မဿဲ 14
14
ဟေရုဒ်မင်း စဉ်းစားရို့မရ ဖြစ်ခြင်း
(မာကု ၆:၁၄-၁၆၊ လုကာ ၉:၇-၉)
1ယင်းအချိန်ခါ ဂါလိလဲပြည်နယ်ကို အုပ်ချုပ်သူ ဟေရုဒ်မင်းစာ ယေရှု လုပ်ကိုင်ခြင်း အကြောင်းကို ကြားရလီရေ။ 2အရာ သူစာ ကိုယ့်ကျွန်ရို့ကို ပြောလီရေ၊ “သူစာ ရီနှစ်မင်္ဂလာပီးသူ ယောဟန် ဖြစ်တေ။ သူစာ သီရာက ပြန်ရှင်ထမြောင့်ဗျာ။ ယင်းအတွက်န သူစာ ဟိသမျ အံ့ဩဖွယ်အလုပ်ကို လုပ်နိုင်ရေ။”
ရီနှစ်မင်္ဂလာပီးသူ ယောဟန် အသီခံရခြင်း
(မာကု ၆:၁၇-၂၉)
3ရီနှစ်မင်္ဂလာပီးသူ ယောဟန် အသီခံရခြင်းစာ ဒေပိုင်၊ ဒေ ဟေရုဒ်မင်းစာ ကိုယ့်ညီ ဖိလိပ္ပုမယား ဟေရောဒိမ အကြောင်းန ယင်းအယင်က ယောဟန်ကို ဖမ်းရို့ ထောင်မာ လှောင်ထားလီရေ၊ 4အကြောင်းကား ယောဟန်စာ ဟေရုဒ်မင်းကို အပြန်ပြန် ပြောလီရေ၊ “ကိုယ်ဘင် ကိုယ့်ညီမာ မယား ဟေရောဒိမကို နစပ်ဖို့ မသင့်ပါ။” 5ယင်းအတွက်န သူစာ ယောဟန်ကို အသီသတ်ဖို့ ကြည့်လီရေ၊ ယေကေလည်း သူစာ လူရို့ကို ကြောက်လီရေ။ ယင်းပိုင် ကြောက်စာ အကြောင်းကား လူရို့စာ ယောဟန်ကို ဘုရားသတင်းပို့သူတစ်ပါး ဖြစ်တေ ဟို့ သတ်မှတ်လီကတ်တေ။
6တစ်ရက်နိ နှစ်တိုင်းကျင့်ပစာ ဟေရုဒ်မင်း မွီးရက်နိပွဲမာ ဟေရောဒိမ သမီးစာ အာဂန္တုရို့ ရှိက ကပြရို့ ဟေရုဒ်မင်းကို စိတ်ပျော်အောင် လုပ်လီရေ။ 7ယင်းအတွက်န ဟေရုဒ်မင်းစာ ဟေရောဒိမ သမီး တောင်းစာကို ပီးဖို့ ဆိုပြီးကေ အကျိန်သစ္စာ ကိုင်ရို့ ပြောလီရေ။ 8ယင်းခါ ထိုမိန်းမသျှေစာ ကိုယ့်အမိက အကြံရရေအတိုင်း ပြောလီရေ၊ “ရီနှစ်မင်္ဂလာပီးသူ ယောဟန် အဂေါင်းကို လောင်ပန်းမာ ထည့်ရို့ အကျွန့်တို့ ယူခပါ။” 9ယင်းခါ ဟေရုဒ်မင်းစာ ကောင်းကောင်း စိတ်ဒုက္ခ ရလီရေ၊ ယေကေလည်း စားပွဲမာ လာကတ်စာ အာဂန္တုရို့ ရှိက အကျိန်သစ္စာ ကိုင်ရို့ ပြောလီရေအတွက်န သူစာ ထိုမိန်းမသျှေ တောင်းစာကို ပီးဖို့အတွက် အာဏာချလိုက်လီရေ။ 10သူစာ လူရွှတ်လိုက်ရို့ ထောင်ထဲမာ ယောဟန် အဂေါင်းကို ဖြတ်ဖို့ ခိုင်းလီရေ။ 11ယင်းနောက် ယောဟန် အဂေါင်းကို လောင်ပန်းမာ ထည့်ရို့ ထိုမိန်းမသျှေတို့ ယူခလီရေ အရာ သူစာ ယင်းအဂေါင်းကို ကိုယ့်အမိတို့ ယူလားခလီရေ။ 12ယင်းနောက် ယောဟန် တပည့်ရို့စာ လာပြီးကေ သူ့အကောင်တော်ကို ယူလားရို့ သင်္ဂြိုဟ်ကတ်လီရေ။ အရာ သူရို့စာ ယင်းအကြောင်းကို ယေရှုဘားမာ လားရို့ ပြောပြကတ်လီရေ။
လူငါးထောင်ကို ကျွေးခြင်း
