Luke 8

Sema Bibiin Enolong Jesus

1Idi epalabas i piyen akow, iyansa-sa-mad si Jesus cha chakel a siyodad, banay tan otik, a iyankasa-kasabaan to na mapteng a chamag maypangkep na pantorayan Afo Chiyos. Ekiolop ira ma sawal na chegwen disipolos to. 2Gwara ngo iriy bibiin timahin cha si-kara. Sema echom iren ma bibii, gwariy sigod a sahit cha et inpamapteng iren Jesus. Sema echom ngo, iya-janan ira na dimonyos, et chiyagchag Jesus ira ma dimonyos. Gwariy sa-kid si-karen si Mary a iyanngaran na Magdalene a bintihan na pithon dimonyos. 3Gwara ngos Joanna a imbaliy Chuza. Si Chuza, si-kathoy naiyanbantay iren ma bagaen Ari Herod. Tan gwara ngos Susanna tan chakel pay a echom a bibiin naengi-kan na kokowa ra say tolongan ches Jesus tan disipolos to na mesepol cha.

Sema Arig Maypangkep Na Mengipoyaw

(Matthew 13:1-9; Mark 4:1-9)

4Sema iren toon edafod chakel a siyodad, kimowan ired kad-an Jesus. Et idi esa-sa-nop ired man, engiarig si Jesus cha si-karen 5kigwan to i “Idi sa-kin akow, gwariy sa-kin toon kimowan a mengipoyaw na bothil cha payow. Idi towan ipoyaw iriy bothil, iya-kas i echom cha chalan a inkathi-kathin cha et kiyakan na titit. 6Iya-kas ngoy echom cha kabatho-bathoan, nem idi simimit, iyakpit tep kolang i chanom to. 7Iya-kas pay ngoy echom cha kaskasbithan, nem ekibadeg i sebit chiwa tanem, et sinisi tho. 8Nem sema iren echom a bothil, iya-kas ired ma mapteng a pithek, et bimadeg a iyandawes na sandadasos.” Et inpekes Jesus i esel ton kigwan to i “Si-kayon manki-ki-ngel, nemnem jon pasiyay inki-ngelan jo.”

9Idi engkay, inbagaan iren ma disipolos si Jesus no nengoy piyan niwa arig a a-seden. 10Et kigwan Jesus i “Si-kayoy inpalobos Afo Chiyos a mengamta na eg aamtaan nontan maypangkep na pantorayan to, nem sema ngo iren echom a too, ari-arig bengat i maytorod si-kara say ‘angken chiyan mathaa, eg cha peschian, tan angken chiyan iki-ngeli, eg cha egwathan.’ ” #8:10 Isaiah 6:9

Sema Banag Na Arig Na Mengipoyaw

(Matthew 13:18-23; Mark 4:13-20)

11Intoloy Jesus a engowan i “Sema banag na arig a kigwan ko maypangkep na toon engipoyaw na bothil, sejay. Sema bothil, si-kathoy esel Afo Chiyos. 12Sema iren iya-kas cha chalan, si-kara ira ma toon manki-ngel na esel Afo Chiyos, et onkowan aliy Diablo et a-kalen tod nemnem cha ma inki-ngelan cha say eg ira memati et say eg ira maysalakan. 13Sema ngo iren bothil a iya-kas cha kabatho-bathoan, si-kara ira ma toon memati na esel Afo Chiyos no iki-ngelan cha wa, et on-imdeng ira, nem eg ondamot iwa esel cha nemnem cha. Memati ira na sankaatihan, nem no onmothok aliy solisog, bebnekan chen chakos i pamati ra. 14Sema iren bothil a iya-kas cha kaskasbithan, si-kara ira ma toon manki-ngel na esel Afo Chiyos, nem dingdingen cha kagol na chana-chanag cha tan sema kamkam chen onbaknang tan sema iren echom a piyan chen kenasen chiya dobong. Isonga, sema esel Afo Chiyos a inki-ngelan cha, mesisi et nagwariy mapteng a panbanagan tod biyag cha. 15Et sema ngo iren bothil a iya-kas cha mapteng a pithek, si-kara ma toon manki-ngel na esel Afo Chiyos, et itanem ched nemnem cha. Anosan chen memati tan a-magen cha man ingkathod gwariy mapteng a panbana-banagan niwa esel cha biyag cha.”

