โรม เตเฮ๊เบ่ เหร่อ เด๊อะ เง
เตเฮ๊เบ่ เหร่อ เด๊อะ เง
คูเปาโล ราจว๊า เป่ ลีเออเนอ เด๊อ วีโรม เพรหยื่อเอ่เต ตู๊หมู่ตอกล๊อ เต๊เห่ อาโอ่, ลี เออเนอหมา หม่าเฮ๊อ อา ตี๊หรี่แตแร เด๊อะรอ หนื่ออื่อ เร๊อ อา เต เตเนหนื่ออื่อ เด๊อ อา เก่ จว๊าโอ่เลโอ่ เกอ วีโรม เพรหยื่อเอ่เต ตู๊หมู่ตอกล๊อ เต๊เห่ ปา อาหรี่อาแก แพ๊. อา เต เตเนหนื่ออื่อ หม่าอิเต เฮ๊เรอ, อา เก่ จว๊า เมเต่อเกอ เต เร๊อ ครี๊พู๊ เบ๊อะเนอเต๊เห่ แตแปล๊เตอเปลอ ปา. โทปาเรอ เหย่ซี เบ๊อะเนอเต๊เห่ เก่ เมจว่า ลู เด๊อ อา เก่ จว๊า แฮเง โป่ เด๊อ สเปนเก่. ฮู๊ อา ซิเง ครี๊พู๊ อา เตหยื่อเตแหน่ เร๊อ ครี๊พู๊ โต โอ่เซอเพร ครวา เมเกอ เต๊เห่เนอ, อา รา เฮ๊โฉ่โลโปล เป่ลอ อู. คูเปาโล เด๊อะโล เป่ อู ครี๊พู๊ อา โอ่เซอเพร อาหรี่อาแก เต๊เห่ อาเกลเนอ, ลีเออต๊าบ่า เนอหม่า อาเล๊ออาบา เล๊ออู เฮ๊อ.
คูเปาโล เฮ๊โมเฮ๊แร๊ โรมัน เพรหยื่อเอ่เต ตู๊หมู่ตอกล๊อ เต๊เห่ เร๊อ อา แด๊โฉ่โล เป่ โท เหย่ซี เร๊อ อา เตกุยจ๊อเบ เป่ เด๊อ เหยซีเง เต๊เห่. โทเฮ๊อ เออโตโพ๊เรอ อา เฮ๊โล เป่ เหย่ซี เน๊อ เต เด๊อ อา ซิหยื่อ รา ลีเออ อา แก่ช๊ากูลู่ อาหรี่อาแก. เตหรี่เตแก อา แก่ช๊ากูลู่ หม่า หม่าเฮ๊อ “จอแปแหร่ แด่จ๊อแด่เต เฮ๊อ แกแย เต๊เห่ เร๊อ อาเหน่ เร๊อดื่อ ฮู๊เตเนอ, เตซิครือมีลา เออ เด๊อะโลแถ่ อาโล เฮ๊อ. เตจ๊อเตเต เออเนอหมา อา เป๊อแถ่ เร๊อ เตหยื่อ เร๊อ อา ตื๊อดื่อ เร๊อ เตหยื่อ.” (๑:๑๗)
โทเรอ คูเปาโล แด๊โฉ่โล เอ๊แถ่โป่ เตหรี่เตแก อา แก่ช๊ากูลู่ เออ. แกแยยิวพู๊ เต๊เห่ เบ่เบ่, แกแยยิวพู๊ หม่าโต่ เต๊เห่ เบ่เบ่, จอแปแหร่ โหล่ เมจ๊อเมเต กา ลอปลี เหย่ซี ปว๋า เตเพร, เมเตเฮ๊เรอ แกแย ปว๋า เตเพร โอ่ แซ่ลอ ลู เด๊อ เตซื๊อเตปล๊า อา เตอเรอฉว่าชอ อาเล แพ๊. เด๊อ แกแยเห่ขุพู๊ หยื่อเอ่ ครี๊ อาขว่าอาคยาเร๊อ, จอแปแหร่ แด่จ๊อแด่เต เฮ๊อ เหย่ซี. โทเรอ คูเปาโล แด๊โฉ่โล โป่ เร๊อ เตโอ่เซอเพร อาเซ เด๊อ เป พย๊าหนิ เออเนอหมา หม่า เด๊อ เป ทวาแถ่ เตเตอเจ๋อ โต เร๊อ ครี๊ เฮ๊อ อาขว่าอาคยา แพ๊, อา แด๊โฉ่โล เป่ โป่ ฮู๊เนอ. เพรหยื่อเอ่ เออ เต๊เห่เนอ, อา พย๊าหนิ แลแค เฮ๊อ เตเปเตดวา เร๊อ จอแปแหร่ เฮ๊อ, โท๊โต่ เตซื๊อ เร๊อ เตเซอ อา เตอเรอฉว่าชอ ปื่อหม่า เหย่ซี เออเนอ, จอแปแหร่ อา แหย่โยบูโพ๊ ปลวาเถ่ เปอเลอ จว๊า เฮ๊อ เหย่ซี เฮ๊อ เบ๊อะอามาดุ ๕-๘ อากูเนอ, คูเปาโล เฮ๊โฉ่โปล เป่ โป่ เร๊อ จอแปแหร่ อา เหล่เตเน แม๊ชือ หนื่ออื่อ อา เตซว๊าเตแส่ เต๊เห่ อาหรี่อาแก เร๊อ แหย่โยบูโพ๊ แบ่เจ่ อา เตโพรเตเตอเรอ ฉว่าชอเออ ถู่แหล่ เต๊เปล่ เป่ อู เตโอ่เซอเพร อาเซ อาหรี่อาแก. โท๊โต่ แกแยยิวพู๊ เต๊เห่ อาเง เบ่เบ่, แกแยยิวพู๊ หม่าโต่ เต๊เห่ อาเง เน๊อ จอแปแหร่ เตเนหนื่ออื่อ เป่ ลอแคร๋ อู ปว๋า เตเพร ฮู๊เตเนอ, คูเปาโล เฮ๊โฉ่โปล เป่ ลอ อู เฮ๊อ. แซ่ฮู๊ แกแย ปว๋า เตเพร เก่ พย๊าหนิ แฮเง เกอ แลแค จอแปแหร่ อาบุ๊ยดุอาเตอเรอทู เด๊อ เหย่ซู่ครี๊ อา โอ่ อาเงเนอเรอ, แกแยยิวพู๊ เต๊เห่ วีแก แก แบ่เจ่ เหย่ซู่ครี๊ แพ๊. อา เม ฮู๊เออเนอหม่า จอแปแหร่ อา เต เตเนหนื่ออื่อ แพ๊. หม่าแน๊เรอ เพรราลีเออ หยื่อเอ่ เร๊อ แกแยยิวพู๊ เต๊เห่เนอ, อา วีแก ลา เร๊อ แบ่เจ่ เหย่ซู่ โต่, อา เฮ๊ปลื๊อแก อาโหง่ ฮู๊เนอ. เด๊อคยา ตื๊อดื่อ เร๊อ คูเปาโล ราโล เป่ เร๊อ ครี๊พู๊ เต๊เห่ โตเบ่ โอ่เซอเพร แด่ แลแค อา ซิปล่อสู่เทอ ฮู๊เต, โท๊โต่ อา โหล่ดุเล๋อ หม่า เบ๊อะเหย่ซี แบ๊ซว๊าแบ๊โค เร๊อ แกแย เด๊อ อาโร เต๊เห่ อาเค, อา โต เด๊อะโล แลแค อาเตโม ฮู๊เตเนอ, อา ราโลโปล เป่ ฮู๊เนอ. อา ราโล เน๊อ เม จอแปแหร่ อา เตเอ่เตแร อาหรี่อาแก, โทเรอ ครี๊พู๊ เต๊เห่ โตเบ่ หนิดา คุ๊ยจ๊อแผ่ เด๊อ อา เป๊อเทอเก่ เต๊เห่ อาโหง่. เร๊อ อา โตเบ่ โมเร๊อ ลู เมจวาหนิ ลู เตเพร เร๊อ เตเพร. เร๊อ อา เมตื๊อดื่อแก อาลี เออต๊าบ่า เร๊อ อา เตเฮ๊โมเฮ๊แร๊ เต๊เห่ เน๊อ อา เตถู่เซ๊แถ่ จอแปแหร่ เต๊เห่ แพ๊.
เตเฮ๊เบ่ โต๊โต่ เร๊อ โต๊โต่
เตเฮ๊เบ่ เหร่อ เด๊อะ เง เร๊อ เตหรี่เตแก อาแก่ช๊าแกแร เต๊เห่ ๑:๑-๑๗
แกแย ปว๋า เตเพร โหล่ เตเมแลเปล๊กา ๑:๑๘-๓:๒๐
จอแปแหร่ อา เตเมแลเปล๊กา อู อาแกล๊อาโกล ๓:๒๑-๔:๒๕
เตโอ่เซอเพร อาเซ เด๊อ ครี๊กู ๕:๑-๘:๓๙
จอแปแหร่ อา เต เตเนหนื่ออื่อ เป่ อิสราเอลพู๊ เต๊เห่ ๙:๑-๑๑:๓๖
ครี๊พู๊ อา เตแด่ ซิปล่อสู่เทอ ๑๒:๑-๑๕:๑๓
เตเฮ๊เบ่ ตื๊อดื่อแก เด๊อคยา เร๊อ เตเฮ๊โมเฮ๊แร๊ เต๊เห่ ๑๕:๑๔-๑๖:๒๗
Currently Selected:
โรม เตเฮ๊เบ่ เหร่อ เด๊อะ เง: EKTNTGEN
Highlight
Share
Compare
Copy
Want to have your highlights saved across all your devices? Sign up or sign in
Wycliffe USA