Jone 21

1Buriana si do eki tha Jesus e fatai nia lau isana toa ne toleda isana amali i Taebiriasi, ma ka fatai nia una eri. 2Toa na kera to ofu na tha Saimona Pita, ma tha Tomasi na kera alaṉia atha Didimasi, bia tha Nathaniala, wane i Kena fanua i Galili, ma ro kaluwane tha Sebede, bia ro wane ki lau ana toa nia ne toleda. 3Tha Saimona Pita e soree isada, Nau kwai lae, kwai de akua. Keka soree isana, Kamilia lau boo miki lae bi oe. Kera lae, keka tae i la foorua si maṉa eri u boo; ma afa rodo eri e ai kesi ṉalia ta si do. 4Sui e laa tatafa, tha Jesus ka takwe sula one: ma toa ne toleda kesi thaitoomana na nia tha Jesus. 5Mania tha Jesus e soree isada, Wela ena ki, amulua ta si do ni ani lana? Kera luua, keka una eri, E ai. 6Ma nia soree isada, Muki ala ana furei ibali aola ana foorua, ma muki fulatoona. Mania kera ala ania, ma si maṉa eri e ai kesi talaana aba lana uria na ia eki e ooro ka oro. 7Mania wane eri na tha Jesus e tolea ma ka liothau ania e soree isatha Pita, Ṉa Lord nena. Mania si maṉa na tha Saimona Pita e roṉoa na nia ṉa Lord, nia ka tooni ana tooni nia (uria ne talu bana), ka fusi ani nia i la amali. 8Ma toa ba ne toleda kera lae mai la kali foorua faekwa (uria ne ai kesi ni da faisia thara, fuliṉana ro taleṉee gwa aaba faisia), keka aba mai furei eri ne fuṉu ana ia. 9Mania si maṉa na kera sifo i thara, keka rikia era ana makeo kula eri, ma ia ki na kera alua iei, ma berede. 10Tha Jesus e soree isada, Muki ṉalia mai tei do ana ia ba ki na mulu dea si maṉa eri. 11Mania tha Saimona Pita e tae, ka aba mai furei eri uri thara, e fuṉu ana ia baita, tee taleṉee do lima tafulu do ulu gwa do: me oro una eri mena, furei e ai si mu. 12Tha Jesus ka soree isada, Lae mai, muki faṉa. Me ai ta wane iada si seeraa fasi kai soetoona, Ma ni oe ni tei? kera thaitoomana boo na nia ṉa Lord. 13Tha Jesus e lae mai, ka ṉalia berede eri, ka falea iada, ma ia ki lau boo. 14Ula naa si maṉa neri na tha Jesus e fatai nia isana toa nia ne toleda, buriana ne tatae faisia toa mae ki.

15Mania buriana na kera faṉa naa, tha Jesus e soree isatha Saimona Pita, Saimona, kaluwane tha Jonasi, o liothau ani nau ka tatha asi do nei ki? Nia e soree isana, Iu, Lord; o thaitoomana na nau ku thathami oe. Ni nia e soree isana, Oko tharea lama nau ki. 16Ruana nia sorea lau isana, Saimona, kaluwane tha Jonasi, oki liothau ani nau? Nia e soree isana, Iu, Lord; o thaitoomana na nau ku thathami oe. Ni nia e soree isana, Oko fono toi kalia sifi nau ki. 17Ula nia ka soree isana, Saimona, kaluwane tha Jonasi, oki thathami nau? Tha Pita liona ka dila uria na nia ula ka soree isana, Oki thathami nau? Ma nia soree isana, Lord, o thaitoomana si do ki sui bana; o thaitoomana na nau ku thathami oe boo. Tha Jesus e soree isana, Oko tharea sifi nau ki. 18Mamana, mamana, ku soree isamu, Si maṉa o bii baita, o ali oe i talaamu, mo lalae ifei no thathamia: sui lalae oko arai naa, oki tekwasia ro aba oe ki, ma ta wane lau kai ali oe, kai ṉali oe uria si kula noki lalakwee lae iei. 19Nia ṉata una eri, ka fatai nia mae la na nia toto kai faainotoa tha God ania. Ma buriana ne sorea si do eri, nia soree isana, Lae mai iburiaku. 20Sui tha Pita e akele, ka rikia wane eri na tha Jesus e liothau ania kai lae mai iburiana; wane eri na bosuli i ruruuna isana fafaṉa i thaulafia ba, ne sorea, Lord, ni tei neri na kai faaalamai oe? 21Mania tha Pita e riki nia, ka soree isatha Jesus, Lord, ma wane nei, ta si ta nia kai ilia? 22Tha Jesus e soree isana, Mada sa ku thathamia kai to maasia si maṉa kwai fula, kai oga oe uria ta? oki lae iburiaku. 23Mania si ṉata eri e thafali i maalutana baree wai doorana, na wane eri ne tolea kai toto ka ai si mae: sui tha Jesus e ai si soree isana, na nia kai toto ka ai si mae; e una eri, Mada sa nau ku thathamia kai to maasia si maṉa kwai fula, kai oga oe uria ta?

24Wane eri boo nai nia na kai faamamanea si do ne thaitoomana sulia si do eki, ma ka keda si do eki, ma kulu thaitoomana faamamane la nia ne mamana.

25Ma tei do oro lau boo kai to bana na tha Jesus e ililia, na mada sa kera keda ka sui, manataku ka sorea na fanua nei iano mena e ai si baita si tala ana buka eki sa kera keda. Emeni.

Currently Selected:

Jone 21: MLU1949

Highlight

Copy