ꤗꤢꤞꤢꤧ 21
21
ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤗ꤫ꤢ꤬ꤘꤢꤦ꤬ ꤗꤢꤩ꤬ꤏꤤꤛꤢ꤬ ꤣꤧ꤭ ꤟꤢꤧ꤭ꤔꤥ꤭ ꤘꤣ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬
(ꤗꤢ꤬ꤊꤢꤨ ꤁꤁:꤁-꤁꤁, ꤜꤢꤨꤊꤢ꤬ ꤁꤉:꤂꤈-꤃꤈, ꤛꤥ꤭ꤟꤢ꤬ ꤁꤂:꤁꤂-꤁꤉)
1ꤙꤣꤧ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤔꤢꤧ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤟꤢꤧ꤭ꤖꤢꤦ꤬ꤟꤣꤧ ꤔꤢꤧ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤟꤢꤧ꤭ꤒ꤫ꤥ꤬ ꤜꤢ꤭ꤋꤢꤧ꤭ ꤘꤣ ꤘꤢꤪ꤭ꤙꤢꤧꤞꤢ꤬ꤖꤢ꤬ꤊꤢꤩ꤬ ꤘꤣ ꤢ꤬ ꤥ꤬ ꤙꤣꤧ ꤢꤪꤜꤤꤠꤢ꤬ꤏꤥ꤬ꤋꤢꤨ꤬ ꤔꤣꤧ꤬꤯ ꤛꤢꤩ꤬ꤏꤛꤢꤨ ꤔꤢꤪ꤭ꤟꤢꤧ꤭ ꤚ꤫ꤣꤧ꤬ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤞꤤꤔꤣꤧ꤭ ꤚꤣꤧ꤬ ꤢ꤬ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, 2“ꤟꤢꤧ꤭ꤔꤥ꤭ ꤚ꤫ꤣꤧ꤬ ꤜꤢ꤭ꤋꤢꤧ꤭ ꤘꤢꤪ꤭ ꤘꤣ ꤑꤢꤩ꤭ꤔꤣꤧ꤬ ꤒꤣ꤬ꤘꤢꤪ꤭, ꤞꤤ꤭ ꤟꤢꤧ꤭ ꤔꤥ꤭ꤔꤥ꤭ ꤔꤢꤧ ꤞꤤ꤭ ꤊ꤫ꤢꤦ꤬ ꤗꤢꤧꤓ꤫ꤣꤧ꤬ ꤢꤨ꤭ ꤡꤢꤪ꤭ꤊꤜꤢꤪ꤬ꤥ꤬ ꤗꤢꤧ꤬ꤢꤪꤜ꤫ꤢꤧ꤬ꤗ꤫ꤥ꤬ ꤒꤣ꤬ꤘꤥ꤭ ꤔꤢꤧ ꤢ꤬ꤖꤢꤨꤕꤣꤧ꤬ꤒꤤꤟꤢꤨ ꤥ꤬ꤒ꤫ꤣ꤬ꤊꤣꤧ꤭ꤔꤢꤧ ꤜꤢꤨ꤭ ꤙꤣꤧꤔꤣꤧ꤬ ꤒꤣ꤬ꤘꤥ꤭ ꤕꤢ꤭꤯ ꤏꤤ꤬ꤜꤥ ꤢ꤬ ꤚꤣꤧ꤬ ꤡꤝꤤ꤬ꤊꤢ꤬ꤜꤢꤪ꤭ ꤘꤣ ꤠꤢꤧ꤭ꤥ꤬ꤣꤧ꤭꤯ 3ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤊꤢꤩ꤬ ꤟꤢꤩ ꤞꤤ꤭ ꤒꤣ꤬ꤡꤣ꤬ꤡꤣ꤬ ꤟꤢꤩꤚꤣꤧ꤬, ꤟꤢꤩꤏꤥ꤬ꤜꤥ꤭ ꤕ꤫ꤢꤩ꤬ ꤜꤢꤨ꤭ ꤔꤢꤧ ꤙꤢꤧ꤬ꤡꤢꤩ꤬ ꤜ꤫ꤥ꤬ ꤛꤢꤩ꤬ꤞꤤ꤭ ꤟꤢꤩꤟꤢꤨꤔꤣꤧ꤬, ꤞꤤ꤭ ꤊꤢꤩ꤬ ꤟꤢꤩ ꤟꤢꤨꤔꤣꤧ꤬ꤗꤢ꤬ ꤢ꤬ ꤕꤜꤝꤢ꤭ꤊꤢ꤬ ꤞꤤ꤭ ꤒꤣ꤬ꤖꤥ ꤕꤜꤝꤢ꤭ꤊꤢ꤬ ꤡꤣꤧ꤯”
4ꤒꤢꤩ꤬ꤣꤧ꤭ꤔꤣꤧ꤬ ꤢ꤬ ꤊ꤫ꤢꤦ꤬ ꤗꤢꤩ꤬ꤜꤣꤙꤢ꤭ꤓꤢꤧ꤬ ꤖꤚꤢꤩ꤬ꤖꤚꤥ꤬ ꤢ꤬ ꤒꤢꤩ꤬ꤟꤢꤩꤥ꤬ꤔꤢꤩ꤬ ꤔꤢꤧ,
5“ꤟꤢꤩꤏꤥ꤬ꤜꤥ꤭ ꤕ꤫ꤢꤩ꤬ ꤠꤤ꤭ꤞꤤꤥ꤬ꤖꤢꤨ ꤒꤣꤧ꤬ꤟꤢꤩ꤬ ꤔꤢꤧ, ‘ꤗꤢꤧꤗꤣꤧ꤭ ꤜꤢ꤭ꤋꤢꤧ꤭, ꤞꤤ꤭ ꤋꤝꤤꤡꤢꤪꤖꤢꤧ꤬ ꤟꤢꤧ꤭ ꤘꤣ ꤞꤤ꤭ ꤥ꤬ ꤟꤣꤧ꤯ ꤢ꤬ ꤗꤢ꤬ ꤢ꤬ ꤞꤤꤘꤥ꤭ꤞꤤꤍꤢ꤬ ꤚꤣꤧ꤬ ꤢ꤬ ꤘꤢꤧ ꤟꤢꤧ꤭ꤔ꤫ꤤ꤬ ꤗꤢꤧ꤬ꤢꤪꤜ꤫ꤢꤧ꤬ ꤚꤣꤧ꤬ ꤢ꤬ ꤘꤢꤧ ꤟꤢꤧ꤭ ꤘꤣ ꤢ꤬ꤖꤢꤨꤕꤣꤧ꤬ꤒꤤ ꤒꤣ꤬ꤘꤥ꤭꤯’”#ꤛꤢ꤬ꤏꤛꤢꤛꤢ꤬ ꤆꤂:꤁꤁, ꤞꤣ꤬ꤋꤢ꤬ꤚꤣ꤬ꤛꤢ꤬ ꤉:꤉
6ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤣꤧ꤭ꤞꤤꤔꤣꤧ꤭ ꤡꤝꤢꤗꤢꤩ꤬ ꤟꤢꤨ ꤢ꤬ ꤟꤢꤩꤚꤣꤧ ꤛꤢꤩ꤬ꤞꤤ꤭ ꤔꤣꤧ꤬꤯ 7ꤛꤢꤩ꤬ꤞꤤ꤭ ꤡꤝꤤ꤬ꤊꤢ꤬ꤔ꤫ꤤ꤬ ꤗꤢꤧ꤬ꤢꤪꤜ꤫ꤢꤧ꤬ꤗ꤫ꤥ꤬ ꤔꤢꤧ ꤢ꤬ꤖꤢꤨ ꤚꤣꤧ꤬ ꤛꤢꤩ꤬ꤞꤤ꤭ ꤘꤢꤩꤓꤢꤧ꤬ ꤜꤢ꤭ꤋꤢꤧ꤭ ꤢ꤬ꤡꤢ꤬ꤊꤜꤢꤪ꤭ ꤘꤣ ꤗꤢꤧ꤬ꤢꤪꤜ꤫ꤢꤧ꤬ ꤣꤧ꤭ꤒꤣꤧ꤬ꤟꤢꤩ꤬ ꤢ꤬ꤍ꤫ꤢꤧ꤬ꤋꤢꤨ꤬ ꤚꤣꤧ꤬ ꤙꤢꤧ꤬ꤡꤢꤩ꤬ ꤓꤢꤧ꤬ꤥ꤬ꤔꤢꤧ꤭ ꤙꤣꤧꤔꤣꤧ꤬꤯ 8ꤊꤣꤧ꤬ꤛꤢꤧ꤭ ꤙꤢꤩꤗꤢꤨ꤬ꤘꤢꤨ꤬ ꤣꤧ꤭ꤒꤣꤧ꤬ꤟꤢꤩ꤬ ꤘꤢꤩꤒꤢ꤭ ꤜꤢ꤭ꤋꤢꤧ꤭ ꤢ꤬ꤡꤢ꤬ꤊꤜꤢꤪ꤭ ꤒꤣꤧ꤬ꤟꤢꤩ꤬ ꤘꤣ ꤊꤜꤢꤧꤘꤢꤩ꤭ꤊꤢꤨ꤭꤯ ꤒꤣꤧ꤬ꤟꤢꤩ꤬ꤟꤢꤩ꤬ꤚꤣꤧ꤬ ꤢ꤬ ꤊ꤫ꤢꤩ꤬ꤒꤢ꤭ ꤜꤢ꤭ꤋꤢꤧ꤭ ꤞꤢꤪ꤬ꤖꤢꤧ꤭ꤟꤢꤨ ꤒꤣꤧ꤬ꤟꤢꤩ꤬ ꤚꤣꤧ꤬ ꤘꤢꤩꤒꤢ꤭ ꤘꤣ ꤊꤜꤢꤧꤘꤢꤩ꤭ꤊꤢꤨ꤭꤯ 9ꤊꤣꤧ꤬ꤛꤢꤧ꤭ ꤡꤝꤢ ꤚ꤫ꤣꤧ꤬ ꤘꤣ ꤙꤢꤧ꤬ꤡꤢꤩ꤬ ꤢ꤬ꤙꤢꤩꤑꤢꤩ꤭ ꤒꤣ꤬ꤕꤜꤢꤨ꤬ꤒꤣ꤬ꤖꤢꤩ꤬, ꤢ꤬ ꤋꤚꤝꤢ꤭ꤊꤣꤧ꤭ ꤘꤣꤋꤛꤢ꤭ ꤒꤣ꤬ꤕꤜꤢꤨ꤬ꤒꤣ꤬ꤖꤢꤩ꤬ ꤚꤣꤧ꤬ ꤢ꤬ ꤢꤩꤓꤥ꤭ ꤜꤢ꤭ꤋꤢꤧ꤭ ꤔꤢꤧ,
“ꤟꤥ꤬ꤎꤢꤧꤔꤢ꤬, ꤓꤢꤨ꤬ꤞꤢꤩꤓꤢꤧ꤬ ꤜꤢ꤭ꤋꤢꤧ꤭ ꤋꤝꤤꤘꤢ꤬ꤠꤤ꤬ ꤢ꤬ꤖꤢꤨꤖꤚꤢꤩ꤬ꤋꤢꤨ꤭꤯”
