Luke 2

Sema Ingkay-anak Jesus

(Matthew 1:18-25)

1Nontan a timpo, inbilin Caesar Augustus #2:1 Si Caesar Augustus, si-kathoy naiyantoray na Romano a empire nonta 23 B.C.—A.D. 14. i manpadista iren emiin i tood ili-ilin naiyantorayan to. 2Sema pilmiron distaan, epasamak nonta si Quirinius i gobirnador na Syria. 3Isonga, kimowan a emiin i toon manpadisted siyodad a edafoan na afo-afo ra la.

4Isonga, si Joseph ngo, bintihan toy Nazareth a siyodad na Galilee, et kimowan cha siyodad David a engaranan na Bethlehem a gwared Judea tep chiwan i iyay-anahan David a afo to la. 5Ekiolop ngos Maria cha Joseph a manpadista tep iyaykarin mekiimbaliy cha si-katho. Iyabchel. 6Et idi gwara ired Bethlehem, mimothok i timpon on-anak si Maria. 7Iyan-anak na kafangodowanan ton dahi. Et dinibothan to na dofot, et in-olig tod panganan na animal cha kamaring a iyan-iyanan cha tep nagwariy egwayen panjo-kowan chen baliy.

Iyanparang Iriy Anghilis Cha Naiyanbantay Na Kalniro Ra

8Nontan a edagwi, gwared ma sahop i naiyanbantay na kalniro red pastolan. 9Et biglen gwariy iyanparang a anghil cha si-kara, et esilowan ira na nihal Afo Chiyos, et timahot iren pasiya. 10Nem kigwan na anghil i “Enog i tahot. Tep kimowanak alin mengigwanggwang na mapteng a chamag cha si-kayo, et seja mapteng a chamag, si-kathoy panchadsahan na emiin a tothoo. 11Tep sema mengisalakan cha si-kayon si Criston Afo thayo, iyay-anak niman cha siyodad David. 12Et sejay i pesing jo na pengamtaan niwa nga-nga a sebien jon edibothan na dofot a man-oolig cha panganan na animal.” 13Et biglen iyanparang ngoy chakel a echom ton anghilis alid dangit, et chiyan chayawes Afo Chiyos a kigwan cha i:

14“Sapay koma mechejaw si Afo Chiyos a gwared dangit.

Sapay koma ontalna iriy toon gwared dobong a pan-imdengan to.”

15Idi imoli wa ira ma anghilis cha dangit, iyankinowan ira ma naiyanbantay na kalniro i “Onkowan kiyed Bethlehem say si-nengen tayo ma epasamak chiwan a inpaamten Afo Chiyos cha si-kathayo.”

16Et imagag iren kimowan, et sibi res Maria ni Joseph tan sema nga-ngen man-oolig cha panganan na animal. 17Idi sini-neng iren ma naiyanbantay na kalniro ma nga-nga, inpaamta riy kigwan niwa anghil maypangkep cha si-katho. 18Et iyasdaaw i emiin a engiki-ngel na kigwan cha. 19Si Maria ngo, sema iren emiin epasamak, inkamid tod nemnem to et niyemnemnem to. 20Et sema ngo iren naiyanbantay na kalniro, imoli iren mancheja-chejaw cha Afo Chiyos kagol niwa inki-ngelan cha tan sini-neng cha tep podnon emiin i kigwan na anghil cha si-kara.

Ngiyaranan Cha Ma Nga-nga Na Jesus

21Idi maykagwalon akow niwa nga-nga, inpakogit cha, et ngiyaranan cha na Jesus tep si-kathoy ngaran a kigwan na anghil cha si-kara nonta aneng pay mebchel si Maria. #2:21 Leviticus 12:3

In-awat Ches Jesus Cha Afo Chiyos

22Idi epalabas i epat a polon akow manipod nonta imanak si Maria, kimowan si Joseph ni Maria cha Jerusalem say tongpalen chiy ogadi na dinis para cha biin imanak tep iyaysolat chiwa dinteg Moses. #2:22 Leviticus 12:1-8 Et intahin ches Jesus say iawat ched Afo Chiyos. 23Tep iyaysolat cha dinteg Afo Chiyos i “May-awat a emiin i kafangodowanan a dahid Afo Chiyos.” #2:23 Exodus 13:2 24Et kimowan ngo iren mengitangdal na chegwen kalapati say ibilang Afo Chiyos si Maria a edinis tep iyaysolat ngod ma dinteg Afo Chiyos.

