ลูกา 8

เพรเหมาะ เด๊อ อา ครวาจว๊าเกอ เหย่ซู่ อาคยา เต๊เห่

1เด๊อเง งยาแต๋โต่ เนอ, เหย่ซู่ เถ่จว๊าแก เร๊อ อา จว๊าโน ตอดอ โท ตอดอ, ตีวี โท ตีวี, เร๊อ อา จว๊าเล แด๊โฉ่โด่แน เป่ อู เร๊อ จอแปแหร่ อาเทออาเก่ อา เตซิครือมีลา อาหรี่อาแก. เร๊อ อา โคเจ่ เช๊อซิเนอ ครวาจว๊า เกอ ลูคยา. 2โท๊โต่ เพรเหมาะ เด๊อ โลเน๊ เมเบ่ ลู เร๊อ เหย่ซู่ เหว่เถ่แก เป่ ลู เต๊เห่, เร๊อ อาชุ๊ยอาเช แลแค เร๊อ เหย่ซู่ แหย่โอ่เหม่ เป่ ลู เต๊เห่เนอ, อา ครวาจว๊า เต่อเกอ. เหย่ซี เออเต๊เห่ เนอหม่า แคร๋ อูเป เฮ๊เนอหม่า, เหมาะมารีย์ (เด๊อ อู เอ๊ ลู เร๊อ มักดาลา ดอกูโหมะ), อา หม่า โลเน๊ โซซว๊าโตโด โอ่ เด๊อ ลูเหน่ เร๊อ เหย่ซู่ เหว่เถ่แก เป่ ลู เนอเตเพร เฮ๊อ เร๊อ อา ครวาจว๊า เต่อเกอ.#มัทธิว ๒๗:๕๕-๕๖, มาระโก ๑๕:๔๐-๔๑, ลูกา ๒๓:๔๙ 3โทเร๊อ คูคูซา เด๊อ อา แม๊ตู่หนิ เป่ คุ๊ยเฮโรด อา ตาหมื่อตาเต เด๊อ จ๊อแผ่ โฮกูเนอ เตเพร อาเม โหมะโยอันนา เร๊อ เหมาะสูสันนา เร๊อ เพรเหมาะ เด๊อ อาโร เต๊เห่ ครวาจว๊าเต่อ เอ๊ เกอลา ลู. เพรเหมาะ เออเต๊เห่เนอ, แซ่ฮู๊ เหย่ซี เก่ เมจว่าเกอ หนิ เหย่ซู่ เร๊อ อา เพรโด่แนพู๊ เออเต๊เห่เนอเรอ, เหย่ซี ลอแก หนิเร๊อดื่อ แลแค อารืออาเท เร๊อ อา ครวาจว๊าเกอ เหย่ซี อาคยา.

เฮ๊เบ่ ค๊าโข่ เป่ อู เร๊อ เพรเว๊อตา เตกลุยเตลุ๊ย อาหรี่อาแก

(มัทธิว ๑๓:๑-๙, มาระโก ๔:๑-๙)

4เบ๊อะแกแย เบ๊หมู่ เด๊อ อา แฮ โอ่โร่ ตีวี โท ตีวี เต๊เห่ แฮโอ่ปล๊อ ตาฉื่อลอ ลู เด๊อ แบ่เจ่ เหย่ซู่ โอ่ เบ๊อะเนอ, แบ่เจ่ เฮ๊เบ่โข่ เป่ เหย่ซี เร๊อ โหง่ค๊าโข่ โต๊โต่ เร๊อ อา เฮ๊ เนอ, 5“เบ๊อะเตอโพ๊ เพรแฮเพร๊ โอ่ เตเพร เร๊อ เตอเนอเค อา จว๊า เว๊อตา เตกลุย. เร๊อ เบ๊อะอา เว๊อตา เตกลุย เด๊อ เพร๊ขุ เบ๊อะเนอ, เต๊เห่เห่เนอ อา ลูตา เด๊อ แกล๊เดกู, เร๊อ อู หยิตาพร๊อ เร๊อ จว๊า ลอปลี ลู, โท๊โต่ ถู่พู๊โหย่พู๊ เต๊เห่ แฮอิโพเอ่แกลอ ลู. 6เต๊เห่เห่เนอ อา ลูตาโต เด๊อ หล่อเกล เร๊อ เบ๊อะอา แด๊แถ่ เบ๊อะเนอ, เห่ขุ ย๋อ จีอี โต่ อาขว่าอาคยา, อาเหมาะ คราเซอ ชีเหมาะลอ แพ๊. 7เต๊เห่เห่เนอ, อา ลูตาโต เด๊อ ส่อแช๊ส่อกิเกล เร๊อ อา ดุแถ่ เตอเร๊อ ส่อแช๊ส่อกิ อาขว่าอาคยา, ส่อแช๊ส่อกิ ดุแถ่ แค๊บี๊ ลอปลี ลู. 8เร๊อ เตกลุย เต๊เห่เห่เนอ อา ลูตาโต เด๊อ เห่หย่ารีหย่าแร๊ เร๊อ อา แด๊แถ่ดุแถ่ เร๊อ อาเส่เถ่ เอ๊เล๊อ เจ๊อ อาปุ๊ย เตเย.”

