᤧ ᤂᤧᤏᤧ᤹ ᤁᤧᤎᤣᤃᤣ᤺ᤰᤁᤡᤴ ᤑᤢᤳᤆᤡᤰ ᤆᤩᤧᤵᤋᤢᤍᤣᤛᤢ ᤁᤧᤒᤡ. ᤜᤧᤰᤁᤩᤠᤱ ᤛᤡᤱᤒᤢᤱᤅᤥ ᤁᤧᤓᤥ᤺ᤴᤗᤥ. ᤜᤧᤰᤁᤩᤠᤱ ᤐᤢᤜᤠ᤹ᤖᤧ ᤁᤧᤏᤧᤰᤛᤠᤴ ᤔᤧᤀᤃᤢ ᤔᤧᤈᤖᤥ॥”
20ᤛᤢᤶᤛᤡᤃᤣᤰᤐᤠ ᤕᤧᤴᤏᤥ ᤑᤠᤖᤥᤸᤗᤧ ᤁᤢᤛᤠᤘᤠ᤺ᤴᤇᤡᤱᤔᤠ ᤛᤠᤓ᤺ᤱᤈᤠ ᤕᤧᤴ ᤘᤕᤧ॥ ᤂᤧᤴ ᤕᤧᤴᤏᤥ ᤂᤢᤏᤧ᤹ ᤁᤢᤛᤢᤜᤠᤱᤃᤧᤶᤒᤠᤜᤠ᤹ ᤁᤧᤖᤧᤰ ᤀᤢ᤺ᤳᤋᤢᤛᤡᤀᤠᤱ ᤆᤠᤔᤠ ᤌᤢᤱᤔᤠ ᤐᤡᤖᤢᤛᤡ. ᤜᤧᤰᤁᤩᤠᤱ ᤂᤧᤴ ᤛᤢᤜᤠᤱᤃᤧᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤋᤢᤶ ᤌᤡ ᤁᤧᤍᤥᤶᤒᤠ ᤁᤧᤒᤡᤒᤠ ᤔᤏᤠᤴ ᤏᤢ ᤋᤢᤶ ᤋ᤺ᤰ ᤁᤧᤎᤥ᤺ᤰᤐᤧᤴ ᤕᤧᤵᤛᤢᤛᤡ॥ 21ᤂᤢᤏᤧ᤹ ᤋᤢᤶ ᤌᤡ ᤁᤧᤍᤥᤶᤒᤠ ᤁᤧᤒᤡᤒᤧᤴ ᤀᤠᤒᤠᤅᤣ ᤁᤢᤕᤠ᤺ᤶᤒᤰᤁᤥ ᤕᤠᤶᤔᤥ ᤑᤳᤇᤢ. ᤜᤧᤰᤁᤩᤠᤱ ᤂᤧᤸᤗᤧ ᤑᤠᤖᤥᤴ ᤆᤸᤗᤠᤱᤏᤠ ᤂᤥᤷᤕᤠᤴ ᤋᤥ᤺ᤴᤍᤢ ᤐᤡᤖᤢ॥ 22ᤁᤖ ᤕᤢᤛᤢᤑᤖᤧ ᤂᤢᤴᤇᤡ ᤛᤧᤵᤔᤠᤱᤅᤡᤸᤗᤧ ᤁᤢᤒᤣᤴ ᤜᤴᤍᤢ ᤐᤡᤖᤢᤒᤠ ᤜᤧᤰᤁᤣᤀᤣ ᤋᤢᤶ ᤋ᤺ᤰ ᤁᤧᤎᤥ᤺ᤰᤐᤧᤴ ᤑᤠᤖᤥᤸᤗᤧ ᤋᤧᤸᤗᤧᤶ ᤑᤥ᤺ᤴᤍᤢ॥
23ᤜᤧᤰᤁᤣᤛᤠᤱ ᤋᤢᤶ ᤌᤡ ᤁᤧᤍᤥᤶᤒᤠ ᤁᤧᤒᤡᤒᤠᤸᤗᤧ ᤕᤢᤛᤢᤑᤧᤴ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤴ. ᤁᤖ ᤂᤢᤏᤧ᤹ ᤏᤡᤱᤘᤠ᤹ ᤛᤷᤔᤢ᤺ᤴ ᤔᤢ᤺ᤳᤇᤢ॥
Currently Selected:
ᤋᤥᤗᤡᤱᤛᤥᤔᤢ 40: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
