Mataio 14

Heroda aea Ioane Bapatiso Vita

(Mareko 6:14–28; Luka 9:7–9)

1Lea soa voa Galilea ve harofave vita Heroda, Iesu ve fari la mapi, 2are areve sarufa karu la mō ōpe, Ioane bapatiso vita meha; are opi ata itei haihava leita siahu are voa lea vei la leipea.

3Ipi mea Heroda are Ioane la fasi dibura uvi voa sasaukōpe, ipi areve paua Filipi ve ua Herodiasa sa haikaeōpe, lea vei.#Luk 3:19–20 4Ipi Ioane sa arero mō ōpe lea o vei, A siahu kao safu hasiavi arero ovi laeai vei.#Levi 18:16; 20:21 5Heroda Ioane la paeai haikaeōpe, a—, are karu sitavu la tore leipe, ipi ereve haiiri Ioane are peroveta vita kofa eavia.

6Soka Heroda la epōpe sare forerōpe lea mea, Herodiasa ve mori ereve aru voa foreri e‐ei, Heroda la lei hailareva leipe. 7Lea vei are otoare kere ita mei, are loki leitita etau foromai arero miarai vei. 8Lou sa arero satiriōri, are mō ōpe, Ioane Bapatiso leita Vita ve harofave mereke voa vuapi, mōvoa faitora araro miaraia. 9King hai tu a’ haieae foromai leipe, a—, ipi areve otoare vei aeata ipi are ita farehoria larietau la’ aipepeiape lea karu vei, are o mei lea mori sa moipe etau la arero miarai vei. 10Soka are karu la itapi Ioane ve harofave la dibura uvi voa sarapi, 11ere areve harofave mereke voa vuapi oviti, mori la miōri, are arero areve lou tai ovi terōpe. 12Soka Ioane ve satiriaraita karu koti, areve maea la fareōvi taiovi te arero viopōpe. Aite ere kei Iesu la o moipe.

Iesu larietau karu 5,000 la miarōpe

(Mareko 6:30–44; Luka 9:10–17; Ioane 6:1–15)

13Soka Iesu lea o la mapi, are oroti voa forea, lea oti murufa kiripi oti meara voa ufōpe. A—, karu sitavu lea fari la mapōpe lea mea, ere karikara haroharo kiripi arero aitetei mora sa eakoōpe. 14Iesu miri voa forōpe soa, are karu sitavu rovaea la ofae eovi, erero maeaforoe lei, ereve eka karu la lei lareva leiape.

15Soka sare sōsi leipe soa satiriaraita karu arero tai koti mō ōpe, Mea oti merava aeata sare misoseai; karu sitavu la paraea itapaia, ere karikara karikara voa fafarapi ereve larietau itaea leiti vei. 16A—, Iesu erero mō ōpe, Ere levi teraia; e haria sa larietau erero miaraia. 17Ere arero mō ōpe, Mōvoa faloa korukoru five haria, aea ekaka ta orakoria. 18Lō mei, are mō ōpe, Lea etau araro tai mōvoa ovitiria. 19Aite are karu sitavu la omei ere kavuru voa ava puavai vei. Are lea faloa korukoru five aea ekaka orakoria ita la maravi, kauri voa misilei, larietau vei Ualare la maeati, are faloa korukoru la fofa fofa a’, aea satiriaraita karu la miōri, satiriaraita karu ere karu la aiorōpe reha. 20Ere foromai larietau la’ la’ ére popōpe. Ere larietau ve hohoi hohoi la maravi vovoisea vovoisea posea twelve soōpe. 21Lea larietau lalape karu ere heavita 5,000 feare, uamori aea atutemori ita ta reha.

Iesu ma ve arori voa mora sa meiape

(Mareko 6:45–52; Ioane 6:15–21)

22Aite are areve satiriaraita karu la haisa ere oroti voa forea, ere omopa ufai vei, are karu sitavu la itapai ao. 23Are karu sitavu la paraea itapi itapi roroka lei, are hariakao raepa voa Ualare la loki leiti vei pataipe. Mea aeōpe soa are hariakao lōvoa meiape. 24A—, oroti mai pisiri voa mea, aroaro sa toaiape ipi mea omopa voa itiape eavia. 25Soka mea ōpai soa feare voa are ma ve arori voa mora sa meamea erero tai forerōpe. 26Areve satiriaraita karu arero ma ve arori voa mora sa meiape la ofae eavōpe lea mea, ere tore lei, mō ōpe, Karisu reha! Aea ere tore lei maea fi rovaea ōpe. 27A—, are erero utohoa o mei mō ōpe, Ivara leitia, ara meha; tore levi leitia. 28Petero tava o arero mō ōpe, Papuvita e, a kofa oria, araro o mei, ara ta ma ve arori voa aro tai kavai vei. 29Are arero mō ōpe, Kotiria. Soka Petero oroti kiripi, ma voa fauka, ma ve arori voa mora sa mea Iesu tai kavōpe. 30A—, are mea la ofae eovi tore leipe. Are parurukai vei leipe lea mea, are i mō isa moipe, Papuvita e, araro lei makuri leitia! 31Iesu areve mai la utohoa sosoropi, arero mai sa tatavi mō ōpe, Sukaerereai seika vita e, a horahora leipeta ipi levea? 32Ereuka oroti voa foreōpe lea mea, mea sarapōpe. 33Soka oroti voa aipepeiape karu arero hiopi maeati mō ōpe, Okofa, a Ualare ve Atute.

Iesu Genesareta voa

(Mareko 6:53–56)

34Ere ma voa ufi roroka leipe lea mea, ere Genesareta ve miri voa susuri avōpe. 35Soka lea oti ve karu arero ofae eovi ore lei, ere eakoa toepōpe otioti foromai voa o itapi, eka karu foromai la arero tai lariōvi foreraiape. 36Ere arero loki leiape ere areve maea puta ve ipi peto fufusi la haria mai sa mōpai vei; aea arero mai sa mopaiape lea karu foromai ere ata lareva leiape reha.

Currently Selected:

Mataio 14: TQO1983

Highlight

Copy