โทเร๊อ เหย่ซู่ เอ๊โท เร๊อ อา เฮ๊ เน๊อ, “ฮู๊เนอเรอ, แกแย เด๊อ อาโอ่ เร๊อ อากู๊หลิโกะ เต๊เห่เนอ, นอ หนิดา แลแค เหย่ซี.”

โด่แน ค๊าโข่ เป่ อู เร๊อ เตเซเร หนื่ออื่อ อาหรี่อาแก

(มัทธิว ๑๓:๑๐-๑๗, มาระโก ๔:๑๐-๑๒)

9เตโด่แน ค๊าโข่ เออโต๊โต่เนอ อา ซิ เฮ๊ อาโหง่แลช๊า ฮู๊เตเนอ, อา โคเจ่ เต๊เห่ แด๊เฮอ ลู. 10เร๊อ อา เฮ๊ เป่ เหย่ซี เน๊อ, “จอแปแหร่ เด๊อซิเงโปล เป่เฮ๊อ ซี เร๊อ อา เทอเลเก่กู อา เตซิคว๊าซิเง เด๊อ อา ด๊อโอ๊ด๊อบี๊ เต๊เห่ เฮ๊อ ตื๊อดื่อเรอ แกแย เด๊อ อาโร เต๊เห่ อาเงเนอ แว เฮ๊เบ่ เป่ เหย่ซี เร๊อ โหง่ค๊าโข่ แพ๊.#อิสยาห์ ๖:๙

‘เหย่ซี แม๊ แลแค เต เด๊อ แว เม เนอเต๊เห่ ตื๊อดื่อเรอ แซ่ฮู๊ เหย่ซี แม๊เถอะ ซิเงโปล เกออู อาโหง่แลช๊า โต่, เหย่ซี หนิดา ตื๊อดื่อเรอ แซ่ฮู๊ เหย่ซี ซิเงโปล เกอ อู โต่,’”#อิสยาห์ ๖:๙-๑๐ อาเงเนอ, แว เฮ๊ เป่ เหย่ซี เร๊อ โหง่ค๊าโข่ แพ๊.

เหย่ซู่ โด่แนโปล เป่ เหย่ซี เร๊อ เพรเว๊อตา เตกลุย เตโด่แน ค๊าโข่ อาโหง่แลช๊า

(มัทธิว ๑๓:๑๘-๒๓, มาระโก ๔:๑๓-๒๐)

