ยอห์น 6
6
แบ่เจ่ เหย่ซู่ โบ่เอ่ แกแย แงรี๊
(มัทธิว ๑๔:๑๓-๒๑, มาระโก ๖:๓๐-๔๔, ลูกา ๙:๑๐-๑๗)
1ฮู๊เนอโทเรอ, เหย่ซู่ เถ่จว๊าแก เด๊อ กาลิลี เทออ่อดุ อาแบ๊เร ตากยา. (อู เอ๊ เร๊อ ทิเบเรียส เทออ่อดุ หม่า อาหม่าหม่า.) 2แกแย เบ๊หมู่ ลอ แม๊เถอะ โทเฮ๊อ เตโค๊ตีกลี๊คยา เด๊อ แบ่เจ่ จว๊า เมโอ่เหม่ เป่ แกแยชุ๊ย แกแยเชเต๊เห่ อาขว่าอาคยา, เหย่ซี ครวา จว๊าปลูจว๊าเผ่ เกอ ลอ ลูคยา. 3เร๊อ แบ่เจ่ เหย่ซู่ แถ่ เด๊อ โฉ่ขุ เร๊อ อา โคเจ่ เต๊เห่ แถ่ โอ่แนโอ่ แลแค เบ๊อะเนอ. 4เบ๊อะเนอ. อาเค แกแยยิวพู๊ ป่วยเตจว๊า ตา ลว๊า เออ อา ผื่อ เบ่ เฮ๊อ.
5เบ๊อะแบ่เจ่ เหย่ซู่ แม๊ เร๊อ อา แม๊เถอะ แกแย ตู๊หมู่ดุ แฮ โต เด๊อ ลูโอ่ เนอ, อา เฮ๊ คูฟีลิป เน๊อ, “เป เก่ จว๊า พรีเอ่ โต เป่แกแย เออเต๊เห่ เหล่เอ่ เบ๊อะเออ?” 6อา แด๊เฮอ แม๊บย่าแพ๊ คูฟีลิป แพ๊. อา เตเร เม เป่ เหย่ซี ฮู๊เต ปาเนอ, อา เตเน หนื่ออื่อ โทเฮ๊อ เด๊อ อา ซิปล่อกู เฮ๊อ.
7คูฟีลิป เฮ๊ฉื่อ เน๊อ, “เป พรีเอ่ ลอ เป่ เจ๊อ เหย่ซี เร๊อ รือหย่า เดนาริอัน โต๊โก่#6:7 รือหย่า เดนาริอัน เต๊เบ่ หม่า อา ครือแน เร๊อ เตอเนอ อาแรเต คว๊าเก่. เบ๊อะเนอ เจ๊อ หม่า, เหย่ซี เอ่ แพ๊ เตเพร ตือมือ เน๋อ อาโป่เอ่โต่.”
8อา โคเจ่ เด๊อ อาโร เตเพร เด๊อ อามุย เร๊อ คูอันดรูว์, อา หม่าดื่อ คูซีโมน เปโตร อาโป่ เออเตเพร เฮ๊ แบ่เจ่ เน๊อ, 9“เป๊เจ่ เพรคู โอ่ เบ๊อะเออ เตเพร. อาค๊อมู เด๊อ อู เม เร๊อ โบ๊บาลีเนอ อา โอ่ แงกล่อ เร๊อ เต๊วฮู๊เนอเบ่. หม่าแน๊เรอ อา เก่ โป่เอ่ เป่ แกแย บ๊าเพรเต?”
