Luke 5

Pinispis Jesus Iriy Pilmiron Disipolos To

(Matthew 4:18-22; Mark 1:16-20)

1Idi sa-kin akow, gwares Jesus a man-ak-akgwat cha kilig na baybay a Gennesaret a mantotoro. Et siyalibongbongan na tothoo tep piyan chen iki-ngelan i esel Afo Chiyos. 2Eni-neng si Jesus na chegwen bangked kilig na baybay. Inpayas ira na naiyanpaideng chiwan, et chiyan kaskasiy balchow cha. 3Et iyankeb-ong si Jesus cha bangken kegwen Simon, et kigwan tod Simon i onki-ki-nan chiwa kilig na baybay. Et timokkong si Jesus chiwa bangka, et intoroan to ira ma too.

4Idi kincheng Jesus a iyantoro, kigwan tod Simon i “Itorong moy bangked kad-an na benow a chanom, et isa-kod joy balchow jo say gwariy nigayen jon paideng.”

5Et insongbat Simon i “Afo, inpahat min manpai-paideng na sandabi et nagwariy ninigay min paideng. Nem kagol a si-katho ma kigwan mo, isa-kod miy balchow mi.” 6Idi insa-kod cha mowan i balchow cha, chakel a chiliy ninigay chen paideng, et chanchanin meketdang i balchow cha. 7Et chiningjasan cha ira ma echom chen gwared ma sa-kin bangka say onkowan ali chen ontolong. Idi mimothok ira ma echom cha, pino riy chegwen bangka na paideng, et chanchanin melned ira ma bangka tep chakel a chiliy paideng.

8Idi sini-neng Simon Peter iwan, iyantalimohod cha sangoanan Jesus a kigwan to i “Afo, pangaasim, kay-aragwi ked si-kak tep mabesolak a too.” 9Kigwan Simon iwan tep si-karen emiin a echom to, iyasdaaw ira tep chakel i ninigay chen paideng. 10Sema iren echom chen gwared sa-kin bangken James ni John a anak iren Zebedee, iyasdaaw ngo ira. Et kigwan Jesus cha Simon i “Enog i tahot. Manipod niman mannigay ka na too.” 11Et idi kincheng chen inkoyod i bangka red ma kilig na baybay, inpayas chen emiin et ekiolop ma ired Jesus.

Piniged Jesus I Kolid Na Mansekit

(Matthew 8:1-4; Mark 1:40-45)

12Nonta gwares Jesus cha sa-kin siyodad, gwariy dahin ekoli-kolid i angel ton kimowan cha kad-an to. Idi mita thos Jesus, iyantalimohod cha sangoanan to et ekiadok cha si-kathon kigwan to i “Afo, amtak i mebedin a a-kalen mo ja sahit ko no piyan mo say eg konen na too i ensekigak.” 13Et in-okjad Jesus i diwa tho et kiyapkap to ma dahin kigwan to i “Piyan ko. Edinis ka wa.” Et epiged a chakos i kolid niwa dahi. 14Idi iyakcheng iwan, tiyengteng Jesus i “Enog i ingwanggwanggwang iyay cha angken siyen too, no diket pandiritso ked kad-an na pari say metaen to i epiged i kolid mo. Et itangdal mod Afo Chiyos i inbilin Moses say amtaen na tothoo i edinis ka wa.” 15Nem iyaychama-chamag i nainpasi-pasing Jesus. Isonga, chakel i toon esa-sa-nop cha kad-an to say iki-ngelan chiy toro-toro tho tan a-kalen toy sahit cha. 16Nem no singka-chom, nabimetik si Jesus et nakimowan cha iyaydasi-dasin a dogad say mankararag.

Inpamapteng Jesus I Dahin Eg Mahakiykiy

(Matthew 9:1-8; Mark 2:1-12)

17Idi sa-kin akow a mantotoros Jesus, gwariy echom a Pharisees #5:17 Sema iren Pharisees tan Sadducees, chegwen gropo na Hodjos a iyanpan-achal. Sema iren Sadducees, naiyonoran chiy toro-toro bengat a gwared dimen dibchon insolat Moses (Genesis, Exodus, Leviticus, Numbers, tan Deuteronomy). Sema iren Pharisees, naiyonoran chiy toro-toron iyaysolat ired ma dibcho, nem naiyonoran cha ngoy toro-toron in-elbat iren ma afo-afo ra la maypangkep na mapteng a panbiyag.Maypangkep na napiyati iren ma Hodjos, napiyati na Pharisees i manpawil i iyangketiy, nem enchiy Sadducees. Napiyati ngo na Pharisees i no metiy miy too, kongkonaan Afo Chiyos no napiyatin ma tooy bili-bilin to, tan chosaen Afo Chiyos no nat napiyati tho ma bili-bilin to. Nem nat napiyati iren ma Sadducees iwan. Tan napiyati ngo iren ma Pharisees i gwares Satanas, anghilis, dimonyos, tan ispiritos, nem enchiy Sadducees. tan sema iren mamaistoro na dinteg a ketinokkong cha kad-an to. Edafo-dafo di ired emiin a siyo-siyodad na Galilee tan Judea, pati Jerusalem. Et gwared Jesus i panakabalin Afo Chiyos a mengkal na sahi-sahit. 18Idi mantotoros Jesus, gwariy mansekit a eg mahakiykiy a intolod na toon man-oolig cha kamen. Inparas chen isekep iwa mansekit cha baliy say isepa red sangoanan Jesus, 19nem nat mebedin tep chakel i too. Isonga, inkayang ched bobongan et gwini-gwian chiy bobongan. Et insa-kod cha ma mansekit a man-oolig cha kamen tod kawa na tothood sangoanan Jesus. 20Idi iyamtaan Jesus i banay i pamati red si-katho, kigwan tod ma mansekit i “Ahi, epakawanan i basol mo.”

