Yṳ̂ha 2
2
Pwè ta̤khòmò̤̌ dǒ Wî̤̌kana̤ akû
1Suni̤ tôni̤nu pwè ta̤khòmò̤̌ ô̌dǒ Galilè̤̌gǎ, Wî̤̌kana̤ akû tôphû̌, dě Yeshǔ amǒ̤ ô̌ bǎnu. 2Ta̤khòmò̤̌nu, kòyò mǎhè dô̌ Yeshǔ kû̌ akhôphijǎ tokhlǒ. 3Bǎ sîpîshisî̌yô̤̌ dǒ shǐpwǎ̤shǐmè̤ tokhlǒ aya hǎbòkè akhanu, Yeshǔ amǒ̤ shôbǐǐlṳ̌ Yeshǔ kû̌, “Asî a sîpîshisî̌yô̤̌ hǎbòkèhǒ.”
4Dě Yeshǔ hî̌shěshu lû̌û kû̌, “Mǒ̤꤮, na cû̌hè hî̌tǒ̤ he ma̤titè? Shěkhǎ dǒ he gǔ dǔlè̌lṳ̌ he ta̤pô̤ta̤phǎ tǒ̤nò̌khôtô̤̌.”
5Yeshǔ amǒ̤ shôbǐǐ pwa̤ma̤ta̤phû̌ tokhlǒ kû̌, “Kè̌ a no sî tôcǒcǒ hî̌dě ma̤ bǎ a nî̌꤮.”
6Ô̌te̤we̤bò bǎnu tôkûnu sôdû̌ ô̌ mè susô̌ tômènu, kòyò tènṳ̌ kû̌ shi numî̌ a nǐ̤ pò̤̌dû̌nu 80-120.#2:6 80-120 pò̤̌dû̌ numî̌ kû̌lǎ ayô̤̌ mî̌ li̤ta sôdû̌ hǒtokhlǒnu, Yǔdaphû̌ tokhlǒ yṳ̂̌nṳ̌ô kû̌ shi dě asî noǎ kû̌ a lǎ̤cǔbò kû̌ cǔde pô̤̌ asî ta̤cubucaba lǎ̤klô ô̌ aya nupwǎ.#2:6 pô̤̌khô Isôrělaphû̌ tokhlǒ gǔ ma̤tô Cǒmara asǎphlǒ ayanu, asî gû̌ cǔbògû̌ pô̤̌ ta̤mǎlò̤ ô̌nu.
7Yeshǔ no pwa̤ma̤ta̤phû̌ nutokhlǒ kû̌, “Lò̌nṳ̌ bebòshi dǒ sôdû̌ nutokhlǒ akûnu.” Dě asî lò̌nṳ̌ bebò htodě.
8Yeshǔ hî̌ asî kû̌, “Khònò̤̌ dǔnṳ̌shi tôbè dě cû̌ǐ dǒ pwèikǒdû̌ dǒ a tîwî̌ kè̌khwè̌ǐ lǒ̤bò kòyò ta̤pṳ̂̌꤮ tocǒ nutôpwa̤ a ô̌,” A hî̌ dě asî tècû̌ bǎ lû̌û. 9Pwèikǒdû̌ ôkè̌bǎ shi dǒ a htûhtò̌ sîpîshisî̌yô̤̌nu. Bǎbǎkǎlè sîpîshisî̌yô̤̌nu a ô̌ bǎtè hènu a sî̌ganǎ̤tô̤̌. (Pwa̤ma̤ta̤phû̌ nutokhlǒ tènṳ̌shi akhû̌akhî, a sî̌ganǎ̤ pwǎtǒ̤ asî nutokhlǒ nô̤̌ pwǎ) dě pwèikǒdû̌ nutôpwa̤ kaǎ pwa̤khòmò̤̌ phû̌khû, 10Dě a hî̌ lû̌û kû̌, “Kòyò pṳ̂̌꤮ tôpwa̤ lǎ̤klô dǐôwǐ sîpîshisî̌yô̤̌ dǒ awǐashu tokhlǒ, htodě kòyò sǎô pwǐ꤮ tètè̌ dě kòyò ô hto akhanu, kòyò dǐô sîpîshǐsî̌yô̤̌ pèè tokhlǒ. Bǎbǎkǎlè nadě na lè̤̌ bè̌wô̌ ǐpepe jòjò̌꤮ na sîpîshǐsî̌yô̤̌ awǐashu tokhlǒ tǒ̤lò̤ khònò̤̌.”
11Yeshǔ ma̤cô̌klǐ wǐlǒ ta̤ tôplǎmî̌ bǎ Wî̤̌kana̤, Galilè̤̌gǎ nuhǒ, dě a dǔlè̌lṳ̌htò̌ a ta̤bwǐdû̌sîrîhtû bǎnu. Pô̤̌nudě akhôphijǎ tokhlǒ yṳ̌nǐ̤nǎ̤nǐ̤ lû̌û.