10แบ่เจ่ เหย่ซู่ เฮ๊ เน๊อ, “นอ โอ่แนโอ่ แกแย เนอเต๊เห่,” อา เฮ๊ ฮู๊เนอ. เหล่โอ่ เบ๊อะเนอ โต๊โผ่ หม่า มี ออขุ อาตว่าแร๊ลา เร๊อ โชชื่อแพ๊ ล๋อ เพรคูดุ เด๊อ อา โอ่แนตา เบ๊อะเนอ เต๊เห่เนอ, อา ผื๋อ โอ่ดื่อ แงรี๊ เจ๊อ. 11แบ่เจ่ เหย่ซู่ พย๊า ค๊อมู เออเต๊เห่ เร๊อ อา เฮ๊บุ๊ยเฮ๊เตอเรอแถ่ จอแปแหร่. โทเรอ อา เด๊อะตา เร๊อ อา โคเจ่ เต๊เห่ เร๊อ เหย่ซี เด๊อะตาแฮเง เป่ลอ เร๊อ แกแย โอ่แนโอ่ เบ๊อะเนอ เต๊เห่. อา พย๊า เต๊วฮู๊ปีตี๊ เออ เนอเบ่ เร๊อ อา เม แซ่เกอ ฮู๊ ค๊อมูเนอ. เร๊อ แกแย เออเต๊เห่ อา ซิเอ่ เกอ เจ๊อ บ๋า เตเนอ อา พย๊าเอ่ แลแค เจ๊อ.
12เบ๊อะเหย่ซี เอ่ก๊อโอบา ลอโทเฮ๊อ ปว๋า เตเพร เบ๊อะเนอ, แบ่เจ่ เหย่ซู่ เฮ๊ อา โคเจ่ เต๊เห่ เน๊อ, “พย๊าดว้าปล๊อ ลอคยา เหล่เอ่ โอ่เล๊อแก เนอเต๊เห่, นอโอ่แกเล๊อ เด แต่เหม่,” อา เฮ๊ เหย่ซี ฮู๊เนอ. 13ฮู๊เนอเรอ อา โคเจ่ เต๊เห่ พย๊าดว้า ค๊อมู บาลี แงกล่อ เด๊อ อู เอ่ โทเฮ๊อ เร๊อ อา โอ่แกเล๊อ เต๊เห่เนอ อา โอ่บา ปา เจ๊อ เร๊อ ขริเนอ เช๊อเนอเม เจ๊อ.
14เบ๊อะแกแย เออเต๊เห่ แม๊เถอะโท แบ่เจ่ เหย่ซู่ เม เตโค๊ตีกลี๊คยา เออเต๊เห่ เบ๊อะเนอ, เหย่ซี เฮ๊ แลแค เน๊อ, “เพรโพร เด๊อ อา เตเร แฮแล เด๊อ เห่ขุเออ ปา อู เฮ๊ เนอหม่า อา หม่า แหน่ เฮ๊อ อา เฮ๊อ,” อา เฮ๊ แลแค ฮู๊เนอ. 15แบ่เจ่ เหย่ซู่ ซิเง เร๊อ เหย่ซี เตเร แฮนอแถ่ ทวา ลู เร๊อ คุ๊ย อาขว่าอาคยา, อา จว๊าแถ่ โค๊แก เด๊อ โฉ่ขุ ตื๊อดื่อ เตเพร แพ๊.
แบ่เจ่ เหย่ซู่ จว๊า เด๊อ เทอขุ
(มัทธิว ๑๔:๒๒-๒๗, มาระโก ๖:๔๕-๕๒)
16เบ๊อะเหมาะเฮ๊แล เฮ๊อ เบ๊อะเนอ, อา โคเจ่ เต๊เห่ ตากาแล จว๊า แลแค เด๊อ เทออ่อดุทือ. 17เหย่ซี ตา แถ่แด๊หนิ ส่อเกลอ เบ๊อะเนอ เร๊อ อา เถ่จว๊า แลแค เด๊อ วีคาเปอรนาอูม. วีเออเนอ อา โอ่ เด๊อ เทออ่อ แบ๊เร ตากยา. เหมาะคี๊เฮ๊อ ตื๊อดื่อเรอ แบ่เจ่ เหย่ซู่ กาโต่ แต่เฮ๊อ เหย่ซี โต่. 18เก่แลเซ๊ ดุแฮ เร๊อ เทอ ฮ๊าโฮ๊ดุฮ๊าโฮ๊ชอ แฮ. 19เบ๊อะเหย่ซี แคจว๊าโต่ เฮ๊อ แงกิโล หม่าโต่เรอ กิโลโซซว๊า เบ๊อะเนอ, เหย่ซี แม๊เถอะ แบ่เจ่ เหย่ซู่ จว๊า เด๊อ เทอขุ เร๊อ แฮผื่อโต เหย่ซี ส่อเกลอ. เร๊อ เหย่ซี ซิอิเช ต๊อหร่อเซ๊ ลอปลี เจ๊อ ลูเหล่. 20เร๊อ แบ่เจ่ เหย่ซู่ เฮ๊ เหย่ซี เน๊อ, “แวแพ๊! ซิอิเช แลแค แต่เหม่.” 21เออโตโพ๊เรอ เหย่ซี ซิครือซิลอ เอ๊ฉื่อ แลแค เหย่ซู่ เด๊อ ส่อเกลอกู เร๊อ ตื๊อหื่อโต, ส่อเกลอเออ จว๊าโต่ เด๊อ เทอทือ เบ๊อะเหย่ซี เหล่จว๊าเออ โต๊โผ่.
