John 4

Si Jesus Tan Sema Biin I-Samaria

1Sema iren Pharisees, chimag cha i chakel pay konoy toon iyanbalin na disipolos Jesus iy say si John a Naemonjag et biyonjagan iren Jesus. 2Nem sema podno, nat si Jesus i naemonjag, no diket sema iren disipolos to bengat.

3Idi iyamtaan Jesus i chimag iren ma Pharisees, iyamtik si Jesus tan disipolos tod Judea et iyan-oli ired Galilee. 4Idi man-ooli ira, mesepol a chedanen chiy sahop na Samaria.

5Idi mimothok ired Samaria, kimowan ired siyodad a engaranan na Sychar. Sema siyodad, iyay-esop cha dogad a intawid Jacob cha anak ton si Joseph nontan da. 6Gwara ngod man i ba-gwek a binkaan Jacob. Timokkong si Jesus cha askang niwa ba-gwek tep iyabdiy na ahad. Chanchaniy alas dosi nontan. 7-8Et sema iren disipolos to, kimowan ired ma siyodad say menongkal ira na kakanen cha.

Idi bimetik ira ma disipolos to, gwariy biin i-Samaria a kimowan alin man-asol. Kigwan Jesus cha si-katho i “Ala ka di pango na chanom a mainom.” 9Et kigwan niwa bii i “Hodjo ka. Apay nga manbaga ked si-kak na chanom angken i-Samariaak?” Kigwan to man tep nat inpakikadgwa iren ma Hodjos iriy i-Samaria. 10Et insongbat Jesus i “No amtam komiy nain-i-kan Afo Chiyos tan no siyaak a manbabaga na chanom, si-kam i manbaga komed si-kak say i-kanan taha na chanom a naengi-kan na biyag.” 11Et kigwan na bii i “Afo, nagwariy itaok mo, tan iyaychalek iya ba-gwek. Toy pengedaan mo na chanom a naengi-kan na biyag i? 12Mas ekayang ka aya iy say afo thayon si Jacob? Tep si-kathoy enawid niya ba-gwek a naiyan-inoman to tan sema iren anak to, pati animal cha.” 13Et insongbat mowan Jesus i “Sema toon menginom niya chanom, ma-kow mowan. 14Nem sema toon menginom na chanom a nain-i-kan ko, nat ma-ma-kow. Tep sema nain-i-kan kon chanom, singen temtem cha angel ton nat ma-ma-tian a naengi-kan na biyag a nagwariy pengingkaan to.” 15Et kigwan na bii i “Afo, ala ka di pango nitha chanom say nat ma-ma-kowak, et say nat mesepol a onkowa-kowanak alin man-asol.”

16Et kigwan Jesus i “Taha, ta-gway mo dis imbaliy mo, et olop mo did jay.” 17Insongbat na bii i “Nagwariy imbaliy ko.” Kigwan Jesus i “Ahow, podnoy kigwan mon nagwariy imbaliy mo, 18tep emindima ken engimbaliy, et sema dahin kadgwam niman, nat imbaliy mo ngo. Isonga, podno ta kigwan mo.”

19Et insongbat mowan na bii i “Afo, profita ka gayam. Gwariy ibagak. 20Toy koston panchejawan tayod Afo Chiyos i? Tep sejay a chontog i naiyanchayawan iren ma afo-afo wi led si-katho. Nem si-kayon Hodjos, nakigwan jo i Jerusalem bengat i koston panchejawan cha Afo Chiyos.” 21Et kigwan Jesus i “Bii, patim i konen ko. Manmomothok aliy timpon nat chiyay a chontog tan nat cha Jerusalem ngoy panchejawan na tood Afo Chiyos a Awa thayo. 22Si-kayon i-Samaria, nat amta yoy Chiyos a nachijaw jo, nem si-kawi ngon Hodjos, amta wiy nachijaw mi tep sema mengisalakan na too, iyay-anak a Hodjo. 23Nem manmomothok aliy timpo et niman ma ngarod a sema toon podnon naiyanchayaw cha Afo Chiyos a Awa thayo, chejawen cha babaen na ispiritos cha tan pengamta ra na podno. Tep piyan Afo Chiyos a seman i pesing na toon manchejaw cha si-katho. 24Tep ispiritos Afo Chiyos, isonga sema manchejaw cha si-katho, mesepol a manchejaw babaen na ispirito tan pengamta tho na podno.”

25Et kigwan na bii i “Amtak i onkowan aliy Messiah a iyanngaran na Cristo. Et no onmothok ali, ipaamta thod si-kathayoy emiin.” 26Et kigwan Jesus i “Si-kak a mantetebal cha si-kam, si-kak iwan.”

