Mǒhtûlû̌hǎhtûsa 25
25
PhaAbraha ata̤si kû̌ akhlialè tokhlǒ
1PhaAbraha phî̌tèplè̌ sô̌ ama tôpwa̤ dě ami̤ kû̌ Mǒ̤ketǔra. 2A phû̌ô̌ nǐ̤bǎ lû̌û phû̌pwa̤khû tokhlǒ dě ami̤ lô̌khô kû̌ Khûsǔro, Khûyûshǎ, Khûmǔdǎ, Khûmǐdǐya, Khûshǐbǎ, Khûshǔa.#Lî̤wě̤mǎnǎ awǐlǒ tôbǎ 1:32-33 3Phayûshǎ aphû̌ mî̌ Khûshebǎ kû̌ Khûdedǎ. Phadedǎ akhlialè tokhlǒ mî̌ Ashǔrǐ khlilèphû̌, Lètǔshe khlilèphû̌, Phalǔmi̤ khlilèphû̌. 4Phamǐdǐya aphû̌ tokhlǒmî̌ Khûěpa, Khûěpha, Khûěnò̌, Khûabǐdǎ, kû̌ Khûědeya sî tokhlǒ hǒ. Dě lǒ̤bò asî nutokhlǒ mî̌ amè̤̌kû̌ Mǒ̤ketǔra akhlialè lǒ̤bò hǒ.
5-6Bǎ PhaAbraha si khôtô̤̌ akhanu, a ǐ padô̌ amanô̌ nutokhlǒ aphû̌ tokhlǒ sû, dě a nocû̌ tepheyî̤kè asî kû̌ aphû̌pwa̤khû KhûIsè̌ dǒ gǎ lṳmṳ̌htò̌ tôkhô. Dě bǎ a si hto akhanu, a ǐ bò ta̤ dǒ a ô̌ kû̌ lû̌û nutokhlǒ kû̌ aphû̌ KhûIsè̌.#Mǒhtûlû̌hǎhtûsa 21:14
7PhaAbraha ô̌htûpwa̤ aně tôya̤ kû̌ susô̌tishi kû̌ yè̤̌ně.#Mǒhtûlû̌hǎhtûsa 12:4 8A ô̌htûpwa̤ tǒ̤ dǒ amǒ̤pwǎ̤ nědû̌lahtû, něbelabe dě a sǎlò̤tě̤kè, dě kòyò lǔǐ a kû̌ aphiaphu sîtokhlǒ.#Mǒhtûlû̌hǎhtûsa 15:15 9Aphû̌ pwa̤khû KhûIsè̌ kû̌ Khûishômelǎ lǔǐnṳ̌kè lû̌û dǒ lǒ̤lṳ̌kû bǎ Mèpe̤lǎ kòshî̌, dǒ a ô̌phǔ kû̌ Mè̤mare, dǒ Hǐtǐphû̌ Phasûha aphû̌ Khûěpharû ahǔkla nutôkû.#Mǒhtûlû̌hǎhtûsa 23:1-20, 49:29-30, 50:13 10Hǔkla dǒ kòyò lǔǐ nṳ̌kè kû̌ PhaAbraha kû̌ ama Mǒ̤sara nutalǎ̤ mî̌ amè̤̌kû̌ PhaAbraha pwî̤kè Hǐtǐ khlilèphû̌ hǔkla nutalǎ̤ hǒ.#Mǒhtûlû̌hǎhtûsa 23:3-16 11Bǎ PhaAbraha si hto akhanu Cǒmaradû̌ ǐshowî̤ aphû̌ pwa̤khû KhûIsè̌. Khònò̤̌dě KhûIsè̌ cû̌ô̌phǔ bǎ Beralahèrû̌ gûlǎ̤ akòshî̌ nutôkû.#Mǒhtûlû̌hǎhtûsa 12:2-3, 22:17, 26:3, 24:62
PhaIshômelǎ akhlialè tokhlǒ
12Hǒomî̌ PhaIshômelǎ akhlialè awe̤akè hǒ. A mî̌ PhaAbraha aphû̌pwa̤khû dǒ Mǒ̤sara ajû̌mǒ̤ Ijî̌ khlilèphû̌ Mǒ̤haga phû̌ô̌lò̤nṳ̌ bǎ lû̌û nutôpwa̤ hǒ.#Mǒhtûlû̌hǎhtûsa 16:15