“ꤙꤢꤧ꤬ꤡꤢꤩ꤬ ꤘꤣ ꤢ꤬ ꤟꤢꤧ꤭ ꤔꤢꤧ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤗꤝꤤ꤭ꤣꤧ꤭ ꤒꤣ꤬ꤖꤚꤢꤩ꤬ꤔꤣꤧ꤬, ꤒꤢꤩ꤬ꤏꤢꤪ꤭ꤚꤤ꤬ ꤊ꤫ꤢꤦ꤬ ꤜꤢꤧ꤬ꤙꤢꤩ꤬ꤘꤢꤦ꤬ ꤢ꤬ ꤔꤤ꤮”#ꤓꤢꤨ꤬ꤞꤢꤩꤓꤢꤧ꤬ ꤁꤁꤈:꤂꤅-꤂꤆
“ꤟꤥ꤬ꤎꤢꤧꤔꤢ꤬, ꤓꤢꤨ꤬ꤞꤢꤩꤓꤢꤧ꤬ ꤜꤢ꤭ꤋꤢꤧ꤭ ꤡꤢꤪꤗꤣꤧ꤬ꤚꤢꤧ꤬ ꤘꤣ ꤢ꤬ ꤥ꤬ ꤘꤣ ꤗꤢꤪꤋꤢꤨ꤬ ꤢ꤬ꤜ꤫ꤢꤩ꤬ꤥ꤬ ꤓꤢꤧ꤬ꤜꤥ꤭ꤜꤣ ꤣꤧ꤭ꤒꤣ꤬ꤖꤚꤢꤩ꤬꤯”
10ꤙꤣꤧ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤔꤥ꤭ ꤘꤣ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬ ꤢ꤬ꤋꤢꤩ꤭ꤔꤣꤧ꤬, ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬ꤖꤢꤨ ꤒꤣ꤬ꤠꤤ꤭ꤜꤢꤪ꤭ ꤞꤤꤕꤜꤢꤪ꤬ ꤒꤣꤧ꤬ꤕ꤫ꤢꤦ꤬ꤊꤣꤧ꤬ꤛ꤫ꤢꤪ꤬ ꤜꤢꤪ꤭ꤕꤜꤤ꤭ ꤚꤣꤧ꤬ ꤛꤢꤩ꤬ꤞꤤ꤭ ꤘꤣꤧꤟꤣꤧ꤭ ꤔꤢꤧ, “ꤢ꤬ ꤗꤢ꤬ ꤢꤨ꤭ꤕꤢꤩ꤭?”
11ꤊꤣꤧ꤬ꤛꤢꤧ꤭ ꤙꤢꤩꤗꤢꤨ꤬ꤣꤧ꤭ ꤟꤢꤩꤏꤢꤦ꤬ ꤔꤢꤧ, “ꤢ꤬ ꤗꤢ꤬ ꤛꤢꤩ꤬ꤏꤛꤢꤨ꤯ ꤢ꤬ ꤗꤢ꤬ ꤖꤚꤢꤩ꤬ꤖꤚꤥ꤬ ꤘꤣ ꤢ꤬ ꤥ꤬ ꤘꤣ ꤊꤢꤧꤜꤢ꤬ꤜꤤ꤬ꤊ꤫ꤢꤩ꤬, ꤔꤢ꤬ꤎꤢ꤬ꤚꤢꤧ ꤠꤤ꤭ꤔꤣꤧ꤬ ꤒꤣ꤬ꤖꤚꤢꤩ꤬꤯”
ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤟꤢꤧ꤭ꤔꤥ꤭ ꤘꤣ ꤒꤢꤩ꤬ꤜꤢꤨ꤭ꤒꤢꤧ꤭ꤟꤥ꤭
(ꤗꤢ꤬ꤊꤢꤨ ꤁꤁:꤁꤅-꤁꤉, ꤜꤢꤨꤊꤢ꤬ ꤁꤉:꤄꤅-꤄꤈, ꤛꤥ꤭ꤟꤢ꤬ ꤂:꤁꤃-꤂꤂)
12ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤡꤝꤢꤔꤥ꤭ ꤘꤣ ꤒꤢꤩ꤬ꤜꤢꤨ꤭ꤒꤢꤧ꤭ ꤟꤥ꤭ꤊꤢꤨ꤭ ꤚꤣꤧ꤬ ꤢ꤬ ꤡꤝꤢꤔꤥ꤭ ꤠ꤫ꤢꤩ꤬ꤓꤢꤩ꤬ꤊꤢꤧ꤭ ꤜꤢꤪ꤭ ꤜꤢꤪ꤭ ꤊꤣꤧ꤬ꤛꤢꤧ꤭ ꤤ꤬ꤖꤚꤤ꤬ꤤ꤬ꤏꤢꤩ꤭ꤒꤢꤩ꤬ ꤙꤣꤧꤔꤣꤧ꤬ ꤒꤣꤧ꤬ꤟꤢꤩ꤬ ꤚꤣꤧ꤬ ꤢ꤬ ꤔꤥ꤭ꤓꤢꤨ꤬ ꤜꤣꤧ꤬ꤊꤜꤢꤪ꤭ꤒꤢ꤭ꤊꤢꤧ꤭ ꤜꤢꤪ꤭ ꤢꤨ꤭ ꤜ꤫ꤢꤩ꤬ꤓꤢꤨ꤬ꤜꤢꤧ꤬ ꤚꤢꤦ꤭#21:12 ꤊꤣꤧ꤬ꤛꤢꤧ꤭ ꤥ꤬ ꤘꤣ ꤓꤣꤧ꤭ꤊ꤫ꤢꤩ꤬ ꤢ꤬ꤚꤥ꤬ ꤟꤢꤧ꤭ ꤘꤣ ꤒꤢꤩ꤬ꤜꤢꤨ꤭ꤒꤢꤧ꤭ꤟꤥ꤭ ꤚꤣꤧ꤬ ꤢ꤬ ꤟꤢꤧ꤭ꤓꤢꤨ꤬ꤜꤢꤧ꤬ ꤜꤢ꤭ꤋꤢꤧ꤭ ꤢ꤬ꤚꤢꤦ꤭ ꤔꤢꤧ ꤒꤢꤩ꤬ꤜꤢꤨ꤭ꤒꤢꤧ꤭ꤟꤥ꤭ ꤚꤢꤦ꤭ ꤞꤢꤧꤟꤢꤨ ꤛꤢꤩ꤬ꤞꤤ꤭ ꤊ꤫ꤢꤦ꤬ ꤤ꤬ꤖꤚꤤ꤬ ꤜꤢ꤭ꤋꤢꤧ꤭ ꤔꤢꤧ ꤒꤢꤩ꤬ꤖꤢꤨꤒꤢꤩ꤬ꤜꤣꤧ꤬ ꤘꤣ ꤊ꤫ꤢꤦ꤬ ꤗꤢꤩ꤬ꤜꤢꤨ꤭ꤓꤢꤧ꤬ ꤢ꤬ꤑꤢꤩ꤭꤯ ꤖꤚꤢꤩ꤬ꤓꤢꤨ꤬ꤜꤢꤧ꤬ ꤚꤢꤦ꤭ ꤒꤣꤧ꤬ꤟꤢꤩ꤬ꤔꤣꤧ꤬, ꤞꤢꤧꤟꤢꤨ ꤊ꤫ꤢꤦ꤬ ꤔ꤫ꤤ꤬ꤙꤢꤩ꤬ ꤢꤩꤚꤢꤦ꤭ ꤚꤣꤧ꤬ ꤢ꤬ ꤗꤢꤧꤕꤢꤨ꤭ꤗꤢꤩ꤬ꤢꤩ꤬ ꤢꤨ꤭ꤋꤢꤨ꤬꤯ ꤢ꤬ ꤘꤤ꤭ꤚ꤫ꤢꤩ꤬ꤓꤢꤧ꤬ꤜꤥ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤔꤢꤧ ꤊꤢꤨ꤬ꤊꤜꤢꤧꤓꤢꤧ꤬ꤜꤥ꤭ ꤘꤣ ꤢꤨ꤭ ꤜ꤫ꤢꤩ꤬ꤥ꤬ꤔꤢꤧ꤭ ꤤ꤬ꤏꤢꤩ꤭ ꤔꤢꤧ ꤓꤢꤨ꤬ꤜꤝ꤫ꤤ꤬#21:12 ꤊꤣꤧ꤬ꤛꤢꤧ꤭ ꤒꤣꤧ꤬ꤟꤢꤩ꤬ꤔꤣꤧ꤬ ꤤ꤬ꤖꤚꤤ꤬ ꤜꤢ꤭ꤋꤢꤧ꤭ ꤓꤢꤨ꤬ꤜꤝ꤫ꤤ꤬ ꤔꤢꤧ ꤞꤤꤗꤤ꤬ ꤘꤣ ꤢ꤬ ꤊ꤫ꤢꤦ꤬ ꤗꤢꤩ꤬ꤜꤢꤨ꤭ꤓꤢꤧ꤬ ꤢ꤬ꤑꤢꤩ꤭ ꤖꤢꤧ꤯ ꤔꤣꤧ꤬ꤒꤣꤧ꤬ꤟꤢꤩ꤬꤯ 13ꤓꤥ꤭ꤚꤣꤧ꤬ ꤢ꤬ ꤟꤢꤩ ꤔꤢꤧ, “ꤜꤤ꤬ꤓꤢꤩ꤭ꤞꤢꤪ꤬ꤖꤢꤊꤢꤨ꤭ ꤟꤢꤩ ꤔꤢꤧ, ‘ꤠꤢꤧ꤭ꤟꤤ꤬ ꤗꤢ꤬ ꤢꤨ꤭ ꤊ꤫ꤢꤦ꤬ ꤢꤩ ꤔꤢꤧ ꤒꤢꤩ꤬ꤡꤢꤪꤙꤢꤩ꤭ ꤢ꤬ꤟꤤ꤬,’ ꤗꤢ꤬ꤔꤢꤧꤚꤣꤧ꤬ ꤞꤤ꤭ ꤡꤝꤢ ꤔꤢꤪ꤭ꤓꤝꤢ꤭ ꤜꤢꤪ꤭ꤟꤣꤧ ꤠꤢꤧ꤭ꤖꤢꤩ꤭ ꤢ꤬ꤟꤤ꤬ ꤔꤢꤧ ‘ꤖꤚꤢꤩ꤬ꤢꤩ꤬ꤟꤥ꤬ꤢꤩ꤬ꤟꤤ ꤜ꤫ꤢꤩ꤬ꤥ꤬ꤠꤢꤥ꤬ ꤢ꤬ꤜ꤫ꤢꤩ꤬ꤥ꤬ ꤟꤣꤧ꤯’”#ꤛꤢ꤬ꤏꤛꤢꤛꤢ꤬ ꤅꤆:꤇, ꤡꤛꤣ꤬ꤚꤢ꤬ꤗꤤꤛꤣ꤬ ꤇:꤁꤁