แกแย เบ๊หมู่ แม๊ปู แบ่เจ่ เหย่ซู่
22ช๋าป่าโร เตอเนอเนอ, แกแย เบ๊หมู่ เด๊อ อา โอ่แก เด๊อ เทออ่อดุ แบ๊เร ตากยา เต๊เห่ ซิเง เร๊อ เด๊อ ป่าเฮ๊เนอเค เนอ ส่อเกลอ โอ่แกแพ๊ เต๊เบ่ แพ๊. เร๊อ แบ่เจ่ อา โคเจ่ เต๊เห่ แถ่แด๊หนิ แลแค ส่อเกลอ เนอเต๊เบ่ เร๊อ อา เถ่จว๊า เกอเร๊อดื่อ แลแค แพ๊. แกแย เบ๊หมู่ เต๊เห่ ซิเง เร๊อ แบ่เจ่ เหย่ซู่ แถ่แด๊จว๊า เต่อเกอ เร๊อ อา โคเจ่ เนอเต๊เห่ โต่, เหย่ซี เถ่จว๊า เกอเร๊อดื่อ แลแค แพ๊. 23โทเรอ ส่อเกลอ โอ่ เด๊อ วีทิเบเรียส เร๊อ อา แฮ เต๊เห่เนอ, อา แฮ โอ่โก๊ ผื่อ แลแค เบ๊อะแบ่เจ่ เหล่ เฮ๊บุ๊ยเฮ๊เตอเรอ แถ่ จอแปแหร่ เร๊อ อา โบ่เอ่ แกแย เบ๊หมู่ เต๊เห่ เร๊อ ค๊อมู อาเหล่โอ่ เนอโต๊โผะ. 24เบ๊อะแกแย เบ๊หมู่ เต๊เห่ แม๊เถอะ ปา แบ่เจ่ เหย่ซู่ เร๊อ อา โคเจ่ เต๊เห่ เบ๊อะเนอ โต่ อาเค, แซ่ฮู๊ เหย่ซี เก่ จว๊า แม๊ปู แม๊เถอะ แบ่เจ่ เหย่ซู่ อาเงเนอ, เหย่ซี โน แลแค เด๊อ ส่อเกลอ เต๊เห่ อากู เร๊อ เถ่จว๊า แลแค เด๊อ วีคาเปอรนาอูม.
แบ่เจ่ เหย่ซู่ หม่า เหล่เอ่ เด๊อ อา เด๊อะ อู เตเซอเพร
25เบ๊อะเหย่ซี จว๊า แม๊เถอะเฮ๊อ เหย่ซู่ เด๊อ เทออ่อดุ แบ๊เร เบ๊อะเนอ, อา แด๊เฮอ ลู เน๊อ, “รับบี, เน แฮโต่ เบ๊อะเออ บ๊อเกเต?”
