Luke 2
2
1Ma lalae mai afa boṉi eki, tee lo e too atha Sisa, ne inoto ani kera sui, ka lae, fasi toa ana fanua eki sui bana keki keda thatada. 2Kekeda la na kera ilia totonao neri si maṉa na tha Saeriniasi e inoto i Siria. 3Ma toa eki sui boo keka lae uria keda lana thatada, ta wane uria toaa susu nia ni u boo, ma ta wane uria toaa susu nia ni u boo. 4Ma tha Josefa e tae lau boo faisia i Galili, faisia toaa susu i Nasaretha, ka lae uri Judia, uria toaa susu tha Defeta, na kera alaṉia ana Bethelihemo, uria nia wane ana kwalafa ma kulee toa tha Defeta; 5Fasi kai keda thatana bia ni Meri, ai ne ado bi nia, e baita ana wela. 6Ma lalae mai, si maṉa na kera ni kula eri, fa boṉi eki kai sui naa fasi nia kai thare. 7Ma nia ka tharea kaluwane inao nia; ma nia ka kokofia asi maku, ma ka alua ka teo i la do ni faṉa buloka, uria ne ai ta si kula ifada i la biu toa kwaita ki.
8Ma wane ni fono toi la kalia sifi kera ni ana fanua eri lau boo, keki to i la gano, keki fono toi la rodo kalia aini sifi kera. 9Ma rikia fasi, angel tha Lord ka takwe isada, ma laa lana inotoa tha Lord ka sina kakali kera: ma keka mau faamau. 10Ma angel eri ka soree isada, Musi mau; uria rikia fasi, ku ṉalia mai si faaroṉoa lea ana seethathala la faamau ifamulua, si do eri uria toa na fanua ni sui bana: 11Uria amulua tee Wane ni Faamaruki la e futa ibare i la toaa susu tha Defeta, nia ṉa Christ na Lord. 12Ma fafuilala ifamulua nania; Toto muki fulatoona wela aabu eri kera kokofia asi maku, ma kai teo i la do ni faṉa buloka. 13Ma malului wane ana toa oro nai thalo kera fula fatonada, keki to bia angel eri, keki taṉoa tha God, keki una eri, 14Keki fare inoto atha God ne ni asi kula da ia ka tatha,
Ma i fanua nei iano keki falea enenoa i maalutana imole ne lea iana urida.
15Ma lalae mai, si maṉa na angel eki kera lae naa faisida uri thalo, wane eki ni fono toi la kalia sifi keka sorea kwailiu uri kera, Kuki lae si maṉa eri uri Bethelihemo bonaa, ma kuka rikia si do eri ne mamana naa, na tha Lord e faaroṉo kulu ania. 16Ma kera lae fofoa mai, ma keka fulatoona ni Meri ma tha Josefa, ma wela aabu eri kai teo i la do ni faṉa buloka. 17Ma si maṉa na kera rikia naa, keka faaroṉo taliṉei sulia si ṉata ba na kera soree isada sulaania wela eri. 18Ma toa ni sui bana na kera roṉoa keka kwele asi do eki na wane eki ni fono toi la kalia sifi kera faaroṉoda ania. 19Ma ni Meri e beta sulia si ṉata eki sui boo i manatana, kai lalomatoona ana ruruuna. 20Ma wane eki ni fono toi la kalia sifi keka oli nada, keka fare inoto atha God ma keka taṉo nia uria si do eki sui bana na kera roṉoa ma keka rikia mai, ka ’uria boo si do na kera sorea isada.
21Ma si maṉa na kwalu fa boṉi e sui naa uria kwaikakali la ana wela eri thatana keka alaṉia atha JESUS uria na angel eri e alaṉi nia ania si maṉa na thainana e ai si iana u.