11“เตโด่แน ค๊าโข่ เออโต๊โต่เนอ อาโหง่แลช๊า แฮ ฮู๊เต เฮ๊เรอ, เตกลุย อาโหง่แลช๊า หม่า จอแปแหร่ อาลาอาโหง่ เฮ๊อ. 12เตกลุย เด๊อ อา เว๊อตาแก จว๊ารว๊า แกล๊ลู อาโหง่แลช๊า หม่า หม่าเฮ๊อ แกแย เด๊อ อา หนิโฮ แลแค จอแปแหร่ อาลาอาโหง่ ตื๊อดื่อเรอ โลเน๊ กู่กล๊อ แฮพย๊า ตาพาเผ่แก จอแปแหร่ อาลาอาโหง่ เด๊อ เหย่ซี ซิปล่อกู. โท๊โต่ แซ่ฮู๊ เหย่ซี ซิปล่อ อา ดี๊ดู๊ดี๊แด เด๊อ เตหยื่อเตแหน่ อากู เร๊อ อา พย๊าหนิ ดื่อ เตเมแลเปล๊กา แต่เหม่เนอ เร๊อ โลเน๊ กู่กล๊อ แฮเม ฮู๊เนอ แพ๊. 13เตกลุย ตา เด๊อ หล่อเกล อาโหง่แลช๊า เนอหม่า หม่าเฮ๊อ แกแย เด๊อ อา หนิโฮ จอแปแหร่ อาลาอาโหง่ เต๊เห่ เร๊อ อา ซิครือซิลอ พย๊าฉื่อ แลแค ตื๊อดื่อเรอ อาแซ่เน๊อ เตกลุย เด๊อ อาหรุ่ย ช๊าตาแยโต่. เร๊อ เหย่ซี หยื่อเอ่ แลแค แพ๊ แตแปล๊เตอเปลอ แพ๊ เร๊อ เบ๊อะเหล่จา ป่อชิเต่อ เหย่ซี เบ๊อะเนอ, อา เตหยื่อเตแหน่ โอ่เหม่แก แพ๊. 14เตกลุย ลูตาโต เด๊อ ส่อแช๊ส่อกิเกล อาโหง่แลช๊า เออเนอหมา หม่าเฮ๊อ แกแย เด๊อ อา หนิโฮ จอแปแหร่ อาลาอาโหง่ เออเต๊เห่เนอ เฮ๊อ. หม่าแน๊เรอ, เบ๊อะอา โอ่เซอเพร แฮเง เบ๊อะเนอ, เตเนกู่เตเนแก, เตดุแหย่แถ่เซ เต๊เห่ เร๊อ อา โมแหน่เร๊อ เออเตอทือ อา เตซิหยื่อซิลอ เต๊เห่ แค๊บี๊ปุยบี๊ ลอ เหย่ซี ฮู๊ ส่อแช๊ส่อกิ แค๊ปุยบี๊ เนอ อาขว่าอาคยา, อาเส่อาโพ เบ๊เกอ ปา อู โตโพ๋ โต่ เฮ๊อ. 15เตกลุย ลูตาโต เด๊อ เห่หย่ารีหย่าแร๊ อาโหง่แลช๊า หม่า หม่าเฮ๊อ แกแย เด๊อ อา หนิโฮ จอแปแหร่ อาลาอาโหง่ เร๊อ อา หยื่อเอ่ จ๊อจื้อ เร๊อ อา โตเร๊อ พย๊าหม่า เด๊อ อา ซิปล่อกู, โท๊โต่ อา หนิดา แร๊ จอแปแหร่ โหง่ เร๊อ อา ข่าแด่ทูซิปล่อ โต่ เจ๊อ เด๊อ อาเส่เถ่โพเถ่เจ๊อ.

หมิเคว๊กอ เด๊อ อู โตโกลบี๊ ลู เร๊อ เหล่โตโกล๊บี๊

(มาระโก ๔:๒๑-๒๕)

16“อู ชีลี โท หมิ เร๊อ อูโตโกล๊บี๊ ลู เร๊อ ปู๊เนอ อา โอ่ เตเพร่ว โต่. หม่าโต่เรอ อู แด่ ลู เด๊อ เหล่โต่ อาเลเนอ อา โอ่ เตเพร่ว โต่. แซ่ฮู๊ อา เก่ ลี เป่ แกแย เด๊อ อา แฮโน เต๊เห่ อาเง เนอ, อู ชีลีโท ลู เร๊อ อู แด่แถ่ ลู เด๊อ หมิเคว๊กอเหร่ขุ.#มัทธิว ๕:๑๕, ลูกา ๑๑:๓๓ 17เตปว๋า เต๊อเจ่อ เด๊อ อู แด่โอ๊ อา เต๊เห่เนอ, จอแปแหร่ อา เด๊อะโอ่โลเถ่ อา ปา. เร๊อ เตปว๋า เต๊อเจ่อ เด๊อ อู เมบี๊ อาเนอ, จอแปแหร่ อา เด๊อซิเง เถ่โล อา ปา.#มัทธิว ๑๐:๒๖, ลูกา ๑๒:๒ 18เบ๊อะซี หนิดา เต เบ๊อะเนอ, หนิดา ตาเต แลแค, เมเตเฮ๊เรอ แกแย เด๊อ อา ซิเง ตาเต โทเฮ๊อ จอแปแหร่ อาเทออาเก่ เต๊เห่เนอ, จอแปแหร่ เก่ เด๊อซิเง โอ่เอ๊แถ่ เล๊อโป่ ลู เร๊อ อา อาเหล่โกล เออเนอ ปา. หม่าแน๊เรอ แกแย เด๊อ อา ซิเง แพ๊ ตี๊กิแพ๊ เต๊เห่เนอ, จอแปแหร่ อา พย๊าเผ่แก ลอเผ่ โป่ อา ปา.”#มัทธิว ๒๕:๒๙, ลูกา ๑๙:๒๖

เหย่ซู่ อาโหมะ เร๊อ อาโป่แหม่ เต๊เห่

(มัทธิว ๑๒:๔๖-๕๐, มาระโก ๓:๓๑-๓๕)

19เหย่ซู่ อาโหมะ เร๊อ อา โป่เพร่คู เต๊เห่ แฮ เด๊อ ลูโอ่, หม่าแน๊เรอ อู ย๋อ โอ่โหร่โอ่เอ๊ ตาลว๊าซิลือ อาขว่าอาคยา, เหย่ซี แฮโน โต่ทว๊าเบ๊ เด๊อ ลูโอ่ โต่. 20แกแย เต๊เห่ เฮ๊ ลู เน๊อ, “เนโหมะ เร๊อ เน โป่เพรคู เต๊เห่ แฮก๊อถ่อ โอ่ป่อ เน เด๊อ อากลอเนอ. เหย่ซี ซิหยื่อ แม๊เถอะ เร๊อ เน เฮ๊เนอ.”

21เหย่ซู่ เฮ๊ฉื่อ เหย่ซี เน๊อ, “ล๋อ แกแย เด๊อ อา หนิโฮ จอแปแหร่ อาลาอาโหง่ เร๊อ อา หยื่อเอ่แลแค เต๊เห่ เนอหม่า แวโหมะ เร๊อ แวโป่แวแหม่ ล๋อ ปลี เฮ๊อ.”

เหย่ซู่ นอโอ่โก๊ เก่แลเซ๊แลแล

(มัทธิว ๘:๒๓-๒๗, มาระโก ๔:๓๕-๔๑)

22เตอเนอเนอ เหย่ซู่ เร๊อ อา โคเจ่ เต๊เห่ จว๊าโน เด๊อ ส่อเกลอ เต๊เบ่ อากู เร๊อ อา เฮ๊ เหย่ซี เน๊อ, “เป เถ่จว๊า เด๊อ เทออ่อแบ๊เร เนอตากยา โป๋” เร๊อ เหย่ซี เถ่จว๊า แลแค. 23เบ๊อะเหย่ซี เถ่จว๊า เบ๊อะเนอ, เหย่ซู่ โอ่เมอตาป่า, เร๊อ เบ๊อะเนอ อาเค, เก่แลเซ๊ แลแล แฮดุ, เทอฮ๊าโฮ๊ โนบาลอ เด๊อ ส่อเกลอกู, เร๊อ เหย่ซี เบ่ยอ ลอปลี เจ๊อ ปว๋า เตเพร.

24อา โคเจ่ เต๊เห่ จว๊า ถู่แรก๊อถ่อ ลู เร๊อ อา เฮ๊ ลู เน๊อ, “เก๋อ ซ๊าร๊า, เก๋อ ซ๊าร๊า! เป เตเร แลจื๊อเซอ ลอเฮ๊อ!”

เหย่ซู่ ป่าก๊อถ่อ เร๊อ อา ซิพรวาแว เก่แลเซ๊ เร๊อ เทอฮ๊าโฮ๊ เร๊อ เก่แลเซ๊ โอ่โก๊โอ่โส่แก เร๊อ เทอโตโจโจ๊โอ่เจ๊อ. 25เร๊อ อา เฮ๊ อา โคเจ่ เต๊เห่ เน๊อ, “ซี เตหยื่อเตแหน่ โอ่โต ลอแคร๊ เบ๊อะเต?”

เหย่ซี คย๊าอายื๊อ ลอปลี เจ๊อ, โท๊โต่ เหย่ซี ซิอิเช แลแค เร๊อ อา เฮ๊ เกอเร๊อลู เน๊อ, “อา หม่า แกแย ฮู๊เต เต๊อเจ่อเต? อา ซิพรวาแพ๊ เก่แลเซ๊ เร๊อ เทอฮ๊าโฮ๊ แพ๊ เร๊อ อา หนิดา เจ๊อ ลู โหง่ โง๋.”