27Idi niyankonen Jesus iwan, mimothok ira ma disipolos to. Iyasdaaw ira tep mantetebal si Jesus cha bii. Nem nagwared si-kariy engibaga no nengoy piyan niwa bii tan niyana niyantabalen Jesus. 28Et inpayas niwa biiy salaw to et iyan-olid siyodad. Kigwan tod tothood man i 29“Gomali jo. Si-neng joy toon engowan cha si-kak niwa emiin a ima-imag ko. Si-katho emoy Cristo.” 30Et bimo-day iriy tood ma siyodad et kimowan ired kad-an Jesus.

31Idi iyamtik iwa bii, kigwan iren ma disipolos Jesus cha si-katho i “Maistoro, pangan ka wa.” 32Nem insongbat Jesus i “Gwariy nakiyakan kon nat amta yo.” 33Isonga, mankinowan iriy disipolos to i “Gwara emoy engala na kiyakan to?” 34Et kigwan Jesus i “Sema nakiyakan ko, sema pengemag ko na piyan Afo Chiyos a engito-nod si-kak tan penongpal ko na obden in-i-kan tod si-kak a a-magen ko. 35Gwariy nakigwan jon ‘Mepalabas pay i epat a bolan et onmothok aliy timpo na pan-ani.’ Nem konen kod si-kayo i niman i timpo na pan-ani. Isonga, takmang jo ira ma toon keminothok ali. May-arig ired dawes a bimalag a esaganen ma-ni tep esagana iren memati. 36Sema iren man-eni, mekongkonaan ira, tan sema ngo iren toon enien cha, may-i-kanan ira na biyag a nagwariy pengingkaan to. Isonga, sema naiyantanem tan sema naiyan-ani, mekichadsak ira. 37Tep podnoy nakigwan chen ‘Sema sa-ki, mantenem, et sema ngon sa-ki, man-eni.’ 38Into-no tahejon man-eni na nat iyandigathan jo. Sa-ki ngoy iyandigat, et niman enien joy dawes a iyandigathan cha.”

39Sema iren i-Samaria a naiyan-iyan cha Sychar, chakel i ematid Jesus kagol niwa kigwan niwa biin “Kigwan tod si-kak i emiin a ima-imag ko.” 40Isonga, idi mimothok ira ma i-Samaria cha kad-an Jesus, inbaga ra i on-onong cha si-kara. Et imeket si Jesus chiwan na chegwen akow. 41Chakel pay ngoy ematid Jesus kagol na toro-toro tho. 42Et kigwan ched ma bii i “Sema pemati wi wa, nat kagol bengat na kigwan mo la, no diket inki-ngelan min mismoy toro-toro tho, et amta wi i agpayson si-kathoy mengisalakan na tood ja dobong.”

Ingkal Jesus I Sahit Na Anak Na Ofisiyal

43Idi epalabas diy chegwen akow, bintihan iren Jesus i Samaria et kimowan ired Galilee a bimadegan Jesus. 44Kigwan Jesus i “Nagwariy profiten nachijaw ched dogad to ngo.” 45Nem idi mimothok ires Jesus cha Galilee, igwat na too tep mita ren emiin i kaskasdaaw a ima-imag tod Jerusalem nonta ekipiyasta ira.

46Et imoli mowan si Jesus cha Cana a siyodad na Galilee a engipabalinan to na chanom na adak. Iyaytompong a gwared siyodad na Capernaum i sa-kin ofisiyal na gobirnon mansekit i anak ton dahi. 47Idi chimag na ofisiyal i mimothok si Jesus cha Galilee a edafo did Judea, kimowan a chakos cha kad-an to. Et ekikakaasi i onkowan si Jesus cha Capernaum say pemapteng toy anak to tep chanchanin metiy. 48Et kigwan Jesus i “Niyana mesepol a si-nengen jo nin i kaskasdaaw a sinjal asan kayo mematid si-kak?” 49Nem kigwan mowan na ofisiyal i “Afo, pangaasim, gomali say nat metiy i anak ko.” 50Et kigwan Jesus i “Betik ka wa. Manbiyag i anak mo.” Piyati na ofisiyal i kigwan Jesus et bimetik malen chakos. 51Idi manbebetik iwa ofisiyal, iyaspol iren ma bagaen ton kigwan cha i “Mapteng miy anak mo.” 52Et inbaga thod si-kara i nengoy oras a inmapteng na anak to. Insongbat cha i “Iya-kal i petang to nonta ala ona na ka-cheman.” 53Et niyemnem na awa i seman i oras a kigwan Jesus i “Manbiyag i anak mo.” Isonga, emati wed Jesus, pati emiin a naiyan-iyan cha baliy to.

54Sejay i maykadgwen milagron imag Jesus cha Galilee. Imag to man nonta imoli did Judea.

Currently Selected:

John 4: KAR

Highlight

Copy