25Nontan a timpo, gwariy sa-kin aamen naiyan-iyan cha Jerusalem a si Simeon i ngaran to. Maronong a too tan napiyati thoy bili-bilin Afo Chiyos. Towan sekeriy imothok na mengisalakan ired ma poli-polin Israel, tan gwariy Ispirito Santod si-katho. 26Inpaamta na Ispirito Santod si-katho i nat metiy ingkathod si-nengen toy Criston ito-no din Afo Chiyos. 27In-ejan na Ispirito Santod nemnem Simeon a onkowan komed timplo. Et idi intolod Joseph tan si Maria i anak chen si Jesus chiwa timplo say a-magen cha ma iyaysolat chiwa dinteg Afo Chiyos maypangkep cha si-katho, 28iyarakop Simeon iwa nga-nga et chijaw tos Afo Chiyos a engowan i:

29“Afo, tiyongpal moy

inkarim cha si-kak,

et gwara wed si-kak i talna.

Si-kak a naiyansilbid

si-kam,

itolok moak men metiy.

30Tep sini-neng ko ma into-nom alin

mengisalakan cha si-kawi.

31Si-kathoy chiyotohan mon maypaamted emiin a too.

32Si-kathoy silow a

menginihal na nemnem

na Gentiles

say amtaen chen maysalakan.

Et kagol cha si-katho, mechejaw iriy tothoom a

poli-polin Israel.”

33Et si awa tan inen Jesus, iyasdaaw ired ma kigwan Simeon i maypangkep niwa anak cha. 34Et binindisjonan iren Simeon a kigwan tod Maria a inen Jesus i “Seta anak mo, si-kathoy kagol na kechosaan tan kaysalakanan na chakel a poli-polin Israel. Into-no din Afo Chiyos a sinjal na kaysalakanan, nem chakel i toon mengomang cha si-katho. 35Et maamtaan no ngoy gwared nemnem na tothoo. Et si-kam ngo, Maria, kagol ira di na mepesamak, banay i engos mon singen iyatbek i posom na ispada.”

36Gwara ngod ma timploy biin profiten iyanngaran na Anna. Anak Phanuel a polin Asher. Eba-kol men pasiya. Ekikadgwed imbaliy to na pithon tawen bengat, 37et ebalo ingkathod gwalon polo tan epat i tawen to. Gwara na olay chiwa timplon mancheja-chejaw cha Afo Chiyos tan mankara-kararag tan man-ayo-ayonar na kaakawan tan kalebiyan. 38Nonta kosto-koston oras a gwares Joseph, si Maria, tan si Jesus chiwa timplo, mimothok si Anna chiwan et iyansalamat cha Afo Chiyos. Et manipod nontan, iyan-is-istoriya maypangkep Jesus cha emiin a tothoon kesineked niwa mengidibchi na tothood Jerusalem.

39Idi kincheng Joseph tan si Maria a engamag niwa emiin a iyaysolat chiwa dinteg Afo Chiyos, bimetik ired siyodad chen Nazareth cha Galilee. 40Et bimadeg iwa nga-nga et kimedsang. Chakel i daing to et naiyapnek si Afo Chiyos cha si-katho.

Sipol Joseph Ni Maria Si Jesus Chiwa Timplo

41Tiyawen a nakimowan i parintis Jesus cha Jerusalem say mekipiyasta ira na timpon Piyasta na Inda-bas na Anghil cha Hodjos. 42Idi iyantawen si Jesus na sawal na chegwa, intahin Joseph tan si Maria nonta kimowan iren mekipiyasten inges toy nainpasing cha na olay. 43Idi iyakcheng iwa piyasta, dimayat iren onbetik. Nem imonong si Jesus cha Jerusalem, nem nat amta na parintis to man 44tep kin cha i gwared gropon echom chen manbebetik cha Nazareth. Isonga, iyanbiyahi ira na san-akow asan a-nafen ches Jesus ired ma aahi ra tan kakadgwa ra. 45Idi nat sipol cha, imoli ired Jerusalem say anafen cha.

46Idi maykatdon akow, sipol ches Jesus chiwa timplon mantoktokkong ired ma mamaistoro na dinteg. Iyanki-ki-ngel cha si-kara, et iyansalo-salodsod cha si-kara maypangkep na kigwa-kigwan cha. 47Et emiin a iyanki-ngel cha si-katho, iyasdaaw ira na kalaing tan songsongbat to. 48Idi mita na parintis to, iyasdaaw ngo ira. Et kigwan ineto i “Anak ko, apay nga inpasing mo jay cha si-kawi? Si-kawin awam, chimanag kawin chili et ina-inap mika.” 49Et kigwan Jesus i “Niyana ina-inap joak? Nat amta yo i mesepol a gwaraak chiyed baliy Awak?” 50Nem nat igwathan chiy piyan ton a-seden.

51Et ekiolop si Jesus cha parintis ton onbetik cha Nazareth, et naimag ton emiin i nakigwan cha. Si Maria ngo, inkamid tod nemnem ton emiin ira ma epasamak. 52Tan si Jesus ngo, bima-ba-deg tan dima-da-toy daing to. Tan dima-da-to ngoy chadsak Afo Chiyos cha si-katho, pati sema iren tothoo.

Currently Selected:

Luke 2: KAR

Highlight

Copy