แบ่เจ่เหย่ซู่ แหย่โอ่เหม่ แกแย เด๊อ โลเน๊ เมเบ่ ลู เตเพร

(มัทธิว ๘:๒๘-๓๔, มาระโก ๕:๑-๒๐)

26แบ่เจ่ เร๊อ อา โคเจ่ เต๊เห่ จว๊าโต่ เด๊อ เกราชาเก่. เกราชา. เออเนอหมา อา โอ่ เบ๊อะเทออ่อดุ เบ๊เร กาลิลี เก่กูเนอ 27เบ๊อะเหย่ซู่ แถ่เฮ๊อ เด๊อ โคขุ เบ๊อะเนอ, อา แม๊เถอะ ตาฉื่อ เร๊อ วีกู เด๊อ โลเน๊ เมเบ่ ลู เตเพร เบ๊อะเนอ. อา โอ่กะโกล อางยาลาเฮ๊อ, เหร่ออา โอ่เกออู เด๊อ หี่ โต่, อา เถ่จว๊า โอ่ แพ๊ เด๊อ โลกู เด๊อ อู โล๊ โนโอ่ เร๊อ โลเออเนอ อากู แพ๊. 28เบ๊อะอา แม๊เถอะ เหย่ซู่ เบ๊อะเนอ, อา จ่าเพรอ เอ๊โท เร๊อ อา จว๊า แด๊งือแล เด๊อ เหย่ซู่ แบ๊เส่เง เร๊อ อา จ่าเพรอ เอ๊โทเฮ๊เบ่ เน๊อ, “เตดุเตทู ตื๊อดื่อ จอแปแหร่ อาพู๊คู เหย่ซู่, เน เตเร แฮเม แคร๋ แว อิเต? แว กุยซิยอ เน, เมจาเมจือ แต่ แว แต่เหม่ นี๋.” 29เหย่ซู่ ย๋อ เวเถ่ โทเฮ๊อ โลเน๊ เออ เด๊อ อา เก่ เบ่ เถ่จว๊าแก เด๊อ แกแยเพ เออเตเพร อาลู อาขว่าอาคยา, อา เฮ๊ ลู ฮู๊เนอแพ๊ โลเน๊ เมเบ่จา เมเบ่จือ โตโมโม เจ๊อ ลู เร๊อ อู จอกลอ หม่า เจ๊อ ลูกู๊ขุ เร๊อกู๊โด่ เร๊อ ซู๊เปลอต่อเท๊ โท๊โต่ อู โอ่ป่อหม่าแหน่ เจ๊อ ลู ตื๊อดื่อเรอ อา จุ่ย ตือแก เป่ แพ๊ ซู๊เปลอต่อเท๊ แพ๊. เร๊อ โลเน๊ นอเถ่จว๊าแก ลู เด๊อ เก่เชเทอแก หล่อตาม๊าขุ.

30เหย่ซู่ แด๊เฮอ ลู เน๊อ, “เนมุย เร๊อ อูเป?”

เร๊อ อา เฮ๊ฉื่อ เน๊อ, “แวมุย เร๊อ โอ่ปล๊อโอ่ปลู,#8:30 แกแยกริกพู๊อาโหง่หม่า เอ๊เน๊อ, “เล๊จิเหย่อ,” เล๊จิเหย่อ หม่า อาโอ่กล่อพู๊ แงรี๊โต๊โผ่เจ๊อ” เมเตเฮ๊เรอ โลเน๊ ย๋อ แฮ โนโอ่ เอ๊แหน่เจ๊อ เฮ๊อ เด๊อ ลูเหน่กู เฮ๊อ. 31แซ่ฮู๊ เหย่ซู่ เก่ เด๊อะเตจา วีตาแก ดื่อ เหย่ซี เด๊อ ครอกูแย แต่เหม่เนอเนอ, โลเน๊ เออเต๊เห่ กุยซิยอ แลแค แบ่เจ่ เหย่ซู่.

