ᤕᤢᤜᤢᤴᤏᤠ 7
7
ᤕᤧᤛᤢᤴ ᤏᤢ ᤁᤢᤴᤛᤠ᤹ᤛᤡ
1ᤂᤧᤴ ᤀᤣᤃᤠᤱ ᤕᤧᤛᤢᤴ ᤃᤠᤗᤡᤗ ᤌᤢᤶ ᤂᤡᤖᤡᤒᤠ ᤐᤠᤱᤓᤣ᤹ᤜᤠ᤹ᤀᤥ ᤋᤠᤰᤁᤴᤍᤧᤖ ᤘᤕᤧᤖᤥ॥ ᤂᤢᤏᤧ᤹ᤃ ᤕᤜᤢᤍᤡᤕᤠ ᤌᤢᤶᤗᤠᤶ ᤔᤠ᤺ᤱᤄᤠᤀᤣ ᤘᤠ᤹ᤔᤠ ᤏᤡᤱᤘᤠ᤹ ᤆᤥᤃᤢ. ᤌᤣᤀᤠᤱᤓᤧᤸᤗᤧ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤏᤧ᤹ ᤛᤧᤵᤔᤠ ᤑᤠ᤹ᤀᤠᤱ ᤔᤧᤛᤢᤃᤢᤖ ᤔᤧᤘᤕᤧᤖᤥ॥ 2ᤁᤖ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤛᤠ᤺ᤱᤃᤠᤜᤡᤶ ᤋᤱᤏᤠᤶᤔᤡᤴ#᥍:᥈ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤐᤠᤎᤧᤒᤠᤜᤠ᤹ ᤀᤣ᤺ᤰᤛᤠᤍᤧᤴᤏᤥ ᤗᤡᤒᤥᤱ (᥊᥆) ᤋᤱᤒᤣ ᤌᤠᤖᤡᤰ ᤗᤠᤶᤍᤡᤰ ᤔᤧᤈᤥᤃᤧᤒᤠ ᤏᤡᤱᤘᤠ᤹ᤛᤥᤀᤥ ᤁᤴ ᤋᤱᤏᤠᤶᤔᤥ ᤛᤠ᤺ᤱᤃᤠᤜᤡᤶ ᤔᤧᤈᤥᤃᤢ॥ ᤕᤖᤡᤰ ᤕᤜᤢᤍᤡᤜᤠ᤹ᤖᤧ ᤕᤜᤢᤍᤡᤕᤠ ᤌᤢᤶᤔᤥᤒᤠ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤔᤧᤒᤣᤀᤠᤱ ᤕᤧᤳᤏᤠᤶ ᤌᤠᤖᤡᤰ ᤁᤴ ᤋᤱᤏᤠᤶᤔᤡᤴ ᤔᤧᤍᤣᤛᤢᤖᤥ (ᤗᤧᤒᤡ ᥈᥉:᥉᥉-᥊᥉; ᤛᤠᤶᤕᤥ ᤀᤡᤱ ᥇᥌:᥇᥉-᥇᥌)॥ ᤋᤠᤔᤠ ᤀᤡ᤺ᤳᤋᤧᤸᤗᤧ 3ᤁᤢᤴᤛᤠ᤹ᤛᤡᤖᤧ ᤕᤧᤛᤢᤴ ᤀᤰᤂᤣ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤴ ᤋᤧᤴᤏᤡᤴ ᤗᤧᤖᤧ᤹ᤀᤠᤱ ᤕᤜᤢᤍᤡᤕᤠᤀᤥ ᤐᤣᤃᤧ᤹ᤀᤥ. ᤂᤧᤸᤗᤧᤆᤥᤃᤢᤸᤗᤧ ᤂᤧᤵᤔᤥ ᤂᤧᤏᤧ᤹ ᤁᤧᤈᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤘᤣ᤹ ᤁᤧᤜᤢ᤹ᤛᤠᤶᤒᤠᤜᤠ᤹ᤖᤧᤀᤠᤱ ᤔᤧᤏᤡᤛᤢᤖᤖᤥ॥ 4ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤔᤡᤱᤛᤥ ᤁᤢᤎᤠᤱᤛᤥ ᤑᤥᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤧᤴ ᤆᤡᤱᤛᤡᤱᤔᤠ ᤔᤧᤏᤢ᤹ᤏᤧᤴᤗᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ᤀᤠᤱ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢᤖ ᤁᤧᤘᤠ᤹ᤏᤧ ᤑᤠ᤹ᤃᤪ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤥᤛᤣ᤺ᤴᤎᤠᤰᤛᤡᤱᤅᤧ᤹ᤀᤥ॥” 5ᤌᤣᤀᤠᤱᤓᤧᤸᤗᤧ ᤀᤠᤒᤠᤅᤣ ᤁᤢᤴᤛᤠ᤹ᤛᤡᤖᤧᤀᤠᤱ ᤂᤢᤏᤧ᤹ ᤏᤠᤔᤧᤴᤇᤠ᤹ᤖᤢᤴᤗᤥ॥
6ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤀᤠᤕᤧᤶᤔᤡᤴ ᤔᤧᤴᤍᤠᤀᤣ ᤘᤠ᤹ᤖᤥ॥ ᤂᤡᤏᤡ᤹ᤃ ᤀᤠᤵᤑᤠᤸᤗᤧᤛᤠᤱ ᤐᤣ᤺ᤰᤔᤠ ᤁᤧᤛᤢᤰᤋᤡ᤹ᤖᤥ. 7ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ᤖᤧ ᤂᤡᤏᤡ᤹ ᤆᤡ᤺ᤵᤔᤠ ᤁᤧᤔᤧᤴᤇᤢᤰᤋᤡᤴᤗᤥ. ᤁᤖ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤋᤠᤵᤑᤧ᤺ᤶᤒᤠ ᤆᤥᤰ ᤔᤧᤳᤋᤢᤱᤛᤡᤱᤒᤠᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤔᤧᤈᤡ᤺ᤳᤋᤠᤖᤥ॥ 8ᤋᤱᤏᤠᤶᤔᤥ ᤂᤡᤏᤡ᤹ ᤌᤥ ᤕᤖᤢᤛᤗᤧᤶᤔᤥ ᤐᤣᤃᤧᤶᤔᤧ᤹ᤀᤥ॥ ᤀᤡᤱᤃᤠ᤹ ᤀᤠᤸᤗᤥ ᤔᤧᤒᤣ᤺ᤰᤁᤠᤴ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤕᤧᤶᤔᤡᤴ ᤔᤧᤴᤍᤠᤀᤣ ᤘᤠ᤹ᤖᤥ॥” 9ᤕᤧᤛᤢᤖᤧ ᤀᤰᤂᤣ ᤐᤠ᤺ᤳᤋᤢᤖ ᤃᤠᤗᤡᤗᤀᤥᤀᤣ ᤘᤕᤧ ᤗᤠᤖᤧᤖᤥ॥
ᤕᤧᤛᤢᤖᤧ ᤋᤱᤏᤠᤶᤔᤥ ᤜᤢ᤹ᤖᤢᤛᤡ᤹
10ᤁᤖ ᤕᤧᤛᤢᤖᤧ ᤁᤢᤴᤛᤠ᤹ᤛᤡ ᤋᤱᤏᤠᤶᤔᤥ ᤔᤧᤒᤣ ᤜᤧᤰᤁᤩᤠᤱ ᤂᤢᤏᤧ᤹ᤀᤠᤱ ᤀᤠᤳᤋᤡᤴ ᤔᤏᤠᤜᤠ᤹ᤖᤧᤀᤠᤱ ᤔᤧᤴᤏᤡᤀᤣ ᤛᤫᤠ᤺ᤳᤋᤠᤱ ᤕᤖᤢᤛᤗᤧᤶᤔᤥ ᤐᤣᤖᤥ॥ 11ᤀᤠᤸᤗ ᤋᤱᤏᤠᤶᤔᤥ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤃᤥ᤺ᤳᤋᤢᤖ ᤀᤰᤂᤣ ᤔᤧᤒᤠ᤺ᤳᤋᤢ. “ᤁᤴ ᤔᤏᤠᤴ ᤀᤠᤳᤋᤠᤴ ᤐᤣᤒᤣ᥅”
12ᤕᤖᤡᤰ ᤔᤏᤠᤜᤠ᤹ᤖᤧ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤛᤫᤠ᤺ᤳᤋᤠᤱ ᤔᤧᤈᤧᤰᤂᤢ॥ ᤁᤢᤓᤠᤖᤧ ᤔᤧᤒᤠ᤺ᤳᤋᤢ. “ᤂᤢᤏᤧ᤹ᤃ ᤏᤢᤒᤠ ᤔᤏᤠᤖᤥ” ᤁᤖ ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤔᤣ᤺ᤴ. ᤂᤧᤸᤗᤧᤃ ᤔᤏᤠᤜᤠ᤹ ᤀᤡᤱᤗᤧᤰᤋᤢᤛᤡᤖ ᤘᤠ᤹ᤖᤥ॥” 13ᤁᤖ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ ᤔᤧᤃᤡᤖᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤀᤠᤳᤋᤡᤴᤜᤠ᤹ᤀᤠᤱ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤖ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤔᤧᤶᤒᤠᤖᤧᤴᤗᤥ॥