14ꤊꤣꤧ꤬ꤛꤢꤧ꤭ ꤕꤣꤧꤞꤢꤩ꤬ꤋꤤ ꤋꤢꤧꤘꤥ꤬ꤘꤢ ꤒꤣꤧ꤬ꤟꤢꤩ꤬ ꤟꤢꤧ꤭ꤔꤥ꤭ꤒꤥ꤭ ꤊꤣꤧ꤭ꤜꤢꤪ꤭ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤘꤣ ꤒꤢꤩ꤬ꤜꤢꤨ꤭ꤒꤢꤧ꤭ ꤟꤥ꤭ꤊꤢꤨ꤭, ꤚꤣꤧ꤬ ꤢ꤬ ꤛ꤫ꤢꤧ꤬ꤥ꤬ꤗ꤫ꤢꤩ꤬ ꤜꤢꤪ꤭ ꤕ꤫ꤢꤩ꤬ ꤛꤢꤩ꤬ꤞꤤ꤭꤯ 15ꤗꤢ꤬ꤔꤢꤧꤚꤣꤧ꤬ ꤙꤣꤧ ꤖꤚꤢꤩ꤬ꤜꤢꤨ꤭ꤒꤢꤧ꤭ ꤊꤢꤨ꤬ꤊꤜꤢꤪꤊꤢꤨ꤬ꤊꤜꤢꤧ꤭ ꤒꤣꤧ꤬ꤟꤢꤩ꤬ ꤔꤢꤧ ꤖꤚꤢꤩ꤬ꤤ꤬ꤞꤝꤢ ꤒꤢꤩ꤬ꤞꤝꤢꤒꤢꤩ꤬ꤞꤢꤧ꤬ ꤢ꤬ꤞꤢꤚꤢ ꤒꤣꤧ꤬ꤟꤢꤩ꤬ ꤗꤢꤧꤓ꤫ꤣꤧ꤬ꤟꤣꤧ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤗꤢꤩ꤬ ꤒꤢꤩ꤬ꤋꤥꤒꤣꤧ꤬ꤊꤜꤤ ꤒꤣꤧ꤬ꤟꤢꤩ꤬ ꤓꤥ꤭ꤚꤣꤧ꤬ ꤢ꤬ ꤗꤢꤧꤓ꤫ꤣꤧ꤬ ꤔꤢꤧ ꤖꤢꤨꤡ꤫ꤢꤩ꤬ꤟꤢꤨ ꤒꤣꤧ꤬ꤟꤢꤩ꤬ ꤢꤩꤓꤥ꤭ꤓꤢꤧ꤬ ꤜꤢ꤭ꤋꤢꤧ꤭ ꤔꤢꤧ, “ꤟꤥ꤬ꤎꤢꤧꤔꤢ꤬, ꤓꤢꤨ꤬ꤞꤢꤩꤓꤢꤧ꤬ ꤋꤝꤤꤘꤢ꤬ꤠꤤ꤬ ꤢ꤬ꤖꤢꤨꤖꤚꤢꤩ꤬ꤋꤢꤨ꤭,” ꤘꤣ ꤒꤢꤩ꤬ꤜꤢꤨ꤭ꤒꤢꤧ꤭ ꤟꤥ꤭ꤊꤢꤨ꤭ ꤢ꤬ꤋꤢꤩ꤭ꤔꤣꤧ꤬, ꤛꤢꤩ꤬ꤞꤤ꤭ ꤞꤤꤕꤜꤢꤪ꤬ꤘꤢꤨ꤬ ꤊꤣꤧ꤬ꤔꤥ꤮ ꤒꤥ꤬꤯
16ꤛꤢꤩ꤬ꤞꤤ꤭ ꤘꤣꤧꤟꤣꤧ꤭ ꤙꤢꤧ꤬ꤡꤢꤩ꤬ ꤔꤢꤧ, “ꤖꤢꤨꤡ꤫ꤢꤩ꤬ꤟꤢꤨ ꤞꤤ꤭ꤒꤣꤧ꤬ꤟꤢꤩ꤬ ꤢꤩꤓꤥ꤭ ꤔꤣꤧ꤬ꤗꤢ꤬ ꤔꤢꤧ꤬ ꤔ꤫ꤤ꤬ꤟꤥ꤭ ꤟꤢꤧ꤭?”
ꤚꤣꤧ꤬ ꤙꤢꤧ꤬ꤡꤢꤩ꤬ ꤟꤢꤩꤏꤢꤦ꤬ ꤛꤢꤩ꤬ꤞꤤ꤭ ꤔꤢꤧ, “ꤢꤪ꤬, ꤠꤢꤧ꤭ ꤔ꤫ꤤ꤬ꤟꤥ꤭ ꤠꤢ꤮, ꤜꤤ꤬ꤓꤢꤩ꤭ꤞꤢꤪ꤬ꤖꤢꤊꤢꤨ꤭ ꤟꤢꤩ ꤔꤢꤧ,
‘ꤖꤢꤨꤡ꤫ꤢꤩ꤬ꤟꤢꤨ ꤞꤤ꤭ꤒꤣꤧ꤬ꤟꤢꤩ꤬ ꤔꤢꤧ ꤖꤢꤨꤡ꤫ꤢꤩ꤬ꤟꤢꤨ ꤘꤣ ꤢ꤬ ꤤ꤬ꤔꤢꤨꤕꤢ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤔꤢꤧ꤬ ꤊ꤫ꤢꤦ꤬ ꤔꤢꤪ꤭ꤓꤢꤨ꤬ꤞꤢꤩꤓꤢꤧ꤬ ꤛꤢꤩ꤬ꤞꤤ꤭ ꤕꤢ꤭,’ ꤢ꤬ ꤟꤢꤩ ꤟꤢꤨꤔꤣꤧ꤬ ꤗꤢ꤬ ꤞꤤ꤭ ꤘꤢꤧꤔꤢꤪ ꤊꤣꤧ꤭ꤔꤢꤧ꤭ ꤢꤨ꤭ ꤒꤥ꤬ ꤟꤢꤧ꤭?”#ꤓꤢꤨ꤬ꤞꤢꤩꤓꤢꤧ꤬ ꤈:꤂
17ꤓꤥ꤭ꤚꤣꤧ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤓꤢꤩ꤬ꤡꤝꤢꤊꤢꤧ꤭ ꤘꤣ ꤘꤢꤪ꤭ꤙꤢꤩ꤬ꤞꤢ꤬ꤔꤤ ꤚꤣꤧ꤬ ꤢ꤬ ꤡꤝꤢ ꤥ꤬ꤗꤣꤧ꤭ꤥ꤬ ꤙꤣꤧꤔꤣꤧ꤬꤯
ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤔꤢꤪ꤭ꤋꤚꤢ꤭ ꤞꤣꤧ꤭ꤊꤢꤧ꤭ ꤊꤣꤧ꤬ꤘꤝꤤꤗ꤫ꤢꤪ꤬ ꤒꤣ꤬ꤗ꤫ꤢꤪ꤬
(ꤗꤢ꤬ꤊꤢꤨ ꤁꤁:꤁꤂-꤁꤄, ꤁꤁:꤂꤀-꤂꤄)
18ꤢ꤬ꤔꤥ꤬ꤒꤣ꤬ꤚꤥ꤭ ꤙꤣꤧ ꤗ꤫ꤢꤪ꤬ꤜꤤ꤭ ꤚꤥ꤬ꤗꤢꤦ ꤢ꤬ꤋꤢꤩ꤭ꤔꤣꤧ꤬, ꤙꤢꤧ꤬ꤡꤢꤩ꤬ ꤔꤢꤧ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤊꤢ꤬ꤋꤛꤢ꤭ ꤋꤛꤢ꤭ꤞꤢꤧ ꤘꤣ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬, ꤚꤣꤧ꤬ ꤙꤣꤧ ꤛꤢꤩ꤬ꤞꤤ꤭ ꤊꤢ꤬ ꤘꤣ ꤊꤜꤢꤧꤜꤥ꤬ ꤢ꤬ꤋꤢꤩ꤭, ꤛꤢꤩ꤬ꤏꤛꤢꤨ ꤞꤤꤢꤩ꤬ ꤘꤤ꤭꤯ 19ꤚꤣꤧ꤬ ꤛꤢꤩ꤬ꤏꤛꤢꤨ ꤗꤢꤧꤓ꤫ꤣꤧ꤬ ꤊꤣꤧ꤬ꤘꤝꤤꤗ꤫ꤢꤪ꤬ ꤒꤣ꤬ꤞꤢꤪ꤬ ꤥ꤬ ꤘꤣ ꤊꤜꤢꤧꤓꤢꤦ꤭ ꤚꤣꤧ꤬ ꤢ꤬ ꤡꤝꤢ ꤒꤥ꤭ ꤜꤢꤨ꤭ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤗꤢꤧꤓ꤫ꤣꤧ꤬ ꤢ꤬ꤞꤢꤩ꤬ ꤥ꤬ ꤒꤣ꤬ꤕꤜꤢꤪ꤬꤮ ꤒꤥ꤬꤯ ꤢ꤬ ꤥ꤬ ꤏꤥ꤭ꤏꤢꤦ ꤢ꤬ꤜꤢꤩ꤬ ꤖꤢꤧ꤯ ꤣꤧ꤭ꤒꤣ꤬ꤖꤥꤚꤣꤧ꤬ ꤢ꤬ ꤟꤢꤩ ꤊꤣꤧ꤬ꤘꤝꤤꤗ꤫ꤢꤪ꤬ ꤣꤧ꤭ꤒꤣ꤬ꤞꤢꤪ꤬ ꤔꤢꤧ, “ꤞꤢꤩ꤬ꤊꤣꤧ꤭ ꤕꤢ꤬ ꤒ꤫ꤢꤧ꤬ ꤢꤨ꤭ ꤒꤣ꤬ꤖꤥ꤮ ꤒ꤫ꤢꤧ꤬ꤗꤢꤩ꤬ ꤔꤤ꤮” ꤢ꤬ ꤟꤢꤩ ꤚꤣꤧ꤬ ꤊꤣꤧ꤬ꤘꤝꤤꤗ꤫ꤢꤪ꤬ ꤋꤚꤢ꤭ꤞꤣꤧ꤭ ꤡꤣꤧ ꤒꤣ꤬ꤖꤥꤞꤣꤧ꤭ ꤡꤣꤧ꤯
20ꤙꤣꤧ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤗꤢꤧꤓ꤫ꤣꤧ꤬ ꤒꤢꤩ꤬ꤓꤝꤢ꤭ꤓꤢꤧ꤬ ꤟꤢꤨꤣꤧ꤭ ꤢ꤬ꤋꤢꤩ꤭, ꤢ꤬ ꤋꤛꤢꤛꤢꤦ ꤜꤢꤪ꤭ꤕꤜꤤ꤭ ꤡꤣꤧ꤯ ꤚꤣꤧ꤬ ꤛꤢꤩ꤬ꤞꤤ꤭ ꤘꤣꤧꤟꤣꤧ꤭ ꤙꤢꤧ꤬ꤡꤢꤩ꤬ ꤔꤢꤧ, “ꤊꤣꤧ꤬ꤘꤝꤤꤗ꤫ꤢꤪ꤬ ꤣꤧ꤭ꤒꤣꤧ꤬ꤞꤢꤪ꤬ ꤢ꤬ ꤡꤝꤢꤞꤣꤧ꤭ ꤒꤣ꤬ꤖꤥꤞꤣꤧ꤭ ꤡ꤫ꤢꤧ꤬ ꤟꤢꤨꤒꤢꤩ꤭ꤒꤢꤩ꤭ ꤟꤢꤧ꤬꤮?”