26แบ่เจ่ เหย่ซู่ เฮ๊ฉื่อ เหย่ซี เน๊อ, “แว เฮ๊จ๊อจ๊อ ซี, ซี แม๊เถอะ แว เม เตโค๊ตีกลี๊คยา เร๊อ ซี แม๊ปู แว หม่าโต่. ซี เอ่ก๊อ ค๊อมู เร๊อ ซี แม๊ปู แว แพ๊. 27จ่าเพรอ แรเป่ เต เหล่เอ่เหล่โอ เด๊อ อา โนโส่ อา ซอปย๊า แจ่ เนอเต๊เห่ อาเง แต่เหม่. จ่าเพรอ แรเป่ เหล่เอ่เหล่โอ เด๊อ อา เก่ เด๊อะ ซี ซิปล่อเซอเพร ตูจูเพร เออเต๊เห่ อาเงเนอ. แกแยเห่ขุ พู๊คูเออ, อา เก่ เด๊อะ อู เหล่เอ่ ฮู๊เนอ เต๊เห่ ปา, เมเตเฮ๊เรอ เพ จอแปแหร่ เด๊อะโล เฮ๊อ เร๊อ อา ซิปล่อโอ่ เฮ๊อ ลู เฮ๊อ.”
28เร๊อ เหย่ซี แด๊เฮอ ลู เน๊อ, “เก่ เฮ๊ฮู๊เนอ เนอ, แซ่ฮู๊ เป เก่ เมโต จอแปแหร่ อาซิปล่อ เร๊อ เป เบ่เม แคร๋ หม่าอิเต?”
29เร๊อ แบ่เจ่ เหย่ซู่ เฮ๊ฉื่อ เหย่ซี เน๊อ, “หยื่อเอ่ แลแค แว เด๊อ จอแปแหร่ นอแฮ อา เออเนอ.”
30ฮู๊เนอเร๊อ เหย่ซี แด๊เฮอ ลู เน๊อ, “แซ่ฮู๊ เป เก่ แม๊เถอะ เตโค๊ตีกลี๊คยา เร๊อ เป เก่ หยื่อเอ่ อาเงเนอ, เน เก่ เด๊อะโล เป่ เป เตโค๊ตีกลี๊ อิเตเต ปา? เน เก่ เม เป่ เป หม่าอิเตปา เออ? 31ฮู๊ ลีเทส่อพ๊า เฮ๊ เน๊อ, ‘อา เด๊อะเอ่ เหย่ซี เร๊อ เหล่เอ่ โอ่ เด๊อ ม๊อขุ แฮแล เต๊เห่,’ #เถ่จว๊าแลเปล๊ ๑๖:๔,๑๕, ถู่เซ๊แถ่ ๗๘:๒๔ ลีเทส่อพ๊า เฮ๊ฮู๊เนอ เนอ, เปเพอเปโพ เด๊อ หนู่เค เต๊เห่ เอ่ แลแค ค๊อมู เด๊อ อู เอ๊ เร๊อ มานา เด๊อ เก่เชเทอแก หล่อตาม๊าขุ เนอ.”
32แบ่เจ่ เหย่ซู่ เฮ๊ฉื่อ เหย่ซี เน๊อ, “แว เฮ๊จ๊อจ๊อ ซี, เหล่เอ่ โอ่เด๊อ ม๊อขุ ตาแล เนอหม่า, คูโมเสส เด๊อะเอ่ เหย่ซี หม่าโต่. แวเพ เด๊อะเอ่ เหย่ซี แพ๊. กู๊แหน่เรอ อา เก่ เด๊อะเอ่ เฮ๊อ ซีเหล่เอ่ หม่าแหน่ เด๊อ อา โอ่ เด๊อ ม๊อขุ ตาแล เออเนอ ปา. 33เมเตเฮ๊เรอ จอแปแหร่ อาเหล่เอ่ หม่าแหน่ หม่า อา โอ่ เด๊อ ม๊อขุ ตาแล เร๊อ อา เด๊อะเป่ แกแย เห่ขุพู๊ ซิปล่อเซอเพร เนอเตเพร เฮ๊อ,” อา เฮ๊ เหย่ซี ฮู๊เนอ.