13Hǒomî̌ PhaIshômelǎ aphû̌pwa̤khû aphû̌ô̌ lò̤ tutṳ̌ lû̌û tokhlǒ ami̤ tôpwa̤ hto tôpwa̤ ata̤wě̤nǎma̤nǎ hǒ, dě aphû̌pwa̤khû wè̤̌pwǎ̤ mî̌ ami̤ kû̌ Khûnabayû, apṳ̌ tokhlǒ mî̌ Khûkeda, Khûadǎbelǎ, Khûmǐbasa,#Lî̤wě̤mǎnǎ awǐlǒ tôbǎ 1:29-31 14Khûmǐshamǎ, Khûdǔmǎ, kû̌ Khûmasa. 15Khûhadǎ, Khûtemǎ, Khûjetǔrǎ, Khûnaphǐshǎ kû̌ Khûkedamǎ sî nutokhlǒ hǒ. 16Asî nutokhlǒ mî̌ PhaIshômelǎ aphû̌pwa̤khû sîtokhlǒ ami̤ hǒ. Asî htû khwǐphû̌ shǐsò̌ginǐ̤ tokhlǒ hǒ, dě tômṳ̌ kû̌ tômṳ̌nu asî kaǎ ǐtûû̌ bò asîdoshô̌ kû̌ agûlǎ̤ lǎ̤ô̌ tokhlǒ kû̌ asîmi̤ tûû̌.#Mǒhtûlû̌hǎhtûsa 17:20 17Dě PhaIshômelǎ asǎlò̤tě̤kè bǎ aně ô̌ tôya̤ kû̌ sushi kû̌ susô̌ tôně akhanu, dě kòyò lǔǐkè a kû̌ aphiaphu sîtokhlǒ. 18PhaIshômelǎ akhlialè tokhlǒ phî̌nṳ̌ lô̌khô agûlǎ̤ bǎ Hawî̌lagǎ tǒ̤htǔ Shǔragǎ nutôkû, dě a ô̌phǔ kû̌ Ijî̌gǎ, kû̌ klè̌ lǎ̤cû̌ dǒ ashǔrǎgǎ nutôbô. Dě asî ô̌tephe khô̌kè kû̌ PhaAbraha akhlialè dǒ ashǔshawa̤ nutokhlǒ.
PhaIsè̌ aphû̌pwa̤khû tokhlǒ
19Hǒomî̌ PhaAbraha aphû̌pwa̤khû PhaIsè̌ akhlialè sîtokhlǒ awe̤akè. PhaAbraha mî̌ KhûIsè̌ apha.#Matè̌ 1:2 20Bǎ PhaIsè̌ phî̌ Mǒ̤ribè̌kha akhanu aně ô̌ lǐ̤shi hǒ. Dě Mǒ̤ribè̌kha mî̌ Aramǐ khlilèphû̌, Phabusuěla aphû̌pwa̤mǒ̤, dě asî ô̌ lô̌khô dǒ Pada aragǎ, dě amî̌ Aramǐ khlilèphû̌ Khûlaba apṳ̌pwa̤mǒ̤.#Mǒhtûlû̌hǎhtûsa 22:23, 24:15,29,67
21PhaIsè̌ ama nî̌ a shôdôphû̌ akhû̌akhî, a kwicabahtò̌ bǎ ama aya dǒ Cǒmara tûjû̌pwa̤ a ô̌, dě Cǒmara tûjû̌pwa̤ ganǎ̤de lû̌û ta̤kwicaba dě ama Mǒ̤ribè̌kha mǒ̤dohtò̌.#Rṳ̂̌me̤ 9:10 22Dě a mǒ̤do sègwè̌, dě phijǎphû̌ ô̌ dǒ hǐphukû nusò̌ginǐ̤ cakǎ lû̌û tôpwa̤ kû̌ tôpwa̤. Dě Mǒ̤ribè̌kha gwè̌ Cǒmara tûjû̌pwa̤ kû̌, “Ǒ Běcǎdû̌, a cû̌htûhtò̌ tǒ̤ pô̤̌o ma̤titè̌?”