21ꤙꤢꤧ꤬ꤡꤢꤩ꤬ ꤟꤢꤩꤏꤢꤦ꤬ ꤛꤢꤩ꤬ꤞꤤ꤭ ꤔꤢꤧ, “ꤠꤢꤧ꤭ ꤟꤢꤩꤡꤢꤪꤡꤢꤪ ꤞꤤ꤭꤮, ꤔꤢꤧ꤬ ꤛ꤫ꤢꤦ꤬ꤢꤩ꤬ ꤚꤣꤧ꤬ ꤔꤢꤧ꤬ ꤊꤢꤩ꤬ ꤞꤤꤕꤜꤢꤪ꤬ꤚꤢ꤬ꤚꤢꤩ꤬ ꤒꤥ꤬ ꤟꤢꤩꤔꤣꤧ꤬ꤗꤢ꤬ ꤟꤢꤨ ꤠꤢꤧ꤭ ꤟꤢꤩ ꤊꤣꤧ꤬ꤘꤝꤤꤗ꤫ꤢꤪ꤬ ꤚꤣꤧ꤬ ꤢ꤬ ꤞꤣꤧ꤭ꤋꤚꤢ꤭ꤊꤢꤧ꤭ ꤣꤧ꤭ꤔꤣꤧ꤬, ꤞꤤ꤭ ꤗꤢ꤬꤮ ꤞꤤ꤭ ꤗꤢꤩ꤬ ꤡ꤫ꤢꤧ꤬ꤊꤣꤧ꤭ꤘꤢꤦ꤬ ꤟꤢꤨꤔꤣꤧ꤬ ꤖꤢꤧ꤯ ꤞꤤ꤭ ꤊ꤫ꤢꤦ꤬ ꤗꤢꤩ꤬ꤡ꤫ꤢꤧ꤬ꤜꤣ ꤕꤢ꤬ ꤡꤣꤧ ꤔꤢꤧ ꤔꤣꤧ꤬ ꤕꤢ꤭꤯ ꤞꤤ꤭ ꤊꤢꤩ꤬ ꤟꤢꤩ ꤏꤥ꤬ ꤣꤧ꤭ꤒꤣ꤬ꤗꤢꤩ꤭ ꤔꤢꤧ, ‘ꤞꤢꤪꤞꤢꤦ ꤡꤝꤢ ꤒꤣꤧ꤬ꤖꤢ꤭ꤊꤢꤧ꤭ ꤘꤣ ꤓꤣꤧ꤭ꤘꤢꤨ꤬ꤒꤣꤧ꤬ꤠꤢ꤬ ꤢ꤬ꤊꤢꤨ꤭ꤔꤣꤧ꤬,’ ꤟꤢꤩꤔꤣꤧ꤬ꤗꤢ꤬ ꤢ꤬ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ ꤕ꤫ꤢꤩ꤬ ꤞꤤ꤭ ꤟꤢꤨ ꤞꤤ꤭ ꤟꤢꤩ ꤔꤣꤧ꤬ ꤕꤢ꤭꤯#ꤗꤢꤞꤢꤧ ꤁꤇:꤂꤀, ꤊꤢ꤬ꤚꤤ꤬ꤞꤢꤨ꤬ ꤢ꤬ꤚ꤫ꤣꤧ꤬ꤜꤣ ꤒꤣ꤬ꤙꤢ꤬ ꤁꤃:꤂ 22ꤞꤤ꤭ ꤊꤢꤩ꤬ ꤛ꤫ꤢꤦ꤬ꤢꤩ꤬ ꤔꤣꤧ꤬, ꤞꤤ꤭ ꤊꤝꤤ꤭ꤒꤢꤩ꤬ ꤘꤣ ꤖꤢꤩ꤭ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤥ꤬ ꤤ꤭ꤒꤢꤩ꤭ꤒꤢꤩ꤭꤮ ꤙꤢꤩ꤬ꤙꤢꤩ꤬ ꤞꤤ꤭ ꤔ꤫ꤤ꤬ꤙꤢꤩ꤬ ꤕꤢ꤭꤯”
ꤊꤣꤧ꤬ꤛꤢꤧ꤭ ꤓꤝꤢ꤭ ꤊꤢꤨ꤬ꤊꤜꤢꤪꤊꤢꤨ꤬ꤊꤜꤢꤧ꤭ ꤒꤣꤧ꤬ꤟꤢꤩ꤬ ꤘꤣꤧꤟꤣꤧ꤭ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤢ꤬ ꤒꤣꤧ꤬ꤚꤣꤧ꤭ꤏꤝꤢ꤬ꤏꤢꤪ꤭
(ꤗꤢ꤬ꤊꤢꤨ ꤁꤁:꤂꤇-꤃꤃, ꤜꤢꤨꤊꤢ꤬ ꤂꤀:꤁-꤈)
23ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤔꤥ꤭ ꤘꤣ ꤒꤢꤩ꤬ꤜꤢꤨ꤭ꤒꤢꤧ꤭ꤟꤥ꤭ ꤠꤤ꤭ꤊꤢꤨ꤭ ꤚꤣꤧ꤬ ꤙꤣꤧ ꤢ꤬ ꤤ꤬ꤞꤝꤢꤤ꤬ꤞꤢꤧ꤬ꤒꤢ꤭ ꤢꤨ꤭ ꤢ꤬ꤋꤢꤩ꤭ꤔꤣꤧ꤬, ꤖꤚꤢꤩ꤬ꤜꤢꤨ꤭ꤒꤢꤧ꤭ ꤊꤢꤨ꤬ꤊꤜꤢꤪꤊꤢꤨ꤬ꤊꤜꤢꤧ꤭ ꤒꤣꤧ꤬ꤟꤢꤩ꤬ ꤔꤢꤧ ꤛꤢꤨꤘꤢ꤬ꤖꤢꤨ ꤒꤢꤩ꤬ꤡꤢꤪꤙꤢꤨ꤬ꤡꤢꤪꤙꤢꤩ꤭ ꤊꤢꤨ꤬ꤊꤜꤢꤪꤊꤢꤨ꤬ꤊꤜꤢꤧ꤭ ꤒꤣꤧ꤬ꤟꤢꤩ꤬ ꤟꤢꤧ꤭ ꤘꤣ ꤙꤢꤧ꤬ꤡꤢꤩ꤬ ꤢ꤬ ꤥ꤬ ꤚꤣꤧ꤬ ꤢ꤬ ꤘꤣꤧꤟꤣꤧ꤭ ꤜꤢꤨ꤭ ꤔꤢꤧ, “ꤔꤢꤧ꤬ ꤡꤝꤢꤗꤢꤩ꤬ꤒ꤫ꤥ꤬ ꤒꤢꤩ꤬ꤟꤢꤨꤣꤧ꤭ ꤒꤣꤧ꤬ꤟꤢꤩ꤬ ꤚꤣꤧ꤬ꤗꤢ꤬ ꤔꤢꤧ꤬ ꤡꤝꤢꤗꤢꤩ꤬ ꤔꤢꤧ ꤢꤨ꤭ꤕꤢꤩ꤭ ꤢ꤬ ꤒꤣꤧ꤬ꤚꤣꤧ꤭ꤏꤝꤢ꤬ꤏꤢꤪ꤭ ꤕꤢꤩ꤭? ꤢꤨ꤭ꤕꤢꤩ꤭ ꤔꤢꤪ꤭ꤗꤢꤩ꤬ ꤔꤢꤧ꤬ ꤕꤢꤩ꤭?”