Sema Arig Maypangkep Na Intohan

(Mark 4:21-25)

16Kigwan pay Jesus i “Nagwariy mengepoy na intohan et tangeban to na malokong ono idoong tod katiri, no diket ipa-tok tod kayang say sema iren toon onsekep chiwan, si-nengen chiy silow to. 17Tep emiin a nat iyaybiybiy niman, maybiybiy no sa-ki din akow, tan emiin ngon nat aamtaan niman, maypaamta no sa-ki din akow. 18Isonga, iki-ngeli yon kosto-kosto. Tep sema toon mahaawat a pasiya na inki-ngelan to, ma-choman iwa egwathan to, nem sema eg mahaawat a pasiya, angken sema otik a egwathan to, mepokaw.”

Si Inen Jesus Tan Sema Iren Aahi Ton Daleki

(Matthew 12:46-50; Mark 3:31-35)

19Et si inen Jesus tan sema iren aahi thon daleki, mimothok ired kad-an to, nem nat mebedin a on-esop ired si-katho tep chakel i too. 20Gwariy engowan cha Jesus i “Igwa ires inam tan aahim a kainakgwat cha awas a piyan chaka konon si-nengen.” 21Et insongbat Jesus i “Si inak tan aahik i naengi-ngel na esel Afo Chiyos et naimag cha.”

Intalnen Jesus I Mapkes A Chahem Tan Ekayang A Chalojon

(Matthew 8:23-27; Mark 4:35-41)

22Nonta sa-kin akow, iyankeb-ong si Jesus cha bangka, pati disipolos to, et kigwan tod si-kara i “Onba-sil kiyed ma piig na baybay.” Et dimayat ira. 23Idi mandodogan ira, iyayjo-kowan si Jesus. Biglen pimekes i chahem et emangka-jani ma bangka ra na chanom et chanchanin melned. 24Et bingon iren ma disipolos si Jesus a kigwan cha i “Afo, Afo, chanchanin metiy kiya cha!” Et imakgwat mes Jesus a binilin to ma chahem tan ekayang a chalojon i on-eket. Et biglen simalcheng iwa chahem tan chalojon, et timalna wen emiin. 25Et kigwan Jesus ired ma disipolos to i “Apay nga kolang i pamati yod si-kak?” Et timahot iren iyasdaaw iren pasiya et iyankinowan ira i “Siya emo ja too? Apay nga no on-esel, angken chahem tan chalojon, napiyati ra?”

Sema Dahin I-Gerasa A Iya-janan Na Chakel A Dimonyos

(Matthew 8:28-34; Mark 5:1-20)

26Intoloy iren Jesus a bima-sil chiwa baybay ingkathod mimothok ired sahop a naiyan-iyanan iren ma i-Gerasa a chemang na sahop na Galilee. #8:26 Gerasa Sema ngaran niya dogad cha echom a sola-solat, Gadara ono Gergesa. 27Idi man-eepas si Jesus chiwa bangka, gwariy sa-kin dahin engaspol cha si-kathon edafod ma siyodad na Gerasa a iya-janan na chakel a dimonyos. Ebayag a eg iyanbaro tan eg iyan-iyan cha baliy, no diket cha dohang a iyaybekaan na iyangketiy. 28Idi mita na dahis Jesus, kimeljaw et iyantalimohod cha sangoanan to. Et inpekes toy esel ton kigwan to i “Jesus, Anak Afo Chiyos a Kahejangan, ngoy pekibiyangan mod si-kak? Pangpangaasim, enogak i chiyosa.” 29Kigwan to man tep binilin Jesus iwa dimonyo i on-awas chiwa dahi. Tep eminchakel a iya-janan iwa dahi niwa dimonyo, et angken nabiyantayan iren ma kaidian to tan nakiyadinaan chiy diwa tho tan seki tho, nakiyetchang toy kadina, et nachiyagchag niwa dimonyod dogad a nagwariy toon naiyan-iya-iyan.

30Et inbagen Jesus chiwa dahi i “Siyay ngaran mo?” Insongbat na dahi i “Si Dinibo.” Tep chakel i dimonyos a iyay-ejan cha si-katho. 31Et ekiado-adok ira ma dimonyos cha Jesus i nat pebtik to ired ma echalek a ebot a nagwariy kaysespaan ton kechosaan cha na ingked ingka. 32Iyaytompong a gwariy chakel a kechel a kekinakan chiwa chontog, et iyadok iren ma dimonyos si Jesus i itolok ton onkowan ired ma kechel say may-i-jan ired si-kara. Et intolok iren Jesus. 33Bintihan ma iren ma dimonyos iwa dahi et iyay-ejan ired ma kechel. Et sema ngo iren kechel, iyanbetik ma iren chimalong a iya-kas mala ired ma baybay et iyalned ma ira.

