Luka 23
23
Iesu Pilato ve omopa voa
(Mataio 27:1–2, 11–14; Mareko 15:1–5; Ioane 18:28–38)
1Soka ere karu foromai itotea arero Pilato tai lariōvi koti forerōpe. 2Foreri ere havara arero paraea mō ōpe, Ela mea vita la sukaeaita, are elave toruipi karu la kurea lei kaiae leiti vei, aea takis Kaisara la miarai vei elaro o erere a’, aeata areve o aea meha are Keriso, King reha. 3Soka Pilato arero lalasi lei mō ōpe, A Iuda karu ve king ei? Are tava o mō ōpe, O a sa la moipea reha. 4Pilato are maso harofave karu aea karu sitavu ita la mō ōpe, Ara mea vita voa kaiae farakeka aeata sukaeaia kasirau. 5A—, ere o serea a’ mō ōpe, Are areve satiriaraita o sa Iudea foromai la lei lavukakaea vovea, soa Galilea soa voa koti koti mea karikara voa. 6Pilato lea o la mapi erero lalasi mō leipe, Mea vita are Galilea karu ei? 7Soka are Heroda ve siahu lei vovo meita soa ve karu lea la ore lei, are arero Heroda tai itapōpe, ipi lea soa voa are ta Ierusalema voa peiape eavia.
Iesu Heroda ve omopa voa
8Soka Heroda Iesu la ofae eovi hailareva foromai leipe, ipi are soa savori Iesu ve fari la mapi mapi arero ofae eovi, aeata Iesu haihava etau farakeka aea leitita la eavai vei haikaeaiape. 9Hai lōri kaea are o rauapo ita arero lalasi lei lei, a—, Iesu arero tava o moi kasirau. 10Maso harofave karu aea Safu Karoro ore karu ita lōvoa soi popōvi, sosori tao havara o serea rovaea ita arero paraeōpe. 11Soka Heroda areve maola karu ita arero o maealolo a’, area sa vutea lei, maea puta sosorusosoru arero mopi, arero Pilato tai ata itapōpe. 12Soka lea sare kofa voa Heroda aea Pilato ita omopa totoea moraitai leipe, ipi ereuka evera sosori ape.
Pilato Iesu la paeai o omoipe
(Mataio 27:15–26; Mareko 15:6–15; Ioane 18:39—19:16)
13Soka Pilato maso harofave karu aea lohio karu aea karikara karu ita la isa kokoruka, 14erero mō ōpe, E mea vita la araro tai lariōvi koti mō auai, are karu la kaiae leiti vei kureaita vita; a—, ara eve omopa voa arero seseōvi roroka lei, a—, e are vei paraeaipeta lea havara voa ara areve kaiae eavai kasirau. 15Heroda ta lōfeare lei, are arero ereitaro tai ata itapi laipea meha. Mapaia, are tava opai la ovai vei kaiae leiti kasirau. 16Ara lea vei arero toa satiriōri lōri paraeai roi. [ 17Soka sosoka soasoa voa areve leita mai dibura karu farakeka la ere vei paraeai vei.] 18A—, ere farehoria i rovaea mō isa moipe, Arero paeaia, Barabasi la ela vei paraeaia. 19Lea Barabasi, ipi are karikara voa sosori a’ karu la paeōpe lea vei, dibura voa fasi peiape. 20Pilato are Iesu la paraeai haikaea, erero ata o moipe, 21a—, ere i rovaea haiara lei mō isa moiape, Arero satauro voa vitei paeaia, arero satauro voa vitei paeaia. 22Are soa oroisoria erero mō ōpe, Ipi levea? are kaiae lekōru voa? Ara are voa paeai tava ve kaiae la eavaia kasirau. Ara lea vei arero toa satiriōri lōri paraeai roi. 23A—, ere i rovaea ita o serea ape arero satauro voa vitei paeai vei. Ereve o hohororo sa aite voa sapataipe. 24Soka Pilato usoso ere haikaeōpe lea haiiri feare leipe reha. 25Sosori a’ karu la paeōpe lea vei dibura voa fasōpe, ere sa are vei loki serea ita leipe lea vita la Pilato sa au paraeōpe; a—, are Iesu la paea opai vei miarōpe usoso ere haikaeōpe lea haiiri feare.
Iesu la satauro voa vitei paeōpe
(Mataio 27:32–56; Mareko 15:21–41; Ioane 19:17–30)
26Ere Iesu la lariōvi kavōpe soa, ere Kurene mea ve karu aea rare Simona, maria voa koti karikara voa forerōpe la sukafori mai paea, satauro areve soro voa miavōpe, Iesu ve aite voa toari taiovai vei.