34เร๊อ เหย่ซี เฮ๊ เน๊อ, “แบ่เจ่, ปว๋า เนอเน๋อ เด๊อะ เป่ เป เหล่เอ่เออเนอ.”
35เร๊อ แบ่เจ่ เหย่ซู่ เฮ๊ฉื่อ เหย่ซี เน๊อ, “แว หม่า เหล่เอ่ เด๊อ อา เด๊อะ อู ซิปล่อเซอ เพร เฮ๊อ. แกแย เด๊อ อา แฮโต เด๊อ แวโอ่ เนอ, อา ซิกู๊ซิวี ปา โตโพ๋ โต่. แกแย เด๊อ อา หยื่อเอ่ แว เนอ, อา ซิโอปา แตแค๋ โต่. 36หม่าแน๊เรอ, ฮู๊ แว เฮ๊โทเฮ๊อ ซีเนอ, ซี แม๊เถอะ เจ๊อ แว ตื๊อดื่อเรอ ซี หยื่อเอ่ แว โต่. 37ล๋อ แกแย เด๊อ แวเพ เด๊อะ แว เต๊เห่เนอ, อา เก่ แฮ เด๊อ แวโอ่ ปา. อูเปเป๋ เบ่เบ่, อา เก่ แฮ เด๊อ แวโอ่ เนอ, แว เหว่เถ่แก เร๊อ อา ตีกี๋ โต่. 38เมเตเฮ๊เรอ แว โอ่เด๊อ ม๊อขุ แฮแล เร๊อ แว แฮเม จู๋ ดื่อ แว ซิปล่อ ฮู๊เนอ หม่าโต่. แว แฮเม ฮู๊ เพร เด๊อ อา นอแฮ แว เออเตเพร อา เตซิหยื่อ เนอแพ๊. 39เต เด๊อ อาโต เพร เด๊อ อา นอแฮ แว เออเตเพร อาซิปล่อ หม่า หม่าเต เฮ๊เนอหม่า, ล๋อ แกแย เด๊อ อา เด๊อะ แว เนอเต๊เห่ แว เบ่ปลวา โอ่เหม่แกหนิ เหย่ซี โต่. ช๋า ม๊อเนอ เด๊อ คยาตื๊อดื่อเล๊อ เตอเนอ ปาเนอ, แว เบ่เม ก๊อถ่อเซอเพร กาคยา เหย่ซี ปา. 40เมเตเฮ๊เรอ, แวเพ อา เตซิหยื่อ หม่า หม่าเฮ๊อ ล๋อ แกแย เด๊อ อา แม๊เถอะ อาพู๊คู เออ เร๊อ อา หยื่อเอ่ เต๊เห่เนอ, อา เก่ พย๊าหนิ ซิปล่อเซอเพร ตูจูเพร, เร๊อ แว เก่ เม ก๊อถ่อเซอเพร กาคยา เหย่ซี ช๋า ม๊อเนอ เด๊อคยา ตื๊อดื่อเล๊อ เนอเตอเนอ ปา.”
41“แว หม่า เหล่เอ่ โอ่เด๊อ ม๊อขุ แฮแล,” แบ่เจ่ เหย่ซู่ ย๋อ เฮ๊ ฮู๊เนอ อาขว่าอาคยา, แกแยยิวพู๊ เต๊เห่ ตามวาเตเล ลอปลี ลู. 42เหย่ซี เฮ๊ แลแค เน๊อ, “อา หม่า เพโยเซฟ อาพู๊คู เหย่ซู่ เฮ๊เนอ เตเพร แพ๊ แวเฮ๊โต่? อาโหมะอาเพ หม่า เป ซิเง แพ๊ แวเฮ๊? หม่าเมเตเร๊อ อา จว๊า เฮ๊โต่ เกอเร๊อ อาเหน่ เน๊อ, ‘แว โอ่ เด๊อ ม๊อขุ แฮแล’ ฮู๊เต?”
