John 2

Sema Kasal Cha Cana

1Idi epalabas diy chegwen akow, gwariy kasal cha Cana a siyodad na Galilee. Gwared man si inen Jesus. 2Ainbitar ngos Jesus tan disipolos to. 3Idi iya-pos i adak, kigwan inen Jesus cha si-katho i “Nagwara wiy adak cha.” 4Et insongbat Jesus i “Nanang, olay toak no gwariy pesing ko. Tep aneng nin onmothok i timpon pengibiybiy ko na panakabalin ko.” 5Et kigwan inen Jesus ired ma bagaen i “Angken nengoy konen tod si-kayo, amag jo.”

6Gwariy ogadi na Hodjos a mesepol a manbolo asan mengan. Isonga, gwared man i enem a salaw a aamag na bathon naaosal a ajanan na chanom. Sema sa-kin salaw, mebedin a a-janen toy sandasos a litron chanom. 7Kigwan Jesus ired ma bagaen i “Peno yo ira ma salaw na chanom.” Et pino riy salaw ingkathod ngoro tho. 8Et kigwan mowan Jesus i “Taok kayo et ala jo led ma toon mahaamta na kasal.” Et seman i imag iren ma bagaen. 9Sema toon mahaamta na kasal, nimathan toy chanom a inpanbalin Jesus na adak. Niman eg to amtiy engalaan cha niwa adak, nem sema iren bagaen a enaok na chanom, amta ra. Isonga, idi nimathan niwa toon mahaamta na kasal, tiya-gway toy dahin mankasal, 10a kigwan to i “Ogadi na toon mengidagwas na kaamisan a adak. Et no chakel miy ininom na too, isa-dat cha wiy endamsis. Nem si-kam, inkamid moy kaamisan ingkathod niman.”

11Seman i pilmiron milagron imag Jesus. Imag tod Cana a siyodad na Galilee. Babaen niwan a milagro, inbiybiy toy banay a panakabalin to, et emati ira ma disipolos tod si-katho.

12Idi iyakcheng iwan, si Jesus, si ineto, sema aahi tho, tan disipolos to, chimalong iren emiin cha Capernaum a siyodad. Et iyan-iyan ired man na kemtang a akow.

Chiyagchag Jesus Ira Ma Naiyandahod Ma Timplo

(Matthew 21:12-13; Mark 11:15-17; Luke 19:45-46)

13Idi chanchani diy timpo na piyasta na Hodjos a kigwan cha i Piyasta na Inda-bas na Anghil cha Hodjos, kimowan si Jesus cha Jerusalem a kad-an niwa piyasta. #2:13 Sema timpo na Piyasta na Inda-bas na Anghil cha Hodjos, naiyanchogi na Abril na tiyawen. Nontan a piyasta, naniyemnemnem iren ma Hodjos iwa inpasing na anghil a dima-bas cha baliy cha, et eg to biyono iriy kafangodowanan chen aanak a daleki nonta bagaen ired Egypt. Sema istoriya, naebased Exodus 11 tan 12. 14Idi mimothok, simekep cha bo-dayan na timplo, et mita thoy tothoon kedinaho na baha, kalniro, tan kalapatin para cha tangdal cha Afo Chiyos. Et mita tho ngoy toon naena-dat na pilak a ketinokkong cha damisaan cha. 15Et engales Jesus na pakod, inpanbalin to na baras, et chiyagchag ton emiin ira ma tood bo-dayan na timplo, pati sema iren baha tan kalniro. Sinidak to ngoy pilak iren ma toon naena-dat, et tingwang to iriy damisaan cha. 16Et kigwan to ired ma naiyandaho na kalapati i “Ekal jo ira ta jowan idaho. Enog i inpanbalin i baliy Awak na dahoan.” 17Et niyemnem iren ma disipolos to ma padton iyaysolat nontan den kigwan to i “Afo Chiyos, sema banay a semek kod baliy mo, si-kathoy kagol ali na ketiy ko.” #2:17 Psalm 69:9

18Kagol a imag Jesus chiwa timplo, sema iren naengibalnay na Hodjos, kigwan ched si-katho i “Nengoy sinjal a ibiybiy mod si-kawi say amtaen mi i gwariy karebengan mon mengemag iren man?” 19Et insongbat Jesus i “Charal jo ja timplo, et itegwen ko mowan na tedon akow.” 20Et kigwan iren ma Hodjos i “Epat a polo tan enem a tawen i ingkabayag na ingkaytegwen niya timplo, nem kigwan mo i itegwen mo mowan na tedon akow bengat?” 21Nem sema timplon piyan Jesus a a-seden, sema angel to. 22Isonga, idi etiy si Jesus et iyanpawil mowan, niyemnem iren ma disipolos to ira ma esel to, et piyati riy iyaysolat cha esel Afo Chiyos tan sema kigwan Jesus.

23Idi gwares Jesus cha Jerusalem nonta timpo na Piyasta na Inda-bas na Anghil, chakel i ematid si-katho nonta mita riy milagron ima-imag to. 24Nem nat inpiyal Jesus i angel tod si-kara 25tep amta thoy nemnem na tothoo. Nat mesepol a gwariy toon mengipaamted si-katho tep amta tho waliy nemnem cha.

Currently Selected:

John 2: KAR

Highlight

Copy