(မာကု ၆:၃၀-၄၄၊ လုကာ ၉:၁၀-၁၇၊ ယောဟန် ၆:၁-၁၅)
13ယောဟန် သီစာအကြောင်းကို ကြားရေခါ ယေရှုစာ နူးချင်းတည်း လောင်းတစ်စင်းမာ တက်ရို့ တတိန်းဆဆိတ်နေရာ တစ်ခုတို့ ကြွလီရေ။ အရာ အမျိုးမျိုး မြို့ရွာတိက လူရို့စာ ယင်းအကြောင်းကို ကြားရေခါ တောင်လမ်းကနီရို့ ယေရှု လားစာနေရာတို့ လိုက်ကတ်လီရေ။ 14ယေရှုစာ လောင်းက ဆင်းရေခါ လူပရိတ်သတ် အများကြီးကို မြင်ရို့ သနားလီရေ။ ယေရှုစာ သူရို့အထဲမာ မကျန်းမာသူရို့ကို ကျန်းမာအောင် လုပ်လီရေ။ 15နီဝင်လာရေခါ တပည့်ရို့စာ သူ့တို့ လာရို့ ပြောကတ်လီရေ၊ “အသျှင်၊ ဒေ နေရာစာ တတိန်းဆဆိတ်နေရာ ဖြစ်ပါရေ အရာ နီလည်း ဝင်လာပါဗျာ။ ဒေ လူရို့ ရွာတိတို့ လားရို့ ကိုယ်ရို့အတွက် အစားဝယ်ဖို့ ရလတ်အောင် သူရို့ကို ရွှတ်လိုက်ပါဖိ။” 16ယေကေလည်း ယေရှုစာ သူရို့ကို ပြောလီရေ၊ “ဒေလူရို့ လားဖို့ အလိုမဟိ၊ နင်ရို့ ကိုယ်တိုင် သူရို့ကို တစ်ခုမသာ စားဖို့ ပီးလိုက်ကတ်။” 17ယင်းခါ တပည့်ရို့စာ သူ့ကို ပြောကတ်လီရေ၊ “အကျွန်ရို့ဘားမာ ပေါင်မုန့် ငါးသျှက်န ငါးနှစ်ကောင်တောက်ရာ ဟိပါရေ။” 18-19ယေရှုစာ သူရို့ကို ပြောလီရေ၊ “ယင်းသျှင့်တိကို ငါ့တို့ ယူခ။” ယင်းနောက် သူစာ လူရို့ကို မြက်တောမာ ထိုင်ဖို့ ခိုင်းလီရေ၊ အရာ ပေါင်မုန့် ငါးသျှက်န ငါးနှစ်ကောင်ကို ယူရို့ ဂေါင်းခင်ဘုံတို့ မော်ကြည့်ပြီးကေ ထာဝရဘုရားကို ကျေးဇူးတင်လီရေ။ ယင်းနောက် သူစာ ပေါင်မုန့်တိကို ဖဲ့ရို့ တပည့်ရို့အလက်မာ အပ်လီရေ အရာ တပည့်ရို့စာ လူရို့ကို ဝီပီးကတ်လီရေ။ ယင်းခါ ဟိသမျ လူရို့စာ ဝအောင် စားကတ်လီရေ။ 20လူရို့ အားကုံးသူ ဝအောင် စားပြီးရေခါ တပည့်ရို့စာ ကျရို့ဟိစာ အပဲ့အခြမ်းတိကို ကောက်ကတ်လီရေ။ ယင်းခါ တစ်ဆယ့်နှစ်တောင်း ဖြစ်လီရေ။ 21ထိုစားကတ်သူရို့အထဲမာ မိန်းမရို့န အသျှေရို့ကို ပယ်ရို့ ယောက်ျား သက်သက် ငါးထောင်လှောက် ဟိလီရေ။
ယေရှု ရီအထက်က ကြွခြင်း
(မာကု ၆:၄၅-၅၂၊ ယောဟန် ၆:၁၆-၂၁)
22ယင်းနောက် ယေရှုစာ တပည့်ရို့ကို ကိုယ့်ထက်အယင် လောင်းမာ တက်ရို့ မြစ်ကမ်းတစ်ဖက်တို့ ကူးဖို့ ခိုင်းလီရေ။ အရာ တစ်ချိန်တည်းမာ သူစာ လူရို့ကို အိမ်တို့ ပြန်ရွှတ်လီရေ။ 23သူစာ လူရို့ကို ရွှတ်လိုက်ပြီးရေနောက် နူးချင်းတည်း ဆုတောင်းဖို့အတွက် တောင်တို့ တက်လီရေ။ သူစာ နီဝင်ရို့လည်းသောက် နူးချင်းတည်း ယင်းတောင်ထက်မာ ဟိလီရေ။ 24ယေကေလည်း တပည့်ရို့မာ လောင်းစာ ကမ်းနားက ခွါလားရို့ ကောင်းကောင်း အဝီးတို့ ရောက်လားခလီရေ။ ယင်းခါ လီအပြန်ထရေအတွက်န ရီလှိုင်းလုံး အက်ကျပြီးကေ သူရို့ လောင်းစာ ကောင်းကောင်း ယိုင်းနီလီရေ။ 25ယင်းနောက် မိုးလင်းဖို့လုတ်မာ ယေရှုစာ ရီအထက်က တပည့်ရို့တို့ ကြွလာလီရေ။ 26ယင်းခါ တပည့်ရို့စာ အသူလည်းမသိ ရီအထက်က လားနီစာကို မြင်ရို့ ကောင်းကောင်း ကြောက်ကတ်လီရေ အရာ သူရို့စာ အားန အော်ရို့ ပြောကတ်လီရေ၊ “အဝေး နတ်၊ နတ်!” 27ယေကေလည်း ချက်ချင်း ယေရှုစာ သူရို့ကို ပြောလီရေ၊ “မကြောက်ကတ်ကေ့! ငါရာ၊ ရဲဝံ့ဖြည့်ကတ်!”
28ယင်းခါ ပေတရုစာ သူ့ကို ပြောလီရေ၊ “အသျှင်၊ ကိုယ်တော် အမှန် ဖြစ်တေဆိုကေ အကျွန့်ကို ရီအထက်က ကိုယ်တော်တို့ လာဖို့ ခိုင်းပါ။” 29အရာ ယေရှုစာ၊ “လာလတ်” ဟို့ ပြောလီရေ။ ယင်းခါ ပေတရုစာ လောင်းက ဆင်းရို့ ရီအထက်က ယေရှုတို့ လားဖို့ စလီရေ။ 30ယေကေလည်း သူစာ လီအဟုန်ကို မြင်ရို့ ကြောက်ပြီးကေ ရီမာ နစ်ဖို့ ပျင်လီရေ။ အရာ သူစာ အားန အော်ရို့ ခေါ်လီရေ၊ “အိုး အသျှင်၊ အကျွန့်ကို ကယ်ဆယ်ပါ။” 31ယင်းခါ ချက်ချင်း ယေရှုစာ သူ့အလက်ကို ကိုင်ရို့ ပြောလီရေ၊ “ကျုံခြင်းတရား အားနည်းသူ၊ ဇာဖို့ မယုံသင်္ခါ ဖြစ်စာလည်း?” 32-33ယေရှုန ပေတရု လောင်းမာ တက်ကတ်တေခါ လီတန့်လားခလီရေ။ ယင်းခါ လောင်းမာ ဟိကတ်သူရို့စာ ယေရှုကို ရှိခိုးရို့ ပြောကတ်လီရေ၊ “ကိုယ်တော် အမှန် ထာဝရဘုရား၏ သားတော် ဖြစ်ပါရေ။”
လူအများကြီး ရောဂါကောင်းခြင်း
(မာကု ၆:၅၃-၅၆)
34ယင်းနောက် ယေရှုန သူ့တပည့်ရို့စာ မြစ်ကို ကူးရို့ ဂင်္နေသရက်အရပ်မာ ဆင်းကတ်လီရေ။ 35ထိုမြို့သားရို့စာ ယေရှုကို သိရေခါ ထိုအရပ်မာ ဟိသမျ နေရာမာ လားရို့ သတင်း ပီးကတ်လီရေ။ 36ယင်းခါ လူရို့စာ ရောဂါသေရို့ကို ယေရှုတို့ ယူလာကတ်လီရေ အရာ ယေရှု ကိုယ်ရုံစွမ်ကို ထိုရောဂါသေရို့ ကိုင်ဖို့ ရလတ်အောင် လူရို့ ယေရှုကို တောင်းပန်ကတ်လီရေ။ ယင်းခါ သူ့ကိုယ်ရုံစွမ်ကို ကိုင်သူရို့ အားကုံးသူမာ ရောဂါကောင်းလားခကတ်လီရေ။
Currently Selected:
မဿဲ 14: RMZ
Highlight
Share
Copy
Want to have your highlights saved across all your devices? Sign up or sign in
©2023 Wycliffe Bible Translators, Inc.