43แบ่เจ่ เหย่ซู่ เฮ๊ฉื่อ เหย่ซี เน๊อ, “ตามวาเตเล ปา แต่ แลแค แต่เหม่. 44เก่ หม่า เน๊อ แวเพ เด๊อ อา นอแฮ แวเออ เตเพร เก่ นอแฮ อู เด๊อ แวโอ่ โต่ เฮ๊เนอ, อู จว๊าเบ๊ เด๊อ แว โอ่ เตเพร่ว โต่. แกแย เด๊อ อา แฮ เด๊อ แวโอ่ เต๊เห่เนอ, แว เก่ เม ก๊อถ่อเซอเพร กาคยา เหย่ซี ช๋า ม๊อเนอ เด๊อคยา ตื๊อดื่อเล๊อ เตอเนอ ปา. 45เพรโพร เต๊เห่ ราโอ่แก เน๊อ, ‘จอแปแหร่ เก่ อิซว๊าอี๊แส่ เหย่ซี ล๋อ ปลี ปา.’#อิสยาห์ ๕๔:๑๓ ล๋อ แกแย เด๊อ อา หนิโฮ เพ อา เตอิซว๊าอี๊แส่ เร๊อ อา แฮ อิซว๊าอี๊แส่ เต เด๊อ ลูโอ่ เต๊เห่เนอ, อา เก่ แฮ เด๊อ แวโอ่ ปา. 46แกแย แม๊เถอะน๊อ เพ จอแปแหร่ เตเพรเพร, แว ซิหยื่อ เฮ๊ ฮู๊เนอ หม่าโต่. อู แม๊เถอะน๊อ เพ เตเพร่ว โต่, อู แม๊เถอะน๊อ เพ หม่า ตือแพ๊ อา โอ่ เด๊อ จอแปแหร่ อา โอ่ เร๊อ อา ตาแล เนอเตเพร แพ๊. 47แว เฮ๊จ๊อจ๊อ ซี, แกแย เด๊อ อา หยื่อเอ่ แว เตเพรเพร เนอ, อา เก่ พย๊าหนิเฮ๊อ ซิปล่อเซอเพร ตูจูเพร เฮ๊อ. 48แว หม่า เหล่เอ่ เด๊อ อา เด๊อะ อู ซิปล่อเซอเพร. 49ซี เพอโพ เด๋อ หนู่เค เต๊เห่ เอ่ ค๊อมูมานา ตื๊อดื่อเรอ อา เซอปา แลแค แพ๊. 50หม่าแน๊เรอ, เหล่เอ่ โอ่ เด๊อ ม๊อขุ แฮแล แว เฮ๊ ซี เนอหม่า, อา โอ่ เบ๊อะเออ. อูเปเป๋ เบ่เบ่, อา เก่ เอ่ เหล่เอ่ เออ เฮ๊เนอหม่า, อา เซอ ปาโต่. 51แว หม่า เหล่เอ่ เด๊อ อา เด๊อะอู ซิปล่อเซอเพร เร๊อ อา โอ่ เด๊อ ม๊อขุ ตาแล. อูเปเป๋ เบ่เบ่, อา เก่ เอ่ เหล่เอ่ เออเนอ, อา เก่ เซอเพร ตูจูเพร ปา. เหล่เอ่ เออเนอหมา หม่าเฮ๊อ แวหย่า เออเนอ เฮ๊อ. แซ่ฮู๊ แกแย เห่ขุพู๊ เก่ เซอเพร อาเงเนอ แว เด๊อะแลแก แว เหน่กล่อ เออ เด๊อ เหย่ซีเง เฮ๊อ.”
52แกแยยิวพู๊ เต๊เห่ เคร๊เซอเคร๊โอ่ เกอเร๊อลู เน๊อ, “อา จว๊า เด๊อะเอ่ แจ่ เป เร๊อ อาหย่า ฮู๊เต?”