14ᤜᤧᤰᤁᤩᤠᤱ ᤋᤱᤏᤠᤶᤔᤡᤸᤗᤧ ᤁᤢᤗᤢᤶᤔᤥ ᤕᤧᤛᤢᤴ ᤔᤠᤱᤜᤡᤶᤔᤥ ᤌᤥ ᤐᤣᤀᤠᤱ ᤔᤏᤠᤜᤠ᤹ ᤏᤡᤛᤠᤶ ᤜᤢ᤹ᤔᤠ ᤜᤣ᤺ᤰᤋᤢᤛᤡᤖᤥ॥ 15ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤏᤧ᤹ ᤁᤢᤏᤡᤛᤠᤶᤔᤡᤴ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤰᤂᤣᤗ᤹ᤖᤡᤰ ᤔᤧᤒᤠ᤺ᤳᤋᤢ. “ᤁᤴ ᤔᤏᤠ᤺ᤸᤗᤧ ᤔᤧᤴᤜᤢ᤹ᤛᤡᤱᤅᤣ ᤀᤠᤰᤂᤣᤗ᤹ᤖᤡᤰ ᤀᤠᤏᤡ᤹ ᤜᤧᤰᤁᤣ ᤁᤴ ᤏᤡᤛᤠᤶᤔᤡᤴ ᤗᤧᤛ᤻ᤛᤢᤒᤣ᥅”
16ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤀᤠᤏᤡᤛᤠᤶᤔᤡᤱᤃ ᤀᤠᤒᤠᤅᤣ ᤀᤡᤱᤃᤠ᤹ᤀᤡᤴ ᤔᤣ᤺ᤴᤗᤥ. ᤁᤖ ᤁᤱᤃ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤧᤒᤠᤖᤥ॥ 17ᤀᤠᤳᤋᤡᤴ ᤔᤏᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤧᤸᤗᤧ ᤀᤡᤱᤃᤠ᤹ ᤀᤠᤏᤡᤛᤠᤶᤔᤡᤴ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠ ᤋᤩᤧᤒᤠᤒᤡ ᤀᤡᤱᤃᤠ᤹ ᤀᤠᤒᤠᤅᤣ ᤐᤠ᤺ᤳᤋᤢᤱᤒᤠᤒᤡ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢ᤹ᤖᤥ॥ 18ᤀᤠᤒᤠᤅᤣ ᤕᤢᤰᤁᤥᤗᤠᤶ ᤁᤧᤒᤠ᤺ᤵᤐᤠᤜᤠ᤹ᤖᤧᤃ ᤀᤠᤒᤠᤅᤣ ᤔᤡᤱᤛᤥ ᤀᤡᤱᤎᤠᤱ ᤔᤧᤃᤥ᤺ᤳᤋᤢ᤹ᤖᤥ. ᤁᤖ ᤀᤠᤳᤋᤡᤸᤗᤧ ᤂᤢᤏᤧ᤹ ᤁᤧᤒᤠᤱᤒᤠᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤧᤸᤗᤧ ᤛᤧᤰᤂᤠ ᤐᤠᤴ ᤐᤠ᤺ᤳᤋᤢ᤹ᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ᤀᤥ ᤌᤣᤀᤠᤱ ᤀᤡᤱᤗᤧᤰᤐᤠ ᤐᤠᤴ ᤜᤥᤵᤗᤥ॥ 19ᤔᤥᤛᤠᤖᤧ ᤂᤡᤏᤡ᤹ ᤛᤠᤶᤕᤥᤌᤡᤶ ᤁᤧᤒᤡᤖᤡ. ᤁᤖ ᤂᤡᤏᤡ᤹ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤁᤧᤴᤀᤡ᤺ᤳᤋᤢᤶᤔᤡᤴ ᤁᤧᤴᤏᤠ᤺ᤳᤋᤢᤶᤔᤡᤴ॥ ᤜᤧᤰᤁᤣ᤺ᤸᤗᤧ ᤌᤣᤀᤠᤱ ᤂᤡᤏᤡ᤹ ᤕᤠᤵᤔᤡ ᤛᤧᤵᤔᤠ ᤁᤧᤃᤥ᤺ᤳᤋᤡᤒᤠᤒᤣ᥅”
20ᤂᤧᤴ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤏᤥᤃᤵ ᤔᤧᤒᤡᤖᤢ. “ᤂᤧᤏᤧ᤹ᤃ ᤑᤧᤴᤛᤠᤶᤔᤡᤸᤗᤧ ᤁᤧᤕᤠᤱᤄᤧᤀᤠᤱ ᤁᤧᤘᤠ᤹ᤖᤥ᥄ ᤜᤠ᤺ᤳᤗᤧ ᤂᤧᤏᤧ᤹ ᤛᤧᤵᤔᤠ ᤁᤧᤃᤥ᤺ᤳᤋᤧᤒᤣ᥅”
21ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ᤃ ᤗᤳᤇᤠ ᤔᤏᤠᤎᤡᤰ ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤏᤢᤛᤢᤱᤅᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥ 22ᤁᤖ ᤂᤡᤏᤡ᤹ᤀᤠᤱ ᤔᤥᤛᤠᤖᤧ ᤁᤧᤒᤡᤖᤡᤒᤠ ᤜᤷᤍᤥ ᤜᤧᤰᤔᤠ ᤛᤠᤶᤕᤥᤌᤡᤶᤔᤡᤴ ᤁᤧᤏᤠ᤺ᤳᤋᤢᤶ ᤁᤧᤀᤡ᤺ᤳᤋᤢᤶᤔᤠᤱ ᤏᤠ᤺ᤶᤛᤡᤱ ᤕᤧᤴᤏᤥᤀᤣ ᤂᤡᤏᤡ᤹ ᤛᤠᤜᤠ᤹ᤖᤧᤴ ᤜᤷᤍᤥ ᤁᤧᤜᤧᤃᤢᤶ ᤁᤧᤒᤡᤖᤢᤶᤛᤡᤶᤔᤡᤸᤗᤧ ᤂᤡᤏᤡ᤹ᤀᤠᤱ ᤛᤠᤶᤕᤥᤌᤡᤶᤔᤡᤴ ᤁᤧᤓᤣ᤺ᤴᤍᤢᤶᤗᤥ॥ (ᤛᤧᤰᤂᤠ᤺ᤸᤗᤧ ᤁᤴ ᤜᤷᤍᤥ ᤜᤧᤰᤔᤠ ᤛᤠᤶᤕᤥᤌᤡᤶᤔᤡᤱᤃ ᤔᤥᤛᤠᤗᤠᤶ ᤔᤣ᤺ᤴ. ᤁᤖ ᤁᤱᤃ ᤀᤒᤪᤠᤜᤠᤔᤗᤠᤶ ᤐᤥ᤺ᤰᤂᤧ ᤕᤧᤒᤠᤖᤥ॥) 23ᤀᤠᤸᤗ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶᤔᤡᤴ#᥍:᥈᥉ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶ ᤁᤢᤀᤡᤛᤡᤰ (ᤗᤧᤒᤡ ᥇᥈:᥉; ᤋᤥᤗᤡᤱ ᥇᥍:᥇᥆) ᤀᤅᤧ᤺ᤰᤘᤠᤛᤠᤴ ᤛᤠᤘᤠ᤺ᤴᤇᤡᤱᤅᤠᤱ ᤕᤧᤳᤇᤡ ᤕᤧᤴᤏᤥ ᤜᤷᤍᤥ ᤜᤧᤰᤔᤠ ᤁᤧᤒᤥᤱᤒᤠ ᤘᤕᤧᤖᤥ॥ ᤔᤧᤒᤣ᤺ᤴᤏᤧᤴᤗ ᤑᤠ᤹ᤀᤠᤱ ᤏᤠ᤺ᤶᤛᤡᤱ ᤕᤧᤴᤏᤥ ᤂᤡᤏᤡ᤹ ᤛᤠᤜᤠ᤹ᤖᤧᤴ ᤜᤷᤍᤥ ᤜᤧᤰᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤏᤧ ᤑᤠ᤹ᤃᤪ. ᤀᤡᤱᤃᤠ᤹ ᤁᤴ ᤔᤏᤠᤴ ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤏᤢᤛᤢᤱᤅᤡᤸᤗᤧ ᤌᤣᤀᤠᤱ ᤀᤡᤱᤃᤠ᤹ᤏᤢ ᤂᤡᤏᤡ᤹ ᤕᤠ᤺ᤰᤗᤧ᤹ᤒᤠᤒᤣ᥅ 24ᤔᤏᤠ ᤀᤥᤔᤧᤵᤔᤠᤛᤡᤀᤠᤱ ᤔᤣ᤺ᤴ ᤁᤖ ᤛᤧᤰᤂᤠᤀᤥ ᤂᤠᤛᤧᤴ ᤗᤥ᤺ᤴᤍᤧᤶᤔᤧ᤹ᤀᤥ॥”
ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤕᤧᤛᤢ
25ᤂᤧᤴ ᤕᤧᤶᤔᤥ ᤕᤖᤢᤛᤗᤧᤔ ᤁᤧᤕᤢᤱᤒᤠ ᤁᤢᤓᤠ ᤔᤏᤠᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤔᤧ᤺ᤶᤒᤧ. ᤛᤧᤵᤔᤠ ᤔᤧᤃᤥ᤺ᤳᤋᤢᤖ ᤔᤧᤘᤠ᤹ᤒᤠ ᤔᤏᤠᤴ ᤒᤠ ᤁᤴ ᤔᤣ᤺ᤶᤒᤡ᥅ 26ᤁᤖ ᤁᤱᤃ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤖᤀᤣ ᤐᤠ᤺ᤳᤗ ᤘᤠ᤹ᤖᤥ॥ ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤌᤣᤀᤠᤱ ᤔᤧᤶᤔᤧᤳᤋᤢᤴᤗᤥ॥ ᤔᤧ᤺ᤶᤒᤧ. ᤀᤠᤏᤡ᤹ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤏᤧ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤒᤡ᥅ 27ᤁᤴ ᤔᤏᤠᤴ ᤀᤠᤳᤋᤥᤗᤠᤶ ᤋᤩᤧ ᤁᤧᤗ᤹ᤒᤠ ᤀᤠᤏᤡ᤹ ᤀᤠᤏᤡᤛᤢᤶᤗᤥ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤋᤠ᤺ᤸᤗᤧᤃ ᤂᤢᤏᤧ᤹ ᤌᤠ᤺ᤶᤛᤡᤱᤗᤰᤗᤥ. ᤂᤢᤏᤧ᤹ ᤀᤠᤳᤋᤥᤗᤠᤶ ᤋᤠ ᤁᤧᤗ᤹ᤒᤠ ᤀᤠᤳᤋᤡᤸᤗᤧᤀᤠᤱ ᤔᤧᤏᤡᤛᤢᤴᤗᤥ॥” 28ᤕᤧᤛᤢᤖᤧ ᤔᤠᤱᤜᤡᤶᤔᤥ ᤜᤢ᤹ᤖᤢᤛᤡᤖ ᤐᤳᤇᤧᤸᤗᤧ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤐᤠᤖᤧ. “ᤛᤧᤰᤂᤠᤀᤣ ᤂᤡᤏᤡ᤹ ᤀᤡᤱᤃᤠ᤹ ᤕᤠᤵᤔᤡ ᤁᤢᤛᤡᤱ ᤁᤧᤏᤡ᤺ᤳᤋᤡ᤹ ᤒᤡ᥅ ᤀᤠᤳᤋᤥᤗᤠᤶ ᤀᤡᤱᤃᤠ᤹ ᤋᤩᤠᤱᤒᤠ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤏᤡᤛᤢᤶᤒᤡ᥅ ᤀᤡᤱᤃᤠ᤹ᤃ ᤀᤠᤒᤠᤅᤣ ᤋᤩᤠᤱᤒᤠ ᤔᤣ᤺ᤴᤗᤥ॥ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠᤱᤃ ᤛᤧᤰᤂᤠᤀᤣ ᤆᤥᤰ ᤜᤧᤰᤁᤩᤠᤱ ᤂᤢᤏᤧ᤹ᤃ ᤂᤡᤏᤡ᤹ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤗᤥ. 29ᤁᤖ ᤀᤡᤱᤃᤠ᤹ᤃ ᤂᤢᤏᤧ᤹ ᤁᤢᤛᤡᤱ ᤏᤡ᤺ᤳᤋᤢᤱᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤗᤠᤶᤒᤠ ᤋᤩᤠᤱᤒᤠ ᤜᤧᤰᤁᤩᤠᤱ ᤂᤢᤏᤧ᤹ ᤐᤠᤱᤄᤠᤱᤒᤠᤖᤥ॥”
30ᤕᤧᤛᤢᤖᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤋᤧᤶᤔᤠ ᤔᤧᤃᤥ᤺ᤳᤋᤢ. ᤁᤖ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤢᤏᤧ᤹ ᤔᤧᤴᤇᤢᤛ᤻ᤛᤢᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤕᤧᤶᤔᤡᤴ ᤔᤧᤱᤃᤧᤳᤋᤣ ᤘᤕᤧᤖᤥ॥ 31ᤜᤧᤰᤁᤣᤛᤠᤱ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤏᤛᤠᤴ ᤔᤧᤈᤥᤃᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤋᤠ᤺ᤸᤗᤧ ᤁᤴ ᤔᤏᤠ᤺ᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤒᤡ᥅”
32ᤔᤏᤠᤜᤠ᤹ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤛᤫᤠ᤺ᤳᤋᤠᤱ ᤂᤢᤛ᤻ᤂᤢᤛ᤻ ᤗ᤹ᤖᤡᤰ ᤔᤧᤒᤠᤖᤧᤒᤠ ᤑᤖᤡᤛᤡᤜᤠ᤹ᤖᤧ ᤔᤧᤄᤧᤵᤛᤢᤖᤥ ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤔᤠᤱᤜᤡᤶᤔᤥᤒᤠ ᤋᤡᤗᤡᤱᤃᤠᤜᤠ᤹ ᤂᤢᤏᤧ᤹ ᤁᤢᤍᤧᤶᤛᤧ ᤔᤧᤒᤠᤱᤄᤢᤛᤡ॥#᥍:᥉᥈ ᤔᤠᤱᤜᤡᤶᤔᤥᤒᤠ ᤋᤡᤗᤡᤱᤃᤠᤜᤠ᤹ ᤗᤧᤒᤡ ᤛᤢᤘᤠᤱᤗᤠᤶ ᤔᤧᤘᤕᤧ. ᤜᤧᤰᤁᤩᤠᤱ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤕᤠ᤺ᤶᤒᤰ ᤔᤧᤈᤥᤃᤢᤖᤥ॥