24ꤙꤢꤧ꤬ꤡꤢꤩ꤬ ꤟꤢꤩꤏꤢꤦ꤬ ꤛꤢꤩ꤬ꤞꤤ꤭ ꤔꤢꤧ, “ꤠꤢꤧ꤭ ꤘꤣꤧꤟꤣꤧ꤭ ꤊꤣꤧ꤭ ꤞꤤ꤭ ꤍ꤫ꤥ꤬ ꤒꤣ꤬ꤗꤢꤦ꤭, ꤞꤤ꤭ ꤊꤢꤩ꤬ ꤟꤢꤩꤏꤢꤦ꤬ ꤕ꤫ꤢꤩ꤬ꤊꤣꤧ꤭ ꤠꤢꤧ꤭ ꤟꤢꤩꤚꤣꤧ꤬ ꤠꤢꤧ꤭ ꤗꤢꤩ꤬ ꤒꤢꤩ꤬ꤣꤧ꤭ꤒꤣꤧ꤬ꤟꤢꤩ꤬ ꤔꤢꤧ ꤢꤨ꤭ꤕꤢꤩ꤭ ꤢ꤬ ꤒꤣꤧ꤬ꤚꤣꤧ꤭ꤏꤝꤢ꤬ꤏꤢꤪ꤭ ꤕꤢꤩ꤭ꤔꤣꤧ꤬ ꤠꤢꤧ꤭ ꤊ꤫ꤢꤦ꤬ ꤟꤢꤩꤏꤥ꤬ꤜꤥ꤭ ꤕ꤫ꤢꤩ꤬ꤊꤣꤧ꤭ ꤞꤤ꤭ ꤕꤢ꤭꤯ 25ꤖꤚꤢꤩ꤬ꤡꤢꤩ꤬ ꤢꤨ꤭ ꤋꤢꤨ꤭ꤛꤥ꤭ꤟꤢ꤬ ꤡꤢꤩ꤬ ꤢꤨ꤭ ꤣꤧ꤭ꤔꤣꤧ꤬ꤗꤢ꤬ ꤡꤢꤪꤗꤣꤧ꤬ꤚꤢꤧ꤬ ꤘꤣꤧ ꤜꤢꤨ꤭ ꤒꤣꤧ꤬ꤚꤣꤧ꤭ꤏꤝꤢ꤬ꤏꤢꤪ꤭ ꤟꤢꤧ꤭? ꤗ꤫ꤢ꤬ꤒꤥ꤬ꤚꤣꤧ꤬ ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤘꤣꤧ ꤜꤢꤨ꤭ ꤟꤢꤧ꤭?”
ꤚꤣꤧ꤬ ꤛꤢꤩ꤬ꤞꤤ꤭ ꤟꤢꤩ ꤚꤣꤧꤘꤢꤦ꤬ꤜꤢꤨ꤭ ꤔꤢꤧ, “ꤕꤢꤩ꤬ ꤊꤢꤩ꤬ ꤟꤢꤩ ꤔꤢꤧ, ‘ꤡꤢꤪꤗꤣꤧ꤬ꤚꤢꤧ꤬ ꤘꤣꤧ ꤜꤢꤨ꤭’ ꤊꤢꤩ꤬ꤟꤢꤩꤚꤣꤧ꤬, ꤢ꤬ ꤊꤜꤢꤩ ꤘꤣꤧꤟꤣꤧ꤭ ꤔꤢꤧ꤭ ꤟꤣꤧ ꤕꤢꤩ꤬ ꤔꤢꤧ, ‘ꤊꤢꤩ꤬ꤟꤢꤩꤟꤢꤨꤔꤣꤧ꤬ꤚꤣꤧ꤬ ꤞꤤ꤭ ꤛ꤫ꤢꤦ꤬ꤢꤩ꤬ ꤜꤢꤨ꤭ ꤒꤥ꤬ ꤗꤢꤩ꤬ꤒꤢꤩ꤭?’ ꤢ꤬ ꤊꤜꤢꤩ ꤟꤢꤩ ꤔꤢꤧ꤭ ꤟꤢꤨꤔꤣꤧ꤬ ꤟꤣꤧ꤯ 26ꤗꤢ꤬ꤔꤢꤧꤚꤣꤧ꤬ ꤕꤢꤩ꤬ ꤊꤢꤩ꤬ ꤟꤢꤩ ꤔꤢꤧ, ‘ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤘꤣꤧ ꤜꤢꤨ꤭’ ꤊꤢꤩ꤬ꤟꤢꤩꤚꤣꤧ꤬, ꤕꤢꤩ꤬ ꤞꤤꤤ꤬ꤏꤢꤩ꤭ ꤊꤣꤧ꤬ꤛꤢꤧ꤭ ꤙꤢꤩꤗꤢꤨ꤬ ꤣꤧ꤭ꤒꤣꤧ꤬ꤟꤢꤩ꤬ ꤢ꤬ꤜ꤫ꤢꤩ꤬ꤜ꤫ꤢꤩ꤬, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤊꤣꤧ꤬ꤛꤢꤧ꤭ ꤣꤧ꤭ꤒꤣꤧ꤬ꤟꤢꤩ꤬ ꤜꤢ꤭ ꤛ꤫ꤢꤦ꤬ꤢꤩ꤬ ꤜꤢ꤭ꤋꤢꤧ꤭ ꤔꤢꤧ ꤋꤢꤨ꤭ꤛꤥ꤭ꤟꤢ꤬ ꤗꤢ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤖꤚꤢꤩ꤬ꤖꤚꤥ꤬ ꤗ꤫ꤢ꤬ꤔꤤꤔꤢꤧ꤬ ꤒꤣ꤬ꤖꤚꤢꤩ꤬, ꤟꤢꤨꤔꤣꤧ꤬ꤔꤣꤧ꤬꤯”
27ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ ꤛꤢꤩ꤬ꤞꤤ꤭ ꤟꤢꤩꤏꤢꤦ꤬ ꤛꤢꤩ꤬ꤏꤛꤢꤨ ꤔꤢꤧ, “ꤕꤢꤩ꤬ ꤞꤤꤑꤢꤩ꤭ꤒꤥ꤬꤯”
ꤚꤣꤧ꤬ ꤛꤢꤩ꤬ꤏꤛꤢꤨ ꤟꤢꤩꤏꤢꤦ꤬ ꤛꤢꤩ꤬ꤞꤤ꤭ ꤔꤢꤧ, “ꤊꤢꤩ꤬ꤟꤢꤩꤟꤢꤨꤔꤣꤧ꤬ꤚꤣꤧ꤬ ꤠꤢꤧ꤭ ꤗꤢꤩ꤬ꤒꤢꤩ꤬ ꤣꤧ꤭ꤒꤣꤧ꤬ꤟꤢꤩ꤬ ꤔꤢꤧ ꤢꤨ꤭ꤕꤢꤩ꤭ ꤢ꤬ ꤒꤣꤧ꤬ꤚꤣꤧ꤭ꤏꤝꤢ꤬ꤏꤢꤪ꤭ ꤕ꤫ꤢꤩ꤬ ꤔꤣꤧ꤬ ꤠꤢꤧ꤭ ꤟꤢꤩꤏꤥ꤬ꤜꤥ꤭ ꤕ꤫ꤢꤩ꤬ ꤞꤤ꤭ ꤒꤥ꤬ꤒꤥ꤬꤯”
ꤒꤢꤩ꤬ꤘꤥ꤬ꤔꤢꤧ꤭ ꤋꤢꤋꤥ꤬ ꤖꤢꤨꤖꤚꤢꤩ꤬ꤋꤢꤨ꤭ ꤞꤤꤔꤣꤧ꤭ ꤢ꤬ꤚꤤ꤬ꤢ꤬ꤊꤢꤧ꤭
28“ꤟꤢꤩ ꤕ꤫ꤢꤩ꤬ꤗꤢꤧ ꤠꤢꤧ꤭ ꤞꤤ꤭ ꤒꤣꤧ꤬ꤔꤢꤩ꤬ ꤟꤢꤨꤒꤢꤩ꤭? ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ ꤚꤣꤧ꤬ ꤢ꤬ ꤖꤢꤨꤖꤚꤢꤩ꤬ꤋꤢꤨ꤭ ꤥ꤬ ꤞꤤꤔꤣꤧ꤭꤯ ꤚꤣꤧ꤬ ꤢ꤬ ꤡꤝꤢ ꤟꤢꤩ ꤢ꤬ ꤠ꤫ꤢꤧ꤬ꤖꤚ꤫ꤢꤩ꤬ ꤒꤣ꤬ꤖꤚꤢꤩ꤬ ꤔꤢꤧ, ‘ꤣꤧ꤭ꤒꤣ꤬ꤔꤣꤧ꤭ ꤟꤢꤧ꤭ ꤘꤣ ꤊꤢꤨꤊꤜꤢꤩ꤭ꤋꤢꤨ꤬ ꤚꤣꤧ꤬ ꤟꤢꤧ꤭ꤗꤢꤧꤡꤢꤧ꤬ ꤎꤢ꤬ꤕꤛꤤꤗ꤫ꤢꤪ꤬ ꤔꤤ꤮꤯’
29“ꤚꤣꤧ꤬ ꤢ꤬ ꤟꤢꤩꤏꤢꤦ꤬ ꤢ꤬ꤖꤢꤩ꤭ ꤔꤢꤧ, ‘ꤠꤢꤧ꤭ ꤟꤢꤧ꤭ ꤒꤥ꤬,’ ꤢ꤬ ꤟꤢꤩ ꤒꤣꤧ꤬ꤘꤢꤦꤚꤣꤧ꤬ ꤘꤣꤋꤛꤢ꤭ ꤔꤣꤧ꤬ ꤢ꤬ ꤒꤣꤧ꤬ꤔꤢꤩ꤬ ꤚꤣꤧꤋꤛꤢ꤭ ꤚꤣꤧ꤬ ꤢ꤬ ꤟꤢꤧ꤭ ꤋꤛꤢ꤭ꤞꤢꤧ꤯
30“ꤓꤥ꤭ꤚꤣꤧ꤬ ꤖꤢꤩ꤭ꤣꤧ꤭ ꤒꤣ꤬ꤖꤚꤢꤩ꤬ꤔꤣꤧ꤬ ꤢ꤬ ꤡꤝꤢꤜꤢ꤭ꤒꤢꤩ꤬ ꤘꤣ ꤢ꤬ꤖꤢꤨꤕꤣꤧ꤬ꤒꤤ ꤒꤣ꤬ꤖꤚꤢꤩ꤬ ꤢ꤬ ꤥ꤬ ꤚꤣꤧ꤬ ꤢ꤬ ꤟꤢꤩ ꤞꤢꤧꤜꤢꤨ꤭ ꤟꤢꤨ ꤢ꤬ ꤟꤢꤩ ꤢ꤬ ꤖꤢꤨꤠ꤫ꤢꤧ꤬ꤖꤚ꤫ꤢꤩ꤬ ꤔꤣꤧ꤬ꤒꤣ꤬ꤖꤚꤢꤩ꤬꤯ ꤚꤣꤧ꤬ ꤢ꤬ ꤟꤢꤩꤏꤢꤦ꤬ ꤢ꤬ꤖꤢꤩ꤭ ꤔꤢꤧ, ‘ꤢꤪ꤬ ꤖꤢꤩ꤭꤮, ꤠꤢꤧ꤭ ꤟꤢꤧ꤭ꤘꤢꤦ꤬ ꤕꤢ꤭,’ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤟꤢꤧ꤭ ꤕꤢꤩ ꤒꤥ꤬꤯
31“ꤖꤢꤨꤖꤚꤢꤩ꤬ꤋꤢꤨ꤭ ꤣꤧ꤭ꤞꤤꤔꤣꤧ꤭ꤔꤣꤧ꤬, ꤢ꤬ ꤗꤢꤩ꤬ꤒꤥ꤭ ꤢ꤬ꤖꤢꤩ꤭ ꤞꤤꤕꤜꤢꤪ꤬ ꤙꤣꤧꤒꤢꤩ꤭ ꤒꤣ꤬ꤖꤚꤢꤩ꤬ꤒꤢꤩ꤭?”