53เร๊อ แบ่เจ่ เหย่ซู่ เฮ๊ฉื่อ เหย่ซี เน๊อ, “แว เฮ๊จ๊อจ๊อ ซี, ซี เก่ เอ่ แกแยพู๊คู เออ อาหย่า โต่, ซี เก่ โอ ลูสุ่ย โต่ เฮ๊เนอหม่า, ซิปล่อเซอเพร โอ่ เด๊อ ซีเหน่ลู โต่. 54หม่าแน๊เรอ แกแย เด๊อ อา เอ่ แวหย่า โอ แวสุ่ย เต๊เห่เนอ, อา พย๊าหนิ ซิปล่อเซอเพร ตูจูเพร, เร๊อ ช๋า ม๊อเนอ ตื๊อดื่อ เด๊อ คยาเล๊อ เตอเนอ ปาเนอ, แว เก่ เมเซอเพร ก๊อถ่อกาคยา ลู ปา. 55เมเตเฮ๊เรอ แวหย่า หม่า เหล่เอ่ หม่าแหน่, แวสุ่ย หม่า เหล่โอ หม่าแหน่ เฮ๊อ. 56แกแย เด๊อ อา เอ่ แวหย่า โอ แวสุ่ย เตเพรเพร เนอ, อา โอ่เซอเพร เด๊อ แวกู, เร๊อ แว โอ่เซอเพร เด๊อ ลูกู เฮ๊อ. 57ฮู๊ แวเพ เด๊อ อา นอแฮ แวเออ เตเพร เซอเพร เนอ, เด๊อ อาขว่าอาคยา, เร๊อ แว เซอเพร เกอ. ฮู๊เนอเร๊อ แกแย เด๊อ อา เอ่ แวหย่า เตเพรเพร เนอ, เด๊อ แวขว่าแวคยา, เร๊อ อา เก่ เซอเพร เกอ ปา. 58เออ หม่า เหล่เอ่ โอ่เด๊อ ม๊อขุ แฮ เฮ๊อ. ซีเพอซีโพ มู๋ หนู่เค เต๊เห่ เอ่ ค๊อมูมานา ตื๊อดื่อเรอ อา เซอ แลแค แพ๊. หม่าแน๊เรอ แกแย เด๊อ อา เอ่ เหล่เอ่ เด๊อ แว เฮ๊ เป่ ซี กู๊แหน่ เออเต๊เห่เนอ อา เก่ เซอเพร ตูจูเพร ปา.” 59เบ๊อะอา อิซว๊าตา อู เด๊อ วีคาเปอรนาอูม เตจ๊อเบ โฮกู เบ๊อะเนอ, อา เฮ๊ อู ฮู๊เนอ.
อาโคฮู๊เจ่ วี๊แก ลูโอ่โร๊ลู
60เหย่ซี หนิโฮ แบ่เจ่ เหย่ซู่ เฮ๊ฮู๊เนอ เน๊อ, อา โคเจ่ โอ่โร๊ลู เฮ๊ แลแค เน๊อ, “อา เตอิซว๊า เออ อาแหย่ แหน่เจ๊อ. อูเป เตเพร เตเร หยื่อเอ่พย๊าฉื่อ เบ๊เกอ อา เตอิซว๊าเออ เป?”