32เบ๊อะเนอเค, แท๊ ตู๊หมู่ตอกล๊อ กู่นู๊เอ่ ตีวี๊ตาวาผื่อ อาเหล่เอ่ เบ๊อะโฉ่หร่าลูเนอ. เร๊อ โลเน๊ เต๊เห่ กุยซิยอ เหย่ซู่ เน๊อ, “นอจว๊าโน โอ่ เร๊อ เป เด๊อ แท๊ เนอตู๊หมู่ อากูนี๋.” เร๊อ เหย่ซู่ นอจว๊าโน โอ่แก เหย่ซี เบ๊อะเนอ. 33ฮู๊เนอเรอ โลเน๊ เออเต๊เห่ เถ่จว๊าแก เด๊อ แกแยเพ เนอเตเพร อากู เร๊อ อา จว๊าโนโอ่แก เด๊อ แท๊ เนอตู๊หมู่ อากู. เออโตโพ๊เรอ แท๊ เออตู๊หมู่ อี๊ฉ่าตา รว๊า หล่าแตแน๊ เนอ อาลู เร๊อ อา แลตาแลจื๊อ เซอแก ลอ เด๊อ เทออ่อดุกู.

34เพรเกแท๊ เต๊เห่ แม๊เถอะ เตเหม่ทวาแถ่ อาเหน่ ฮู๊เออ เร๊อ อา แกล่กา แด๊โฉ่โล จว๊าเป่ ลอ อู เด๊อ วีกู เน๊อ เด๊อดอเด๊อโฉ่ เต๊เห่ อากู เน๊อ เตหรี่เตแก เออเต๊เห่. 35เตเมอาเหน่ ฮู๊เออ เร๊อ แกแย เต๊เห่ เถ่จว๊าแม๊ แลแค. เหย่ซี แฮโต่ เด๊อ เหย่ซู่ โอ่ เร๊อ อา แม๊เถอะ แลแค แกแยเพ เด๊อ โลเน๊ เต๊เห่ เถ่จว๊าแก เด๊อ ลูกู เนอเตเพร ซิปล่อแร๊ กาคยา เฮ๊อ เร๊อ อา โอ่แนโอ่ เบ๊อะเหย่ซู่ อาช๊า เร๊อ อา กือแซ๊แถ่ แร๊ ลอ คยาแซ๊ อาเห่อจา. เหย่ซี แม๊เถอะ ลู เร๊อ อา ซิอิเช ลอปลี เจ๊อ ลูเหล่. 36แกแย เด๊อ อา แม๊เถอะ เหย่ซู่ แหย่โอ่เหม่ กาคยา โลเน๊ เมเบ่ ลู เออเตเพร เร๊อ อาเหน่ เร๊อ อา เมแคร๋ ฮู๊เตเนอ, อา โด่แนโปล เป่ อู. 37เตเมโทอาเหน่ ฮู๊เนอเรอ, ล๋อ แกแย เด๊อ อา โอ่ ตีวี๊ตาวา เบ๊อะเกราชาเก่ ทือ เนอเต๊เห่ ซิอิเช ตาลว๊าซิลือ อาขว่าอาคยา, เหย่ซี กุยซิยอ เหย่ซู่ เร๊อ อา นอจว๊า ตาพาแก เร๊อ เหย่ซี เบ๊อะเนอ. เร๊อ เหย่ซู่ เถ่จว๊า แถ่โน เด๊อ ส่อเกลอกู เร๊อ อา กาเด๊อกาลิลีเก่.

38แกแยเพ เด๊อ โลเน๊ เถ่จว๊าแก โทเฮ๊อ เด๊อ ลูฮ๊อกู เออเตเพรเนอ อา กุยซิยอ เหย่ซู่ เน๊อ, “เอ๊ครวาจว๊า เป่เกอเร๊อ แว,” หม่าแน๊เรอ เหย่ซู่ จู ลู โต่, เร๊อ อา เฮ๊ กาคยาฉื่อ ลู เนอ, 39“จอแปแหร่ เม โค๊ตีกลี๊คยา แคร๊ อิเตอาดุอาแย เด๊อ เนเง ฮู๊เตเนอ, กา เด๊อ เนหี่ เนอ เร๊อ กาเฮ๊โฉ่โล เป่ เกอ อูโร เต๊เห่ นี๋.” เร๊อ แกแยเพ เออเตเพร กาโน เด๊อ วีกู เร๊อ เหย่ซู่ เม เป่ แคร๊ ลู ฮู๊เตเนอ, อา จว๊าเล แด๊โฉ่โล เป่ ลอปลี อู.

