Si do Aposela ki kera ilidaki 6
6
1Ma sui afa boṉi eki na toa na tha Jesus e toleda keka oro ka oli alaa, uubulu taa la e tae mai i maalutana Ju ki na kera ṉata ana ṉata lana Girisi uria Hibaru ki, sulaania kera luka faekwa ana gwa oru kera ki ana fale la na kera fale ania ifada sulia boṉi. 2Ma akwala ma ro wane eki kera ailia mai malului wane eki na tha Jesus e toleda, keka sorea, E ai si kokoto na miki ekwa ana bae lana tha God, miki ra ana tatafe ni faṉa la ki. 3Mania, doora kera, muki talisia mai fiu nonii wane iamulua, toa na kera ṉata lea sulida, na kera fuṉu atha Spirit Abu ma ana liotooa, miki aluda keki ana asi ra eri. 4Ma ni kamilia miki seemabe ṉado ana foa la, ma ana ra la asi baea eri. 5Ma malului wane eki sui boo kera roṉoa ṉata lada ka lea: ma kera filia mai tha Sitifini, wane ne fuṉu ana fitooa ma tha Spirit Abu, ma tha Filifi, ma tha Porokorasi, ma tha Nikano, ma tha Timona, ma tha Pamenasi, ma tha Nikolasi tee Jenetaele i Adioko na ka ade mala Ju: 6Wane eki kera aluda inaofana aposela ki: ma buriana na kera foa e sui, keka alua abada fafi kera.
7Ma bae lana tha God e baita alaa; ma toa na tha Jesus e toleda kera oro faamau ka oli alaa i Jerusalema; ma toa ooro ka oro ana wane ni foa ki keka ade sulia si do eki na kulu fitoona.
8Ma tha Sitifini, ne fuṉu ana fitooa ma sukwaia, e ilia do baita ni kwele la ania ki ma bala si do ki i maalutana toa eki. 9Sui tei wane ana biu ni ofu la na kera alaṉia ana ofu la Libatine ki, ma ana toa i Saerini, ma toa i Alikisadaria, ma toa i Silisia ma i Asia, kera tae mai, keka oli susuu bia tha Sitifini. 10Ma kesi sukwai ana duu lana liotooa eri ma tha Spirit na nia ṉata mania. 11Sui kera to’oa lole la isana tei wane ki na keka sorea, Kamilia mili roṉo nia e ṉata ni fare toliṉi lana tha Mosesi ma tha God. 12Ma kera faarakeiria toa eki, ma ulunao ki, ma wane ni kekeda ki, ma keka fula isana, keka rau fafi nia, keka tolea i la ofu la eri, 13Keka alua toa na kera lole fafi nia, na kera ṉata mai una eri, Wane nai ṉata taa lana e ai si sui sulia si kula abu nai, ma ṉa lo: 14Uria na mili roṉo nia, e sorea na tha Jesus, wane ba i Nasaretha, kai labatania i kunei, ma kai taala ana biraṉakulua ki na tha Mosesi e falea ifakulua na ba. 15Ma toa eki sui boo na kera ono ana ofu la eri, kera lio tete uri nia, keka rikia maana ’uria sa maana angel.
Currently Selected:
Si do Aposela ki kera ilidaki 6: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951