12Htodě a kû̌ amǒ̤ kû̌ apṳ̌ tokhlǒ kû̌ akhôphijǎ tokhlǒ lò̤ lô̌khô dǒ Wî̤̌kaperanò̤ akû, dě asî cû̌ ô̌ lô̌khô bǎnu ginǐ̤suni̤. #Matè̌ 4:13
Yeshǔ cû̌ dǒ ta̤lṳhtò̌hô
(Matè̌ 21:12-13; Makǔ 11:15-17; Lǔka 19:45-46)
13Dǒ Yǔdaphû̌ ta̤cû̌bò̌tûlû̌pwè phǔhè akhû̌akhî, Yeshǔ cû̌ dǒ Wî̤̌yarǔshôle.#2:13 ta̤cû̌bò̌tûlû̌pwè mî̌ pwè tôpwè dǒ kòyò ma̤ta̤ gènè̤htò̌bǎ sô̌ bǎ Cǒmara ma̤hǎplǎge Yǔdaphû̌ tokhlǒ dǒ tanaphû̌ hèlò̤ ma̤si kòyò phû̌wè̤̌pwǎ̤ akhanu. #Hǎplǎge 12:1-27 14Bǎ a hètǒ̤ dǒ ta̤lṳhtò̌hôkû akhanu, a kè̌shǐ kòyò shaǎ pṳ̂̌, sû̌phû̌, htû̌lǐ̤ tokhlǒ kû̌ kòyò hǎnòò̌ htû̌lè̌ ru dǒ dîgògǒ kòshî̌ tokhlǒ. 15Pô̤̌nudě a ma̤ sǒpli̤ lǎ̤plè dě a wṳ̂̌hǎhtò̌kè bò sû̌phû̌ kû̌ pṳ̂̌ tokhlǒ dǒ ta̤lṳhtò̌hô kû. Htodě a shò̌lò̤tě̤bòkè bò kòyò lǎ̤htû̌lè̌ ru a ala̤wǎ̤ nutokhlǒ dě a ma̤ ma̤pò̌ma̤shî bò asî ruyî̌ tokhlǒ. 16Htodě a hî̌ kòyò shaǎ htû̌lǐ̤ nutokhlǒ kû̌, “Johǎhtò̌ tephekè bò hǒtokhlǒ. Nohtûhtò̌ tǎ̤ hepha ahǐnu kû̌ klǎ tǎ̤mǎ̤.”
17A khôphijǎ tokhlǒ gènè̤htò̌ tǒ̤ lî̤plò̌shǐkû hî̌ kû̌, “He sǎphlǒshû̌ mô̤ǐ mè̤mè̤̌ nahǐ. He ta̤sǎphlǒshû̌ mô̤ǐ numî̌ a gǔ u bòkè he sô̌sô̌kû̌ mî̌nu pě.”#Htû̌sò̌htò̌ 69:9
18Dǒ a ma̤ pô̤̌o akhû̌akhî, Yǔdaphû̌ ikǒdû̌ tokhlǒ gwè̌ lû̌û kû̌, “Pô̤̌khô pa gǔ sî̌ganǎ̤ kû̌ na nǐ̤bǎ ta̤siwi̤sòwò̤ dǒ na gǔ hèma̤ ma̤pò̌ma̤shî pô̤̌o mî̌ anǐ̤ pwǎ ayanu, na gǔ dǔlè̌lṳ̌ bǎ pa ta̤cô̌klǐ titè pě ya?”
19Yeshǔ hî̌shěshu kû̌, “Ma̤ lò̤tě̤pro̤kè mò̌ ta̤lṳhtò̌hônu. Suni̤ akû, he gǔ bô̌htò̌ sô̌ pě.”#Matè̌ 26:61, 27:40; Makǔ 14:58, 15:29
20Htodě Yǔdaphû̌ gwè̌ lû̌û kû̌, “Suni̤ akû, na glè̌ bô̌htò̌bò̌ tîkhîsô̌ cǎ pě ya? Ta̤lṳhtò̌numî̌ kòyò bô̌htò̌ yǎ nî̌ ayî̤ anělǐ̤shi kû̌ susô̌ lè.” 21Bǎbǎkǎlè bǎ Yeshǔ hî̌ kû̌ ta̤lṳhtò̌hô awe̤akè akhanu mî̌ a hî̌lò̤ tûû̌ anǎ̤glǒ pwǎ. 22Pô̤̌nu akhû̌akhî, bǎ Yeshǔ htûpwa̤ getîkhî sô̌ dǒ ta̤si akhanu, akhôphijǎ tokhlǒ gènè̤htò̌ to̤ǐbǎ sô̌ dǒ a hî̌bǎkè ayô̤̌nu dě asî yṳ̌ǎ lî̤plò̌shǐ kû̌ a hî̌ô̌kè ayô̤̌ nutokhlǒ.
Yeshǔ sî̌ganǎ̤ kòyò lǒ̤bò a sǎphlǒ
23Bǎ Yeshǔ ô̌pe bǎ Wî̤̌yarǔshôle ta̤cû̌bò̌tûlû̌pwè kû akhanu, kòyò kè̌shǐ a ma̤ ta̤cô̌klǐ nutokhlǒ akhû̌akhî, kòyò yṳ̌ǎ dû̌wî̤ lû̌û. 24Bǎbǎkǎlè Yeshǔ yṳ̌ǎnṳ̌ asî tô̤̌, ma̤titèhî̌dě a sî̌ganǎ̤ lṳ̌phlô bò kòyòsǎphlǒ. 25Kòyò lǎ̤lṳ̂ shôbǐǐlṳ̌ bǎ kû̌ Yeshǔ kû̌ kòyò pṳ̂̌꤮ tôpwa̤ awe̤akè tô̤̌ ma̤titèhî̌dě Yeshǔ sî̌ganǎ̤ htotû̌ kòyò pṳ̂̌꤮ tôpwa̤ asǎphlǒ hǒ.
Currently Selected:
Yṳ̂ha 2: KXF
Highlight
Share
Copy
Want to have your highlights saved across all your devices? Sign up or sign in
Wycliffe USA