21Sema iren mamaistoro na dinteg tan sema iren Pharisees, idi inki-ngelan chiy kigwan Jesus, gwared nemnem cha i “Ampay siya man aya? Towan iinges i angel tod Afo Chiyos. Tep nagwariy mebedin a memekawan na basol, malaksid si Afo Chiyos bengat.” 22Amten Jesus i gwared nemnem chen kigwan to i “Niyana setan i jowan nemnema? 23Konen jo emo i in-inam-ay i kekegwan to i ‘Epakawanan i basol mo’ iy ‘Bangon ka et pan-ahad ka.’ 24Nem konen ko ma edigat say amtaen jo i si-kak a Anak na Too, gwariy karebengan kod dobong a memekawan na basol.” Et kigwan tod ma toon nat mahakiykiy i “Konen kod si-kam i ‘Bangon ka, alam itha kamen mo, et betik ka.’ ” 25Et sema wen too, bimangon a chakos cha sangoanan na emiin a too, ida thoy kamen ton iyan-oligan to, et bimetik malen iyanchaya-chayaw cha Afo Chiyos. 26Et sema emiin a toon gwared man, iyasdaaw ira tan ketinahot ngo ira, et chijaw ches Afo Chiyos a kigwan cha i “Kaskasdaaw a chiliy sini-neng mi niman.”

Pinispis Jesus Si Levi A Iyanngaran Pay Na Matthew

(Matthew 9:9-13; Mark 2:13-17)

27Idi iyakcheng iwan, imawas si Jesus chiwa baliy. Et gwariy mita thon dahin para singil na binis a iyanngaran na Levi a mantoktokkong chiwed opisina thon naeningilan to na binis. Kigwan Jesus i “Gwalid jay, kay-olop ked si-kak.” 28Et imakgwat mes Levi a inpayas ton emiin et ekiolop.

29Idi engkay, iyanpartis Levi cha baliy to para cha kaychayawan Jesus. Gwara ngo iriy chakel a toon para singil na binis tan echom a toon ekidihob cha si-kara. 30Sema iren Pharisees tan sema iren echom chen mamaistoro na dinteg, iyanriri iren kigwan cha ired ma disipolos Jesus i “Niyana naekidihob kayod ma para singil na binis tan sema iren mabesol?” 31Insongbat Jesus a engiarig i “Sema mahasafol na doktor, nat sema iren mahedsang, no diket sema iren mansekit. 32Ekak ali kimowan say mena-gwayak na maronong a too, no diket sema iren mabesol say manbabawi ira na basol cha.”

Sema Maypangkep Na Ayonar

(Matthew 9:14-15; Mark 2:18-20)

33Gwara iriy echom a toon kigwan ched Jesus i “Sema iren disipolos John a Naemonjag, naiyan-ayonar tan naiyankararag ira. Inges to ngo ired ma disipolos na Pharisees. Apay nga sema iren disipolos mo, naengan tan naenginom ira na olay?” 34Simongbat si Jesus cha si-karen engiarig iren ma disipolos tod tothoon mekikasal. Kigwan to i “Nakigwan jo ayed toon mekikasal i mesepol a man-ayonar ira iy gwara pay cha si-kariy dahin engimbaliy? Enchi. 35Nem onmothok aliy timpo no si-kak a inges to ma dahin engimbaliy, a-kalen chaak ired ma disipolos ko, et si-katho diy timpon pan-ayonar cha.”

Sema Maypangkep Na Badon Intoron Jesus

(Matthew 9:16-17; Mark 2:21-22)

36Et kigwan Jesus a engiarig i “Nagwariy toon memi-nik na badon baro say itahap tod chaan a baro tho. Tep no a-magen to man, mebi-nik iwa badon baro, et sema badon dofot, nat may-anam cha chaan a baron iyaytahapan to. 37Tan nagwara met pay i mengi-jan na tafiy cha chaan a kathat a ejanan. Tep no a-magen to man, ma-tengan i tafiy et onpekis iwa ejanan to. Et maybo-jak iwan tan mechechal ngo ma ejanan. 38Sema tafiy, mesepol a may-ejan chiwa badon kathat a ejanan. 39Sema toon naenginom na tebol, nat piyan toy tafiy. Tep nakigwan to i ‘Kamaptengan iwa tebol.’ ”

Currently Selected:

Luke 5: KAR

Highlight

Copy