GENESIS 15
15
1Buriana si do eki bae lana tha Jihova ka fula mai satha Aberamo ana sii na kera fatai lalaa ania, ka una eri, Osi mau, Aberamo: ni nau ṉa talo oe ma kwaiaraa oe ne baita ka tatha. 2Ma tha Aberamo ka una eri, Arai Lo, God ae, si ta noki falea iaku, uria ni nau ku to bakua e a’i akua ta wela, ma wane nei na nau ku takofale nia asi do na i maafera nau ki na tha Eliisa i Damasikasi? 3Ma tha Aberamo ka una eri, Rikia fasi, ni oe osi falea boo ta kaluwane iaku: ma, lio fasi, wane ne futa mai maafera nau, nai nia, kai tae fuli ani nau. 4Ma, rikia fasi, bae lana tha Jihova ka fula mai isana, ka una eri, Wane nei sa ka tae fuli ani oe e a’i; wane noki kwalafia ana seemu italaamu, ni nia ana na kai tae fuli ani oe. 5Ma nia ka talaia mai thara, ka una eri, Lio fasi si maṉa eri uri thalo lo, oko teemai nia fa bubulu lo ki, soki thaitoomana teemai lada la: ma nia ka una eri isana, Kwalafamu keki oro ’uria fa bubulu eki. 6Ma nia e fitoona tha Jihova; ma ni nia ka alua fitooa eri ifana ’uria kokoto la. 7Ma nia ka una eri isana, Ni nau tha Jihova na ku talai oe mai faisia i A, na fanua toa i Kaladia, fasi kwai falea fanua nei iamu, do oe bonaa neri. 8Ma nia ka una eri, Arai Lo, God ae, nifana ade lana fasi kwai thaitoomana na do nau bonaa neri? 9Ma nia ka soree isana, ṉalia mai tee fa buloka kini ifaku, na do kera tharea sulia ulu fa ṉali, ma tee gota kini, na do kera tharea sulia ulu fa ṉali, ma tee sifi wane, na do kera tharea sulia ulu fa ṉali, ma tee fa bola rafu, ma tee fa kalee bola. 10Ma nia ka ṉalia si do eki sui bana ifana, ka kwa’imusida ana ro kadee do ki ne totoo, ka alua too tee kadee do ka to otofana ruana kadee do nia: ma sui thaaro eki e a’i si kwa’imusida. 11Ma toto thaaro ki kera lofo mai, keka dau fafia do mae eki, tha Aberamo ka tarida keka thaka. 12Ma si maṉa na thato karaṉia kai su, si biṉaa ka kulua fafia tha Aberamo, adedea ka biṉa liu; ma, lio fasi, do kwaifamaui na ṉa maerodo baita ka fula fafi nia. 13Ma ni nia ka soree isatha Aberamo, Oko thaitoomana maalutana si do mamana, nai nia; kwalafaa oe toto keki to ni laea ata fanua na fanua kera e a’i, keki ra ifana toa ana fanua eri; ma toa eki keki suuwanida keki to ana taa la sulia fai taleṉee fa ṉali; 14Ma ni nau toto kwai kwaea toa eki na kera ra ifada: ma iburi keki luu mai faisida fafia ogogonia kera ki na kai baita faamau. 15Ma ni oe oki lae kau ana enenoa uri isana maka oe inao ki mai; oki to ni lea la sulia fa ṉali oro ki, sui keki bii kwaiṉei oe. 16Ma sui, toto ka fula ana faina unii wane, keka bii oli lau mai uria fanua nei: uria na abula lana Amoraete ki asi do na kera lufidaki e a’i si baita si tatha u bana. 17Ma lalae mai, thato e su ma fanua ka rodo naa, rikia fasi si era thasune baita, ma laeta ne tharu na ka tatha imaalutana kadee do ba ki. 18Afa boṉi eri boo tha Jihova e kania alaofua bia tha Aberamo, ka una eri, Ifana kwalafamu ku falea naa fanua nei, ka thafali mai ana kafo na ka lio uri Ijifi, lalae ka fula ana kafo baita eri, na kafo thatana Iupetisi: 19Fanua Kinaete ki, ma Kenisaete ki, ma Kamonaete ki, 20Ma Hitaete ki, ma Perisaete ki, ma Rifeimu ki, 21Ma Amoraete ki, ma Kenanaete ki, ma Gagasaete ki, ma Jebiusaete ki.
Currently Selected:
GENESIS 15: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951