23Dě Cǒmara tûjû̌pwa̤ hî̌shǔ lû̌û kû̌,
“Dǒ nahǐphukûnu khlilèphû̌ gǔ ô̌htò̌ ginǐ̤cǒ pě,
Khlilèphû̌nu ginǐ̤cǒnu, a gǔ htûhtò̌ pwa̤ tǎ̤ kè̌khîlû̌û pě,
tôcǒ pě mî̌ dě a gǔ khû̌ǎshû̌shokhlo kû̌ dǒ ashǔshawa̤ tôcǒ pě,
adû̌ tôpwa̤ gǔ htû apṳ̌jû̌ pě.”#Mǒhtûlû̌hǎhtûsa 27:27-40; Malakhǐ 1:2-3; Rṳ̂̌me̤ 9:12
24Dě bǎ shěkhǎ tǒ̤ dǒ Mǒ̤ribè̌kha tô phû̌ô̌ akhanu, aphû̌pwa̤khû ô̌ sègwè̌ lû̌û. 25A phû̌ô̌htò̌ wǐlǒ nutôpwa̤ dě aphěayî̌ li̤pi̤sǐ dě ashû̌ ô̌dutuglu anǎ̤ tôpwa̤bò sô̌sô̌kû̌ asô̌ jekhloshû̌ mî̌ca. Pô̤̌nukhû̌khî asî pô̤ lû̌mi̤ kû̌ Khûětò̌.#Mǒhtûlû̌hǎhtûsa 27:11 26Awè̤̌ ô̌htò̌ dě apṳ̌ gû̌ pṳ̂̌měhtò̌ǐ awè̤̌ Khûětò̌ akhò̌tôněkò akhû̌akhî, kòyò kaǎ lû̌mi̤ kû̌ Khûya̤kò. Bǎ Mǒ̤ribè̌kha phû̌ô̌ asî sò̌ginǐ̤ akhanu, PhaIsè̌ něô̌ shisusô̌ hǒ. (Hebrǔyô̤̌ nu, Khûya̤kò yô̤̌sǎyô̤̌mû mî̌ khò̌tôněkò mè̤̌tô̤̌mî̌ lîmòǎ kòyòkhû̌.)#Mǒhtûlû̌hǎhtûsa 25:20; Hû̌she 12:3
27Bǎ phijǎphû̌nu sò̌ginǐ̤ dû̌htò̌ akhanu, Khûětò̌ dě ahtû pwa̤lṳ̂ta̤mi̤ta̤mò̤̌ dǒ a khǎjò wô̌ta̤ tôpwa̤, dě a sǎlě̤ hǎhtò̌cû̌gǎ pwǎ dǒ mi̤kla, bǎbǎkǎlè Khûya̤kò nî̌, a bè̌shapwǎ̤ anǎ̤dě a ô̌ pwǎ dǒ hǐphû̌kû pwǎ.#Hebrǔ 11:9
28PhaIsè̌ ǎ bǎ aphû̌ Khûětò̌ ata̤mi̤ta̤mò̤̌ yî̌ akhû̌akhî, a mô̤ ǐ lû̌û, bǎbǎkǎlè Mǒ̤ribè̌kha hî̌dě a mô̤ǐ Khûya̤kò.#Mǒhtûlû̌hǎhtûsa 27:6-10, 19 29Tôni̤kha, bǎ Khûya̤kò phôǎ kîbîphlǒlî̤ akha, Khûětò̌ ô̌ dǒ mi̤kla ge dě a lòdô̌lòde sǎǎsǎô jî̌ lû̌û. 30Dě a hî̌ Khûya̤kò kû̌, “He sǎǎ sikè dî hǒ, dǐǎ mò̌ he na phôǎ kîbîphlǒlî̤ nutôbè.” Pô̤̌nukhû̌khî kòyò kaǎ pô̤̌ Khûětò̌ mi̤ kû̌ Khûedû. (Edû yô̤̌sǎyô̤̌mû mî̌ alî̤.)
31Dě Khûya̤kò hî̌shǔ lû̌û kû̌, “Ma̤pô̤̌nudě shaǎ mò̌ he naphû̌wè̤̌pwǎ̤ gûlǎ̤ dǒ na lǎ̤nṳ̌bǎ û̌cata̤bǐnu.”
32Khûětò̌ hî̌shǔ lû̌û kû̌, “Ma̤mò̌, he sǎǎ sikè hǒ, he glè̌ si hǒ. Phû̌wè̤̌pwǎ̤ gûlǎ̤ tôkǔ mî̌ a nǐ̤bwǐsîrî dǒ heya mî̌titè?”
33Dě Khûya̤kò hî̌shǔ lû̌û kû̌, “Ǐsholò̤wǐ mò̌ nayô̤̌ khònò̤̌ kû̌ naphû̌wè̤̌pwǎ̤ agûlǎ̤ htû heta pô̤̌nu.” Ma̤hî̌nudě Khûětò̌ ǐsholò̤kè ayô̤̌ dě a shaǎlò̤kè aphû̌wè̤̌pwǎ̤ gûlǎ̤ kû̌ Khûya̤kò.#Hebrǔ 12:16
34Htodě Khûya̤kò dǐǎ lû̌û mû̌ kû̌ hǎsǐ kîbîphlǒlî̤nu. A ǎhtoôhto dě a ihtǒ cû̌kè.
Ma̤pô̤̌nudě Khûětò̌ gènè̤pî̌tî̌kè aphû̌wè̤̌pwǎ̤ gûlǎ̤.
Currently Selected:
Mǒhtûlû̌hǎhtûsa 25: KXF
Highlight
Share
Copy
Want to have your highlights saved across all your devices? Sign up or sign in
Wycliffe USA