22Ma si maṉa na fa boṉi eki ana faafalu lada sulia lo tha Mosesi e sui naa, kera ṉalia uri Jerusalema uria fale lana ifatha Lord. 23(’Uria na kera keda ana lo tha Lord, Do wane ni sui bana na kai ifinia oonikale keki alaṉia ana do abu ifatha Lord), 24Ma uria fale lana do ni foa la ka ’uria si do na kera sorea ana lo tha Lord, Ro bola mela na kera ofuda, mado ta ro kalee bola. 25Ma rikia fasi, tee nonii wane e to i Jerusalema, thatana tha Simiona; ma wane eri e kokoto ma ka faabaita tha God, kai maasia faainamaruki lana Isirela: ma tha Spirit Abu e to fafi nia. 26Ma kera faaroṉo nia atha Spirit Abu, na nia ka ai si thaitoomana maea, si maṉa ne ai si rikia u ṉa Christ, Wane tha Lord. 27Ma nia e lae mai atha Spirit uri la biu baita tha God: ma si maṉa na maka nia ma thainana kero kotho fafia kali wela eri na tha Jesus, fasi keki ilia si do ki ani nia sulia biraṉana ṉa lo, 28Si maṉa eri nia ṉalia, ka olia, ma ka taṉoa tha God, ka sorea,
29Lord, oki alamatania naa wane ni ra oe kai lae
Ana enenoa, ka ’uria bae lamu na ba;
30Uria na ku rikia naa marukia oe ana maaku,
31No thauwai nia ka kwaimaakwali naa inaona maana kulee toa ni sui bana;
32Ṉa laafa na kai fula fatai ifana Jenetaele ki,
Ma inotoa toa oe Isirela.
33Ma tha Josefa ma thainana keko kwele bada asi do eki na kera sorea suli nia; 34Ma tha Simiona ka falea lea la ifada, ma ka soree isana thainana na ni Meri, Rikia fasi, wela nei kera alua fasi toa oro keki asi kera ania ma uria tatae lana toa oro ana toa nai Isirela; ma uria fafuilala na keki ṉata taa seena; 35Iu ma ta nini ni firu toto kai ruu ana maṉomu; fasi keki fatai nia si lio ni manatana toa oro. 36Ma tee ai na ni Ana, porofeta kini, thari tha Fanuela ana kulee toa tha Asa (nia kukue okaoka naa, e thari, sui ka to isana kwaina sulia fiu fa ṉali, 37Sui ka oru sulia kwalu tafulu fa ṉali ma fai fa ṉali), ne ai si lae faisia biu baita eri, ka ra ana abu la ana faṉa ma foa la ki afa rodo mafa thato. 38Ma nia ka fula asi kadee maṉa eri boo, ka sore lea lau boo talea tha Lord, ma ka ṉata suli nia isana toa eki sui boo na keki maakwalia tae la faisida i Jerusalema. 39Ma iburiana na kera faasuia naa si do ki sui bana ne lae sulaania ṉa lo tha Lord, kera oli uri Galili, uria toaa susu kera ni u boo i Nasaretha.
40Ma wela eri ka baita alaa, ma spirit nia ka sukwai alaa, ma liona ka too faamau: ma lea la tha God e to fafi nia.
41Ma maka nia ma thainana kero lae ṉado sulia fa ṉali ki uri Jerusalema si maṉa ana fuliṉana fafaṉa tathafafi la. 42Ma si maṉa na tafulu fa ṉali ma ro fa ṉali e sui ani nia, keka tae uri Jerusalema sulia biraṉada ana fafaṉa eri; 43Ma si maṉa na kera faasuia fa boṉi eki, si maṉa na keki oli ada, kali wela eri tha Jesus ka to u mana i Jerusalema; ma tha Josefa ma thainana kesi thaitoomana; 44Ma uria na manatade soso ni ana lae ofua eri, keka lae ana laea ne talaana tee fa thato; sui keka rofe uri nia isana ina lada ki bia toa na kera thaitoomada: 45Ma si maṉa na kesi fulatoona, keki oli uri Jerusalema, keki rofe badaroa uria. 46Ma lalae mai ulu fa boṉi e sui, keka bii fulatoona i la biu baita tha God, kai ono i maalutana toa ni kwaifamanatai, kai roṉoa ṉata lada, bia kai soetooda uria maalutana si do ki: 47Ma toa eki sui boo na kera roṉoa ṉata lana keka tona ana manata kali lana ma si do ne luuda ania. 48Ma si maṉa na kero riki nia keko kwele: ma thainana ka soree isana, Kaluwane nau, uria ta no ade una eri iamarea? rikia fasi, maka oe fai nau mere rorofe oe ana liodila la. 49Ma nia ka soree isadaroa, Nifana ade lana moka rorofe nau? mosi thaitoomana nau kwai oga asi do sulia Maka nau e ai si ei boo? 50Me ai kesi thaitoomana maalutana si ṉata eri na nia soree isadaroa. 51Ma nia sifo bida, ka fula i Nasaretha; ma nia ka roo sulidaroa: ma thainana ka beta sulia si ṉata eki sui boo i ruruuna.
52Ma tha Jesus ka baita alaa ana liotooa ma seena, ma tha God ma imole kera ala fafi nia ka lalae bana.
Currently Selected:
Luke 2: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951
