เห่ขุทวาลู่ 13
13
คูอับราม เน๊อ อาพู๊ดุ คูโลท จว๊าเปโค๊แก ลู
1ฮู๊เนอเร๊อ, คูอับราม เอ๊ เกอเร๊อ อาเม เน๊อ อาพู๊ดุ คูโลท เร๊อ อา พย๊าหนิ ลอ อาเตดุแหย่แถ่เซ ตาหมื่อตาเต เต๊เห่ เร๊อ อา โอ่ เบ๊อะ อียิปต์เก่ เนอ เร๊อ อา กาโน คยาแซ๊ เด๊อ คานาอันเก่ เบ๊แล ตากยา. 2คูอับราม อา เตมีเตดอ เต๊เห่ อาโอ่ เอ๊ แหน่เจ๊อ, โทโต่ อารือ หม่า อา โอ่ เอ๊เอ๊, อาเท หม่า อา โอ่ เอ๊เอ๊.
3อา โอ่ เด๊อ คานาอันเก่ เบ๊แล เนอตากยา เร๊อ อา จว๊าโอ่ โต๊โผะ โท โต๊โผะ, เร๊อ อา กาคยา คยาแซ๊ เด๊อ วีเบธเอล, เด๊อ อาเหร่อเค อา จว๊าช๊อโอ่ เกอเร๊อ เหล่สื่อเหล่แบ่ เบ๊อะ วีเบธเอล เน๊อ วีอัย อาเปล่กู เนอ. 4เร๊อ อาเหล่โอ่ เออโต๊โผะ หม่า เบ๊อะ อาเหล่ ต่าแถ่ เกอเร๊อ เตหลู่แตเหร่ เนอ โต๊โผะเฮ๊อ. เร๊อ อา จ๊อเบแถ่ จอแปแหร่ ตูจูเพร เบ๊อะเนอ.
5คูโลท เด๊อ อา จว๊าเต่อเคเต่อ เกอ เน๊อ คูอับราม ปว๊า โตโพ่ เออเตเพรเนอ, อาซิหมิ เน๊อ เป่, ปู่เป๊เหน่ เน๊อ เหล่สื่อเหล่แบ่ เต๊เห่ หม่า อาโอ่ เอ๊ แหน่เจ๊อเจ๊อ. 6เหย่ซี เตมีเตดอ เต๊เห่ โอ่โหร่โอ่เอ๊แถ่ แหน่เจ๊อ อาขว่าอาคยา, เหย่ซี ซิเนอ เก่ โอ่เต่อ ลู อาเง เนอ, เหย่ซี เตมีเตดอ เหล่เอ่เฉ่ อาเหล่โอ่ โป่ เป่ เด๊อ เหย่ซีเง โต่ เฮ๊อ. 7โทโต่ เพรเก เป่ คูอับราม อาเตมีเตดอ เต๊เห่ เน๊อ เพรเก เป่ คูโลท อาเตมีเตดอ เต๊เห่ กย๊าตางา เฮ๊เบ่โอ่เอ๊ เกอเร๊อโป่ ลูลู. เบ๊อะเนอเค, คานาอันเมวเจ่อพู๊ เต๊เห่ เน๊อ เปริสซี เมวเจ่อพู๊ เต๊เห๋ หม่า อา โอ่ แลแค เบ๊อะ เก่กู เนอเนอ.
8เด๊อ อาโหน่เนอ คูอับราม เฮ๊ คูโลท เน๊อ, “เด๊อ แว เน๊อ เน อาเปล่กู เนอเบ่เบ่, เด๊อ เพรเก เป่ แวเตมีเตดอ เต๊เห่ เน๊อ เพรเก เป่ เนเตมีเตดอ เต๊เห่ อาเปล่กู เนอเบ่เบ่, แว ซิหยื่อ นอทวาแถ่ เตกย๊าตางา โต่, เมเตเฮ๊เร๊อ แว เน๊อ เน หม่า เปโป่แหว่กลุยแล ต๊อต่อ ปา ลู แพ๊. 9เมฮู๊เนอเร๊อ เป จว๊าเปโค๊ ลู โป๋. ล๋อ เห่ขุ เด๊อ เน แม๊เถอะ อาเออ, เน เก่ นว๊าพย๊า เกอ อา หม่า อา หนิ แพ๊. เน เก่ นว๊าพย๊า อาเหล่โอ่ เด๊อ จ๊อจิ ตากยา เฮ๊เร๊อ, แวเก่ พย๊า เป่เน เด๊อ จ๊อทว๊า ตากยา ปา. เน เก่ นว๊าพย๊า อาเหล่โอ่ เด๊อ จ๊อทว๊า ตากยา เฮ๊เร๊อ, แว เก่ พย๊า เป่ดื่อ เน เด๊อ จ๊อจิ ตากยา ปา.” 10คูโลท ตู่แม๊ เก๊เถ่ เด๊อ จอร์แดน แลโหมะทือ เก่ตอกู, อา ตื๊อดื่อ จว๊าโต่ เด๊อ วีโศอาร์ เนอโตโกลลอ. เร๊อ อาแม๊เถอะซิเง เน๊อ เทอ แร๋ เป่ แหน่เจ๊อ ลู เบ๊อะเนอ. เร๊อ เหล่โอ่ เบ๊อะเนอโต๊โผะ หม่า อาตว่า แซ่เจ๊อเน๊อ จอแปแหร่ ตูจูเพร อาเตเร๊กู, อาเร แซ่เจ๊อเน๊อ อียิปต์เก่ เนอเจ๊อ. อาตว่าอาเร ฮู๊เออเนอ หม่า เบ๊อะ จอแปแหร่ ตูจูเพร เมจากาคยา แต่ล๋าย วีโสโดม เน๊อ วีโกโมราห์ โต่ เบ๊อะเนอ แพ๊. #เห่ขุทวาลู่ ๒:๑๐ 11ฮู๊เนออาขว่าอาคยา, คูโลท นว๊าพย๊าแก จอร์แดน แลโหมะทือ เก่ตอกู เนอโตโกล ลอ, โทเร๊อ อา เถ่จว๊าแก เด๊อ เบ๊เถ่ ตากยา. โป่แหว่กลุยแล ลู ซิเนอเออ, เตเพร ตูกูกู๋ อา จว๊าเปโค๊แก ลอ ลู. 12คูอับราม เร๊อ อา โอ่แก แก เด๊อ คานาอันเก่กู, หม่าแน๊เรอ คูโลท ติ เร๊อ อา จว๊าโอ่ โค๊แก เด๊อ วี โอ่ เด๊อ เก่ตอกู เนอ เต๊เห่, เร๊อ อา จว๊าช๊อ โอ่ผื่อ อาเหล่สื่อเหล่แบ่ เต๊เห่ เด๊อ วีโสโดม ช๊า เนอตากยา. 13เบ๊อะเนอเค, วีโสโดมพู๊ เต๊เห่ อาซิปล่อ มู๊แหม่รีแจ่ แหน่เจ๊อ เร๊อ อา เมซื๊อเมปล๊า ดุ แหน่เจ๊อ จอแปแหร่ ตูจูเพร. 14เบ๊อะ คูโลท จว๊าเปโค๊แก โทเฮ๊อ เน๊อ คูอับราม เบ๊อะเนอ, จอแปแหร่ ตูจูเพร เฮ๊ คูอับราม เน๊อ, “โอ่ เบ๊อะ เน เหล่โอ่ เนอโต๊โผะ เร๊อ แม๊โท, แม๊แล, แม๊เถ่, แม๊โน ตาวา เน๊อ เนเหน่ เนอ. 15เร๊อ เห่ขุ เด๊อ ล๋อ เน แม๊เถอะ กู๊แหน่ เออเต๊เห่เนอ, แว เก่ เด๊อะ เป่ เน๊อ เน เน๊อ เนพู๊เนเลอ เต๊เห่ อาเง ตูจู๋ เพร ปา.#เพรโด่แนพู๊ เต๊เห่ ๗:๕ 16แว เก่ นอ โอ่เอ๊แถ่ เนพู๊เนเลอ เต๊เห่ แซ่เจ๊อเน๊อ เห่หมื่อ เนอ เจ๊อ ปา. แกแย เตเพรเพร เด๊อ อา แด๊ ลอเป่เบ๊ เห่หมื่อ เนอ, อา เก่ แด๊ ลอเป่เบ๊ เนพู๊เนเลอ เต๊เห่ ปา. 17จว๊ามอ, จว๊าเล ตาวาลอ มอ เด๊อ เก่กู เออ, แว เก่ เด๊อะ เฮ๊อ เน๊อ เน ปา.”
18ฮู๊เนออาขว่าอาคยา, คูอับราม ย๊าโพร๊จว๊า อาเหล่สื่อเหล่แบ่ เต๊เห่ เร๊อ อา จว๊า ช๊อโอ่ผื่อ เด๊อ คูมัมเร อาส่อเหมาะดุเจ๊แร๊ เหล่โอ่ เบ๊อะ วีเฮโบรน เนอโต๊โผะ, เร๊อ อา ต่าแถ่แตแถ่ หนิ เป่ เด๊อ จอแปแหร่ ตูจูเพร อาเง เตหลู่แตเหร่ เน๊อหล่อ เบ๊อะเนอ เต๊เหร่.
Currently Selected:
เห่ขุทวาลู่ 13: EKTNTGEN
Highlight
Share
Copy
Want to have your highlights saved across all your devices? Sign up or sign in
Wycliffe USA
