Luke 20

Sema Salodsod Maypangkep Na Karebengan Jesus

(Matthew 21:23-27; Mark 11:27-33)

1Idi sa-kin akow, niyantoroin Jesus iriy tothood bo-dayan na timplo tan towan ikasaba ma mapteng a chamag cha si-kara. Nontan a gwared man, sema iren aafo na papari, mamaistoro na dinteg, tan iyangkaama, kimowan ired kad-an ton 2kigwan cha i “Kowan mod si-kawi no ngoy karebengan mon mengipesi-pesing iren tan? Siyay engi-kan nitha karebengan mo?” 3Insongbat Jesus i “Gwara nin i ibagak cha si-kayo. Kowan jod si-kak 4no siyay engi-kan cha John na karebengan ton memonjag na too? Si Afo Chiyos ono too?” 5Et iyantatabalan cha wa i “Ngoy konen tayo? No konen tayo i si Afo Chiyos i engi-kan na karebengan John, konen to emo i ‘No setan ngarod, apay nga eg jo piyati?’ 6Nem no konen tayo i too bengat i engi-kan, emiin a too, chedtogen cha kiya tep podnon napiyati ra i agpayson profites John.” 7Isonga, kigwan cha i “Nat amta wi.” 8Et kigwan ngon Jesus i “Angken si-kak ngo, ekak igwanggwang cha si-kayo no siyay engi-kan na karebengan kon mengema-emag iren jay.”

Sema Arig Na Naengi-chen Na Garden A Grape

(Matthew 21:33-46; Mark 12:1-12)

9Et in-arigan Jesus ira ma toon kigwan to i “Gwariy toon iyantanem na grape cha mabenaw a garden to, et inpa-bang to ma garden tod echom a naengi-chen. Et kimowan cha sa-kin ili et ebayag chiwan. 10Idi mimothok i timpo na siborasan na grape, engito-no ma mahagarden na bagaen to ired ma naengi-chen say a-daen na bagaen i bingay to. Nem idi mimothok iwa bagaen, piyegpeg-as iren ma naengi-chen et inpabtik chen diwas. 11Engito-no mowan iwa mahagarden na sa-kin bagaen. Piyegpeg-as ngo iren ma naengi-chen tan biyai-baingan cha, et inpabtik chen diwas. 12Et engito-no mowan na maykatdon bagaen to. Si-katho, siyogathan cha et chiyagchag ched ma awas na garden. 13Et kigwan na mahagarden i ‘Ngoy pesing ko? Amtak. Ito-nok i anak kon ensemek kon pasiya. Mebedin emon rispiktaren cha.’ 14Nem idi mita iren ma naengi-chen i anak to, kigwan cha i ‘Sejay i menegwid niya garden. Bonoen tayo et say a-daen tayo ja tawid to.’ 15Et inkowan ched ma awas na garden, et biyono ra. Ngoy pesing niwa mahagarden ired ma naengi-chen? 16Sigoradon onkowan chiwan a bonoen to ira, et ipiyal to ma garden tod echom a too.” Idi inki-ngelan na tothoo man, kigwan cha i “Sapay koma nat mepesa-pesamak ira man!” 17Nem sini-neng iren Jesus et kigwan to i “No setan i konen jo, nengoy banag niwa iyaysolat cha esel Afo Chiyos a kigwan to i:

‘Sema bathon kigwan iren ma naengamag i

nagwariy silbi tho,

si-kathoy iyanbalin a kapategan a bathon

naengibahed na baliy’? #20:17 Psalm 118:22

18Emiin a toon ma-kas chiya batho, mebosak ira, tan emiin ngon toon may-i-kasan niya batho, mepiksit ira.”

Sema Salodsod Maypangkep Na Bayad Na Binis

(Matthew 22:15-22; Mark 12:13-17)

19Idi kincheng Jesus a engowan iren man, sema iren mamaistoro na dinteg tan aafo na papari, piyan chen chakos a chedmethen tep amta ra i sema arig, maypangkep cha si-kara. Nem eg cha inpasing tep tiyakothan chiy tothoo. 20Isonga, sinili-siliban ches Jesus, et engito-no ira na tothoon engibili-biling a maronong iren too say salodsoren ches Jesus et say mesaol. Et sema iren aafo na papari tan mamaistoro na dinteg, osalen chiy konen Jesus a pengicharoman ched si-katho et say mebedin a iawat ched gobirnador. Tep sema gobirnador, gwariy kabaalan tan karebengan ton mengowis cha si-katho. 21Et sema iren toon into-no ra, kimowan ired kad-an Jesus a kigwan cha i “Maistoro, amta wi i emiin a nakigwan mo tan naintorom, podno. Amta wi pay i nat naindasin moy kasasaad na angken siyen too, no diket naintorom i podno maypangkep na piyan Afo Chiyos a a-magen na tothoo. 22Et ija pangoy ibaga wi. Iyaytolok emod ma dinteg tayo i panbejad na binis cha Caesar, ono enchi?” 23Nem amten Jesus i chiyan iparas a menaol, isonga kigwan to i 24“Ibiybiy jod si-kak i pilak a naaosal a maybayad na binis. Siyay mahadopa tan mahangaran niyay?” Kigwan cha i “Si Caesar.” 25Et kigwan men Jesus i “No setan ngarod, i-kan jod Caesar i may-i-kan komed si-katho, tan i-kan jo ngod Afo Chiyos i may-i-kan komed si-katho.” 26Et nat mebedin a siyaol ches Jesus a osalen chiy kigwan tod sangoanan ira na too, no diket iyasdaaw ira na insongbat to et imeke-eket ira.