27Karu sitavu rovaea arero aitetei roroaiape, aeata uamori ita are vei ovororo sisapi fi savoiape. 28A—, Iesu aiterori a’ erero mō ōpe, Ierusalema ve uamori e, fi ara vei levi aria, a—, fi eve elore maea vei aeata eve atutemori vei fi ō puavaia. 29Ipi, mapaia, soa forerai vei la roi lea mea karu o mō ari roi, Korōvu uamori, mi ari auke ére aea sosoai auke kō ere lareva ia. 30Lea mea ere raepa la mō ari roi, Elave arori voa foforukaia, aea raepa kari ta mō ari roi, Elaro aieraia.#Hose 10:8; Apok 6:16 31Ipi ere mōfeare mai tola ve makuri soa voa leitita, a—, ere tola hahoro soa voa lekōru la leiti roi?
32Mai kaiae leita karu oraka are ita farehoria paeai vei lariōvi kavōpe. 33Ere oti rare Harofave Kōkuharo voa forerōpe lea mea, ere arero lea kaiae leita karu ita farehoria elore elore satauro voa vitaipe, farakeka areve mai toare voa, farakeka aea areve mai ava voa. 34Aea Iesu mō ōpe, Oa e, ereve kaiae sasukaia, ipi ere leipeta lea etau ere eite ore kao. Soka ere areve maea puta la feai fasi forea faeafaea ōpe.#Sal 22:18 35Soka karu rauapo soi pepea aruru lei, harofave karu ta arero area sa vutea a’ mō ōpe, Are karu hariaharia la lei makuri lei vovea, a—, are Ualare ve Keriso, are sa haikaea ovaita lea Vita oria, are areve elore maea la lei makuri leitia.#Sal 22:7 36Maola karu ta arero opasea lei, ere haekao lei uaina peroro arero muia,#Sal 69:21 37mō ōpe, A Iuda karu ve King oria, ave elore maea la lei makuri leitia. 38Areve arori voa karoro o mō ukōpe, Iuda Karu ve King meha.
39Soka satauro voa vitaipe lea kaiae leipe karu farakeka aea arero o maealolo mō ōpe, A Keriso kao ei? A ave elore maea la elakaro ita la lei makuri leitia. 40A—, lea karu aea arero o erere a’ mō ōpe, Se! a Ualare la tore leitia kao ei? Ipi a opai tava ta ovai are ita usoso. 41Etau farakeka elaka ve opai ipi elakave elore kaiae ve tava vei, a—, mea vita are mai kaiae kasirau. 42Soka are mō ōpe, Iesu e, a ave basileia ve soa voa foreraita lea mea, araro haikaeaia. 43Iesu arero mō ōpe, O kofa ara aro omoi, a iso sare ara ita fareho Paradaiso voa forerai roi.
44Lea sare koko soa voa mea foromai la murumuru sa aieri eaea tetete sare sōsi soa voa; 45sare ve ovava futi kaleipe; aea Maso Uvi ve aru voa sasaukaita tavaea puta lōva aru torerapi itai itai leipe.#Eso 26:31–33 46Lea mea Iesu i rovaea mō isōpe, Oa e, ara arave ove ave mai voa miavaita meha. Are lea o mei opōpe.#Sal 31:5 47Soka maola kapena vita lea forerōpe etau la ofae eovi, Ualare la maeati mō ōpe, O kofa haura kofa vita meha. 48A—, aruru lei kokoruka roroaiape karu sitavu lea forerōpe etau la ofae eavōpe soa, ere ereve haiposa la toatoa karikara voa ata kerori itipe. 49Arero malasa leita karu foromai, aea Galilea kiripi arero aitetei roroaiape lea uamori ára‐ita popōvi lea etau la ofae fofoisaiape.#Luk 8:2–3
Iesu la viopōpe
(Mataio 27:57–61; Mareko 15:42–47; Ioane 19:38–42)
50Soka Iuda karu ve karikara aea rare Arimatea, karu farakeka rare Iosefa lōvoa peiape; are karu lareva, areve leita mai haura; are Ualare ve basileia la taiape. Are kaunsila karu, 51a—, are ereve fasōpe lea laua aea leipe mai ita la topiarai haikaeai kasirau. 52Are Pilato tai te Iesu ve maea la fareovai vei loki leipe. 53Lea mea are arero ovi fauka, puta kere sa fasi, aea tapu oti fave voa isōpe uta iri voa viopōpe, lea fave‐uta áre kofa, karu haria lea oti voa evera viopai kasirau 54Lei kekese lei ovava leita sare reha; Sabati sare ta haekao leipe.
55Soka Galilea kiripi Iesu ita fareho kotipe uamori ere Iosefa la aitetei, tapu oti aea areve maea la viopaita mai la ofae eavōpe. 56Eovi ere ata kerori, muramura muforoe aea maea roroaita muramura ita la ovi kekese leipe.
Soka Sabati sare voa ere haiorōpe, usoso Mose ve safu o feare.#Eso 20:10; Deut 5:14
Currently Selected:
Luka 23: TQO1983
Highlight
Share
Copy
Want to have your highlights saved across all your devices? Sign up or sign in
Published by the Bible Society of Papua New Guinea in 1983.