33ᤁᤖ ᤕᤧᤛᤢᤖᤧ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤂᤡᤏᤡ᤹ᤏᤢ ᤛᤵᤑᤠᤖᤰ ᤁᤵᤔᤥ ᤘᤠ᤹ᤀᤠᤖᤥ ᤜᤧᤰᤁᤩᤠᤱ ᤕᤠᤵᤔᤡ ᤁᤧᤒᤠᤱᤒᤠᤸᤗᤥ ᤏᤢᤱᤅᤠ ᤐᤣ᤺ᤰᤁᤠᤖᤥ॥ 34ᤂᤡᤏᤡ᤹ ᤕᤠᤵᤔᤡ ᤁᤧᤃᤥ᤺ᤳᤋᤡ᤹ ᤁᤖ ᤕᤠᤵᤔᤡ ᤁᤧᤱᤄᤥᤛᤡᤴᤗᤥ ᤜᤧᤰᤁᤩᤠᤱ ᤀᤡᤱᤃᤠ᤹ ᤐᤣ᤺ᤰᤁᤠᤒᤠ ᤋᤧᤴᤏᤥᤀᤠᤱ ᤁᤧᤵᤔᤠ ᤁᤧᤴᤇᤢᤰᤋᤡᤸᤗᤥ॥”
35ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ ᤛᤣ᤺ᤴᤔᤧᤗᤠᤵᤛᤡᤱ. “ᤔᤧ᤺ᤶᤒᤧ. ᤂᤢᤏᤧ᤹ ᤀᤠᤳᤋᤥ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤖ ᤘᤠ᤹ᤀᤠᤱ ᤀᤠᤏᤡ᤹ ᤋᤢᤶᤔᤠ ᤀᤠᤴᤇᤢᤰᤋᤢᤶᤔᤡᤴᤒᤠᤒᤣ᥅ ᤂᤢᤏᤧ᤹ ᤘᤣ᤹ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤀᤠᤏᤡ᤹ ᤔᤏᤠᤜᤠ᤹ᤖᤥ ᤐᤣ᤺ᤰᤁᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤜᤢ᤹ᤖᤢᤛᤡᤒᤠᤒᤡ᥅ 36ᤂᤡᤏᤡ᤹ ᤕᤠᤵᤔᤡ ᤁᤧᤃᤥ᤺ᤳᤋᤡ᤹ ᤁᤖ ᤕᤠᤵᤔᤡ ᤁᤧᤴᤍᤢᤔᤡᤴ ᤜᤧᤰᤁᤩᤠᤱ ᤀᤠᤳᤋᤠᤴ ᤐᤣ᤺ᤰᤁᤠ ᤂᤧᤴ ᤋᤧᤴᤏᤥᤀᤠᤱ ᤁᤧᤵᤔᤠ ᤁᤧᤴᤇᤢᤰᤋᤢᤶᤔᤡᤸᤗᤥ ᤗ᤹ᤖᤡᤰ ᤌᤣ ᤐᤠ᤺ᤳᤋᤢᤒᤠᤒᤣ᥅”
ᤜᤡᤱᤔᤴ ᤁᤧᤒᤡᤒᤠ ᤆᤫᤠ᤺ᤳ
37ᤜᤧᤰᤁᤩᤠᤱ ᤋᤱᤏᤠᤶᤖᤧ ᤁᤢᤏᤢᤵᤔᤠ ᤏᤢ ᤁᤧᤕᤧᤰᤐᤠ ᤕᤧᤴᤏᤥ ᤕᤧᤛᤢᤴ ᤕᤧᤶᤛᤡᤱᤅᤠᤱ ᤕᤶᤒᤠ ᤀᤡᤰᤗᤠᤀᤥ ᤔᤏᤠᤜᤠ᤹ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤛᤡᤖᤥ. “ᤂᤡᤏᤡ᤹ ᤗᤢᤶᤔᤥ ᤁᤢᤘᤠᤃᤧᤔᤡᤒᤠᤸᤗᤧ ᤀᤡᤱᤃᤠ᤹ᤀᤥ ᤋᤠᤀᤠᤱ ᤌᤢᤅᤢᤖᤖᤥ॥ 38ᤛᤠᤶᤕᤥᤛᤠᤵᤗᤠ᤺ᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤀᤡᤱᤃᤠ᤹ ᤕᤠᤵᤔᤡ ᤏᤛᤠᤴ ᤁᤧᤈᤥ᤺ᤰᤐᤠᤸᤗᤧ ᤁᤢᤛᤡᤃᤠᤱᤗᤠᤶ ᤜᤡᤱᤔᤴ ᤁᤧᤒᤡᤒᤠ ᤆᤫᤠ᤺ᤳᤋᤡᤴ ᤕᤱᤄᤱ ᤁᤢᤀᤡᤛᤡᤰ ᤐᤢᤴᤗ᤺ᤴᤗᤥ॥” 39ᤁᤱᤃ ᤕᤧᤛᤢᤖᤧ ᤛᤣᤛᤣᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠᤖᤥ॥