ꤚꤣꤧ꤬ ꤛꤢꤩ꤬ꤞꤤ꤭ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤢ꤬ꤘꤢꤨ꤬ ꤒꤣ꤬ꤖꤚꤢꤩ꤬꤯”
ꤚꤣꤧ꤬ ꤙꤢꤧ꤬ꤡꤢꤩ꤬ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤠꤢꤧ꤭ ꤟꤢꤩꤡꤢꤪꤡꤢꤪ ꤞꤤ꤭, ꤞꤤ꤭ ꤜ꤫ꤢꤩ꤬ꤔꤥ꤭ꤥ꤬ ꤢ꤬ꤜ꤫ꤢꤩ꤬ꤥ꤬ ꤘꤣ ꤗꤢꤪꤋꤢꤨ꤬ ꤓꤣꤧ꤭ꤜ꤫ꤢꤩ꤬ꤊ꤫ꤢꤩ꤬ꤊꤢꤨ꤭ ꤔꤣꤧ꤬, ꤖꤚꤢꤩ꤬ꤊꤝꤤ꤭ꤢ꤬ꤗꤢꤨ꤬ꤢ꤬ꤚꤢ ꤔꤢꤧ ꤟꤤ꤬ꤗꤢꤧꤖꤢꤩ꤬ꤗ꤫ꤥ꤬ ꤒꤣꤧ꤬ꤟꤢꤩ꤬ ꤡꤝꤢꤔꤥ꤭ꤖꤢꤩ꤬ꤊꤢꤧ꤭ ꤞꤤ꤭ ꤟꤣꤧ꤯ 32ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤋꤢꤨ꤭ꤛꤥ꤭ꤟꤢ꤬ ꤟꤢꤧ꤭ ꤘꤣꤧꤜꤥ꤭ ꤞꤤ꤭ ꤔꤢꤧ ꤒꤢꤩ꤬ꤡꤢꤪꤒꤢꤩ꤬ꤒꤢꤩ꤬ ꤢ꤬ꤊꤜꤢꤧ ꤒꤣꤧ꤬ꤘꤢꤦꤚꤣꤧ꤬ ꤞꤤ꤭ ꤛ꤫ꤢꤦ꤬ꤢꤩ꤬ ꤜꤢꤨ꤭ ꤒꤥ꤬꤯ ꤗꤢ꤬ꤔꤢꤧꤚꤣꤧ꤬ ꤖꤚꤢꤩ꤬ꤊꤝꤤ꤭ꤢ꤬ꤗꤢꤨ꤬ꤢ꤬ꤚꤢ ꤔꤢꤧ ꤟꤤ꤬ꤗꤢꤧꤖꤢꤩ꤬ꤗ꤫ꤥ꤬ ꤒꤣꤧ꤬ꤟꤢꤩ꤬ ꤛ꤫ꤢꤦ꤬ꤢꤩ꤬ ꤜꤢꤨ꤭꤯ ꤞꤤ꤭ ꤗꤢꤧꤓ꤫ꤣꤧ꤬ ꤡꤣꤧ ꤊꤣꤧ꤬ꤛꤢꤧ꤭ ꤣꤧ꤭ꤒꤣꤧ꤬ꤟꤢꤩ꤬ ꤢ꤬ꤞꤤꤕꤜꤢꤪ꤬ ꤓꤢꤨ꤬ꤜꤢꤧ꤬ ꤊꤢ꤬ ꤡꤣꤧ ꤒꤣꤧ꤬ꤘꤢꤦꤚꤣꤧ꤬ ꤞꤤ꤭ ꤞꤤꤕꤜꤢꤪ꤬ ꤓꤢꤨ꤬ꤜꤢꤧ꤬ꤊꤢ꤬ ꤊꤣꤧ꤭ꤢꤨ꤭ ꤒꤥ꤬ ꤓꤥ꤭ꤒꤥ꤬ ꤞꤤ꤭ ꤛ꤫ꤢꤦ꤬ꤢꤩ꤬ꤊꤣꤧ꤭ ꤡꤣꤧ ꤢꤨ꤭ ꤒꤣꤧ꤬ꤊꤤ꤬꤮ ꤒꤥ꤬꤯#ꤜꤢꤨꤊꤢ꤬ ꤃:꤁꤂, ꤇:꤂꤉-꤃꤀
ꤒꤢꤩ꤬ꤘꤥ꤬ꤔꤢꤧ꤭ ꤋꤢꤋꤥ꤬ ꤖꤚꤢꤩ꤬ꤗꤢꤩ꤬ꤢꤩ꤬ ꤎꤢ꤬ꤕꤛꤤꤖꤢꤩ꤬ ꤘꤣ ꤢ꤬ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤒꤣꤧ꤬ꤟꤢꤩ꤬
(ꤗꤢ꤬ꤊꤢꤨ ꤁꤂:꤁-꤁꤂, ꤜꤢꤨꤊꤢ꤬ ꤂꤀:꤉-꤁꤉)
33“ꤔ꤫ꤤ꤬ꤘꤢ꤭ ꤕ꤫ꤥ꤬ ꤜꤢ꤭ꤋꤢꤧ꤭ ꤒꤢꤩ꤬ꤘꤥ꤬ꤔꤢꤧ꤭ ꤘꤣ ꤢ꤬ꤚꤥ꤬ ꤣꤧ꤭ꤒꤣ꤬ꤒ꤫ꤥ꤬꤯ ꤒꤣ꤬ꤖꤥꤢ꤬ꤋꤢꤩ꤭ꤔꤣꤧ꤬ ꤊꤢꤨꤊꤜꤢꤩ꤭ꤙꤢꤧ꤬ꤡꤢꤩ꤬ ꤘꤣ ꤢ꤬ ꤤ꤬ꤏꤢꤪꤤ꤬ꤕꤜꤢꤦ꤭ ꤚꤣꤧꤘꤢꤦ꤬ ꤢ꤬ ꤎꤢ꤬ꤕꤛꤤꤗ꤫ꤢꤪ꤬ ꤒꤣꤧ꤬ꤟꤢꤩ꤬ ꤥ꤬ꤒꤣ꤬ꤖꤚꤢꤩ꤬ ꤢ꤬ ꤚꤢ꤬ꤒꤣꤧ꤬ꤠꤢ꤬ꤙꤤ ꤚꤣꤧꤘꤢꤦ꤬ ꤜꤢꤪ꤭ ꤢ꤬ ꤊꤣꤧ꤬ꤚꤢꤩꤣꤧ꤭, ꤚꤣꤧ꤬ ꤢ꤬ ꤋꤢꤦ꤬ꤥ꤬ ꤚꤣꤧꤘꤢꤦ꤬ ꤢ꤬ꤟꤢꤩ꤬ꤊꤢꤨ꤭ ꤒꤣ꤬ꤊꤢꤨ꤭ ꤘꤣ ꤢ꤬ ꤊ꤫ꤢꤦ꤬ ꤤ꤬ꤠꤤ꤭ꤓꤢꤩ꤬ ꤔꤢꤧ ꤎꤢ꤬ꤕꤛꤤꤓꤣꤧ꤭ ꤢ꤬ꤑꤢꤩ꤭, ꤓꤥ꤭ꤚꤣꤧ꤬ ꤢ꤬ ꤤ꤬ꤏꤢꤪꤓꤢꤧ꤬ ꤚꤣꤧ ꤜ꤫ꤢꤩ꤬ꤞꤢꤦ꤬ꤓꤢꤧ꤬ꤜꤥ꤭ ꤘꤣ ꤢꤨ꤭ ꤜ꤫ꤢꤩ꤬ꤥ꤬ꤕ꤫ꤢꤪ꤬ꤗꤢꤧ ꤔꤢꤧ ꤊꤢꤨꤊꤜꤢꤩ꤭ ꤢ꤬ꤑꤢꤩ꤭ ꤒꤣ꤬ꤗꤢꤩ꤭꤯ ꤓꤥ꤭ꤚꤣꤧ꤬ ꤢ꤬ ꤕꤜꤝꤢ꤭ꤋꤢꤧ꤭ꤢꤩ꤬ꤊꤢꤧ꤭ ꤢ꤬ꤊꤢꤨꤊꤜꤢꤩ꤭ꤣꤧ꤭ ꤔꤢꤧ ꤖꤚꤢꤩ꤬ꤟꤢꤧ꤭ꤊꤢꤨꤊꤜꤢꤩ꤭ ꤒꤣꤧ꤬ꤟꤢꤩ꤬ ꤚꤣꤧ꤬ ꤢ꤬ ꤓꤢꤩ꤬ꤡꤝꤢꤊꤢꤧ꤭ ꤘꤣ ꤊ꤫ꤢꤩ꤬ꤢ꤬ꤚꤥ꤬ ꤒꤣ꤬ꤊ꤫ꤢꤩ꤬꤯#ꤛꤢ꤬ꤏꤛꤢꤛꤢ꤬ ꤅:꤁-꤂ 34ꤞꤢꤧꤟꤢꤨ ꤖꤚꤢꤩ꤬ꤋꤢꤧ꤭ꤢꤩ꤬ ꤜꤢꤨ꤭ ꤊꤢꤨꤊꤜꤢꤩ꤭ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤙꤢꤩ꤭ꤢꤩ꤬ꤕ꤫ꤢꤩ꤬ ꤊꤣꤧ꤭ ꤜꤢꤨ꤭ ꤞꤢꤪ꤬ꤞꤢꤩ꤬ ꤒꤣꤧ꤬ꤟꤢꤩ꤬ꤔꤣꤧ꤬ꤚꤣꤧ꤬, ꤙꤣꤧ ꤏꤣꤧꤋꤢꤩ꤭ ꤖꤢꤦ꤬ꤟꤢꤧ꤭ ꤟꤣꤧ ꤘꤣ ꤒꤥ꤭ ꤙꤢ꤬ꤕꤜꤢꤪ ꤟꤣꤧ ꤎꤢ꤬ꤕꤛꤤꤞꤢꤩ꤬ ꤢ꤬ꤋꤢꤩ꤭ ꤔꤣꤧ꤬, ꤢ꤬ ꤔꤢꤪ꤭ꤟꤢꤧ꤭ ꤢ꤬ꤖꤚꤢꤩ꤬ꤗꤢꤩ꤬ꤒꤢꤩ꤬ꤖꤢꤨ ꤒꤣꤧ꤬ꤟꤢꤩ꤬ ꤘꤣ ꤖꤚꤢꤩ꤬ꤋꤢꤧ꤭ꤢꤩ꤬ꤊꤢꤨꤊꤜꤢꤩ꤭ ꤒꤣꤧ꤬ꤟꤢꤩ꤬ ꤢ꤬ ꤥ꤬꤯
35“ꤖꤚꤢꤩ꤬ꤋꤢꤧ꤭ꤢꤩ꤬ꤊꤢꤨꤊꤜꤢꤩ꤭ ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤕ꤫ꤢꤦ꤬ ꤊꤢꤨꤊꤜꤢꤩ꤭ꤙꤢꤧ꤬ꤡꤢꤩ꤬ ꤢ꤬ꤖꤚꤢꤩ꤬ꤗꤢꤩ꤬ꤒꤢꤩ꤬ꤖꤢꤨ ꤣꤧ꤭ꤒꤣꤧ꤬ꤟꤢꤩ꤬ ꤚꤣꤧ꤬ ꤢ꤬ ꤗꤢꤦ꤭ ꤜꤢꤨ꤭ꤒꤢꤩ꤬ ꤒꤣ꤬ꤖꤚꤢꤩ꤬, ꤢ꤬ ꤗꤢꤩ꤬ꤞꤣꤧ꤭ꤊꤢꤧ꤭ ꤜꤢꤨ꤭ꤒꤢꤩ꤬ ꤒꤣ꤬ꤖꤚꤢꤩ꤬, ꤒꤣ꤬ꤖꤚꤢꤩ꤬ ꤚꤣꤧ꤬ ꤢ꤬ ꤒ꤫ꤢ꤬ ꤜꤢꤨ꤭ ꤔꤢꤧ ꤜ꤫ꤢꤪ꤬꤯ 36ꤣꤧ꤭ꤒꤣ꤬ꤖꤥꤚꤣꤧ꤬ ꤢ꤬ ꤔꤢꤪ꤭ꤟꤢꤧ꤭ ꤢꤩꤜꤣꤜꤢ꤭ꤒꤢꤩ꤬ ꤖꤚꤢꤩ꤬ꤗꤢꤩ꤬ꤒꤢꤩ꤬ꤖꤢꤨ ꤘꤣ ꤛꤢꤩ꤬ꤞꤤ꤭ ꤥ꤬ ꤚꤣꤧ꤬ ꤢ꤬ ꤟꤢꤧ꤭ꤢꤩ ꤜꤣ ꤔꤢꤧ ꤢ꤬ ꤟꤢꤧ꤭ ꤚ꤫ꤣꤧ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤡꤣꤧ ꤒꤣꤧ꤬ꤘꤢꤦꤚꤣꤧ꤬ ꤖꤚꤢꤩ꤬ꤋꤢꤧ꤭ꤢꤩ꤬ꤊꤢꤨꤊꤜꤢꤩ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤗꤢꤩ꤬ꤡꤢ꤭ꤗꤢꤩ꤬ꤡꤢꤦ꤬ ꤛꤢꤩ꤬ꤞꤤ꤭ ꤞꤢꤧꤔꤢꤧ ꤢ꤬ ꤟꤢꤧ꤭ ꤚ꤫ꤣꤧ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤖꤢꤧ꤯ 37ꤘꤣꤋꤛꤢ꤭ꤒꤣꤧ꤬ꤘꤢꤦ꤬ꤚꤣꤧ꤬, ꤢ꤬ ꤔꤢꤪ꤭ꤟꤢꤧ꤭ ꤢ꤬ ꤖꤢꤨꤖꤚꤢꤩ꤬ꤋꤢꤨ꤭ ꤘꤣ ꤛꤢꤩ꤬ꤞꤤ꤭ ꤢ꤬ ꤥ꤬꤯ ‘ꤠꤢꤧ꤭ꤖꤢꤨ ꤚꤣꤧꤘꤢꤦ꤬ ꤗꤢ꤬ ꤛꤢꤩ꤬ꤞꤤ꤭ ꤊꤜꤢꤩ ꤞꤤꤔ꤫ꤢꤧ꤬ꤞꤤꤒꤣꤧ꤬ꤚꤢꤩ꤭ ꤜꤣꤔꤢꤧ꤭ ꤖꤢꤧ,’ ꤢ꤬ ꤟꤢꤩ ꤟꤢꤨꤔꤣꤧ꤬꤯
38“ꤗꤢ꤬ꤔꤢꤧꤚꤣꤧ꤬ ꤙꤣꤧ ꤖꤚꤢꤩ꤬ꤋꤢꤧ꤭ꤢꤩ꤬ꤊꤢꤨꤊꤜꤢꤩ꤭ ꤣꤧ꤭ꤒꤣꤧ꤬ꤟꤢꤩ꤬ ꤗꤢꤧꤓ꤫ꤣꤧ꤬ ꤜꤢꤨ꤭ ꤢ꤬ꤋꤢꤩ꤭ꤔꤣꤧ꤬, ꤛꤢꤩ꤬ꤞꤤ꤭ ꤟꤢꤩ ꤚꤣꤧꤘꤢꤦ꤬ꤜꤢꤨ꤭ ꤔꤢꤧ, ‘ꤢ꤬ ꤗꤢ꤬ ꤖꤚꤢꤩ꤬ ꤘꤣ ꤢ꤬ ꤔ꤫ꤤ꤬ꤙꤢꤩ꤬ ꤢꤨ꤬ꤡꤢꤩ꤭ꤒꤣꤧ꤬ꤛ꤫ꤢꤩ꤬ ꤔꤣꤧ꤬ꤒꤣ꤬ꤖꤚꤢꤩ꤬ ꤟꤣꤧ, ꤡꤝꤢ! ꤡꤝꤢꤗꤢꤩ꤬ꤞꤣꤧ꤭ꤊꤢꤧ꤭ ꤜꤢꤨ꤭ ꤕꤥ꤮, ꤚꤣꤧ꤬ ꤕꤢꤩ꤬ ꤊ꤫ꤢꤦ꤬ ꤖꤛꤢ ꤢ꤬ ꤢꤨ꤬ꤡꤢꤩ꤭ꤒꤣꤧ꤬ꤛ꤫ꤢꤩ꤬ ꤕꤢ꤭ ꤕꤥ꤮,’ ꤢ꤬ ꤟꤢꤩ ꤜꤢ꤭ꤋꤢꤧ꤭ ꤟꤢꤨꤔꤣꤧ꤬꤯ 39ꤚꤣꤧ꤬ ꤢ꤬ ꤕ꤫ꤢꤦ꤬ ꤜꤢꤨ꤭ ꤚꤣꤧ꤬ ꤢ꤬ ꤡꤝꤤ꤬ꤓꤢꤩ꤬ꤊꤢꤧ꤭ ꤜꤢꤨ꤭ ꤘꤣ ꤊꤣꤧ꤬ꤚꤢꤩꤊꤜꤢꤪ꤭ ꤚꤣꤧ꤬ ꤢ꤬ ꤗꤢꤩ꤬ꤞꤣꤧ꤭ꤊꤢꤧ꤭ ꤜꤢꤨ꤭꤯
40“ꤟꤢꤨꤔꤣꤧ꤬ꤚꤣꤧ꤬ ꤏꤢ꤮ ꤊꤢꤨꤊꤜꤢꤩ꤭ꤙꤢꤧ꤬ꤡꤢꤩ꤬ ꤟꤢꤧ꤭ꤒ꤫ꤥ꤬ ꤕꤢ꤭ꤔꤣꤧ꤬, ꤢ꤬ ꤊ꤫ꤢꤦ꤬ ꤗꤢꤩ꤬ ꤛꤢꤩ꤬ꤞꤤ꤭ ꤟꤢꤨꤒꤢꤩ꤭ ꤕꤢ꤭?”