Sema Salodsod Maypangkep Na Panpawil Na Iyangketiy

(Matthew 22:23-33; Mark 12:18-27)

27Gwariy echom a Sadducees #20:27 Sema iren Pharisees tan Sadducees, chegwen gropo na Hodjos a iyanpan-achal. Sema iren Sadducees, naiyonoran chiy toro-toro bengat a gwared dimen dibchon insolat Moses (Genesis, Exodus, Leviticus, Numbers, tan Deuteronomy). Sema iren Pharisees, naiyonoran chiy toro-toron iyaysolat ired ma dibcho, nem naiyonoran cha ngoy toro-toron in-elbat iren ma afo-afo ra la maypangkep na mapteng a panbiyag.Maypangkep na napiyati iren ma Hodjos, napiyati na Pharisees i manpawil i iyangketiy, nem enchiy Sadducees. Napiyati ngo na Pharisees i no metiy miy too, kongkonaan Afo Chiyos no napiyatin ma tooy bili-bilin to, tan chosaen Afo Chiyos no nat napiyati tho ma bili-bilin to. Nem nat napiyati iren ma Sadducees iwan. Tan napiyati ngo iren ma Pharisees i gwares Satanas, anghilis, dimonyos, tan ispiritos, nem enchiy Sadducees. a kimowan cha kad-an Jesus. Sema iren Sadducees, eg cha napiyati i manpawil i etiy. 28Kigwan ched Jesus i “Maistoro, say dinteg tayon insolat Moses, kigwan tod man i ‘No gwariy sambaliy a nagwariy anak cha iy metiy i dahi, mesepol a imbaliyen na ahi tho ma ebalo say no man-enak ira, maybilang a anak niwa etiy.’ #20:28 Deuteronomy 25:5-6 29Niman ma, gwariy pithon san-aahin daleki. Engimbaliy i kafangodowanan, nem etiy iy nagwariy anak cha. 30Et sema sigonchen ahi tho, inimbaliy to ma ebalo, nem etiy ngo iy nagwariy anak cha. 31Et sema maykatdo, inimbaliy to ma ebalo. Et inges tod si-katho. Timolo-toloy ingkathod emiin a pithon san-aahi, iyansina-dat iren engimbaliy niwa ebalo, et etiy iren nagwariy anak cha. 32Et etiy ngo ma bii na kaonoran. 33Isonga, no timpo di na panpawil na iyangketiy, siya ngarod iren ma pithoy koston imbaliy niwa bii? Tep emiin a pithon daleki, inimbaliy cha ma bii.”

34Et insongbat Jesus i “Sema iren tothood ja dobong, naengimbaliy ira. 35Nem sema iren nainbilang Afo Chiyos a maykarin manpawil say mayka-chom cha si-katho, nat mengimbaliy ira. 36Tep singen inges chiy anghilis a nat naetiy. Anak iren Afo Chiyos a inpanpawil to. 37Nem sema maypangkep na panpawil na iyangketiy, angken si Moses, piyaneknekan to i manpawil i etiy. Tep idi insolat toy maypangkep na manchachalang a kejow, ngiyaranan tos Afo Chiyos a Chiyos Abraham, Chiyos Isaac, tan Chiyos Jacob. #20:37 Sema istoriyen maypangkep Abraham tan sema kejow a manchachalang, naebased Exodus 3:1-6. Kigwan Afo Chiyos iwan angken ebayag malen etiy ires Abraham. Sema piyan ton a-seden, manpawil i iyangketiy tan sibibiyag ired sangoanan Afo Chiyos. 38Si Afo Chiyos, nat Chiyos na etiy, no diket sema iren sibibiyag. Tep sibibiyag a emiin i tood sangoanan to.” 39Et sema echom a mamaistoro na dinteg, kigwan cha i “Maistoro, mapteng i insongbat mo.” 40Et nat timoled ma iren mansalodsod cha Jesus.

Sema Salodsod Maypangkep Na Cristo

(Matthew 22:41-46; Mark 12:35-37)

41Et kigwan Jesus cha si-kara i “Niyana nakigwan cha i sema Cristoy polin David? 42Tep kigwan mismon David cha dibchon Psalmo i:

‘Kigwan Afo Chiyos cha

Afok i

“Tokkong ked ja

gwanan ko

43ingkathod a-gwahen ko

ira ma naengontred

si-kam a singen inkathin mo ira.” ’ ” #20:42-43 Psalm 110:1

44Intoloy Jesus a engowan i “No kigwan David ngo i sema Cristoy Afo tho, ngoy pesing na Criston medepod David?”

Kigwan Jesus Ired Tothoo I Tanchaanan Chiy Mamaistoro Na Dinteg

(Matthew 23:1-36; Mark 12:38-40)

45Idi manki-ki-ngel i toon emiin, kigwan Jesus ired ma disipolos to i 46“Tanchaani yoy mamaistoro na dinteg tep piyan chen manbaro na mapteng say mepeschian ira tan piyan cha pay a komostaen ira na too no onkowan ired market. Piyan cha pay a ontokkong chiwa kamaptengan a tokkongan cha synagog, tan no mekidihob ira, piyan cha pay a mekitokkong ired ma ainportantin too. 47Nasiyaol cha pay iriy iyangkebalo say a-daen chiy kameng cha, angken baliy cha, tan naebaya-bayag iren mankararag a nainbili-biling cha i maronong iren too. Isonga, mema-men enbel-at aliy chosa ra.”

Currently Selected:

Luke 20: KAR

Highlight

Copy