เพไยรัส อาพู๊เพรเหมาะ เร๊อ เพรเหมาะ เด๊อ อา เต่อเบ่ เหย่ซู่ อาจา เตเพร

(มัทธิว ๙:๑๘-๒๖, มาระโก ๕:๒๑-๔๓)

40เบ๊อะเหย่ซู่ กาคยา คยาแซ๊ เด๊อ เทออ่อดุ เบ๊เร ตากยา เบ๊อะเนอ, แกแย เบ๊หมู่เออ ย๋อ โอ่ป่อแม๊ชือ ลอปลี เฮ๊อ ลู อาขว่าอาคยา, เหย่ซี เอ๊โมฉื่อ ลู. 41โทเร๊อ เตจ๊อเบโฮกู กู่กล๊อดุ เด๊อ อามุย เร๊อ เพไยรัส เฮ๊ เออเตเพร แฮโต่ เด๊อ เหย่ซู่ โอ่ เร๊อ อา แฮ แด๊งือแล เด๊อ ลู กู๊โด่ซ๊า, เร๊อ อา กุยซิยอ เหย่ซู่ เร๊อ อา เก่ ครวากาเกอ เด๊อ อาหี่. 42เมเตเฮ๊เรอ อา พู๊เพร เหมาะ โอ่แพ๊ เตเพรเพร่ว แพ๊ เร๊อ อา หน่าโอ่เฮ๊อ เช๊อเนอหน่า เออเตเพร เตเร เซอตีลี ลาเฮ๊อ อาขว่าอาคยา, อา จว๊า เอ๊กา เหย่ซู่ เด๊อ อาหี่ แพ๊.

เบ๊อะเหย่ซู่ ครวากาเกอ ลู เด๊อ แกล๊ลู เบ๊อะเนอ, แกแย ครวา ดุ๊ยแฮยาแฮ โอ่ปลูโอ่บี๊ลอ อา ดีโค๊ดีเง เจ๊อ. 43เพรเหมาะ เด๊อ อา ข่าเบ่ เตชุ๊ยเตเช เด๊อ อา งยา เจ๊อเฮ๊อ เช๊อเนอหน่า เนอ อา โอ่ เตเพร. หม่าแน๊เรอ อู แหย่โอ่เหม่เบ๊ เป่ ลูเนอ, อา โอ่ เตเพร่ว โต่. #8:43 ลีเทส่อพ๊า มู๋ หนู่เค เต๊เห่เห่เนอ, อา ราโนโต หนิ, “แซ่ฮู๊ อาเตชุ๊ย เก่ โอ่เหม่ อาเงเนอ, อา เอ๊แหย่เตขุซ๊าร๊า เร๊อตาเต เด๊อ อา โอ่ เน๊อ ลู เต๊เห่เนอ อา ลอ เจ๊อเฮ๊อ” 44อา แฮโน เด๊อ แกแย โอ่โหร่โอ่เอ๊ เกล เร๊อ อา ครวาจว๊าเกอ เด๊อ เหย่ซู่ คยา, เร๊อ อา แฮ เต่อเบ่ เหย่ซู่ จาแกแลแจ, เร๊อ อา เตเซ สุ่ยตา เออเนอ อา โอ่โก๊ โตโพ๊ โอ่เหม่แก เจ๊อ.

45เหย่ซู่ แด๊เฮอ อู เน๊อ, “อูเป เต่อเบ่ แว เป?”

อู โซ๊โซ่อาโอ่ ลอปลี ปว๋า เตเพร เร๊อ คูเปโตร เฮ๊ฉื่อ ลู เน๊อ, “ซ๊าร๊า, อู ดุ๊ยแฮยาแฮ ลอ แหน่ เน เนอ.”

46หม่าแน๊เรอ เหย่ซู่ เฮ๊ฉื่อ เน๊อ, “แกแย แฮเต่อ เบ่ข่อ แหน่ดื่อ แว เตเพร, เมเตเฮ๊เรอ แว เตโพรเตเตอเรอ เถ่จว๊าแก เด๊อ แวเหน่ เนอ แว ซิเง.”