61อา โคเจ่ เต๊เห่ ตามวาเตเล แลแค ฮู๊เออเนอ อา ซิเง อาขว่าอาคยา, อา เฮ๊ เหย่ซี เน๊อ, “แว เฮ๊ ฮู๊เออ เร๊อ ซี ซิปล่อปย๊า ลอ แลแค เร๊อ แว เตอิซว๊า เออเต๊เห่ แอ? 62เก่ เมฮู๊เนอ เฮ๊เรอ, ซี แม๊เถอะ แกแยพู๊คูเออ เก่ กากี๊แถ่ คยาแซ๊ เด๊อ อาเหล่โกล เหล่โอ่ ปา เฮ๊เรอ, ซี เก่ เตเน แลแค ฮู๊เต ปา? 63แหย่โยบูโพ๊แบ่เจ่ เนอ อา เด๊อะ ซิปล่อเซอเพร ตูจูเพร. แกแยเห่ขุพู๊ เนอ, อา เด๊อะ แจ่ ซิปล่อเซอเพร ตูจูเพร โต่. โหง่ เด๊อ แว เฮ๊เบ่ ซี เออเต๊เห่ เนอหม่า, แหย่โยบูโพ๊แบ่เจ่ อา เตเฮ๊เบ่ เต๊เห่ เร๊อ อา เด๊อะเบ๊ อู ซิปล่อเซอเพร ตูจูเพร. 64หม่าแน๊เรอ เด๊อ ซีเกล เนอ, แกแย เด๊อ อา หยื่อเอ่ เกออู โต่เนอ อา โอ่ เต๊เห่.” เมเตเฮ๊เรอ แบ่เจ่ เหย่ซู่ ซิเง ปา เจ๊อ เด๊อ อาแก่ช๊า เนอ, เด๊อ เหย่ซีเกล เนอ อา หยื่อเอ่ ลู โต่, เร๊อ อา เก่ อิเซตาแก ลู ปาเนอ อา โอ่เตเพรเนอ, อา ซิเง เร๊อ อา เฮ๊ เหย่ซี ฮู๊เนอ แพ๊. 65อา เฮ๊ เป่แฮ โป่ เน๊อ, “เด๊อ ซีเกลเนอ แกแย หยื่อเอ่ แว โต่ โอ่เต๊เห่, ตื๊อเรอ แว เฮ๊ เฮ๊อ ซี เนอ, เพ เก่ นอแฮ อู เด๊อ แวโอ่ โต่ เฮ๊เนอ อู จว๊าเบ๊ เด๊อ แวโอ่ เตเพร่ว โต่, ฮู๊เนอ เฮ๊อ.”
66เป๊อแถ่ เบ๊อะเนอ เร๊อ อา โคฮู๊เจ่ เต๊เห่ กาแก โร๊ลา เร๊อ ครวาเกอ ปา ลูคยา โต่.
67เร๊อ อา แด๊เฮอ อา โคเจ่ เช๊อซิเนอ เออเต๊เห่ เน๊อ, “ซีเล, ซี ซิหยื่อ เถ่กาคยา เกอ แวเหล่ ฮู๊เนอ แวเฮ๊โต่?” อา เฮ๊ เหย่ซี ฮู๊เนอ.
68คูซีโมน เปโตร เฮ๊ กาคยาฉื่อ ลู เน๊อ, “แบ่เจ่, เป เตเร จว๊าโต เกอ อูเป? เตอิซว๊าอี๊แส่ เด๊อ อา เด๊อะ เป ซิปล่อเซอเพร ตูจูเพร เนอ อา โอ่ แพ๊ดื่อ เด๊อ เนโอ่ แพ๊.#มัทธิว ๑๖:๑๖, มาระโก ๘:๒๙, ลูกา ๙:๒๐ 69เป หยื่อเอ่ เร๊อ เป ซิเง เร๊อ เน หม่า จอแปแหร่ อา แกแยบูโพ๊พู๊ เตเพร, เร๊อ อา นอแฮแล เน เฮ๊อ.”
70โทเรอ แบ่เจ่ เหย่ซู่ เฮ๊ฉื่อ เหย่ซี เน๊อ, “แว นว๊าแถ่ โทเฮ๊อ ซี เช๊อซิเนอ, หม่าโต่ แอ? หม่าแน๊เรอ, เด๊อ ซีเกล เนอ, โลเน๊มู๊แหม่ กู่กล๊อ โอ่โตโด, อา เฮ๊ เหย่ซี ฮู๊เนอ.” 71(อา เฮ๊ฮู๊เออหม่า อา ซิหยื่อ เฮ๊ เพซีโมน อิสคาริโอท อาพู๊ คูยูดาส. อา หม่า อา โอ่เต่อเกอ เด๊อ เช๊อซิเนอเออ อาเกล ตื๊อดื่อเรอ เด๊อคยาปาเนอ อา อิเชตาแก แบ่เจ่ เหย่ซู่.)
Currently Selected:
ยอห์น 6: EKTNTGEN
Highlight
Share
Copy
Want to have your highlights saved across all your devices? Sign up or sign in
Wycliffe USA