34Sema ngo iren manbanbantay na kechel, idi mita riy epasamak, iyanbetik iren engigwanggwang cha siyodad tan iyay-esop a doga-dogad. 35Et kimowan iriy toon manmatha na epasamak. Idi mimothok ired ma kad-an Jesus, mita ra ma dahin bintihan iren ma dimonyos a mantoktokkong cha sekian Jesus. Ebaroan et imoli wed mapteng a nemnem to. Et timahot ira. 36Sema iren toon eni-neng, ingwanggwang cha wed echom i inpasing Jesus a engipabtik iren ma dimonyos chiwa dahi. 37Et sema emiin a toon edafod sahop na Gerasa, ekiadok ired Jesus i bebtihan to ma sahop cha tep epaladoy tahot cha. Isonga, iyankeb-ong si Jesus chiwa bangka et imoli. 38Sema ngon dahin bintihan iren ma dimonyos, ekiadok cha Jesus i mekiolop koma. Nem inpabtik Jesus a kigwan to i 39“Mapmapteng no onbetik ka et iis-istoriyam a emiin i inpasing Afo Chiyos cha si-kam.” Et iyamtik ma iwa dahi et iyanchalan cha intiron siyodad a engiis-istoriya na inpasing Jesus cha si-katho.

Sema Anak Jairus Tan Sema Biin Mansekit

(Matthew 9:18-26; Mark 5:21-43)

40Idi imoli ches Jesus cha piig na baybay, imimdeng iriy too nonta mita ra tep singsingked chen emiin. 41Gwara ngoy sa-kin toon mimothok a si Jairus i ngaran ton afo na synagog. Iyantalimohod cha sangoanan Jesus, et ekiadok i mekitahin cha baliy to. 42Tep sema sa-sa-kin anak ton biin chanchanin sawal na chegwiy tawen to, emangketiy.

Idi mankokowan si Jesus chiwan, sema iren toon ekitahin, chiyan setseta. 43Gwara ngoy sa-kin biin manbobolos i chala tho na oneg na sawal na chegwen tawen, nem nagwariy mebedin a mengipamapteng. 44Kimowan chiwa benekan Jesus et kiyapkap toy kilig na baro tho. Simalcheng a chakos i chala thon manbobolos. 45Et kigwan Jesus i “Siyay engapkafak?” Nem kigwan chen emiin i “Nat si-kak.” Et kigwan Peter i “Afo, chakel i toon man-aalibongbong cha si-kam a mansasagid cha angel mo.” 46Nem kigwan Jesus i “Ahow, nem gwariy sa-kin engapkafak. Tep diyeknak i imawas i panakabalin ko la.” 47Idi iyamtaan niwa bii i amten Jesus i inpasing to, kimowan cha kad-an ton manbabayedbed, et iyantalimohod chiwa sangoanan to. Et kigwan tod Jesus cha sangoanan na emiin a too i kagol na engapkafan to na baro tho et mimapteng a chakos. 48Et kigwan Jesus i “Anak ko, mimapteng ka wa kagol na pamatim cha si-kak. Taha wa betik et gwariy talned nemnem mo.”

49Idi niyankonen Jesus iwan, gwara ngoy toon mimothok a edafod baliy Jairus a kigwan to i “Enog i tiyaktak itha maistoro tep etiy iwa anak mo.” 50Idi inki-ngelan Jesus iwan, kigwan tod Jairus i “Enog i tahot. Basta pemati ka et onmapteng iwa anak mo.” 51Et idi mimothok si Jesus cha baliy Jairus, eg to intolok a gwariy mekisekep cha si-katho, malaksid si Peter bengat, si John ni James, tan sema awa tan inen ma nga-nga. 52Sema emiin a tothoon gwared man, mannanangis tan manngogngogngog ira kagol niwa nga-nga. Nem kigwan Jesus cha si-kara i “Enog i nangis tep nat etiy iwa nga-nga, manjo-jo-kow bengat.” 53Et ngini-ngi-ngian cha tep amta ra i etiy. 54Nem iyagchian Jesus i diwen ma nga-nga, et inpekes toy esel ton kigwan to i “Anak, bangon ka.” 55Imoli diy ispiriton ma nga-nga et bimangon men chakos. Et kigwan Jesus cha si-kara i pekanen cha. 56Et sema parintis na nga-nga, iyasdaaw iren chili, nem binidin iren Jesus i eg cha igwanggwanggwang cha angken sa-kin too i epasamak.

Currently Selected:

Luke 8: KAR

Highlight

Copy