47เออโตโพ๊เรอ เพรเหมาะ เออเตเพร ซิเงเฮ๊อ เน๊อ อา โอ่ ตาดวาโอบี๊ แจ่ ปา โต่ เบ๊อะเนอ, อา แฮแด๊งือแล แตแนตากยา เด๊อ เหย่ซู่ อาเป๊เส่เง. อา จว๊าแฮโต่เบ่ โต่ เหย่ซู่ เมเตเนอ, อา แด๊โฉ่โล ลอ อู เด๊อ แกแย ปว๋า เตเพร อา เป๊เส่เง, โท๊โต่ อา เฮ๊โฉ่โลหนิ เป่ โป่ อู เร๊อ อา โต่เบ่โท ลู เร๊อ อาเตเช โอ่เหม่ โตโพ๊ โอ่เหม่ เจ๊อ. 48เร๊อ เหย่ซู่ เฮ๊ ลู เน๊อ, “พู๊หม๋อ, เน เตหยื่อ เออเนอ, อา แหย่โอ่เหม่ แกเฮ๊อ เน เตเชเฮ๊อ, กาโมโม กาแร๊แร๊ ดื่อนี๋.”

49เบ๊อะเหย่ซู่ เฮ๊เบ่ปาแพ๊ เบ๊อะเนอ, แกแย เตเพร โอ่ เด๊อ เพไยรัส เด๊อ อา ทวา เตจ๊อเบโฮ กู่กล๊อ เออเตเพร อาหี่แฮ, เร๊อ อา แฮแด๊โฉ่ เป่ เพไยรัส เน๊อ, “เนพู๊เหมาะ เซอเฮ๊อ, เมดี๊แด ปา แต่ ซ๊าร๊า แต่เหม่.”

50เหย่ซู่ หนิโฮ เต๊เออ เร๊อ อา เฮ๊ เพไยรัส เน๊อ, “เบ่ยอ แต่เหม่, ตูรู๊ หยื่อเอ่ แว เนอ นี๋, เนพู๊เหมาะ เก่ เซอเพร กาคยา คยาแซ๊ ดื่อ ปา.”

51เบ๊อะอา จว๊าโต่ เด๊อ หี่ เบ๊อะเนอ, อา เด๊อะโน อู เด๊อ หี่ด๊อกู เตเพร่ว โต่, อา เอ๊โนหนิ ตือแพ๊ คูเปโตร, คูยอห์น, คูยากอบ เร๊อ เป๊เจ่โหมะ เออเตเพร อาโหมะอาเพ แพ๊. 52แกแย โอ่ เบ๊อะเนอ เต๊เห่ โหง่เห่ เกอเร๊อลอ เป๊เจ่เพร เหมาะ เออเตเพร. หม่าแน๊เรอ เหย่ซู่ เฮ๊ เหย่ซี เน๊อ, “โหง่ แลแค แต่เหม่ เป๊เจ่เพรเหมาะฮู๊ เออเตเพรเนอ, อา อาเซอ หม่าโต่, อา โอ่เมอ ตาปา แพ๊!”

53เหย่ซี ซิเง แลแค เร๊อ เป๊เจ่โหมะพู๊ เออเตเพรเนอ อา เซอเฮ๊อ อาขว่าอาคยา, เหย่ซี งยาโคร ลอปลี ลู. 54หม่าแน๊เรอ เหย่ซู่ ปื่อ เป๊เจ่โหมะพู๊ เออเตเพร อากู๊ขุ เร๊อ อา เฮ๊ ลู เน๊อ, “พู๊หม๋อ ก๊อถ่อ ม๋อ!” 55อา ซิปล่อเซอเพร กาโน คยาแซ๊ เร๊อ อา ก๊อถ่อ โตโพ๊ ก๊อถ่อ เจ๊อ. เร๊อ เหย่ซู่ เฮ๊ เหย่ซี เน๊อ เด๊อะเอ่ เป่ ลู เหล่เอ่ เต๊อเจ่อเจ่อ เนอ. 56อาโหมะอาเพ คย๊าอายื๊อ ลอปลี เจ๊อ, หม่าแน๊เรอ เหย่ซู่ เฮ๊แก เหย่ซี โหง่ เน๊อ แว เม ฮู๊เออ เนอ จว๊า แด๊โฉ่ เป่ แต่ อู เตเพร่ว แต่เหม่ นี๋.

Currently Selected:

ลูกา 8: EKTNTGEN

Highlight

Copy