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤀᤥ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤛᤣᤛᤣᤔᤠᤱᤅᤡᤴ ᤔᤧᤄᤥᤛᤢᤒᤠ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥ ᤛᤣᤛᤣᤔᤠᤱᤅᤡᤴ ᤂᤧᤴ ᤕᤧᤶ ᤌᤠᤖᤡᤰ ᤔᤧᤶᤒᤠᤱᤅᤣ ᤘᤕᤧᤖᤥ. ᤌᤣᤀᤠᤱᤓᤧᤸᤗᤧ ᤕᤧᤛᤢᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤔᤧᤴᤏᤢ᤺ᤱ ᤔᤧᤶᤒᤣ᤺ᤰᤁᤣ ᤘᤕᤧᤖᤥ॥#᥍:᥉᥏ ᤃᤪᤡᤁ ᤐᤠ᤺ᤴᤍᤠᤱᤅᤥ “ᤕᤧᤛᤢᤖᤧ ᤁᤢᤔᤡᤔᤡᤍᤡᤱ ᤔᤧᤶᤒᤥᤱᤅᤣ ᤘᤕᤧᤖᤥ॥”
ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤴᤎᤱ
40ᤜᤧᤰᤁᤩᤠᤱ ᤁᤴ ᤔᤧᤄᤧᤵᤛᤢᤀᤠᤱ ᤔᤏᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤛᤧᤰᤂᤠᤛᤠᤱ ᤁᤴ ᤔᤏᤠ᤺ᤱᤃ ᤋᤠ ᤗ᤹ᤖᤡᤰ ᤀᤡ᤺ᤵᤔᤏᤠᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤴᤏᤣᤖᤥ॥”#ᤛᤠᤶᤕᤥ ᤀᤡᤱ ᥇᥎:᥇᥋. ᥇᥎
41ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢ “ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤥ॥” ᤁᤖ ᤀᤠᤸᤗᤛᤠᤱ ᤘᤣ᤹ᤜᤠ᤹ᤖᤧ ᤀᤰᤂᤣᤗ᤹ᤖᤡᤰ ᤔᤧᤒᤠ᤺ᤳᤋᤢ. “ᤁᤱᤃ ᤐᤥᤱᤔᤠᤀᤣ ᤔᤧᤛᤢᤰᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤧᤱᤃ ᤃᤠᤗᤡᤗ ᤌᤢᤶᤔᤥᤗᤠᤶ ᤔᤧᤍᤠᤏᤧᤴᤗᤥ॥ 42ᤛᤠᤶᤕᤥᤛᤠᤵᤗᤠᤀᤥ ᤋᤥ᤺ᤴᤍᤥᤴᤏᤠᤱ ᤛᤠᤵᤋᤧᤀᤠᤱ ᤐᤳᤗᤥ. ‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤱᤃ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤜᤡᤶᤛᤕᤱᤗᤠᤶ ᤜᤧᤰᤁᤩᤠᤱ ᤍᤠᤀᤢᤍ ᤜᤠᤱ ᤘᤕᤧᤒᤠ ᤒᤣᤌᤗᤧᤜᤧᤔ ᤐᤠᤱᤈᤢᤶᤔᤥ ᤛᤠᤘᤠ᤺ᤴᤇᤡᤱᤗᤥ॥’”#ᤔᤡᤁᤠ ᥋:᥈ 43ᤀᤰᤂᤣᤗ᤹ᤖᤡᤰ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤧᤍᤅᤧᤴᤏᤠᤱ ᤔᤧᤛᤧᤖᤧᤖᤥ॥ 44ᤁᤢᤓᤠᤖᤧ ᤂᤢᤏᤧ᤹ ᤋᤧᤶᤔᤠ ᤔᤧᤃᤥ᤺ᤳᤋᤢ. ᤁᤖ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤢᤏᤧ᤹ ᤜᤢᤰ ᤔᤧᤴᤕᤠᤰᤋᤢᤴᤗᤥ॥
45ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤧᤶᤛᤧ ᤁᤧᤍᤠᤒᤠ ᤔᤠᤱᤜᤡᤶᤔᤥᤒᤠ ᤋᤡᤗᤡᤱᤃᤠᤜᤠ᤹. ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤥ ᤀᤠᤶᤓᤠ ᤔᤧᤏᤢ᤺ᤰᤂᤧ ᤔᤧᤒᤣᤖᤥ॥ ᤂᤧᤱᤜᤠ᤹ᤖᤧ ᤔᤠᤱᤜᤡᤶᤔᤥᤒᤠ ᤋᤡᤗᤡᤱᤃᤠᤜᤠ᤹ ᤛᤣ᤺ᤴᤔᤧᤍᤥᤛᤢᤛᤡ “ᤌᤣᤀᤠᤱ ᤂᤢᤏᤧ᤹ ᤁᤧᤴᤍᤧᤶᤛᤢᤶᤔᤡᤴ ᤁᤧᤴᤍᤠᤖᤢᤔᤡᤶᤒᤠᤒᤣ᥅”
46ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢᤛᤡ. “ᤀᤠᤳᤋᤡᤴᤏᤠᤱ ᤂᤧᤴ ᤔᤏᤠᤴ ᤜᤧᤰᤁᤣ ᤐᤠᤖᤧᤒᤠᤃ ᤔᤧᤱᤄᤧᤶᤔᤣ ᤘᤠ᤹ᤖᤥ॥”
47ᤜᤧᤰᤁᤣ᤺ᤸᤗᤧ ᤑᤖᤡᤛᤡᤜᤠ᤹ᤖᤧ ᤂᤧᤱᤜᤠ᤹ ᤔᤧᤔᤧᤳᤋᤢᤛᤡ. “ᤔᤧ᤺ᤶᤒᤧ. ᤂᤡᤏᤡ᤹ᤀᤠᤱ ᤂᤧᤸᤗᤧ ᤁᤢᤀᤡᤱᤗᤧᤰᤁᤥ ᤁᤧᤎᤩᤧ᤹ᤀᤡᤒᤡ ᤌᤧᤔᤠᤒᤣ᥅ 48ᤀᤠᤏᤡ᤹ ᤗᤠᤶᤗᤥᤒᤠ ᤏᤢ ᤑᤖᤡᤛᤡᤜᤠ᤹ᤖᤧ ᤂᤢᤏᤧ᤹ᤀᤥ ᤏᤛᤠᤴ ᤔᤧᤈᤥᤃᤢᤀᤠᤱ ᤘᤠ᤹ᤒᤡ᥅ 49ᤀᤠᤳᤋᤡᤸᤗᤧᤀᤠᤱ ᤔᤧᤴᤈᤥ᤺ᤰᤁᤣ ᤘᤠ᤹॥ ᤁᤴ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤔᤧᤸᤗᤧᤔᤏᤠᤒᤠ ᤔᤏᤠᤜᤠ᤹ᤖᤧᤖᤰ ᤔᤧᤈᤥᤃᤢᤀᤠᤱ ᤘᤠ᤹ᤖᤥ॥ ᤁᤴ ᤔᤏᤠᤜᤠ᤹ᤃ ᤏᤡᤱᤘᤠ᤹ᤑᤢ ᤛᤠᤱᤃᤪᤠᤖᤧ ᤋᤧᤳᤋᤢᤛᤡᤀᤠᤱ ᤘᤠ᤹ᤖᤥ॥”
50ᤋᤃᤡ ᤌᤡᤰ ᤛᤧᤴᤍᤡᤰ ᤕᤧᤛᤢᤖᤧ ᤁᤢᤍᤢᤶᤛᤧ ᤁᤧᤒᤣ᤺ᤰᤐᤠ ᤏᤡᤁᤥᤍᤣᤔᤛ ᤔᤧᤵᤔᤏᤠᤒᤠ ᤂᤢᤏᤡ᤹ ᤗᤢᤶᤔᤥᤒᤠ ᤌᤡᤰ ᤑᤖᤡᤛᤡ ᤗᤠᤶᤗᤥᤒᤠᤴ ᤐᤠᤖᤧᤖᤥ. 51“ᤔᤧ᤺ᤶᤒᤧ. ᤂᤧᤴ ᤔᤏᤠ᤺ᤸᤗᤧ ᤌᤣ ᤆᤥᤃᤢᤖ ᤘᤠ᤹ ᤁᤧᤗ᤹ᤒᤠᤴ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤀᤠᤵᤋᤡᤰ ᤁᤢ᤺ᤵᤔᤠ ᤀᤠᤏᤡ᤹ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤒᤡ᤹ᤒᤡ᥅”
52ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤂᤧᤏᤧ᤹ᤀᤠᤱ ᤃᤠᤗᤡᤗᤗᤠᤶᤔᤣ ᤁᤧᤍᤩᤧᤒᤠᤒᤡ᥅ ᤂᤧᤏᤧ᤹ ᤀᤠᤒᤠᤅᤣ ᤛᤠᤶᤕᤥᤛᤠᤵᤗᤠᤴ ᤏᤡᤖᤧ ᤛᤠ᤹ᤖᤧ. ᤃᤠᤗᤡᤗᤗᤠᤶᤒᤠᤃ ᤀᤠᤵᤑᤠᤸᤗᤧᤀᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤴ ᤔᤧᤍᤠᤏᤧᤴᤗᤥ॥”
53((ᤜᤧᤰᤁᤩᤠᤱ ᤔᤏᤠᤜᤠ᤹ ᤀᤠᤒᤠᤅᤣ ᤜᤡᤶᤜᤡᤶ ᤔᤧᤏᤢ᤺ᤰᤂᤧ ᤔᤧᤒᤣᤖᤥ॥
Currently Selected:
ᤕᤢᤜᤢᤴᤏᤠ 7: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