41ꤖꤚꤢꤩ꤬ꤜꤢꤨ꤭ꤒꤢꤧ꤭ ꤊꤢꤨ꤬ꤊꤜꤢꤪ ꤒꤣꤧ꤬ꤟꤢꤩ꤬ ꤔꤢꤧ ꤛꤢꤨꤘꤢ꤬ꤖꤢꤨ ꤒꤢꤩ꤬ꤡꤢꤪꤙꤢꤩ꤭ ꤊꤢꤨ꤬ꤊꤜꤢꤪꤊꤢꤨ꤬ꤊꤜꤢꤧ꤭ ꤒꤣꤧ꤬ꤟꤢꤩ꤬ ꤟꤢꤩꤏꤢꤦ꤬ ꤔꤢꤧ, “ꤢ꤬ ꤊ꤫ꤢꤦ꤬ ꤗꤢꤩ꤬ꤡꤢ꤭ꤗꤢꤩ꤬ꤡꤢꤦ꤬, ꤗꤢꤩ꤬ꤞꤣꤧ꤭ꤊꤢꤧ꤭ ꤊꤣꤧ꤬ꤛꤢꤧ꤭ꤗꤢꤨꤗ꤫ꤢꤧ꤬ꤊꤣꤧ꤬ꤛꤢꤧ꤭ꤚꤤ꤬ꤡ꤫ꤢꤧ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤕꤢ꤭꤯ ꤚꤣꤧ꤬ ꤢ꤬ ꤊ꤫ꤢꤦ꤬ ꤕꤜꤝꤢ꤭ꤋꤢꤧ꤭ ꤋꤥꤜꤢ꤭ꤒꤢꤩ꤬ ꤢ꤬ꤊꤢꤨꤊꤜꤢꤩ꤭ ꤣꤧ꤭ꤔꤣꤧ꤬ ꤔꤢꤧ ꤖꤚꤢꤩ꤬ꤋꤢꤧ꤭ꤢꤩ꤬ꤊꤢꤨꤊꤜꤢꤩ꤭ ꤘꤣ ꤢ꤬ ꤊ꤫ꤢꤦ꤬ ꤙꤢꤩ꤭ꤢꤩ꤬ ꤊꤢ꤬ꤋꤛꤢ꤭ ꤕ꤫ꤢꤩ꤬ ꤜꤢꤨ꤭ ꤙꤣꤧ ꤒꤢꤩ꤬ꤞꤢꤩ꤬ꤒꤢꤩ꤬ꤖꤥ꤭ ꤓꤢꤩ꤬ ꤢ꤬ꤏꤣꤧꤢ꤬ꤋꤢꤩ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤕꤢ꤭꤯”
42ꤙꤢꤧ꤬ꤡꤢꤩ꤬ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤜꤤ꤬ꤓꤢꤩ꤭ꤞꤢꤪ꤬ꤖꤢꤊꤢꤨ꤭ ꤟꤢꤩ ꤔꤢꤧ,
‘ꤊꤣꤧ꤬ꤛꤢꤧ꤭ ꤗꤢꤩ꤬ꤓꤢꤧ꤬ ꤟꤤ꤬ ꤚꤣꤧ꤬ ꤜ꤫ꤢꤪ꤬ ꤘꤣ ꤛꤢꤩ꤬ꤞꤤ꤭ ꤠꤤ꤭ꤊꤢꤧ꤭ ꤜꤢꤨ꤭ ꤔꤣꤧ꤬ꤒꤣ꤬ꤗꤢꤩ꤭ꤔꤣꤧ꤬ ꤢ꤬ ꤓꤝꤢ꤭ꤓꤢꤧ꤬ ꤜ꤫ꤢꤪ꤬ ꤘꤣ ꤢ꤬ ꤒꤣꤧ꤬ꤓꤝꤢꤗꤢ꤬ ꤜꤢꤪ꤭ ꤡꤣꤧ ꤟꤤ꤬ꤒꤣ꤬ꤗꤢꤩ꤭ ꤡꤣꤧ꤯ ꤣꤧ꤭ꤔꤣꤧ꤬ꤗꤢ꤬ ꤙꤢꤧ꤬ꤡꤢꤩ꤬ ꤡꤢꤪꤗꤣꤧ꤬ꤚꤢꤧ꤬ ꤗꤢꤩ꤬ꤒꤢꤩ꤬ ꤖꤢꤧ, ꤚꤣꤧ꤬ ꤢ꤬ ꤗꤢꤩ꤬ꤒꤢꤩ꤬ ꤣꤧ꤭ꤔꤣꤧ꤬ꤗꤢ꤬ ꤢ꤬ ꤋꤥꤒꤣꤧ꤬ꤊꤜꤤ ꤔꤢꤧ꤬ꤡꤣꤧ꤯’#ꤓꤢꤨ꤬ꤞꤢꤩꤓꤢꤧ꤬ ꤁꤁꤈:꤂꤂-꤂꤃
ꤜꤤ꤬ꤓꤢꤩ꤭ꤞꤢꤪ꤬ꤖꤢꤊꤢꤨ꤭ ꤟꤢꤩ ꤟꤢꤨꤣꤧ꤭ꤔꤣꤧ꤬ꤗꤢ꤬ ꤞꤤ꤭ ꤘꤢꤧꤔꤢꤪ ꤊꤣꤧ꤭ꤢꤨ꤭ ꤒꤣ꤬ꤖꤥ꤮ ꤒꤥ꤬ ꤟꤢꤧ꤭? ꤞꤤ꤭ ꤊꤜꤢꤩ ꤘꤢꤧꤔꤢꤪ ꤔꤢꤧ꤭ꤖꤢꤧ꤯”
43“ꤟꤢꤨꤔꤣꤧ꤬ꤚꤣꤧ꤬ ꤠꤢꤧ꤭ ꤟꤢꤩ ꤞꤤ꤭ ꤗꤢꤪꤋꤢꤨ꤬ ꤓꤣꤧ꤭ꤜ꤫ꤢꤩ꤬ꤊ꤫ꤢꤩ꤬ꤊꤢꤨ꤭ ꤘꤣ ꤞꤤ꤭ ꤒꤥ꤭ꤙꤢꤩ꤬ ꤔ꤫ꤤ꤬ꤙꤢꤩ꤬ꤔꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤖꤛꤢꤖꤢꤩ꤬ꤊꤢꤧ꤭ꤖꤢꤩ꤬ ꤞꤤ꤭ ꤕꤢ꤭꤯ ꤚꤣꤧ꤬ ꤢ꤬ ꤊ꤫ꤢꤦ꤬ ꤘꤣꤧ ꤔꤢꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤡꤢꤨ꤭ꤢꤩ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤍ꤫ꤥ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤕꤢ꤭꤯ 44ꤊꤣꤧ꤬ꤛꤢꤧ꤭ ꤘꤣ ꤢ꤬ ꤜꤣꤧ꤬ꤒꤢ꤭ ꤘꤣ ꤜ꤫ꤢꤪ꤬ ꤣꤧ꤭ꤒꤣ꤬ꤗꤢꤩ꤭ ꤢ꤬ꤜꤥ꤬ꤔꤣꤧ꤬, ꤢ꤬ꤋꤚꤝꤤ ꤊ꤫ꤢꤦ꤬ ꤜꤣꤧ꤬ꤊ꤫ꤢꤩ꤬ ꤖꤢꤧ ꤕꤢ꤭, ꤗꤢ꤬ꤔꤢꤧꤚꤣꤧ꤬ ꤜ꤫ꤢꤪ꤬ ꤣꤧ꤭ꤒꤣ꤬ꤗꤢꤩ꤭ ꤊ꤫ꤢꤦ꤬ ꤜꤣꤧ꤬ꤒꤢ꤭ ꤘꤣ ꤜꤢꤨ꤭ꤜꤥ꤬ ꤕꤢ꤭ ꤔꤣꤧ꤬, ꤢ꤬ꤋꤚꤝꤤꤢ꤬ꤋꤚꤝꤢ ꤊ꤫ꤢꤦ꤬ ꤗꤢꤦ꤬ ꤒꤣꤧ꤬ꤖꤚꤤ꤭ ꤜꤢꤪ꤭ ꤡꤣꤧ ꤕꤢ꤭꤯”#21:44 ꤢꤨ꤭ ꤚꤢ꤭ ꤜꤤ꤬ꤖꤢ ꤗꤢꤨ꤮ ꤑꤢꤔꤢꤨ꤬ꤋꤢꤩ꤭ ꤒꤣꤧ꤬ꤟꤢꤩ꤬ꤟꤢꤩ꤬ꤔꤣꤧ꤬, ꤢꤨ꤭ ꤗꤢꤧꤓ꤫ꤣꤧ꤬ ꤜꤤ꤬ꤓꤢꤩ꤭ꤞꤢꤪ꤬ꤖꤢ ꤣꤧ꤭ꤒꤣ꤬ꤗꤢ꤭ ꤥ꤬ꤕ꤫ꤢ꤬ꤒ꤫ꤣ꤬ꤊꤣꤧ꤭ ꤒꤥ꤬
45ꤙꤣꤧ ꤖꤚꤢꤩ꤬ꤜꤢꤨ꤭ꤒꤢꤧ꤭ ꤊꤢꤨ꤬ꤊꤜꤢꤪꤊꤢꤨ꤬ꤊꤜꤢꤧ꤭ ꤒꤣꤧ꤬ꤟꤢꤩ꤬ ꤔꤢꤧ ꤖꤢ꤬ꤚꤤ꤬ꤏꤛꤢꤧꤖꤢꤨ ꤒꤣꤧ꤬ꤟꤢꤩ꤬ ꤔ꤫ꤤ꤬ꤟꤥ꤭ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤘꤢꤧꤋꤢꤋꤥ꤬ ꤢ꤬ꤋꤢꤩ꤭ꤔꤣꤧ꤬, ꤛꤢꤩ꤬ꤞꤤ꤭ ꤞꤤꤑꤢꤩ꤭ ꤔꤢꤧ ꤙꤢꤧ꤬ꤡꤢꤩ꤬ ꤟꤢꤩꤋꤥ꤬ ꤛꤢꤩ꤬ꤞꤤ꤭꤯ 46ꤚꤣꤧ꤬ ꤛꤢꤩ꤬ꤞꤤ꤭ ꤗꤢꤧꤕꤢꤨ꤭ ꤜꤢ꤭ꤋꤢꤧ꤭ ꤊꤜꤢꤧ ꤘꤣ ꤢ꤬ ꤊ꤫ꤢꤦ꤬ꤚꤢꤩ꤭ ꤕ꤫ꤢꤦ꤬ ꤛꤢꤩ꤬ꤏꤛꤢꤨ ꤒꤣꤧ꤬ꤘꤢꤦꤚꤣꤧ꤬ ꤛꤢꤩ꤬ꤏꤛꤢꤨ ꤗꤢ꤬ ꤖꤚꤢꤩ꤬ꤖꤚꤥ꤬ ꤒꤣ꤬ꤖꤚꤢꤩ꤬, ꤊꤣꤧ꤬ꤛꤢꤧ꤭ ꤙꤢꤩꤗꤢꤨ꤬ ꤒꤣꤧ꤬ꤟꤢꤩ꤬ ꤜꤢ꤭ ꤛ꤫ꤢꤦ꤬ꤢꤩ꤬ ꤜꤢ꤭ꤋꤢꤧ꤭ ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤛꤢꤩ꤬ꤞꤤ꤭ ꤞꤤꤤ꤬ꤏꤢꤩ꤭ ꤊꤣꤧ꤬ꤛꤢꤧ꤭ ꤙꤢꤩꤗꤢꤨ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤢ꤬ꤜ꤫ꤢꤩ꤬꤯
Currently Selected:
ꤗꤢꤞꤢꤧ 21: eky-Kali-MM
Highlight
Share
Copy
Want to have your highlights saved across all your devices? Sign up or sign in
Wycliffe USA
